Imbono YeBhayibhile
Ngaba Ukungcakaza Kufanelekile KumaKristu?
UKUNGCAKAZA NGUMKHWA ODLA IMALI. NGOKUFUTHI KUCHITHA ISIQINGATHA SENGENISO KABANI YAYE KUNOKUKHOKELELA KUMATYALA AMAKHULU. LO MKHWA UNOKONAKALISA IMITSHATO NEMISEBENZI YOKUZIPHILISA, YAYE USENOKUDE WENZE ABATHILE BAQALISE UKUBANDAKANYEKA KULWAPHULO-MTHETHO. AMAXHOBA AKO ABANJISIWE YAYE ANOKUBANDEZELEKA NGENXA YEZIGULO EZIBANGELWA KUKO EZIFANA NEZO ZIBONWA KWABANYE ABAKHOTYOKISIWEYO.
UKUNGCAKAZA kukho zwenibanzi kangangokuba wambi amazwe akujonga ‘njengendlela yokuhambisa ixesha eqhelekileyo.’ Noko ke, kanye kanye kuyintoni ukungcakaza? IThe World Book Encyclopedia ithi ukungcakaza “kukubheja ngesiphumo soko kuya kwenzeka kwikamva. Ngokuqhelekileyo abangcakazi babheja ngemali okanye ngenye into enexabiso njengebhaso ngethemba lesiphumo esilindelweyo. Xa isiphumo sifunyenwe, owelwe ngumqa esandleni uqokelela amabhaso abo bangaphumelelanga.”
Ukungcakaza akuyonto intsha. AmaMaya amandulo akuMbindi Merika ayedla ngokudlala umdlalo webhola odumileyo owawubizwa ngokuba yipoktatok—owawusaziwa ngama-Aztec ngokuba yitlachtli—“bambi ababesithi kuwo, ngenxa yokuba bephulukene nobutyebi babo [ngokungcakaza kulo mdlalo], babheje ngobomi babo,” litsho njalo iphephancwadi iAméricas. Aba bantu bamandulo bebanjiswe gqitha ngumkhwa wokubheja, maxa wambi “babebeka ubomi babo esichengeni sokuba ngamakhoboka ngenxa yomdlalo webhola yerabha.”
Kutheni abaninzi bebanjiswe kangaka ngumkhwa wokungcakaza? Ngokutsho kukaDuane Burke, umongameli wePublic Gaming Research Institute eUnited States, “abantu abangakumbi nangakumbi bakujonga ukungcakaza njengendlela yokuzonwabisa eyamkelekileyo.” Kwanamahlelo athile onqulo ayakwamkela ukungcakaza njengendlela yokunyusa ingxowa-mali.
Nangona ukungcakaza kuthandwa yaye kukudala kukho, ngaba kunokuba yinto yokuhambisa ixesha emsulwa kumaKristu? Okanye ngaba kukho okungakumbi kuko kunoko?
Kutheni Abantu Bengcakaza Nje?
Ngamafutshane, ukuze baphumelele. Kubangcakazi, ukungcakaza kubonakala kuyindlela ekhawulezayo nemnandi yokwenza imali ngaphandle komgudu noqeqesho olubandakanyeke kumsebenzi wengqesho. Ixesha elininzi lichithwa kwiingcinga ‘ezingentywenka yemali’ nendlela loo mali enokubazisela udumo nezinto eziphathekayo ngayo.
Kodwa amathuba okuba umngcakazi aphumelele anqabe kakhulu. Ngokomzekelo, ingcali yokubalwa kwezinto uRalf Lisch ithi eJamani “unokubethwa ngumbane izihlando ezine kwisithuba sonyaka kunokuba [uphumelele] kwimidlalo [ye-lottery yaseJamani].” Ukuba oko akuvakali kusanelisa, wongezelela uthelekiso olulandelayo: “Ukuba uyindoda, amathuba okuba uphile ufikelele [kubudala beminyaka] eli-100 aphindwe kangangama-7 000 kunawokuba [uphumelele kumdlalo we-lottery].” Okuhlekisayo kukuba kusenokuba umngcakazi uyakuqonda oku. Ngoko, yintoni emenza aqhubeke engcakaza?
Ngokutsho kukaGqr. Robert Custer, kwincwadi yakhe ethi When Luck Runs Out, kwabathile abangcakazayo, “ukuzuza imali asikokuphela kwento ebangela bafune ukuphumelela. . . . Kubo into ebalulekileyo ngumona, ukuhlonelwa, ukunconywa, ukubunguzelelwa okuhambisana nokuzuza imali.” Wongezelela esithi kwaba “luchulumanco lokukwazi ukuqhayisa ngemali yabo eninzi okanye kuphela kukukwazi ukuthi, ‘Ndizuze intywenka yemali’ nokuzonwabisa ngolo zuko.”
Kwelinye icala, ukuphumelela—nochulumanco oluhamba nako—akwaneli kubangcakazi abaninzi. Umnqweno wokungcakaza usenokukhula ube namandla kangangokuba babe ngamakhoboka okungcakaza. Kuhlolisiso olwenziwa nguGqr. Custer namalungu ombutho iGamblers Anonymous, ama-75 ekhulwini abo kwakwenziwe uhlolisiso nabo bathi babedla ngokuqhayisa ngokuphumelela kwanaxa babebuya nembande yesikhova! Ewe, ukungcakaza kusenokukhobokisa ngamandla kuze kutshabalalise njengokukhotyokiswa butywala okanye olunye uhlobo lwesiyobisi. Bangaphi abangcakazi abaye badlula kwinqanaba lokungcakaza njengendlela yokuzonwabisa basuka baxhomekeka kuko? Bangaphi abekwenzileyo oku yaye abangaziyo ukuba bakwenzile?
Indlela UThixo Akujonga Ngayo
IBhayibhile ayixubushi ngokweenkcukacha ngokungcakaza. Noko ke, iyasinika imigaqo esinceda sibone indlela uThixo akujonga ngayo ukungcakaza.
Amava aye abonisa ukuba ukungcakaza kubonakalisa ukubawa. IBhayibhile ikugweba ngokuqatha ukubawa, ilumkisa isithi ‘umntu olibawa akanalifa ebukumkanini bukaThixo.’ (Efese 5:5) Ukubawa kubonwa naxa abangcakazi bengaphumeleli. Ngokutsho kwelinye igosa, umngcakazi “uye azame ukuzuza oko aye waphulukana nako—efuna ‘ukuzuz’ isithonga.’ Ukuba kuyenzeka azuze imali eninzi, uye abheje ngengakumbi, aze ekugqibeleni aphulukane ‘nesithonga asizuzileyo.’” Ewe, ngokuqinisekileyo ukubawa kuyinxalenye yokungcakaza.
Bambi baye bangcakaze ukuze banelise ikratshi abanalo. Olunye uhlolisiso olwenziwa nabangcakazi abakhotyokisiweyo lwabonisa ukuba ama-94 ekhulwini ayekujonga ukungcakaza ‘njengomdlalo owakha ukuzihlonela,’ yaye ama-92 ekhulwini athi ayevakalelwa ngokungathi ‘ayezizikhulu’ xa ayengcakaza. Ukanti, uThixo uthi: “Ikratshi nokukratsha . . . ndikuthiyile.” Ngenxa yoko, amaKristu akhuthazwa ukuba ahlakulele ukuthozama nokuthobeka.—IMizekeliso 8:13; 22:4; Mika 6:8.
Kwakhona ukungcakaza kusenokubangela ubuvila, ekubeni kubonakala kuyindlela elula yokwenza imali ngaphandle komgudu obandakanyeke ekusebenzeni. Kodwa iLizwi likaThixo liwakhuthaza ngokucacileyo amaKristu ukuba asebenze ngenkuthalo yaye azibhokoxe.—Efese 4:28.
Ngaphezu koko, oko bakubiza ngokuba lithamsanqa kubaluleke kakhulu kubangcakazi abathile kangangokuba bade baxhomekeke gqitha kulo, belenza uthixo wabo. Oku kuyafana nengxelo yeBhayibhile engamadoda ‘awayelungiselela uThamsanqa isithebe.’ Ngenxa yesenzo sawo sokunqula izithixo, amiselwa “ikrele.”—Isaya 65:11, 12.
Kuthekani ukuba umntu uphiwa itikiti lelottery okanye isisulu semali ukuba angcakaze ngayo? Kuzo zombini ezi meko, ukwamkela isipho esinjalo bekuya kuba kukuxhasa ishishini lokungcakaza—ishishini elingavisisaniyo nemigaqo yobuthixo.
Ewe, ukungcakaza akufanelekanga kumaKristu. Kunjengokuba omnye umhleli wephephancwadi ekubeka oku, ‘ukungcakaza akuphosakele nje kuphela kodwa kukwabubuyatha.’
[Inkcazelo Ngomfanekiso okwiphepha 20]
Valentin/The Cheaters, Giraudon/Art Resource