Iphulo Lokufuna Injongo

UKUSUSELA kwixesha lokuphila kukaCharles Darwin, izazi ngebhayoloji bezithetha zophele zisithi makwamkelwe ingcamango yokuba ngokusisiseko ubomi, ngenxa yokuba babakho ngendaleko, abunanjongo. Noko ke, ngokuzenzekelayo abaninzi abakuvumi oku. Bekunganzima ngesibini esiselula esitshatileyo, xa sikhangela usana lwaso oluhle nolusandul’ ukuzalwa, ukukholelwa kwelokuba obu bomi butsha abunanjongo. Kuso, ngummangaliso, ummangaliso owenza ukuba ubomi bube nentsingiselo yaye banelise.

Nezazinzulu ezithile azivumi ukuba ubomi babakho ngengozi yaye abunantsingiselo. Kutheni zingavumi nje? Kungenxa yoko iThe Encyclopedia Americana ikubiza ngokuba “linqanaba eliphawulekayo lokuntsonkotha nelokulungelelana kwizidalwa eziphilayo.” IAmericana ihlabela mgama isithi: “Ukuhlolisisa ngenyameko iintyatyambo, izinambuzane okanye izilwanyana ezanyisayo kubonisa ukulungelelaniswa kwamalungu phantse ngocoselelo olungakholelekiyo.”

Xa kuqwalaselwa ukuntsonkotha nokulungelelana okuhle ngolo hlobo​—⁠okubonwa nakwesona sidalwa sincinane esiphilayo⁠—​iCape Times yacaphula amazwi esazinzulu saseMzantsi Afrika uGqr. Louw Alberts ngokuthi: “Ndifumana ulwaneliseko olusengqiqweni ngakumbi ekwamkeleni ukuba kukho uThixo kunokusuka nje ndamkele into yokuba [ubomi] bavela ngamabona-ndenzile.” Sithetha ngokuyilwa kwemichiza yezinto eziphilayo, isazi ngeenkwenkwezi saseBritani uMhlekazi Bernard Lovell sabhala: “Ithuba lokuba kungenzeka . . . ngamabona-ndenzile ukuba kubekho okuthile okukhokelela ekuyilekeni kwenye yezona molekyuli zincinane zeeproteni lincinane ngokungenakuthelekelelwa. . . . Ngokwenene alikho.”

Ngengqiqo efanayo, isazi ngeenkwenkwezi uFred Hoyle sabhala: “Inzululwazi yezinto eziphilayo nesekelwe kwisithethe xa iyonke isathi ubomi basuka bazivelela. Kodwa njengoko izazi ngamachiza ezinto eziphilayo zifumanisa okuninzi ngakumbi ngokuntsonkotha okoyikekayo kobomi, licacile elokuba amathuba okuba ubomi bazivelela ngengozi mancinane gqitha kangangokuba anokungabikho ngokupheleleyo. Ubomi abunakuba bazivelela ngamabona-ndenzile.”

Kuthetha ntoni oku? Ukuba ubomi abuzange bubekho ngengozi, bumele ukuba bayilwa. Yaye ukuba kunjalo, kumele ukuba kukho uMyili owabuyilayo. Yaye onjani yena uMyili! Ngokufanelekileyo umdumisi wathi: “Ndenziwe ngokoyikekayo, ngokubalulekileyo.” (INdumiso 139:​14) Kodwa oku kusixelela ntoni ngokuba nenjongo kobomi okanye ukungabi nayo?

Kaloku, nabantu bayila baze benze izinto. Benza iinqwelo-moya ezibaleka ngesantya esiphakamileyo. Benza iindawo ekucocwa kuzo ioli. Benza amaziko ombane. Yaye benza nentlaninge yezinye izinto ezintsonkothe ngakumbi okanye ezingantsonkothanga kangako. Kodwa abantu abaziyili baze bazenze izinto ezintsonkothe ngolo hlobo ngaphandle kwesizathu. Yonke into yenziwa kucingwa ngenjongo ethile.

Ekubeni kungekho nanye into eyenziwe ngabantu ekhe yasondela nokusondela kwindlela ezintsonkothe nezoyikeka ngayo izinto eziphilayo, ngokuqinisekileyo uMyili wobomi wayengenakudala ubomi engenanjongo ithile ngabo. Kukungaqiqi ukukholelwa ukuba ‘senziwe ngokubalulekileyo’ saza ke sashiywa enyanyeni nangaphandle kwenjongo.

Iphulo Lokufuna Injongo

Into yokuba uMdali wadala abantu ukuze bafeze injongo ikwaxhaswa ngamandla sisibakala sokuba thina bantu ngokuzenzekelayo sifuna injongo kubomi bethu. UGilbert Brim, osisazi ngengqondo, wathetha ngokufuna kwabantu injongo ebomini ngokuzenzekelayo xa wathi: “Abantu abaninzi bafumana amathuba okukhula ngokobuqu nocelomngeni kwindawo yempangelo. Kodwa abo bangakwaziyo baya kufuna ucelomngeni nokufikelela izinto ezikhethekileyo kwezinye izinto: ukunciphisa ubunzima bomzimba, ubuchule bokubetha ibhola yegalufa esethambekeni ngentonga yegalufa enegqudu lentsimbi, ukuqhotsa amaqanda aqhuqhiweyo ngendlela efanelekileyo okanye ukubonisa ubudela-ngozi​—⁠enoba kukuhla phezulu ngekayiti okanye ukulinga ukwenza isidlo esingaqhelekanga.” Isazi ngezifo zengqondo uViktor Frankl sakha sathi: “Ukuzama ukufumana intsingiselo kubomi bukabani yeyona mpembelelo iyintloko emntwini.”

Makhe sihlolisise ezinye zezinto ezilusukelo abantu abazibekele lona ebomini.

Yintoni Ebangela Ubomi Bube Nenjongo?

Enye intwazana ekwishumi elivisayo, xa yabuzwa ngenjongo yayo ebomini, yathi: “Ndiphupha nje ngokuba nendlu entle, inqwelo-mafutha entle, nenzwana endiya kuhamba nayo ngaloo nqwelo-mafutha. Amaphupha am ndiza kuwanelisa. Ndingumntu ozithandayo. Ndifuna into eza kundonwabisa, kungekhona eya konwabisa lonke ibutho labantu.” Ukuba ucinga ukuba eso sisimo sengqondo sokuzingca, uchan’ ucwethe ebaleka. Siso. Noko ke, into embi kukuba ayisosimo sengqondo esingaqhelekanga.

Sekunjalo, ngaba ukusukela izinto eziphathekayo neziyolo kuyayanelisa intswelo yokuba nentsingiselo kubomi bukabani? Hayi. Xa ekuphela kwento esiyifunayo iluyolo, alusanelisi. Abantu abaye balwenza usukelo lwabo oluyintloko ebomini ngokuqhelekileyo baphelela ekuzixeleleni ezintliziyweni zabo oko kwathethwa ngukumkani osisityebi wamandulo owasebenzisa amandla nobutyebi bakhe ukuze ahlolisise iinkalo ezahlukahlukeneyo zoyolo ezazikho emva apho. Khawuphulaphule isigqibo awafikelela kuso:

“Ndaziqwebela nesilivere, negolide, nezinto eziziinqobo zookumkani ngookumkani, nezamazwe ngamazwe; ndazenzela iimvumi neemvumikazi, neziyolo zoonyana babantu, inkosikazi namakhosikazi. . . . Ndayibona ukuba yonke loo nto ingamampunge nokusukelana nomoya.​—⁠INtshumayeli 2:​8, 11.

Abaninzi bafumana ulwaneliseko emsebenzini okanye ekusebenziseni amandla abo engqondo okanye omzimba ukuze bafikelele oko kubonakala ngathi ziinjongo ezibalulekileyo. Noko ke, emva kwexesha elithile, umsebenzi awuyanelisi ngokupheleleyo intswelo yokuba nenjongo ebomini. UPeter Lynch, owachazwa ‘njengencutshe kutyalo-mali,’ wayeka umsebenzi wakhe ohlawula kakhulu xa waqonda ukuba kukho nto ithile awayephulukana nayo ngokupheleleyo ebomini bakhe. Yintoni leyo? Kukunxulumana nentsapho yakhe. Wavuma: “Ndandikuthanda oko ndandikwenza, kodwa ndafikelela esigqibeni, yaye nabanye benjenjalo: Sikwenzela ntoni . . . oku? Akukho namnye umntu endimaziyo owathi xa wayesekhukweni lokufa wanqwenela ukuba akwaba wayechithe ixesha elininzi eofisini.”

Ngenxa yoko, enye intwazana ekwishumi elivisayo yabonakalisa umlinganiselo othile wokulungelelana xa yacinga ngosukelo lwayo ebomini yaza yathi: “Enye into endiyinqwenelayo kukuba nomsebenzi. Kodwa ndicinga ukuba eyona nto ndiyinqwenela kakhulu kukuba ndibe nentsapho eyonwabileyo.” Ewe, intsapho yethu inokuzisa intsingiselo nenjongo ebomini. Elinye ibhinqa eliselula elitshatileyo lathi: “Kwasebuntwaneni bam ndabona ukuba enye yezinto ubani azalelwe ukuba ayenze kukuba ngumzali, leyo yenye yeenjongo zobomi, yaye andizange ndikuthandabuze oko.”

Abanye bafuna injongo ebomini ngezinye iindlela. Bambi​—⁠ngokunokwenzeka kuquka nezo zazinzulu ezimi ngelokuba ubomi yinto nje engenantsingiselo eyavela ngengozi⁠—​bafumana injongo ngokufuna ulwazi. Isazi ngendaleko uMichael Ruse sabhala: “Sinxanelwe ukwazi, yaye oku kusiphakamisa ngaphezu kwezilwanyana. . . . Phakathi kwezona mfuno nemisebenzi yethu emikhulu kukho owokudlulisela, kubantwana bethu, ubulumko obuqokelelweyo bexesha elidlulileyo, kunye nezinto esizinandiphileyo nesizifikeleleyo. . . . Ukufuna ulwazi, nempumelelo, lolunye lwezona mpawu zibalaseleyo zabantu.”

Bambi bafumanisa ukuba ukulwela inkolelo okanye umgaqo othile kwenza ubomi babo bube nenjongo. Basebenzela ukulondolozwa kweentlobo zezilwanyana ezinqabileyo. Okanye balwa nongcoliso nokonakaliswa kwemeko-bume. Abantu abanenkathalo balwela amalungelo abantwana okanye banyamekela abantu abangenamakhaya okanye abangamahlwempu. Okanye basebenzela ukuthintela ukwanda kokukhotyokiswa ziziyobisi. Maxa wambi abantu abanjalo baphumeza okuninzi okulungileyo, yaye oko bakwenzayo kwenza ubomi babo bube nenjongo.

Izinto Eziphoxayo Nezidanisayo

Noko ke, sifanele sivume ukuba abantu ngokufuthi bayaphoxeka kwizinto abazibekele usukelo lwazo nokuba usukelo lolufanelekileyo. Abazali abakhulisa abantwana babo ngothando nangomgudu omkhulu maxa wambi baphulukana nabo kwiingozi, kulwaphulo-mthetho, ngezigulo, okanye ngokukhotyokiswa ziziyobisi. Okanye xa abantwana bekhula, basenokuchatshazelwa ngumoya wokuzingca weli hlabathi baze boyisakale ukubathanda abazali babo.

Abo basebenza ngokungazingciyo ekuphuculeni imeko-bume ngokufuthi baphoxwa zizilangazelelo zenkqubo yorhwebo okanye yinto yokuba abanye bengakhathali. Abo basebenzela ukuphucula imeko yabantu abangamahlwempu bakatyiswa bubukhulu balo msebenzi. Umntu ofumanisa umsebenzi wakhe usanelisa uyanxunguphala xa kunyanzeleka ukuba aye kudla umhlala phantsi. Umphengululi ofumanisa ukufuna ulwazi kusanelisa ngokupheleleyo uyanxunguphala xa ubomi bakhe busondela ngakumbi esiphelweni yaye kusekho imibuzo emininzi engekaphendulwa. Indoda eye yachitha ubomi bayo iziqwebela ubutyebi ifumanisa ukuba, ekugqibeleni, imele ibushiyele abanye.

Ukumkani wamandulo ocatshulwe ngaphambilana wachaza ezinye zezi zinto zidanisayo xa wabhalayo: “Ndayithiya yonke imigudu yam endaphuka yiyo phantsi kwelanga, ekubeni ndiya kuyishiya nomntu oya kubakho emva kwam. Iya kuba yindoda enjani na eya kubakho emva kwam, edla ilifa lento efunyenwe ngabanye? Yaziwa ngubani na ukuba yoba sisilumko okanye yoba sisiyatha kusini na? Sekunjalo iya kulawula zonke iziqhamo zemigudu yam.”​—⁠INtshumayeli 2:​18, 19, The New English Bible.

Ngoko, ngaba ke ubomi abunayo nje kwaphela injongo, njengoko la mazwi ayinyaniso emsulwa ebonakala esitsho? Ngaba usukelo olwahlukahlukeneyo lwabantu lukokuphela koncedo lokubafikisa kwiminyaka engama-70, nengama-80, okanye engama-90 yokuphila abaninzi abayiphiweyo? Ngaphandle koko, ngaba olu sukelo ngokusisiseko alunantsingiselo? Akunjalo. Enyanisweni, luphawula into ethile ebaluleke kakhulu ngendlela esenziwa ngayo, yaye lunikela ubungqina bokuba ubomi, ngokwenene, bunenjongo emangalisa kakhulu. Kodwa sinokuyifumana njani le njongo?

[Imifanekiso ekwiphepha 17]

Bambi bafumanisa ukuba ukufuna ulwazi kuzisa intsingiselo nenjongo kubomi babo

Abantu abazakhi izinto ezintsonkothileyo bengenayo injongo ethile engqondweni

[Inkcazelo]

NASA photo