Iphulo Lam Lokufuna Ihlabathi Elilunge Ngakumbi

Ngokubaliswa ngowayesakuba ngunongendi ongumKatolika

IHLABATHI elilunge ngakumbi​—⁠ngaba linokufumaneka? Ngokuqinisekileyo ihlabathi elizele yintiyo, lugonyamelo, kukuzingca, ukunganyaniseki, kokungekho sikweni nokubandezeleka yayingelohlabathi elacetywa nguThixo xa wayelidala. Limele ukuba likho ihlabathi elilunge ngakumbi. Ukuba lalinokufumaneka, ngoko ndandizimisele ukuncedisa ekuliveliseni.

Ndazalelwa ndaza ndakhulela kwiphondo laseCorrientes, eArgentina, indawo edume ngokunqula Intombi Enyulu yaseItatí. Abantu balapha ngamaKatolika, baluzondelele gqitha unqulo, yaye bahamba uhambo olude izihlandlo ezininzi nyaka ngamnye besiya kunqula loo ntombi inyulu. Ndandiphakathi kwabo. Ukususela ebuntwaneni ndandinomnqweno wokwazi lo Thixo ekwakuthethwa kakhulu ngaye, kodwa ubawo wandalela ukuba ndiye kwizifundo zekatekizim. Kamva, ebudeni bokufikisa kwam, ngenxa yezinxulumani zakhe ezingalunganga, utata waba linxila. Sabandezeleka sonke kodwa umntu owabandezeleka ngokukhethekileyo yayingumama njengoko utata wayemhlasela ngamazwi nasemzimbeni. Ngenxa yoko, ndabathiya abantu besini esahlukileyo, ndiwagqala onke amadoda ekhohlakele yaye egwenxa.

Usukelo Lwam​—⁠Ukufumana Umpu Wokubulala

Noko ke, isikolo sandenza ndavelisa iimpawu zam ezilunge ngakumbi. Ndafundisisa ngenzondelelo nangenyameko, ndaza ndazuza iziqinisekiso zokuphumelela ekuthungeni iimpahla nakwizifundo zezorhwebo yaye kamva ndaphumelela ngamanqaku aphezulu ndaba ngumfundisi-ntsapho. Ngoku eyona minqweno yam yayiqalisa ukuzaliseka: ukuzuza izibizo ezithile neziqinisekiso zokuphumelela nto leyo eyayinokundikhulula kwidyokhwe yokucinezelwa ngubawo. Kwangaxeshanye, ndenza amacebo okuba ndisebenze nzima ukuze ndiphucule imeko kamama ndandule ke​—⁠ndithenge umpu ukuze ndibulale ubawo!

Kambe ke, oku akuzange kundivuyise, kwanciphisa uxolo nolonwabo endandinalo. Kunoko, ndavakalelwa njengesilwanyana esivalelweyo. Ndandineminyaka engama-20 ubudala yaye ndazifumanisa ndisengxingweni kwaye ndingakwazi ukuphuma.

Ubomi Bonqulo​—⁠Ukuthelekisa Izinto Endandizilindele Nezo Zathi Zenzeka

Malunga neli xesha ndaqalisa ukunxulumana noonongendi kunye namaKomanisi. Omabini loo maqela azama ukundihlohla ngeengcamango zawo. Kodwa ingcinga yokunceda amahlwempu kwimimandla ekude njengaseAfrika naseAsia yandenza ndagqiba kwelokuba ndiye kumzi woonongendi.

Ndahlala kumzi woonongendi kangangeminyaka eli-14. Ubomi bam kumzi woonongendi babuyolisa, buzolile yaye buseluxolweni. Xa ndasebenza nabefundisi ababephanda ngamazwe asakhasayo ndaqalisa ukubona umahluko phakathi kobomi thina bonongendi esasibuphila kunye nobo buphilwa luluntu ngokubanzi​—⁠obo bomi bentlungu nokungekho sikweni apho abantu bebandezeleka phantsi kwedyokhwe yengcinezelo yabo bagagamelayo.

Kumbutho wam wonqulo, iTheresian Carmelite Missionaries, kwakuthethwa gqitha ngokusesikweni, kodwa abaphathi bam babonakala bengayinanzi ngokupheleleyo indlela abaqhubana ngayo nabanye. Abahlohli babefumana umvuzo omncinane gqitha kunomvuzo owawumiselwe ngurhulumente, babengawafumani amalungelo abo naweentsapho zabo, yaye babenokugxothwa bengakhange baziswa ngoko kusengaphambili yaye babengahlawulwa ngenxa yelahleko ababejamelene nayo. Imeko yabo babesenza imisebenzi yasendlwini yayimbi nangakumbi; emva kokusebenza esikolweni iiyure ezili-10 ukusa kwezili-12, babemele bafumane omnye umsebenzi ukuze bakwazi ukuxhasa baze bondle iintsapho zabo. Ndandifuna ukuyilungisa loo meko ingekho sikweni.

Xa ndayithi thsuphe kunongendi owayephethe le nto, wandixelela ukuba ekuphela kwento efunekayo ukuze ndibonakale nyhani ukuba ndineengcamango ezigabadeleyo kukuba ndixwaye umbayimbayi! Kanye ngaloo mzuzu ndacinga ukuba ndikhetha ukuba kuthiwe ndineengcamango ezigabadeleyo kunokuba ndingabi nabuntu njengokuba babenjalo. Ngaloo ndlela, ndagqiba kwelokuba ndirhoxe kuthotho lwezifungo endandizenzile zobunyulu, zokuhlala ulihlwempu nezifungo zokuthobela. Ndandifuna ukuncedisa icawa ngomlinganiselo obanzi ngakumbi. Ndayinikwa ngokulula imvume yokurhoxa.

Indima Yam Kwiipolitiki

Ngoko ndaqalisa ngokwenene ukuzalisekisa isifungo sokuhlala ndilihlwempu. Kumaxesha amaninzi ngendandingazange ndifumane neqhekeza lesonka ukuba ndandingaphiwa ngabantu abaneentliziyo ezilungileyo ababendingqongile. Okwesihlandlo sokuqala, ndayiqonda indlela abantu abaqhelekileyo ababephila ngayo ngokwenene. Ndasebenza nzima necawa yasekuhlaleni kuzo zonke iinkalo​—⁠kwezonqulo, kwezentlalo nakwezopolitiko. Njengomfundisi-ntsapho owayefundisa abantu abakhulu, ndandinamathuba amaninzi okuthetha nabo ngeemeko ezingekho mgangathweni abanyanzelelwa ukuphila kuzo libutho labantu, oonobangela bezo meko nezicombululo ezingafumaneka. Yayiziziphi ezo zicombululo? Kuqala, usebenzisa iindlela zoxolo noqhankqalazo; uze ke, ukuba kuyimfuneko, usebenzise ugonyamelo ukuze ufikelele olo sukelo lunqwenelwayo, okusesikweni.

Umbutho wonqulo nowepolitiki endandinxulumene nawo, owawulawulwa ngabefundisi abangamaKatolika yaye uxhaswa ngamalungu onqulo angengobefundisi, usebenza kwimimandla esakhasayo yaseAfrika, eAsia nakuMzantsi Merika. Ufuna inguqulelo enkulu nekhawulezileyo kwezentlalo nakwezorhwebo ngokuvukela, ngokuchasa ngokupheleleyo zonke iindlela zokungenisa inkqubo yamathanga kwezorhwebo, kwezopolitiko nakwinkcubeko. Injongo yawo yayikukuseka inkqubo yobusoshiyali yakuMzantsi Merika ekhuthaza ukudalwa kwehombre nuevo (umntu omtsha), ekhululekileyo kwimiqathango emiselwe ziinkqubo zopolitiko zasemzini.

Sazimisela ukungena nzulu kubantu abangamahlwempu, sizigqala sikwimeko yabo ebomini. Ndinezi ngcinga engqondweni, ndenza umgudu okhethekileyo ukuze ndincede wonke ubani​—⁠abancinane nabakhulileyo, abafikisayo nabafikelele ebudaleni.

Ubomi Bam Bobuqu​—⁠Eyona Ndlela Ibalaseleyo Endakhululeka Ngayo Kwiinkolelo Zobuxoki

Kumlo wam wokuphucula iimeko zabantu abangamahlwempu, ndalibala ukuba intliziyo inokukhohlisa. Ndathandana nomphathi wam, owayengumfundisi, endahlala naye kangangeminyaka emibini. Ekuhambeni kwexesha ndakhulelwa. Xa lo mfundisi wakufumanisayo oko, wafuna ukuba ndiqhomfe, nto leyo endayibhebhethayo, ekubeni oko ibiya kuba kukubulala. Ukuze ndimfumane loo mntwana, kwafuneka ndiyeke ukusebenza naloo mfundisi ndize ndisishiye isixeko kuba ndisoyikela ukuba iya kufunyaniswa into yokuba ndandithandana naye.

Ndemka kweso sixeko ndikhathazeke gqitha yaye ndicinga ngokuzibulala ngokuziphosa phantsi kukaloliwe, kodwa kukho into eyandinqandayo. Ndanyamezela. Abahlobo, amalungu entsapho nabantu abanobubele kwidolophu yakowethu babonakalisa kum uthando, uvelwano nokuqonda​—⁠into engazange yayenza indoda eyayikuphela kwendakha ndayithanda. Ekuzalweni komntwana wam, aba ngabo basinyamekelayo. Ndandifuna ukuba unyana wam akhule abe yindoda eyomeleleyo nenamandla, anyaniseke kulweyiseko lwakhe yaye akulungele ukuzifela iingcamango zakhe. Ukubonisa loo mnqweno, ndamthiya igama lesibini elinguErnesto ndikhumbula uErnesto Che Guevara (umnqolobi owaziwayo waseArgentina), endandimothulela umnqwazi.

Xa urhulumente waseArgentina wabhukuqwa ngumkhosi, amaqela awayesebenzisana norhulumente aqala ukutshutshiswa. Abahlobo bam abaninzi babanjwa. Ikhaya lam laligqogqwa izihlandlo eziliqela ziiencapuchados (abantu abazigqume ubuso), abaguqulula baza beba phantse zonke izinto zam. Izihlandlo ezininzi ndandibizelwa ukuba ndize kuvela phambi kwabasemagunyeni ukuze ndichaze iindawo abazimele kuzo abahlobo bam, kodwa ndahlala ndinyanisekile kubahlobo bam, ndixolele ukufa kunokuba ndibe ngumngcatshi.

Inguqulelo Ebalulekileyo

Ndiphila phantsi kwengcinezelo enjalo, ndandifuna umntu endandinokuthetha naye, umntu endandinokukholosa ndize ndithembele ngaye njengomhlobo wokwenyaniso. Afika ngelo xesha ke amaNgqina kaYehova amabini ekhayeni lam. Ndawamkela ngovuyo, ndiphawula ukuzola nobuhlobo obuthile kuwo, nto leyo eyandenza ndanomdla. Ndawacela ukuba abuye azokufundisisa iBhayibhile kunye nam. Xa abuyayo, ndawachazela imeko enzima endandikuyo ndaza ndawaxelela ngeliphandle ukuba ndandingafuni abandakanyeke njengoogxa bam. Andiqinisekisa ukuba akoyiki, ekubeni abasemagunyeni babewazi.

Ekuqaleni isifundo sethu seBhayibhile saba nemiqobo emininzi ekwakufuneka isusiwe. Ekubeni ndandingenalukholo nantembelo kuThixo, kwakunzima gqitha ukuba ndamkele iimfundiso ezazikwincwadi yokufundisisa iBhayibhile ethi Inyaniso eKhokelela kuBomi obungunaPhakade. Ndaphantse ndasiphelisa isifundo, ndiyigqala iBhayibhile njengeyintsomi yaye ndimngqinela okaMarx kwelithi unqulo “lusisiyobisi sabantu.” Xa ndaxelela amaNgqina indlela endandivakalelwa ngayo ndaza ndawaxelela ukuba angachith’ ixesha kum, aphendula ngelithi ukunceda abantu abafuna ukuncedwa awakugqali ikukuchitha ixesha.

Ndafumana ingcamango eyahlukileyo xa ndamenyelwa kwiHolo yoBukumkani. Ndandikruqukile ziintlanganiso apho ukwabelana ngezimvo, ukuhlonelana nobuhlobo babungekho ngokuphawulekayo. Noko ke, iintlanganiso zamaNgqina kaYehova zazahlukile. Zisekelwe eBhayibhileni yaye zomeleza ukholo, yaye zisishukumisela ekubeni sithande kwaneentshaba zethu.

Ubuntu Obutsha BobuKristu Buthabathel’ indawo Ugonyamelo

Ekugqibeleni ndayifumana indlela yokulungisa eli hlabathi. NgoJuni 8, 1982, ndabonakalisa ukuzahlulela kwam kuYehova uThixo ngokubhaptizwa emanzini, kwaza kunanini na ngaphambili kwangumnqweno wam ukulahla ubuntu obudala, ihombre nuevo yobupolitika enogonyamelo, ndize ndambathe ubuntu obutsha, neziqhamo zabo ezihle, ezichazwe kumaGalati 5:​22, 23. Ngoku ndinenxaxheba kolunye uhlobo lwemfazwe, imfazwe yobuKristu, ndishumayela iindaba ezilungileyo zoBukumkani yaye ndizibhokoxa ekufundiseni abanye inyaniso yoBukumkani engehlabathi elilunge ngakumbi elizayo.

Enjani yona intsikelelo ekuyiyo ukufundisa unyana wam omncinane ukuba kunokuba akhule alinganise uErnesto Che Guevara, unokuhamba emanyathelweni kaKristu Yesu, iNkokeli noMzekelo wethu! Ndithandazela ukuba mna nonyana wam, kunye nabo bonke abantu abathanda ubulungisa, kuquka nabahlobo bam bangaphambili nezizalwana zam, singangena kwelo hlabathi lilunge ngakumbi neliza kuhlala likho ngonaphakade, umhlaba oyiparadisi ozaliswe luvuyo, luxolo, lulonwabo nokusesikweni. Ugonyamelo aluyongenelo nakubani na; kuphela lukhuthaza intiyo, iiyantlukwano, unxunguphalo neenkathazo ezingapheliyo. Oku ndikuthetha ngamava, kuba ndikhe ndabuphila ubomi obunjalo.​—⁠NguEugenia María Monzón.

[Umfanekiso okwiphepha 30]

Ukushumayela kwindlu ngendlu eArgentina