Bamangaliswa Koko Bakubonayo

KWELI hlobo lidluleyo kwimimandla emininzi yaseMpuma Yurophu nakwiKazakhstan neSiberia ezikude, amaNgqina kaYehova abonwa ngeendlela ezingazange zibonwe ngaphambili. Abemi basekuhlaleni neendwendwe ezazize ezindibanweni kwezo ndawo bachukumiseka, ewe, bekwamangalisiwe, koko bakubonayo.

Ngokuphindaphindiweyo iindwendwe ezazize eZagreb zazixelelwa oku: “Besingaqondi ukuba niza kuza!” Inkoliso yabanye abakhenkethi yayiwarhoxisile amalungiselelo ayo okhenketho​—⁠kodwa amaNgqina kaYehova awazange awarhoxise. IThe Times yaseLondon yanikela le ngxelo ngendibano: “Enyanisweni, yindibano yokuqala elungiselelwe ngamaNgqina kaYehova kwilizwe elinemfazwe yamakhaya.”

Abona bantu babekhwankqiswe ngokukhethekileyo yayingabakwantsasana. Omnye waseZagreb wathi: “Ibiya kuba yinto entle ukubonisa iziko leendaba le nto yenzeka kweli bala lemidlalo, kanye apha, apho sibona amaSerbia, amaCroatia, amaSlovenia, amaMontenegrin nabanye behlelisene kunye ngoxolo.”

EBudapest elinye ipolisa lacelwa ukuba lichaze umahluko okhoyo phakathi kwamaNgqina abuthelene kwibala elikhulu lemidlalo nezihlwele eziqhele ukuza kumdlalo webhola. Lancuma, laphakamisa intloko, laza lathi: “Umahluko okhoyo unjengomahluko ophakathi kwezulu nomhlaba.”

“Utheth’ ukuthini?”

Laphendula lathi: “Kaloku, khawuphose nje iliso. Akukho mntu utshayayo, awuhambi udibana nje nenkunkuma, ibe aba bantu banesimilo. Benza oko ubacela ukuba bakwenze.”

EKiev, idolophu elikomkhulu laseUkraine, abantu abali-14 654 babebuthelene kwiBala Lezemidlalo iDynamo. Elinye iNgqina elalilapho labuza omnye wabaphathi bamapolisa enoba amapolisa aphantsi kwakhe kuye kwafuneka asebenze nzima kusini na ebudeni bendibano. “Hayi, kwisihlandlo esilandelayo siza kunithumelela amapolisa amabini kuphela.”

Wabuzwa oku, “Kutheni le nto eza kuba mabini?”

Eqhula waphendula esithi: “Xa elinye lilala, elinye liza kulinyamekela.”

Uluntu Ngokubanzi Lwamangaliswa

IPesti Hírlap, iphephandaba laseBudapest, yanikela le ngxelo: “Abantu abangaphezu kwama-40 000 bachithe le mpela-veki eNépstadion. Khange bashiye maphepha, imvuthuluka yesonka, okanye izijungqe zemidiza.” IFehérvár Hírlap, elinye iphephandaba laloo dolophu, yathi: “Abo bazibona sebebhadulela eNépstadion phakathi koJulayi 26 nowama-28 ngokuqinisekileyo bamangaliswa koko bakubonayo. . . . Babona umzekelo ongaqhelekanga wehambo yamaKristu nendlela aphila ngayo.”

Ngempela-veki kwagaleleka izandyondyo zemvula eBudapest; kwanetha imvula engaphezu kweemilimitha ezingama-50. Kodwa oko akuzange kuwathintele amaNgqina. Elinye ipolisa lavakala lisithi: “Kuyamangalisa! Kuyakhwankqisa! Ayathontelana ukungena . . . Akukho nto inokuwathintela.” NgoMvulo elinye iphephandaba lalinenqaku elithi “Umthandazo Emvuleni” laza kulo lacaphula iindwendwe ezize endibanweni: “Imvula iyasimanzisa nje kuphela, kodwa ayisikhukulisi!”

ELvov, apho abantu abali-17 531 babebuthelene kwiBala Elikhulu laseUkraine, igosa lamapolisa laxelela omnye wamaNgqina oku: “Kuso nasiphi na esinye isiganeko sikawonke wonke ekuze abantu abaninzi kangaka, bekungafuneka sibe namakhulu-khulu amapolisa. Kwindibano yenu besinamapolisa alishumi, ibe ebengafuneki nganto.”

Landula ke, libonisa indlela elichukunyiswe ngayo yindibano, eli gosa lathi: “Indlela enibafundisa ngayo abanye okulungileyo ibalasele, nithetha ngoThixo, kwaye anibandakanyeki kugonyamelo. Besixubusha ngesizathu sokuba sasidla ngokunitshutshisa, yaye siye sagqiba kwelokuba sasingazange siniphulaphule yaye sasingazi nto konke konke ngani.”

Emva kokuya kwindibano eyayiseUsolye-Sibirskoye, eSiberia, intatheli yephephandaba laseSoviet iLeninskiy Put’, yabhala: “Kwakumangalisa ukubona isimilo, nobuchule bokuqonda iintswelo zabanye nokusabela kuzo, obabubonakaliswa ngabakhonzi bakaYehova kwabo bakhonza nabo. Andisoze ndiwalibale amazwi awathethwa endibanweni: ‘Uze ungebi! Uze ungaxoki! Uze ungaseli [ngokugqithisileyo]! Sebenza ngenkuthalo! Nceda ummelwane wakho!’ Ngapha koko, le yimigaqo bonke abantu ngokubanzi abafanele bazabalazele ukuyifikelela. Kodwa sidla ngokuyilibala.

“Enye into eyandichukumisayo yayisisimo sengqondo sobuzalwana esasibonakaliswa kwabanye, ukuba nomdla wokunceda. Elinye ibhinqa lasinika iphephandaba ukuze singahlali kwisihlalo esinothuli. Xa imvula yaqalisa ukuna, ibhinqa eliselula elalihleli ecaleni kwam landiboleka isambrela salo lincumile, yaye indoda eyayikufuphi nathi yayithabatha ngokoqobo intwana eyayimanzi yaza yayisithelisa ngesambrela sayo. . . .

“Imeko-bume kanye yendibano yayimenza umntu azibone ebhetele ngandlel’ ithile, ephucuke ngakumbi, ehlonipheke ngakumbi. Kwakungenakwenzeka ukuba ungabobotheki luncumo ngenxa yobubele obabubonakaliswa ngabantu ongabaziyo. . . . Saphuma kwelo bala lemidlalo siziva sihlanjululwe, sinemvakalelo yokuba besidibene nento entle.”

Kwindibano eyayiseKiev, kwakuze abantu abangaphezu kwama-2 000 ababevela eMoscow nabanokuba ngama-4 500 ababevela eCaucasus. Kwavulwa iofisi yenkcazelo kwisikhululo seenqwelo-moya, yaye kwabekwa uncwadi lweBhayibhile phezu kwedesika. Abaninzi babuza imibuzo eyaphendulwa ngobubele. Ngenye ingokuhlwa indoda ethile yasondela yaza yathi: “Bendinibek’ esweni kangangexesha elide. Iyandimangalisa indlela enibonakalisa ngayo ububele xa nithetha nabantu ngoBukumkani. Ncedani namkele ezi ntyatyambo njengesipho esivela kum ngenxa yomsebenzi omhle eniwenzayo.”

Ebudeni bobhaptizo kwindibano eyayiseUsolye-Sibirskoye, unondaba othile wachukumiseka xa wabona iqela labantu baseRashiya lisangana yaye livuyisana nomntu owayesandul’ ukubhaptizwa wesizwe samaBuryat. Nangona ngokuqhelekileyo lungekho ucalu-calulo lobuhlanga eSiberia, asinto iqhelekileyo ukuba abantu baseRashiya babe ngabahlobo bokwenene naba bantu. Unondaba wabuza oku: “Yintoni enincedileyo ukoyisa le miqobo yobuhlanga?”

Waxelelwa oku: “Ngokusebenzisa umgaqo weBhayibhile othi ‘uze umthande ummelwane wakho njengoko uzithanda.’”

Ubuzalwana Bezizwe Ngezizwe

Eyona nto yayifudumez’ intliziyo kakhulu ngokukodwa kwiindibano ezintathu zezizwe ngezizwe yayibubudlelane bothando obabuphakathi kweendwendwe ezazivela kulo lonke ihlabathi. EBudapest kwakukho iindwendwe ezazivela kumazwe angama-35, inkoliso yazo zivela ePoland naseJamani, kodwa iqela labameli lalivela nakwezinye iindawo ezininzi, kuquka abanokuba ngama-500 ababevela eSoviet Union. EPrague kwakukho abathunywa ababevela kumazwe angama-39, kuquka abangaphezu kwama-26 000 ababevela eJamani, nabaphantse babe li-13 000 ababevela ePoland, abangaphezu kwama-900 ababevela eItali, abangama-570 ababevela eNetherlands, ama-746 awayevela eSweden nama-743 awayevela eJapan. EZagreb kwakukho iindwendwe ezazivela kumazwe ali-15, phezu kwaso nje isisongelo semfazwe yamakhaya.

Kwindibano nganye yezizwe ngezizwe, kwakumiswe amaqonga amathathu ebaleni ejongene namacandelo awahlukahlukeneyo ebala. Kula maqonga ucwangciso lwalunikelwa lonke ngaxeshanye ngeelwimi ezintathu. EBudapest lwalunikelwa ngesiHungary, ngesiPolish nangesiJamani; ePrague lwalunikelwa ngesiCzech nangesiSlovak, ngesiPolish nangesiJamani; kwaye eZagreb, lwalunikelwa ngesiCroatia nangesiSerbia, ngesiSlovenia nangesiTaliyane. Ebudeni bomdlalo weBhayibhile ofundisayo, owawusekelwe kumava kaEzra wamandulo namaqabane akhe, iindwendwe ezithetha iilwimi ezahlukahlukeneyo zakwazi ukuwubukela kulo naliphi elinye lamacandelo amathathu ezazizikhethele ukuhlala kulo.

Inkoliso yeentetho eziziintloko kwezi ndibano yayinikelwa ngaxeshanye ngesiNgesi ngamalungu awahlukahlukeneyo eQumrhu Elilawulayo lamaNgqina kaYehova. Ilungu ngalinye lathetha kulo ngalinye laloo maqonga mathathu. Kambe ke, ezi ntetho zazitolikwa ukuze kungenelwe abo bantu bathetha ezo lwimi zintathu, ibe eBudapest nasePrague, zazitolikelwa nakwezinye iilwimi ezininzi.

Abaguquleli abahlukahlukeneyo ababetolikela la macandelo eelwimi babemi ebaleni kanye ngaphambi kweqela elithetha olo lwimi. Izandisi-lizwi zazijoliswe kwiqela elithetha olo lwimi ngokukhethekileyo ukuze kube lula ukuba ubani eve ulwimi lwakhe ngaphandle kokuphazanyiswa ngokungeyomfuneko ziinguqulelo zezinye iilwimi ezinikelwa kwamanye amacandelo. Ngokomzekelo, eBudapest, iintetho ezazinikelwa ngamalungu eQumrhu Elilawulayo zazitolikelwa kwisiDatshi, kwisiFinnish, kwisiFrentshi, kwisiGrike, kwisiJapan, kwisiNorwegian, kwiSpanish, kwisiSwedish nesiTaliyane, ukongezelela kwiilwimi eziyintloko zesiHungary, isiPolish nesiJamani.

Kwindibano nganye yezizwe ngezizwe, intetho eshukumisayo yokuqukumbela yayinikelwa ngamalungu amathathu eQumrhu Elilawulayo. Ayejamelene nocelo-mngeni lokugqiba phantse ngaxeshanye kangangoko kunokwenzeka. Emva koko, abantu beentlanga ezininzi bamanyana ngazwi-linye ekuculeni, yaye ekugqibeleni iintliziyo zamanyaniswa ngomthandazo ochukumisayo kubulelwa uYehova uThixo ngokusikelela kwakhe ezi ndibano ukuze ziphumelele.

Emva kokuba kuthiwe “Amen!” ekuqukunjelweni kocwangciso, akukho mntu wayefuna ukuhamba. Amawaka-waka abantu ayentywizisa. Ngaphesheya kwamabala amakhulu, iitshefu, izikhafu nezambrela zaziwangawangiswa, abantu besithi ndlela-ntle kubahlobo babo abathandekayo ababelondoloze ingqibelelo kuThixo phezu kwayo nje iminyaka emininzi yokuvalwa umlomo nokuvalelwa ezintolongweni. EPrague abahlobo abaninzi bahlala ithuba elingaphezu kweyure, becula yaye benandipha ukuba kunye.

Le mpumelelo imangalisayo yezi ndibano ayizange ibekho ngamabona-ndenzile. AmaNgqina kaYehova achitha ngokoqobo amakhulu amawaka eeyure engalungiseleli nje kuphela ukubakho kodwa ekwanyamekela neenkcukacha ngeenkcukacha eziyimfuneko ukuze ezi ndibano ziphumelele.

Ukulungisa Iindawo Ukuze Zifaneleke

IBala Lemidlalo elikhulu iStrahov ePrague, elalingazange likhe lisetyenziselwe indibano enkulu kangangeminyaka, kwafuneka lilungiswe kanobom. Zazinokuba ngama-55 000 kuphela izihlalo ezinokusetyenziswa, phantse zinganelanga ukuba kungahlaliswa inani labantu ekwakulindeleke ukuba beze kweyona ndibano inkulu kwelo hlobo eMpuma Yurophu. Ngoko kwafunyanwa umatshini wokuchwela owonakeleyo, walungiswa, waza wasetyenziselwa ukufakela izihlalo ezifikelela ngaphezu kweekhilomitha ezili-18 zokuhlalisa abantu abangakumbi abathelekelelwa kuma-30 000.

Kakade ke, ukwenza izihlalo nokuzifakela kwakuyinxalenye nje yomsebenzi. Kwakufuneka kwenziwe umsebenzi wokupeyinta, owokucoca, owokususa ukhula nowokulungisa nje izinto-yinto ezahlukahlukeneyo. Ekugqibeleni, ibala lalihonjiswe ngeembiza ezingama-8 300 zineentyatyambo ezingama-33 200 nemithi eli-1 357 enemibhumbulu. Maxa wambi kwakusiza abasebenzi abaliwaka. Lilonke amatsha-ntliziyo avela kumabandla angama-260 amaNgqina kaYehova achitha iiyure ezingaphezu kwama-66 000.

Kwenziwa umsebenzi ofanayo ukuze kulungiswe amabala emidlalo eBudapest, eZagreb nakwezinye izixeko. Amatsha-ntliziyo anokuba ngama-4 000 achitha iiyure ezingaphezu kwama-40 000 esebenza kumabala endibano eLvov. Ukusebenza kwawo kwagqalwa njengentlawulo yokuqesha loo mabala. Zonke izihlalo ebaleni zalungiswa zaza zapeyintwa, ibe zonke izindlu zangasese zacocwa zaza zalungiswa. Kwakhona, kwakhiwa ngezitena isakhiwo esibude buziimitha ezingamashumi amathathu anesithathu esasinezindlu zangasese ezongezelelekileyo. Ngokufanayo, kwiBala Lemidlalo iKhimik eUsolye-Sibirskoye, kwakhiwa izindlu zangasese ezongezelelekileyo ezingama-52 ukuze zisetyenziswe ebudeni bendibano.

Unonjineli omkhulu kwibala lemidlalo eliseLvov wathi: “Kudala ndisidl’ amazimba, kodwa andizange ndibabone abantu abangaqhelekanga ngolu hlobo. Nisebenza ngokungathi nizalwa ngumntu omnye. Andiyiqondi mpela le nto, kodwa kumnandi gqitha ukusebenza nani.” Amagosa aphetheyo elo bala alungiselela amazwi ombulelo nawathi ngawo awabulela amaNgqina “ngokuzinikela kwawo kumsebenzi awayewenza nangeempawu ezintle nenkathalo ayibonakalisayo.” Ekuqukumbeleni loo mazwi athi: “Sininqwenelela impumelelo kwindibano yenu eseLvov.”

EKiev umgangatho wegumbi ekwakuza kufumaneka kulo ukudla wawufanele ulungiswe. Ngeentsuku nje ezimbini umsebenzi wawugqityiwe. Abantu ababini abanyamekela elo bala beza kuzibonela lo “mmangaliso,” omnye esithi komnye: “Ngeentsuku nje ezimbini benze umsebenzi abantu bethu abawugqiba emva kwesiqingatha sonyaka.” Umongameli wequmrhu lemidlalo yasemanzini waxelela umveleli wendibano oku: “Niliguqule ngokupheleleyo eli bala ngokokude singaliqondi ukuba lilo ngenene.”

Abantu abasebenza kwibala eliseKiev babhala bevakalisa uxabiso: “Sichukumiseke ezintliziyweni yindlela ecwangciswe ngayo indibano yamaNgqina kaYehova. . . . Njengoko imilanjana idibana ize yenze umsinga oqukuqelayo, ngoko namaNgqina kaYehova aselula nakhulileyo anjengomfula ukuqukuqela esinge kumsitho wawo. Into enje ifanele inconywe. Siyaqala ukuyibona le nto. Siyanibulela ngoko nisifundise kona ngomzekelo wenu.”

Ukunyamekela Iindwendwe

Omnye weyona misebenzi mikhulu yayikukulungiselela iindawo zokuhlalisa amawaka-waka eendwendwe. AmaNgqina asekuhlaleni awavula amakhaya awo ukuze kuhlaliswe iindwendwe. Kwindibano eyayisePrague, amaNgqina aseCzechoslovakia ahlalisa iindwendwe ezingama-6 280 ezazivela ePoland kumakhaya awo. EBudapest, iindwendwe ezingama-2 203 zazihlala kumakhaya abantu. Kwaye amaNgqina angama-278 aseKiev ahlalisa iindwendwe ezinokuba ngama-750 ukusa kwezingama-800.

Ukongezelela koko, izikolo neeholo zemithambo ezininzi eBudapest nasePrague zasetyenziswa njengeendawo zokuhlala. EBudapest kwasetyenziswa izikolo ezingaphezu kwama-40 ukuhlalisa abantu abangama-7 930. EPrague, abantu abangama-12 530 balaliswa ezikolweni nakwiiholo zokwenza umthambo. Kwafunyanwa amawaka-waka eematrasi ezimpontshelwa umoya zaza zasetyenziselwa ukulala kwezi ndawo. Abangaphezu kwama-​29 000 ababeze kwindibano eyayisePrague babehlala kumagumbi okulala abafundi neehostele zolutsha, ibe amawakawaka angakumbi ayehlala kwiihotele eziqhelekileyo.

Kwezinye iindibano, kwakwenziwe amalungiselelo okuba iindwendwe zilale koololiwe ezazize ngabo. EKiev amaNgqina amalunga namawaka amabini awayevela eZakarpatskaya Oblast ayelala kumakhareji kaloliwe. Namanye awayevela eCaucasus eze eKiev enza into efanayo. Ngokukwanjalo namaNgqina aseLithuania awayeze kwindibano eyayiseTallinn, e-Estonia, alala koololiwe awayeze ngabo.

Nasemva kokufika kwazo, iindwendwe zazinyanyekelwa ngeendlela ezininzi ngabantu abanolwazelelelo ezazifikele kubo. Ngokomzekelo, ePrague kwenziwa amalungiselelo okuba kubekho ooduladula abangama-40 bokuncedisa kwindlela ngokuqhelekileyo ekuhamba kuyo uduladula omnye kuphela. Ukongezelela koko, ngenxa yokuba kwakuhlawulwe kwangaphambili, iindwendwe zakwazi ukuhamba simahla kwizithuthi zikawonke wonke ukuya endibanweni kusasa nokubuyela emakhaya ngokuhlwa ngokusuka nje zivelise iibheji zazo zendibano. ESoviet Union, ooduladula abali-11 ababesiya kwindibano eyayiseUsolye-Sibirskoye besuka kwiAngarsk ekufuphi baphelekwa ngobubele ziinqwelo-mafutha ezimbini zamagosa endlela, enye ingaphambili enye ingemva!

Ukwenza Imigudu Yokubakho

Ezona ndwendwe zahamba imigama emide ngeendleko zazo zezo zazisiya kwiindibano ezithile eSoviet. Zimbi zonga imali yonyaka wonke ukuze zihlawulele uhambo lwazo. Iindwendwe zafika zivela kwichweba laseVladivostok ekuLwandlekazi lwePasifiki, zihamba umgama ongaphezu kweekhilomitha ezingama-3 200 ukuya eUsolye-Sibirskoye. Ezinye iindwendwe ezilishumi elinesibini zazivela kwisiqithi saseSakhalin kuLwandlekazi lwePasifiki kumntla weJapan. Omnye wazo yayingoselula oneminyaka engama-20 ubudala owayehamba nabanye abaselula abathathu aqhuba nabo izifundo zeBhayibhile.

Umqhubi kaduladula eSayanogorsk, owayenenjongo yokubhaptizwa eUsolye, wampheka emophula umqeshi wakhe ecela iintsuku ezimbalwa zokungabikho emsebenzini ukuze aye endibanweni, kodwa umphathi wakhe wayengazimiselanga ukumkhulula ahambe. Ngoko le ndoda yahamba yaya kwidolophu yaseAbakan yaza yafumana umbhalo woxwebhu lwaseSoviet olwalushicilelwe ngoMatshi 27 nolwalugunyazisa ngokusemthethweni ukwamkelwa kwamaNgqina kaYehova njengentlangano yonqulo. Nangoku sebona olu xwebhu, umphathi wayo akazange avume ukuyinika imvume yokuhamba. Kwangethuba ngosuku eyayimele induluke ngalo, emva komthandazo onyanisekileyo, le ndoda yabongoza kwakhona ibe ekugqibeleni yayifumana imvume yokuhamba.

Ubhaptizo Neempapasho Ezintsha

Imbalasane evuyisayo yazo zonke ezi ndibano zaziqhutywa eMpuma Yurophu yayilubhaptizo. Ngesenzo esifuziselayo sokuntywiliselwa emanzini, abantu abali-18 293 ababeze kwezi ndibano babonakalisa phambi kwamangqina amaninzi ukuba babezinikela ngokungagogotye lutho ukuba bakhonze uYehova uThixo. Omnye oselula owayebhaptizwa ePrague, owayesandula ukuthenjiswa umsebenzi ohlawula kakuhle, wathi: “Ndavakalelwa kukuba ndandifanele ndikhethe phakathi kothixo ongubathathu emnye onedola yaseUnited States, imark yaseJamani nesheleni yaseOstriya kwelinye icala noYehova kwelinye icala. Ndakhetha uYehova ndaza andawamkela loo msebenzi.”

Ubhaptizo eTallinn lwaluqhutyelwa kwiqula elingaphandle kufuphi noLwandle iBaltic apho kufuphi wawunokubona inqaba endala ngaphambili eyayisetyenziswa njengentolongo. AmaNgqina amaninzi ase-Estonia ayegcinwa apha ngaphambi kokuthunyelwa kwiinkampu zentolongo eRashiya ekuqaleni kweminyaka yee-1950. Olunjani lona uchulumanco olwabakhoyo, ngokukodwa kwabo bakhulileyo, ukubona amakholwa amatsha angama-447 efuzisela uzahlulelo lwawo kuYehova ngembonakaliso yasekuhleni!

Enye imbalasane echwayitisayo yeendibano yayikukukhutshwa kweempapasho ezintsha. Abahlobo baseLithuania ababeseTallinn baxhuma ngokoqobo ezihlalweni zabo baza balila xa babexelelwa ukuba incwadana enemifanekiso ethi “Uyabona, Izinto Zonke Ndizenza Ntsha” ngoku yayifumaneka ngolwimi lwabo. Ngokufanayo, imbalasane yeendibano ezaziseRomania yayikukukhutshwa kwencwadi ethi ISityhilelo​—⁠Incopho Yaso Ezukileyo Isondele! ngesiRomania, ukanti kubantu abathetha isiCzech nabathetha isiSlovak ababesePrague, yayikukufumana iNew World Translation of the Holy Scriptures ngeelwimi zabo.

Noko ke, kwinkoliso yeendibano, eyona mpapasho yabavuyisa kanobom abantu yayiyincwadi entsha ethi Oyena Mntu Ubalaseleyo Wakha Waphila. Sele kushicilelwe imibhalo ezizigidi ezilishumi ngeelwimi ezingama-⁠59.

Ukuyisebenzisa Kakuhle Inkululeko

Namhlanje, uncwadi lweBhayibhile lwamkelekile eMpuma Yurophu, kuquka naseSoviet Union. Iilori ezithwele IMboniselo noVukani! ziphuma kwisakhiwo esikhulu sokushicilela samaNgqina kaYehova esiseSelters/Taunus, eJamani, zize ziwele umda zisinge kumazwe aseMpuma Yurophu. Hayi indlela okwahluke ngayo oku kumaxesha axa kwakufuneka amaNgqina angenise uncwadi ngondlela mnyama kula mazwe, ezichanaba kwingozi yokuvalelwa entolongweni!

Okubonisa oku kuguquka kumangalisayo kwezinto yile ncoko ilandelayo eyayiphakathi kwegosa elinyamekela imicimbi yokungeniswa nokuthunyelwa kwezinto zamanye amazwe nomnye wamaNgqina kaYehova xa kwakusondela indibano eyayiseTallinn:

“Uphethe ntoni ngaloo bhokisana?”

“Ndipheth’ amaphephancwadi.”

“Ngamaphephancwadi antoni lawo? Ngaba ngakaThixo?”

“Ewe, ngawo.”

“Ngamaphephancwadi kaYehova uThixo?”

“Ewe!”

“Jaa’a, kulungile ke. Ungahamba.”

Emva kwendibano yaseBudapest, uArpad Goncz, umongameli waseHungary, wamema iNgqina elalivalelwe kwisisele esinye naye ebudeni bolawulo olucinezelayo lwamaKomanisi ukuba limtyelele. UMnu. Goncz wachitha iyure ehleli nalo waza emva koko walicela ukuba lidlulise iminqweno yakhe emihle kumaNgqina kaYehova. Abathandi benkululeko kaThixo kuzo zonke iindawo banombulelo ongazenzisiyo kuba amagosa aphetheyo ngoku, njengoMnu. Goncz, eyivumela inkululeko yonqulo eMpuma Yurophu.

Ibonisa ukuba abantu bakaYehova bayisebenzisa kakuhle inkululeko yabo, iThe New York Times kaSeptemba walo nyaka yachaza okwakusenzeka eSt. Petersburg (ngaphambili eyayiyiLeningrad), isithi: “Umculo opholileyo wengoma kaGershwin ethi ‘Summertime’ utsho kakuhle ngaphesheya koMlambo iNeva . . . Lo mculo uvakala ezindlebeni zabantu abagcakamele ilanga, zabantwana abancinane besukela izinja, zabathengisi bethengisa iimaphu zeSt. Petersburg endala namaNgqina kaYehova efuna abantu anokubaguqula.”

Ewe, amaNgqina ayisebenzisa ngenzondelelo inkululeko yawo eshumayela iindaba ezilungileyo! Ngaba ungathanda ukwazi okungakumbi ngesigidimi sawo? Iphephandaba laseSoviet iVostochno-Sibirskaya Pravda lacacisa: “Inkcazelo eneenkcukacha ngokuphathelele umsebenzi wawo inokufunyanwa kwiindawo ekunikelwa kuzo imfundo yeBhayibhile ngamaNgqina kaYehova kuso nasiphi na isixeko.” Enoba uhlala phi na ehlabathini, mus’ ukuphozisa amaseko ekwenzeni uphando.

[Isicangca esikwiphepha 13]

CHART IINDIBANO EZAZISEMPUMA YUROPHU NASESOVIET UNION

ECzechoslovakia (ePrague) 74 587 2 337

EHungary (eBudapest) 40 601 1 134

EPoland (izixeko ezili-12) 131 554 4 250

ERomania (izixeko ezisi-8) 34 808 2 260

ESoviet Union (izixeko ezisi-7) 74 252 7 820

EYugoslavia (eZagreb) 14 684 492

Inani lilonke leendibano

ezingama-30: 370 486 18 293

[Pictures on page 20, 21]

Ngasekunene: Ukutolikwa kweentetho ukuze kungenelwe abantu abathetha iilwimi ezahlukahlukeneyo ePrague

Ngezantsi: IBala Lemidlalo iStrahov ePrague lizaliswe ziindwendwe ezingaphezu kwama-74 000

[Imifanekiso ekwiphepha 22]

Ngasentla: Indibano eTallinn, e-Estonia

Endibanweni eBudapest, apho, kunetha okanye kunganethi, iindwendwe ezingama-40 000 zazinandipha ucwangciso

[Imifanekiso ekwiphepha 27]

Ngasentla: Ezinye zezindlu zangasese ezakhiwayo ukuze zisetyenziswe kwindibano eyayiseUsolye-​Sibirskoye, eSiberia

Ukupeyinta ibala lemidlalo nokufakela izihlalo ezongezelelekileyo ePrague

[Imifanekiso ekwiphepha 28]

Umdlalo weBhayibhile nobhaptizo eZagreb

[Umfanekiso okwiphepha 29]

Phezulu: Ukunikezelwa kweHolo yoBukumkani yokuqala eyakhiwe ngamaNgqina eHungary ngoJuni 1991

Phakathi: Abangaphezu kwama-20 000 babelala ezikolweni nakwiiholo zokwenza umthambo eBudapest nasePrague

Ngezantsi: Ukusasazwa kwencwadi ethi “Oyena Mntu Ubalaseleyo Wakha Waphila” eUsolye-Sibirskoye, eSiberia