Yayizizihlandlo Zovuyo EMpuma Yurophu
KWELI hlobo lidluleyo amashumi amawaka abantu athontelana kwizixeko ezikhulu eMpuma Yurophu. Kwizitrato zesixeko esihle saseBudapest, esasePrague, esaseZagreb nezezinye izixeko ezingaphezu kwama-20 kwakunyakazela abantu ababefake iibheji ezitsho ngombala oluhlaza nomhlophe. Ezi bheji zazibenza baphawuleke njengabathandi benkululeko kaThixo ababeze kwiindibano zamaNgqina kaYehova.
Okwesihlandlo sokuqala embalini, iindibano zaqhutywa ngokukhululekileyo kwiiriphabliki zaseSoviet Union eziseYurophu, kwanakwiSiberia ekude nakwiriphabliki yaseKazakhstan eseAsia nephantsi kweSoviet. Bebonke, abantu abangaphezu kwama-370 000 ababeze ezindibanweni banandipha ubudlelane obuhle eCzechoslovakia, eHungary, eYugoslavia, ePoland, eRomania naseSoviet Union.
Kumntu owayengekho apho, kusenokuba nzima ukuluthelekelela uvuyo olwalukho xa abangama-74 252 babuthelana eSoviet Union ukuze banqule uYehova uThixo ekuhleni nangaphandle koloyiko. Kanti, uvuyo lwabo olwalucace nakuthathatha lwalungalodluli nganto uvuyo lwabantu abangama-74 587 ababesePrague nabangama-40 601 ababeseBudapest ababehlanganisene kwawona mabala emidlalo makhulu eCzechoslovakia naseHungary, okanye olwabantu abali-14 684 ababebuthelene eZagreb, eYugoslavia.
Into ebangela ukuba oku kube ngundaba-mlonyeni kukuba kwiminyaka nje embalwa ngaphambilana, amaNgqina kaYehova ayevalwe umlomo kwinkoliso yamazwe aseMpuma Yurophu. Ebudeni beMfazwe Yomlomo ayengakwazi ukunxibelelana namazwe aseNtshona. Kwanokuhlanganisana nje engamaqela amancinane ukuze anqule uThixo kwakungamkelekanga ngokomthetho. Akumangalisi ke ukuba kubekho uvuyo olunjalo xa athi akwazi ukuhlanganisana ngokukhululekileyo kwiindibano ezinkulu!
INgqina elineminyaka engama-59 ubudala laseCzechoslovakia, elalichithe iinyanga ezisibhozo kwiminyaka enokuba ngama-40 eyadlulayo livalelwe lodwa ngenxa yokukholelwa kwalo kuThixo, lathi: “Abaninzi bethu ababehlala ePrague liphupha ababenalo indibano enkulu eya kuze iqhutyelwe kweli bala, kodwa asizange siyicinge nokuyicinga into yokuba oku kwakungenzeka ngendlela emangalisa ngolu hlobo.”
Kwisithuba seeveki ezimbini ngaphambi kwendibano yasePrague, ngomhla we-9 kuse kowe-11 kuAgasti, iphephandaba leso sixeko, iVečerník Praha, lathi: “Emangalelwa ngokuzama ukubhukuqa umbuso ngobuqhetseba nangokuphazamisa inkqubo yobukomanisi, amaNgqina kaYehova ayephoswa kwiintolongo zamaKomanisi kangangeminyaka emininzi.” Emva kokuchaza ukuba eso sixeko kungekudala sasiza kuba neendwendwe ezingamashumi amawaka ezingamaNgqina, elo nqaku laqukumbela ngokuthi: “Akunakufane kwenzeke ukuba udibane nabantu abaninzi abanobubele nabancume ngolu hlobo apha ePrague nangaliphi na elinye ixesha ngaphandle kwempela-veki yesibini kuAgasti.”
Noko ke, usenokubuza oku: ‘Ngaba amaNgqina kaYehova ayetshutshiswa ngokusesikweni ngaphambili? Ngaba akhe asisisongelo kubalawuli bezobupolitika kumazwe awayehlala kuwo? Zazivela phi ezi ndwendwe zingamakhulu amawaka ezazize kwindibano zaseMpuma Yurophu? Ekubeni ayevalwe umlomo yaye engenako ukunxibelelana ngokukhululekileyo namazwe aseNtshona kangangeminyaka engama-40 okanye ngaphezulu, kwenzeka njani ukuba ande aze abe maninzi kangaka?’