Lumbi Ulutsha Alukufuni Ukuphila
UKUZIBULALA kwabantu abaselula lutyekelo oluxhomis’ amehlo eIndiya. Abaphengululi kwelo lizwe bathelekelela ukuba rhoqo ngemizuzu emibini umntu othile ulinga ukuzibulala, yaye rhoqo ngemizuzu elishumi umntu othile uyaphumelela ekuzibulaleni.
Ebudeni bowe-1990 abantu abangama-60 000 bazibulala eIndiya, yaye iphephancwadi i-India Today laphawula ukuba, “phantse isiqingatha sabo sasikubudala obuphakathi kweminyaka eli-18 nama-35.” Bambi abantu abaye bazibulala babebancinane gqitha njengoko beneminyaka elishumi ubudala. Elona nani lichanileyo labantu abazibulalayo eIndiya alaziwa kuba iintsapho ezininzi zikhetha ukunikela ingxelo yokuba abantu abazibuleleyo bafe ngengozi ukuze ziphephe ihlazo.
I-India Today ithi ebudeni bowe-1990 “ulutsha olufikisayo olungaphezu kwama-2 500 lwazibulala ngenxa yokungonwabi kwimibandela yothando.” Ngokutsho koogqirha bengqondo, esinye isizathu esibangela ukuba lande inani labantu abazibulalayo phakathi kwabantu abaselula yingcinezelo yokhuphiswano nendlela abaqhuba ngayo esikolweni, eqalisa besebancinane.
Eli phephancwadi longezelela ukuba “oogqirha bengqondo bakholelwa kwelokuba ukuqhekeka kwentsapho ehlala nezizalwane kunegalelo elikhulu ekudandathekeni nasekuziveni ulikheswa okusenokuvusa iimvakalelo zokuzibulala” ebantwaneni. Omnye ugqirha wengqondo, uGqr. S. G. Dastoor, wathi: “Ukuba nje abazali bebezikhathaza ngokuchitha ixesha elingakumbi nabantwana babo baze bafumanise into eyayibakhathaza, ubomi babo babunokusindiswa. Ndisoloko ndicinga ukuba ngabazali abafuna ukucetyiswa.”
IBhayibhile ikhuthaza abazali abangamaKristu ukuba bachithe ixesha nabantwana babo baze babethelele imigaqo yokuhlonel’ uThixo kubo. (Duteronomi 6:4-9) Kwakhona iZibhalo zibongoza abazali ukuba bangabacaphukisi abantwana babo kodwa babakhulisele “ekuqeqesheni nasekululekeni kweNkosi.”—Efese 6:4.
Ngaphezu koko, ulutsha olungamaKristu lunokuhlangabezana neengcinezelo zanamhlanje ngokusebenzisa isiluleko sobulumko esifumaneka eBhayibhileni kwabaseFilipi 4:6, 7, esithi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”