Into Elunge Ngakumbi Kunento Yasimahla
PHANTSE bonke abangcakazi baphelela ekubeni ngamahlwempu ngakumbi kunokuba babenjalo ngaphambi kokuba baqalise ukungcakaza. Ngokufuthi, kwanebathwana eliye lizuze imali eninzi lifumanisa ukuba loo mabhaso alo awayondlela esa elonwabeni.
Indoda engatshatanga enama-36 eminyaka ubudala yaseJapan yazuza ii-R124 000 kwilottery. Yayizimisele ukuthenga indlu ngelo bhaso layo, kodwa yaba lixhoba lokumonelwa nokuhletywa kangangokuba yagqiba kwelokuba ihle nomcinga. Okwabamangalisayo abantu eyayisebenza nabo kukuba yalitshisa elo tikiti lokuzuza imali beyijongile.
EFlorida abakwantsasana babamba ibhinqa elathi, phezu kwako nje ukuba lazuza i-R14 lezigidi kwilottery, laceba ukubulala umolokazana walo. Unyana walo wathi lalinxunguphaliswe kukungahambi kakuhle kwenkqubo yotyalo-mali nayinkcitho egqithileyo eyayitshayela kwathi tu imali yalo.
Obebuya Nembande Yesikhova Owaphumelelayo
UDomingo wayelikhoboka lokungcakaza yaye enabantwana abahlanu. Ucacisa athi: “Ukuba ndiphumelele, kwakuba kubi ngakumbi. Ndandicinga ukuba ndingoyena mntu ukrelekrele ngandlel’ ithile, yaye ndandingakwazi ukulinda ukubuyela kwiitafile zemidlalo ukuze ndiye kubonisa ukuba ibingeyompazamo into yokuphumelela kwam.
“Wathi lo mkhwa wakuba sisinama-ndokunamathela, kwaba ngathi ndidlisiwe. Ndandikulungele nokushiya umfazi nabantwana bam ukuze nje ndiqhubeke ndingcakaza. Nakubeni ndafunga ngokuphindaphindiweyo kumfazi wam ukuba andisokuze ndiphinde ndingcakaze kwakhona, ndandisazi mna ngaphakathi ukuba ndandibhibhidla nje amazinyo. Ndikhumbula ngenye imini ndiqinisekisa umfazi wam ukuba ndandiyeke kwaphela ukungcakaza, ngoxa kanye ngawo loo mzuzu, ndandiceba indlela yokufumana imali yokubheja.
“Ndaphulukana nayo yonke imali yam, eyomfazi wam kunye neshishini lam yaye ndatshona zwabha ematyaleni. Kwakungadluli nemini kungekho nto ndiyibhejelayo, kwade kwenzeka into eyandiqhubela ukuba ndizifune. Ndaqalisa ukufundisisa iBhayibhile namaNgqina kaYehova. Ndachukumiseka koko ndakufundayo, kodwa andizange ndisuke nje ndiyeke ukungcakaza. Ndibamba ngazibini kuba iNgqina elalifundisisa nam laba nomonde kakhulu.
“Kodwa kungekudala isigidimi seBhayibhile saqalisa ukundichaphazela. Sandinceda ndalishiya ilizwe lephupha yaye ndazijonga ngendlela uThixo awayendijonga ngayo. Ndakhwankqiswa. Ndaziva ndineentloni ngokunzulu, njengabo umpostile uPawulos wababhalelayo kwinkulungwane yokuqala: ‘Naye ninasiqhamo sini na ke ngelo xesha, ngezi zinto nineentloni ngazo ngoku? Kuba isiphelo sazo kukufa.’—Roma 6:21.
“Ukwazi uThixo, igama lakhe, ubuntu bakhe, yaye ingakumbi inceba yakhe kwandishukumisela ukufuna ukuguqula iindlela zam, ndicingele abanye ngaphezu kokuzicingela. Ekugqibeleni ndahlukana ngokupheleleyo nomkhwa wokungcakaza, yaye mna nomfazi wam sabhaptizwa.
“UYesu wathi inyaniso yayiya kusikhulula. (Yohane 8:32) Ngokuqinisekileyo oko kwaba njalo kum. Yaba yinyaniso yeLizwi likaThixo eyandinika into endifanele ndiyiphilele, yandenza ndaphinda ndazihlonela, yaza yandizisela ulwaneliseko olukhulu. Ndakwazi nokunceda owayesakuba ngomnye wabahlobo bam ekungcakazeni ukuba aguqule ubomi bakhe njengokuba nam ndenzayo. Xa yena nomfazi wakhe babhaptizwayo, oko kwandinika uchulumanco olungaphezulu lee kunolo ndandiluzuza ngokungcakaza.
“Kwiminyaka engama-20 edlulileyo, andikhange ndibe nanto ndiyibhejelayo, kwanangemalana encinane. Andinakuthi bekulula, kodwa bekungenzima kangako. Yaye oko uThixo andinike kona kuye kwazizalisa ngakumbi iintswelo endandifuna ukuzanelisa ngokungcakaza.”a
Imbono yeZibhalo iyeyembaluleka enkulu kwabo bafuna ukwenza ukuthanda kukaThixo. Yaye abo balandela isiluleko sikaThixo abaneli nje ukuphepha intlungu enokuziswa kukungcakaza kodwa bafumanisa ukuba ubanika into ekogqitha lee nakuphi na ukuphumelela ekungcakazeni.
Ithamsanqa Elifaneleke Kakhulu
UPawulos, ebhalela uTimoti kwinkulungwane yokuqala, wathi: “Bafundise bangathembeli ngento engaqinisekanga njengemali, kodwa bathembele kuThixo, osinika ngokukhulu zonke izinto zokuba sizinandiphe. Bayale ukuba benze okulungileyo . . . , bakulungele ukupha nokwabelana, baze ngoko bazuze ubutyebi obuya kubakhela isiseko esilungileyo sekamva. Ngaloo ndlela baya kububamba ubomi obubobokwenene.”—1 Timoti 6:17-19, The New English Bible.
Ubutyebi obumele bufunyanwe kukuba negama elihle noThixo. Oku kukhokelela ‘kubomi obubobokwenene’—ubomi obungunaphakade, elona bhaso likhulu kwawakha anikelwa. UYesu wathi emthandazweni kuThixo: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.
Ngokungafaniyo namabhaso emali ekungenakuthenjelwa ngawo, ibhaso uThixo alinikelayo linokuzuzwa ngumntu wonke owenza ukuthanda kukaThixo. Ngokubhekele phaya, ukwenza ukuthanda kukaThixo kunika uchulumanco wonke ubani alufunayo, yaye kumenza umntu azihlonele yaye abe nobomi obunentsingiselo. Kwangaxeshanye, ngenxa yomphumo ombi wokungcakaza, khumbula icebiso lesaci sakudala sesiNgesi: “Eyona ndlela ilungileyo yokuphosa amadayisi kukuwalahla kude.”
[Umbhalo osemazantsi]
a AmaNgqina kaYehova aye anceda amakhoboka okungcakaza amaninzi ukuba oyise ubukhoboka bawo. Amanye aye ancedwa ngamaqela okuzinceda afana neGamblers Anonymous (umbutho wokunceda abangcakazi boyise umkhwa wabo).
[Umfanekiso okwiphepha 10]
Ubomi obungunaphakade emhlabeni oyiparadisi libhaso eligqwesa nawaphi na amabhaso afunyenwe ngokungcakaza