UGawulayo EAfrika—Isilumkiso Ehlabathini!
“UKUBA uthandana nomntu omnye ngonyaka kangangeminyaka emithandathu, yaye ukuba benjenjalo nabantu othandana nabo, phantse uya kuba neentlobano zesini nabantu abangama-45 000.” Le ndlela ilula yokubala eyenziwa nguGqr. K. E. Sapire, ecatshulwe kulindixesha waseMzantsi Afrika othi Continuing Medical Education ibonisa ukuba kusenokwenzeka ukuba ngokuqinisekileyo uGawulayo uza kubasulela abo baziphethe vakalala.
Ngoko kutheni sitsalela ingqalelo eAfrika?
Kungenxa yokuba oko kwenzeka apho sisilumkiso ehlabathini. AsiyoAfrika kuphela indawo ekwande kuyo ngokubanzi ukuziphatha vakalala. Leyo yingxaki yazwenibanzi. Ingcali ngoGawulayo uGqr. Dennis Sifris uthi: “Ekugqibeleni, kunokwenzeka ukuba wonke umntu ehlabathini oba neentlobano zesini namaqabane amaninzi abe sengozini.” Ngokufanayo, ngokutsho kwephephancwadi iU.S.News & World Report, ngokwemilinganiselo yanamhlanje “kwanomtshato awusosiqinisekiso sokuba umntu uba neentlobano zesini nomntu owahlukileyo kuye ngokwesini—okanye sokuthembeka kwiqabane likabani lomtshato—yaye ngenxa yoko akukho khaka lokuzikhusela ngokupheleleyo kuGawulayo.”
Ngaloo ndlela, ngezizathu ezivakalayo, ulindixesha iAfrican Affairs uyalumkisa: “Lo bhubhani unokubakho kwezinye iindawo.” Yonke imiqondiso ibonisa ukuba amanqam aseAfrika sele esenzeka nakweminye imimandla emininzi yehlabathi.
Ngokomzekelo, iphephancwadi iNewsweek linikela ingxelo yokuba eBrazil, “abantu abalinani elandayo ababa neentlobano zesini nabantu abahlukileyo kubo ngokwesini baye bafumana uGawulayo kubantu abathandana nabo abanesi sifo.” Isebe lezempilo kwelo lizwe lithelekelela ukuba abantu abasisiqingatha sesigidi sele beneHIV. UGqr. Carlos Alberto Morais de Sá, ongumalathisi kuphando ngoGawulayo kwiSibhedlele Seyunivesithi iGaffrée e Guinle eRio de Janeiro, uthi: “Ukuba akukho nto yenziwayo, siza kujamelana nentlekele yempilo ebantwini.”
KwaneUnited States iyasongelwa. Iphephancwadi iTime linikela ingxelo ethi: “Ngoxa ngokomlinganiselo liphantsi inani kwabo baqhelisela iintlobano zesini nabantu abahlukileyo kubo ngokwesini, liye lagqitha kuma-40 ekhulwini nyakenye [ngowe-1990], ngakumbi kunalo naluphi na udidi.” Kwiveki emva kokuvakala kwento yokuba imbaleki edumileyo uMagic Johnson wafumana uGawulayo ngokuba neentlobano zesini nomntu owahlukileyo kuye ngokwesini, iminxeba yangena ingenile kumaziko ezonyango ivela kubantu ababesoyika befuna inkcazelo engakumbi ngesi sifo.
Iimeko zaseAsia zibonisa ukuba naphezu kwayo kulengalenga eli shwangusha. Kuye kwakho abantu abaninzi abaneHIV kuloo mmandla wehlabathi ukususela ekubeni kwakungekho namnye owayenayo ngowe-1988 ukusa ekubeni namhlanje babengaphezu kwesigidi! UGqr. Jim McDermott, enikela ingxelo ngephulo lokufuna inkcazelo engakumbi ngale ngxaki eAsia uthelekelela ukuba, “imilinganiselo esanda ngayo esi sifo eAfrika iza kubonakala iphantsi kakhulu xa kuthelekiswa neAsia. Ndeyisekile lelokuba iAsia iza kuba yindawo apho kuza kubakho amaxhoba amaninzi gqitha alo bhubhani kaGawulayo osehlabathini jikelele.”
Ukuzama ukubek’ ityala ngemvelaphi nangokusasazeka kukaGawulayo kwilizwekazi okanye kuhlanga oluthile olunye kukubhibhidla nje amazinyo yaye akuncedi nganto. Kunjengokuba uGqr. June Osborn, oyintloko kwiSikolo Sokunyamekela Impilo Yabantu kwiYunivesithi yaseMichigan, eUnited States, ekubeka ngokungqalileyo oku, esithi: “Ayibalulekanga into yokuba ungubani na kodwa ebalulekileyo yinto oyenzayo.”
Ngaba uGawulayo uza kuqhubeka enqumlel’ egoqweni abantu kuzo zonke iindawo? Ngaba kukho isicombululo, okanye ngaba ekugqibeleni uGawulayo uza kushiya kukhal’ ibhungane kwimimandla emininzi yelizwekazi laseAfrika nakweminye imimandla yehlabathi?
[Inkcazelo Ngomfanekiso okwiphepha 8]
WHO photo by H. Anenden; background: NASA photo