IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g01 11/8 iphe. 20-21
  • Ingxaki Esehlabathini Lonke

No video available for this selection.

Sorry, there was an error loading the video.

  • Ingxaki Esehlabathini Lonke
  • Vukani!—2001
  • Imixholwana
  • Amanqaku Afanayo
  • Ukwahluka Kweendlela Zokwenza Izinto
  • Ukuzibulala—Isibetho Sabantu Abaselula
    Vukani!—1998
  • Isizathu Sokuba Abantu Baxhom’ Izandla Ebomini
    Vukani!—2001
  • Ukuzibulala—Ubhubhane Ofihlakeleyo
    Vukani!—2000
  • Imibuzo Evela Kubafundi
    IMboniselo Evakalisa UBukumkani BukaYehova—2002
Khangela Okunye
Vukani!—2001
g01 11/8 iphe. 20-21

Ingxaki Esehlabathini Lonke

“Ukuzibulala yingxaki embi kawonke-wonke.”—UDavid Satcher, ugqirha wesizwe waseUnited States, ngowe-1999.

KWAKUQALA ezimbalini ukuba ugqirha wesizwe waseUnited States athethe elubala ngombandela wokuzibulala. Kungoku nje abona bantu baninzi bayazibulala kunokuba babulawe. Akumangalisi ukuba iNdlu Yeengwevu yaseUnited States ithi ukunqanda abantu bangazibulali kumele kube yinto ephambili elizweni liphela.

Kodwa, umlinganiselo wokuzibulala eUnited States, wabantu abali-11,4 kwabali-100 000 ngowe-1997, ungaphantsi komlinganiselo wehlabathi owapapashwa yiWorld Health Organization ngowama-2000—wabantu abali-16 kwabali-100 000. Umlinganiselo wokuzibulala ehlabathini lonke uye wanda ngama-60 ekhulwini kwiminyaka engama-45 edluleyo. Ngoku, kunyaka nje omnye, bamalunga nesigidi ehlabathini lonke abazibulalayo. Oku kuthetha ukuba kufa umntu omnye kwimizuzwana engama-40!

Noko ke, amanani akasiniki zonke iinkcukacha. Phantsi kweemeko ezininzi amalungu entsapho adla ngokungavumi ukuba loo mntu uye wazibulala. Ngaphezu koko, kuqikelelwa ukuba kumntu ngamnye ozibulalayo, phakathi kwabali-10 nabangama-25 bakhe bazama ukwenjenjalo. Olunye uhlolisiso lwafumanisa ukuba ama-27 ekhulwini abafundi bezikolo zamabanga aphakamileyo eUnited States aye avuma ukuba kunyaka odluleyo ebekucinga ngamandla ukuzibulala; isi-8 ekhulwini seqela ekuye kwenziwa uhlolisiso kuso sathi siye sawenza amalinge okuzibulala. Kolunye uhlolisiso kuye kwafunyaniswa ukuba ukususela kwisi-5 ukuya kwi-15 ekhulwini labantu abasele bekhulile bakhe bacinga ngokuzibulala ngaxa lithile ebomini babo.

Ukwahluka Kweendlela Zokwenza Izinto

Indlela abantu abakujonga ngayo ukuzibulala yahlukahlukene. Abanye bakujonga njengolwaphulo-mthetho, abanye bakujonga njengobugwala, kanti abanye bakujonga njengendlela ebekekileyo yokuzingxengxezela ngenxa yesishiqi esithile abasenzileyo. Abanye bakujonga njengendlela ephucukileyo yokuqhuba umlo. Kutheni abantu bekujonga ngezi ndlela zahlukeneyo? Indlela ekwenziwa ngayo izinto ibaluleke gqitha. Enyanisweni, iThe Harvard Mental Health Letter ithi indlela ekwenziwa ngayo izinto “inokuba negalelo ekuzibulaleni.”

Khawucinge nje ngelizwe elikumbindi Yurophu—iHungary. UGqr. Zoltán Rihmer ubhekisela kumlinganiselo ophakamileyo wokuzibulala kweliya laseHungary “‘njengesithethe’ esilusizi.” UBéla Buda, umalathisi weHungary’s National Institute for Health, wathi kulula gqitha ngabantu baseHungary ukuzibulala, ngenxa yaso nasiphi na isizathu. UBuda uthi kuyinto nje engothusiyo ukuba “umntu onomhlaza—azicim’ igama ukuze azikhuphe kuloo meko.”

EIndiya kwakha kwakho isithethe sonqulo esibizwa ngokuba yisuttee. Nangona olu qheliselo, lokuba umhlolokazi azitshise nesidumbu somyeni wakhe, kudala sapheliswa, asikapheli ncam. Xa elinye ibhinqa lazibulala ngale ndlela, abantu abaninzi basekuhlaleni basincoma esi sihelegu. Ngokutsho kweIndia Today, kuloo mmandla waseIndiya “malunga namabhinqa angama-25 aye azifaka kwimililo yokutshisa izidumbu zabayeni bawo kwiminyaka ekwafanayo.”

Ngokuphawulekayo, eJapan abantu abazibulalayo baliphinda kathathu inani labo babulawa ziingozi zendlela! IJapan—An Illustrated Encyclopedia ithi: “Izithethe zaseJapan, ezingakucekisiyo ukuzibulala, zidume ngesithethe esamkelekileyo sokuziqhaqha (iseppuku, okanye ihara-kiri).”

Kwincwadi yakhe ethi Bushido—The Soul of Japan, uInazo Nitobe, owathi kamva waba ngusosiba-jikelele ongaphantsi woManyano Lwezizwe, wachaza oku kuthi phithi kukufa. Wabhala wathi: “Imveliso yamaxesha aphakathi, [iseppuku] yayiyindlela amajoni awayezikhulula ngayo kwizigigaba awayezenza, engxengxezela iziphoso zawo, ebaleka ihlazo, ebuyekeza izihlobo zawo, okanye azingqine emsulwa.” Nangona le ndlela yesithethe yokuzibulala sele iyinto eyaphelayo, abantu abambalwa basabhenela kuyo njengendlela yokubethelela okuthile kubantu basekuhlaleni.

Kwelinye icala, kwiNgqobhoko, kwakusele kukudala ukuzibulala kujongwa njengolwaphulo-mthetho. Ngenkulungwane yesithandathu neyesixhenxe, iCawa yamaRoma Katolika yayibasika abo bazibuleleyo ize ingafuni kubangcwaba. Kwezinye iindawo, inzondelelo yonqulo iye yabangela izithethe ezingaqhelekanga ngokuphathelele ukuzibulala—zithethe ezo eziquka ukuxhoma isidumbu, kwanokufaka izibonda entliziyweni.

Kwelinye icala, abo babezama ukuzibulala babenokufumana isigwebo sentambo. Enye indoda eliNgesi yenkulungwane ye-19, yaxhonywa ngenxa yokuzama ukuzinquml’ umqala. Ngaloo ndlela, amagunya aqoshelisa umcimbi owayoyisayo le ndoda. Nangona isohlwayo sokuzama ukuzibulala satshintshayo ukutyhubela iminyaka, kwathi ngowe-1961 iPalamente yaseBritani yavakalisa ukuba ukuzibulala nokuzama ukuzibulala akuselulo ulwaphulo-mthetho. EIreland kwaqhubeka kululwaphulo-mthetho de kwangowe-1993.

Namhlanje, abanye ababhali bayakukhuthaza ukuzibulala. Incwadi yowe-1991 ethetha ngokuncedisa abo banezigulo ezingapheliyo ukuba bazibulale yabala iindlela umntu anokuzicim’ igama ngazo. Kamva, abantu abaninzi ababengenazo izigulo ezingapheliyo basebenzisa enye yeendlela ezachazwa apho.

Ngaba ngokwenene ukuzibulala kuyazicombulula iingxaki zomntu? Okanye ngaba zikho izizathu ezivakalayo zokuqhubeka uphila? Ngaphambi kokuphendula le mibuzo, makhe siqale sihlolisise oonobangela bokuzibulala.

[Amagama acatshulweyo akwiphepha 21]

Kunyaka nje omnye, malunga nesigidi sabantu ehlabathini lonke siyazibulala. Loo nto ithetha ukuba kufa umntu omnye kwisithuba semizuzwana engama-40!

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share