Kubalulekile Ukuqalisa Kuselithuba

ABANTWANA abaselula banelungelo lokufumana inkcazelo esengqiqweni neneenkcukacha ngendlela imizimba yabo esebenza ngayo neyokuzikhusela kubantu abaziphethe kakubi. Kodwa loo mfundo ifanele iqale nini? Kuselithuba gqitha kunokuba abaninzi becinga.

Ukufikisa ebuntwini obukhulu kuqala ngethuba lokukhahlela, kubudala apho kubonakala khona iimpawu zokukhula ngokupheleleyo ngokwesini. Intombazana inokuqalisa ukuhlamba xa ineminyaka eli-10 ubudala okanye kwanangaphambi koko nokuba kukubudala beminyaka eli-16 okanye ngaphezulu. Inkwenkwe inokuqalisa ukutyekeza amadlozi ebusuku isencinane kangangeminyaka eli-11 okanye eli-12. Ngaba abantwana bakho baya kulungiselelwa ngaphambi kwelo xesha, masithi bekubudala beminyaka esithoba?a Kwakhona ngaba baya kukwazi besekuloo minyaka yobuntwana ukubaluleka kokulondoloza ubunyulu babo?

Baqhelanise Neenguqulelo Zomzimba

Intombi yakho inelungelo lokwazi iinguqulelo ezabangelwa nguThixo eziya kwenzeka emzimbeni wayo. Umama usenokukhankanya amathuba okuba sexesheni kwakhe aze ayibonise uhlobo lwezinto azisebenzisayo ukuzikhusela. Ufanele ayichazele ukuba ezi nguqulelo ziziinkqubo eziqhelekileyo zomzimba. Ngendlela engqalileyo, umama unokuyichazela intombi yakhe ukuba umzimba wayo uya kulungiselela elo xesha, kwiminyaka ukususela ngoku, xa inokutshata ize nayo ibe ngumama. Umama unokuyichazela intombi yakhe ukuba umzimba ulungiselela usana olusesibelekweni icwecwe elithambileyo nelitofotofo elinemithambo yegazi emininzi. Xa usana lungakhawulwa, elo cwecwe lukhutshelwe ngaphandle ngomjelo oya esizalweni, yaye le nkqubo ibizwa ngokuba kukuhlamba.

Ngokufanayo, unyana wakho ufanele azi kwangaphambili ngokutyekeza kwakhe amadlozi kwasebusuku. (Duteronomi 23:​10, 11) Ufanele aqonde ukuba ukutyekezwa kolwelo olunqumbululu, ngamaxesha athile xa ephupha, kuyindlela nje yomzimba yokuphungula incindi yamadlozi emzimbeni. Oonyana neentombi zakho bafanele bazi ukuba akukho nto iphosakeleyo ngezi nguqulelo zisemizimbeni yabo. Imizimba yabo ilungiselelwa nje ikamva xa besenokutshata baze babe ngabazali.b

Njengabazali, nifanele niyithabathe nzulu le mibandela, kuba iyimibandela yobuthixo. Yaye ningabafundisi-ntsapho abamiselwe nguThixo.

Luyintoni Uqheliselo Lwesini Olukhuselekileyo?

Njengoko iminyaka iqengqeleka nabantwana benu bengenelela iminyaka yabo yeshumi elivisayo, nifanele niqiniseke ukuba bayazi ukuba iintlobano zesini phakathi kwabantu abangatshatanga ziyingozi, kungakhathaliseki oko baya kukuva okuchasene noko. Izifo ezidluliselwa ngesini, kuquka uGawulayo, ziye zaba ngubhubhani wazwenibanzi. Izifo ezinjalo zinokubangela ubudlolo, ukuzalwa kwabantwana abaneziphene, umhlaza kwanokufa. Ngaphezu koko, zinokudluliselwa ngabantu abangazi nokwazi ukuba banesifo.

Abantwana benu bafanele baqonde ukuba ayikho indlela yokunqanda ukukhawula eye yangqineka isebenza ngokupheleleyo enoba kusekuthinteleni ukukhulelwa okanye kusekunqandeni ukudluliselwa kwesifo. Enyanisweni, abasebatsha abalinani elikhulu ngokumangalisayo abasebenzisa iindlela ezahlukahlukeneyo zokunqanda ukukhawula bayakhulelwa. Yaye nakubeni iicondom zibhengezwa ngokubanzi njengezikhuselayo ekufumaneni uGawulayo kwiqabane lesini elinesi sifo, iThe New England Journal of Medicine yanikela ingxelo yokuba iicondom ziyasilela ukuthintela ukudluliswa kwentsholongwane kaGawulayo ngokufuthi kangangezihlandlo ezili-17 ekhulwini.

Ngaloo ndlela, umbhali wemihlathi kwiNew York Post uRay Kerrison waliphikisa ibango lokuba iicondom ‘ziyinciphisa ibe ncinane gqitha ingozi yokufumana uGawulayo’ ngokubhala athi: “Ubuncinane obuphawulekayo. Kaloku ukuba ufaka imbumbulu empwini, uze ujikelezise icandelo elihlala iimbumbulu uze udlale umdlalo waseRashiya ekuthiwa yiroulette wokudubula ujoliswe kuwe entloko, unethuba elinye kwamathandathu okuzibulala ngokwakho. Ngecondom, phantse ube unethuba elinye kwamahlanu lokufumana uGawulayo. Ngoku ubuxoki bokuba iicondom zikhusela ubani ekufumaneni uGawulayo siyakwazi ukubunika igama labo lokwenene. Ngumdlalo weroulette yesini.”

Abantwana bakho bafanele bazi ukuba silula isicombululo kwingxaki yezifo ezidluliselwa ngesini. Sikukwamkela ilungiselelo likaThixo ngokusebenzisa isipho sikaThixo sokuvelisa abantwana. Eneneni, ukusetyenziswa okukhuselekileyo kwamalungu akho esini kusemtshatweni, ngokusengqiqweni kumanyano lobomi bakho bonke nomntu omnye omthandayo naye ongazange abe nalo elinye iqabane lesini.

Imiyalelo KaThixo Iyakhusela

IBhayibhile ithi: “Indoda . . . [imele, NW] inamathele kumkayo.” “Uze ungakrexezi.” ‘Ke umbulo, mawungakhe ukhankanywe phakathi kwenu.’ “Umenzi wombulo . . . akanalifa ebukumkanini bukaKristu noThixo.”​—⁠Genesis 2:24; Mateyu 5:27; Efese 5:​3, 5.

Le miyalelo ayicinezeli. Kunoko, ukuyilandela kuya kukhokelela ekubeni nentsapho eyonwabileyo nesondeleleneyo. Umntwana ongekazalwa uya kufumana into anelungelo layo​—⁠abazali ababini, umama notata. Ngamnye wabo uneempawu ezahlukileyo, yaye ngamnye unokufak’ isandla kubomi bomntwana ngezinto omnye angenazo.

Njengabazali, ngemfundiso nangomzekelo wenu, nifanele niyibethelele ngokunzulu imigaqo esekelwe eBhayibhileni entliziyweni nasengqondweni yomntwana wenu. Nifanele nakhe ngezinto zokwakha ezomeleleyo​—⁠ezingatshiyo. Kunjengoko iBhayibhile isithi: “Umsebenzi walowo nalowo wobonakaliswa; kuba loo mini iya kuwazisa, ngokuba iya kuvela inomlilo; nomsebenzi walowo nalowo, umlilo uya kuwucikida ubunjani bawo.” Ukuba wakha ngezinto ezomeleleyo uze nomsebenzi wakho uhlale uhleli, uya kuvuzwa ngokutyebileyo.​—⁠1 Korinte 3:⁠13.

Kodwa kusasele umbuzo obalulekileyo: Unokulomeleza njani olu qeqesho njengoko abantwana bakho bethubeleza kwiminyaka yabo yeshumi elivisayo yaye besiya kubuntu obukhulu?

[Imibhalo esemazantsi]

[Umfanekiso okwiphepha 8]

Kubalulekile ukumenza umntwana wakho azilungele iinguqulelo zomzimba