Abavakalisi BoBukumkani Bayabalisa

Inyaniso YeBhayibhile Ikhulula Unongendi EBolivia

ABANTU abaninzi abantliziyo zinyanisekileyo bayalushiya unqulo lobuxoki, bafunda inyaniso yeBhayibhile, baze bazokunqula uYehova, uThixo wokwenyaniso. Bangaphezu kwama-7 600 abaye benjenjalo eBolivia, kuquka nonongendi.

Xa wayeneminyaka elithoba kuphela ubudala, uM—— wadibana okwesihlandlo sokuqala nomnye wamaNgqina kaYehova. Wavulela iNgqina elalize ekhayeni lakhe, ibe okwesihlandlo sokuqala, weva igama likaThixo, uYehova, libizwa. Akazange alilibale kangangeminyaka.

Ekubeni wayekuphela kwentombazana kuloo ntsapho, kwagqitywa kwelokuba abe ngunongedi. UM—— uthi: “Hayi indlela endavuya ngayo kuba ndandiza kuba senkonzweni kaThixo—ubuncinane, ndacinga ngolo hlobo.” Kodwa uvuyo lwakhe lwajika lwaba ludano xa wabona ukungabikho kokusesikweni nomkhethe owawusenziwa kwikhaya loonongendi. Uthi: “Mhlawumbi andisokuze ndizilibale izihlandlo endandidandatheka ngazo nokuphathwa kakubi ngokwasenyameni nangokomoya okwakubangela ubuhlungu, nokwakunokundenza ndimjonge uThixo, engenguye Owothando, kodwa njengaLowo wohlwaya ngokungenamfesane.”

Uhlabela mgama esithi: “Ngethuba endaba ngunongendi ngalo, ndandingekalifumani igama elithi Yehova eBhayibhileni. Ndafumana kuphela elithi ‘Yahweh,’ ibe oko kwandenza ndadideka. Ngenye imini ndade ndaphuma ndaya kukhangela abo bantu babethetha ngoYehova, kodwa andizange ndibafumane.

“Lahamba ixesha, ibe ngenye imini xa ndandisendleleni egodukayo ndabona umbhalo othi, ‘IHolo YoBukumkani YamaNgqina KaYehova.’ Ndandifuna ukubaxelela ukuba babengabaprofeti bobuxoki, kodwa kwakungekho mntu eholweni. Ndabuya ngeCawa. Kwakuqhubeka intlanganiso, ibe abaninzi babonakala bemangalisiwe kukubona unongendi onxibe isinxibo sakhe esipheleleyo eze entlanganisweni. Emva kwentlanganiso, ndazama ukuphuma ngokukhawuleza. Noko ke, omnye wamaNgqina wandibulisa, ndaza ndambuza, ‘Kutheni ninyelisa oyiNgcwele ngokuzibiza ngelo gama?” Umbuzo wam wakhokelela kwingxubusho yeBhayibhile, ibe ndenza amalungiselelo okuba andityelele ekhayeni lam. Abazali bam bamgxotha. Phofu ke, emva kwenyanga ezimbini, saphinda sadibana waza wandimemela kwisifundo seBhayibhile ekhayeni lakhe. Ndachukumiseka gqitha yinkcazelo awandibonisa yona, engqina ukuba amaKristu afanele alisebenzise igama likaThixo. Obo bungqina bandinika amandla endandiwafuna ukuze ndilahle zonke izinto ezingenaxabiso endandizifundiswe njengonongendi.

“Ndikhumbula izinto ezininzi ezandehlelayo kwikhaya loonongendi. Ngokomzekelo, ngesinye isihlandlo ndandifuna ukutya okungakumbi. Ngoko ndabhala ndaza ndacela abazali bam ukuba bandithumelele, ndandingaqondi ukuba iileta zaziqhaqhwa zihlolwe ekhayeni loonongendi. Kwisidlo esilandelayo, kwabekwa isonka esininzi nejeli eninzi phambi kwam, ibe ndanyanzelelwa ukuba nditye konke. Ngoku ndandinokutya okuninzi ngokugqithiseleyo. Ndakubalisela abahlobo bam oku, ibe omnye wandicebisa ukuba ndiphuqe eso sonka ndandingenako ukusitya ndize ndisisasaze phantsi emgangathweni. Xa ndakwenzayo oko, unongendi wandixhakamfula ngokukhawuleza waza wandikhahlela phantsi, wandiyalela ngokungqongqo ukuba ndikhothe ngolwimi wonke loo mgangatho ucoceke. Elo gumbi lalilikhulu. Ngoxa ndandithobela loo myalelo, ndeva ukugigitheka nokuhleka—wayengenalusini kwaphela.

“Ngoku ndinokubona indlela okuvuyisa ngayo ukukhululeka kuko konke oko. Njengoko kunokulindeleka, le nkululeko ibandakanya ukuzincama. Phakathi kwezinye izinto utata wam wandigxotha ekhaya. Sekunjalo, ngaphambi kokuba ndimke ekhayeni loonongendi, ndaba nelungelo lokunceda abanye oonongendi abaselula bafunde inyaniso. Kuyandivuyisa ukuthi abanye bethu baye bahlulela ubomi babo kuYehova uThixo!

“Emva kokuba ndimkile kwikhaya loonongendi, utata akazange akwazi ukusiqonda isizathu sokuba ndingayamkeli imisebenzi ehlawula kakuhle kodwa edla ixesha. Noko ke, ndandifuna ixesha elingakumbi enkonzweni kaThixo. Ngoku ndikhonza njengovulindlela othe ngxi, ndiphila ubomi obulula kodwa obunomvuzo kakhulu. Ibe okundivuyisa ngakumbi, kukuba umama kunye nabanakwethu baye bandithelela enkonzweni kaYehova.”

Enyanisweni, inyaniso yeBhayibhile iyamkhulula umntu kwinkqubo yeli hlabathi yonqulo lobuxoki, yaye ibangela uvuyo nolonwabo oluhlala luhleli.—Yohane 8:32.