Indlela Eyaneliswa Ngayo Intswelo Yam Yokomoya
KUBALISA ULUCIA MOUSSANETT
KWIINTABA zomntla-ntshona weItali, kude kufuphi neSwiss Alps engakwintaba yodumo yaseFransi iMont Blanc, kukho iValle d’Aosta. Ndazalelwa apho ngowe-1941 kwindawo encinane ekuthiwa yiChallant St. Anselme.
Ekhaya sasibahlanu, ndingumafungwashe; ndisalekelwa ngabanakwethu abane. UMama wayekhuthele yaye engumKatolika ozinikeleyo. NoTata wayephuma kwintsapho ethanda unqulo. Oodade wabo ababini babengoonongendi. Abazali bam bancama izinto ezininzi eziphathekayo ngenxa yam, besenzela ukundifundisa. Zazingekho izikolo kuloo ndawo sasihlala kuyo, ngoko xa ndandineminyaka eli-11, abazali bam bandithumela esinaleni esasiphethwe ngoonongendi yaye ndandihlala apho.
Apho ndafunda isiLatin, isiFrentshi, nezinye izifundo. Ndakuba neminyaka eli-15 ubudala, ndaqala ukucinga nzulu ngokukhonza uThixo. Ndaqiqa ngelithi eyona ndlela ifanelekileyo yokumkhonza kukuya kwikhaya loonongendi. Noko ke, abazali bam abazange bakuthande oko, kuba kwakuza kufuneka uMama asale yedwa enyamekela abanakwethu. Abazali bam babenethemba lokuba xa bendifundisile ndandiza kutsho ndikwazi ukubancedisa ngemali.
Nangona ndadanayo yindlela abasabela ngayo, ndandifuna ukwazi eyona njongo yobomi, yaye ndandivakalelwa kukuba uThixo umele abe kwindawo yokuqala ebomini. Ngoko, ngowe-1961, ndaya kwikhaya loonongendi lamaRoma Katolika.
Ubomi Bam Njengonongendi
Kwiinyanga zokuqala, ndafundiswa imigaqo nemithetho yecawa ndisenza nemisetyenzana ethile kwikhaya loonongendi. NgoAgasti 1961, ndaqalisa ukuqeqeshwa njengonongendi, ndaqala ukunxiba impahla yoonongendi. Ndazithiya igama elitsha, uInes igama likaMama. Emva kokuba lamkelwe ndabizwa ngokuba ndinguSister Ines.
Nakuba inkoliso yoonongendi abaqeqeshwayo yayisenza imisetyenzana apho kwikhaya loonongendi, ngenxa yemfundo endandinayo ndaba ngumfundisi-ntsapho kwisikolo samabanga aphantsi. Kwiminyaka emibini kamva, ngoAgasti 1963, ndenza izifungo ndaza ndaba ngunongendi ngaphantsi kwe-order of the Sisters of San Giuseppe yaseAosta, eItali. Emva koko, ikhaya loonongendi landithumela kwiYunivesithi yaseMaria Santissima Assunta, eRome ukuze ndiqhubele phambili nezifundo zam.
Ukubuyela kwam eAosta ngowe-1967 emva kokugqiba izifundo zam eRome, ndafundisa kwisikolo samabanga aphakamileyo. Ngowe-1976, ndenziwa umalathisi weso sikolo. Nangona ndandisafundisa izifundo ezithile, ndamiselwa njengenqununu yesikolo ndaza ke ndaba lilungu kwiqumrhu lolawulo lwezikolo zengingqi yaseValle d’Aosta.
Owona mnqweno wam yayikukunceda amahlwempu. Ndandiwasizela gqitha. Ngoko ndalungiselela iinkqubo ezahlukahlukeneyo zokunceda abantu, kuquka neyokunceda abantu abanezifo ezinganyangekiyo abangenabani kwiintsapho zabo. Ndaseka nenkqubo yokufundisa abantwana abavela kwamanye amazwe. Ukongezelela, ndandifunela amahlwempu umsebenzi nezindlu ndalungiselela nokuba abo basweleyo bakwazi ukufumana uncedo lwezonyango. Ndandizama ukuphila ngokuvisisana nemigaqo yecawa.
Ngelo xesha, ndamkela iinkolelo zobuKatolika, kuquka iimfundiso ezifana noBathathu Emnye, ukungafi komphefumlo neembono zamaKatolika ngokuphathelele ikamva lomntu lokuphila ngonaphakade. Ngelo xesha amaKatolika ayekholelwa kuzwelonke, nto leyo eyayithetha ukuba amkela neenkolelo zezinye iicawa.
Izinto Ezaqalisa Ukundikhathaza
Noko ke, izinto ezithile ezazisenziwa kwiCawa yamaKatolika zazindikhathaza. Ngokomzekelo, ngaphambi kokuba umntu abhaptizwe aze amkelwe ngokusesikweni, abazali nabantwana babefanele bafundiswe ngentsingiselo yala manyathelo. Noko ke, inkoliso yabo yayingezi kwezo zifundo, yaye abanye babengazikhathazi ngokufunda. Ngaphezulu, xa bengavunyelwa ukubhaptizwa nokwamkelwa kwenye ityalike, abanye babesuka baye kwenye ityalike bafike babhaptizwe okanye bamkelwe apho. Oko ndandikugqala njengenkwalambisa nokuhanahanisa.
Maxa wambi ndandikhe ndibe nomdla wokwazi ndize ndibuze kwabanye oonongendi, “Kanene besingafanele sishumayele iVangeli ngaphezu kokuzinikela kuzo zonke ezinye iintlobo zemisebenzi?” Babephendula bathi: “Sishumayela ngokwenza izinto ezilungileyo.”
Ukongezelela, ndandingayikholelwa into yokuya kuvuma izono kumfundisi. Ndaqiqa ngelithi ndifanele ndikwazi ukuthetha noThixo ngemibandela yobuqu enjalo. Ngaphezulu, yayingangeni ncam into yokucengceleza nokuphinda-phinda umthandazo. Ndandingayiginyi neyokuba upopu akazenzi iimpazamo. Ethubeni, ndaqiqa ngelithi ndiza kuzigqibela ngezinto endifanele ndizikholelwe kwimibandela enjalo ndize ndiqhubeke nonqulo lwam.
Umnqweno Wokufuna Ukwazi IBhayibhile
Ndandisoloko ndiyihlonela iBhayibhile yaye ndinqwenela ukuyazi. Nanini na xa ndiza kwenza isigqibo okanye ndifuna uncedo kuThixo, ndandifunda iBhayibhile. Nakuba sasingayifundi kwikhaya loonongendi, ndandizifundela ngokwam. Ndandisoloko ndichukunyiswa yingxelo ekuIsaya 43:10-12, apho uYehova uThixo athi, “Ningamangqina am.” Noko ke, ndandingayiqondi kakuhle intsingiselo yaloo mazwi.
Phakathi kwiminyaka yee-1960, xa ndandiseyunivesithi eRome ndaqalisa izifundo zakwalizwi zeminyaka emine ezazihlawulelwa yiVatican. Kodwa iBhayibhile yayingekho phakathi kweencwadi esasizifunda apho. Emva kokubuyela eAosta, ndaya kwiingqungquthela eziliqela, nakwezo zeemvaba ngeemvaba nezaziqhutywa ziintlangano ezingezozabuKatolika. Oko kwandenza ndakulangazelela ngakumbi ukwazi iimfundiso zeBhayibhile. Kwakukho ukudideka okuninzi phakathi kwaloo maqela awayesithi afundisa iBhayibhile!
Ukufumana Inkcazelo Engakumbi YeBhayibhile
Ngowe-1982, kwafika elinye iNgqina likaYehova kwiziko endandingunontlalo-ntle kulo lathetha nam ngeBhayibhile. Nangona ndandixakeke gqitha, ndandinomdla wokufunda ngeBhayibhile. Ngoko ndathi, “Ndicela undityelele esikolweni, yaye siza kuncokola xa ndifumana ithuba.”
Nangona elo bhinqa lafikayo, andizange ndifumane ‘thuba’ kucwangciso lwam. Kusenjalo, uMama wafumanisa ukuba ugula ngumhlaza, ngoko ndathabatha ikhefu ndisiya kumnceda. Emva kokufa kwakhe ngoAprili 1983, ndabuyela emsebenzini, kodwa ngelo xesha amaNgqina ayengakwazi ukuqhagamshelana nam. Noko ke, kungekudala emva koko kwafika elinye iNgqina elalimalunga neminyaka engama-25 ubudala, lize kuthetha nam ngeBhayibhile. Ndandisele ndizifundela incwadi yeBhayibhile yeSityhilelo. Ngoko ke ndalibuza: “Ngoobani aba bali-144 000, kuthethwa ngabo kwiSityhilelo isahluko 14?”
Ndandifundiswe ukuba bonke abantu abalungileyo baya ezulwini, ngoko ke, yayingekho ngqiqweni kum into yokuba kubekho abantu abali-144 000 abahlukileyo kwabanye ezulwini. Ndandizibuza, ‘Ngoobani aba bali-144 000? Yintoni umsebenzi wabo?’ Le mibuzo yayisoloko inkenteza engqondweni. Eli Ngqina laqhubeka lisiza kundifuna, kodwa ndandisoloko ndingekho, ngoko lalingandifumani.
Ekugqibeleni eli Ngqina ladlulisela idilesi yam kuMarco, umdala osebandleni lalo. NgoFebruwari 1985, wada wandifumana. Ekubeni ndandixakekile, sathetha imizuzwana nje embalwa, kodwa sabeka elinye ixesha. Kamva yena nomfazi wakhe, uLina bandityelela rhoqo, bendinceda ukuba ndazi iBhayibhile. Kwithutyana nje elingephi, ndakwazi ukubona ukuba iimfundiso ezisisiseko zamaKatolika njengoBathathu Emnye, ukungafi komphefumlo nesihogo somlilo azisekelwanga Bhayibhileni.
Ukunxulumana NamaNgqina
Ukuya kwam kwiintlanganiso zamaNgqina kaYehova kwiHolo yoBukumkani, kwacaca kwangoko ukuba kukho umahluko omkhulu phakathi kwawo neCawa yamaKatolika. Wonk’ umntu olapho wayecula, ingeyokwayala nje kuphela. Emva koko baba nenxaxheba bonke kwintlanganiso. Ndaphawula nokuba bonke abantu bale ntlangano ‘ngabazalwana’ ‘noodade.’ Bonke bayathandana. Ezi zinto zandichukumisa gqitha.
Ngelo xesha, ndandisiya kwiintlanganiso ndinxibe impahla yoonongendi. Kwacaca ukuba abanye bayachukunyiswa kukubona unongendi kwiHolo yoBukumkani. Ndafumana uvuyo nolwaneliseko lokuba phakathi kwentsapho enkulu enothando. Kwakhona, njengoko ndifundisisa ndabona ukuba imigaqo emininzi endandiphila ngayo ayivisisani neLizwi likaThixo. Ngokomzekelo, iBhayibhile ayithi abakhonzi bakaThixo bafanele banxibe impahla ekhethekileyo. Ukubakho kwabefundisi becawa neenkonzo ezinobugocigoci kwahlukile koko kufundiswa yiBhayibhile ngabadala abathobekileyo abakhokela ibandla.
Ndavakalelwa kukuba ukholo lwam belusekelwe kwizinto ezingenasihlahla. Kwakunzima ukukholelwa ukuba ixesha eli lonke bendilahlekisiwe kangangeminyaka engama-24. Kodwa, ndandiqonda kakuhle ukuba le yinyaniso yeBhayibhile. Ndandisoyika xa ndicinga ukuba ndifanele ndiphinde ndiqale ekuqaleni ndakugqiba ukuba neminyaka engama-44 ubudala. Kodwa ndandinokuyenza njani into yokuqhubeka ndifathula ebumnyameni sele ndiyibonile eyona nto ifundiswa yiBhayibhile?
Ukwenza Isigqibo Esibalulekileyo
Ndandisazi ukuba ukumka kwikhaya loonongendi kwakuza kundishiya ndingumpha ochutyiweyo. Kodwa ndakhumbula amazwi kaDavide aphathelele ilungisa ‘elingazange lishiywe, nenzala yalo ifuna isonka.’ (INdumiso 37:25) Ndandisazi ukuba ndiza kuphulukana nezinto eziphathekayo, kodwa ndabeka ithemba lam kuThixo ndaqiqa ngelithi, ‘Yintoni kanye eyona nto ndiyoyikayo?’
Ekhaya bacinga ukuba ndiyaphambana. Nakuba kwakundikhathaza oko, ndakhumbula amazwi kaYesu athi: ‘Abo bathanda uyise okanye unina ngakumbi kunam abandifanele.’ (Mateyu 10:37) Kwangaxeshanye, uvelwano olwaluboniswa ngamaNgqina lwandikhuthaza lwaza lwandomeleza. Xa ndisehla ngesitrato ndinxibe imiwunduzo yoonongendi, ayejika eze kundibulisa. Oku kwandenza ndaziva ndisondele ngakumbi kubazalwana yaye ndiyinxalenye yentsapho yabo.
Ekugqibeleni ndaya kuMphathi Woonongendi ndamcacisela isizathu sokumka kwam kwikhaya loonongendi. Nangona ndacela ukumbonisa ngokusuka eBhayibhileni isizathu sokumka kwam, akazange afune ukuphulaphula esithi: “Ukuba kukho into endifuna ukuyazi eBhayibhileni, ndiza kubiza ingcali yeBhayibhile!”
KwiCawa yamaKatolika bothuswa gqitha sisigqibo sam. Bandityhola ngokuziphatha okubi nokulahlekelwa ziingqondo. Noko ke, abantu abandaziyo babesazi ukuba ezo zityholo zibubuvuvu. Abantu endandisebenza nabo basabela ngeendlela ezahlukahlukeneyo. Abanye bakugqala oko njengesenzo senkalipho. Abanye baba buhlungu, becinga ukuba ndiyalahleka. Abanye baba novelwano.
NgoJulayi 4, 1985, ndayishiya iCawa yamaKatolika. Ekubeni amaNgqina ayeyazi indlela abaphathwa ngayo abanye abayeka icawa, esoyikisela ubomi bam andizimelisa kangangenyanga. Ayendilanda ngenqwelo-mafutha siye kwiintlanganiso aze aphinde aye kundibeka apho ndihlala khona. Ndazimela de wehla umoya. NgoAgasti 1, 1985, ndaqalisa ukuba nenxaxheba kubulungiseleli bamaNgqina kaYehova.
Ukuya kwam kwiNdibano YeSithili yamaNgqina kaYehova kamva kuloo Agasti, amajelo eendaba eva ukuba ndiyekile ukuhamba icawa aza azisasaza ezo ndaba. Ekubhaptizweni kwam ngoDisemba 14, 1985, ijelo likamabonwakude nephephandaba lasekuhlaleni lavakalelwa ukuba ndenza into engaqhelekanga ngoko, lakusasaza ngokuphindaphindiweyo oko, lifun’ ukuqinisekisa ukuba wonk’ ubani uyeva ngako.
Kwikhaya loonongendi, ndaphuma ndiyimpula kaLujaca. Ndandingasebenzi, ndingenakhaya yaye ndingafumananga mali yomhlala-phantsi. Ngoko kangangonyaka, ndanyamekela umntu owayefe amalungu omzimba. NgoJulayi 1986, ndaba nguvulindlela, indlela ababizwa ngayo abalungiseleli bexesha elizeleyo bamaNgqina kaYehova. Ndafudukela komnye ummandla owawunebandla elincinane elalisandul’ ukumiselwa. Apho ndaqhuba iiklasi zangasese ndifundisa ulwimi nezinye izifundo, ngaloo ndlela ndisebenzisa imfundo endinayo. Oku kwandinceda ndaba nocwangciso olulungeleleneyo.
Ukukhonza Kwelinye Ilizwe
Ngenxa yokuba ngoku ndandifunde inyaniso yeBhayibhile, ndandifuna ukwabelana ngayo nabantu abaninzi kangangoko kunokwenzeka. Ekubeni ndandithetha isiFrentshi, ndacinga ngokuya kukhonza kumazwe athile aseAfrika athetha isiFrentshi. Kodwa ngowe-1992, amaNgqina kaYehova amkelwa ngokusemthethweni kwilizwe elikufuphi laseAlbania. Ekupheleni kwaloo nyaka, kwathunyelwa iqela elincinane loovulindlela baseItali ukuba liye kushumayela apho. Kwelo qela kwakukho uMario noCristina Fazio bebandla lam. Bandimema ukuba ndiye kubabona nokuze ndicinge ngokukhonza eAlbania. Ngoko ke, emva kokucingisisa nzulu nokuthandaza, ebudaleni beminyaka engama-52 ndaphinda ndashiya indawo eyayimi kakuhle ngandlel’ ithile ndaya kuziphosa kwimeko eyahlukileyo.
Ngoko kwakungoMatshi 1993. Ekufikeni kwam apho kwacaca kwangoko ukuba ndikwilizwe elahluke ngokupheleleyo nakuba lingekho kude kwelam. Apho abantu babehamba ngeenyawo nokuba bayaphi na, yaye babethetha isiAlbania, ulwimi endandingalwazi. Kwelo lizwe kwakusenzeka iinguqu ezinkulu, kutshintshatshintshwa iinkqubo zezobupolitika. Sekunjalo, abantu balapho babenxanelwe inyaniso yeBhayibhile, yaye babekuthanda ukufunda. Izifundo zeBhayibhile zazisenza inkqubela yokomoya ngokukhawuleza, yaye oku kwandivuyisa gqitha, kwandinceda ndaziqhelanisa nemeko yalapho.
Ngowe-1993, ukufika kwam eTiranë, isixeko esilikomkhulu salapho kwakukho ibandla elinye kuphela eAlbania yaye kwakukho amaNgqina angaphezulu nje kwe-100 awayethe saa kulo lonke elo. Kuloo nyanga, kwindibano ekhethekileyo yosuku olunye yokuqala eyaqhutywa eTiranë, kwakukho abantu abangama-585 yaye kwabhaptizwa abangama-42. Nakuba ndandingeva kwanto ithethwayo, kwandichukumisa gqitha ukuva amaNgqina ecula nokuwabona ephulaphule ngenyameko. NgoAprili kwabakho iSikhumbuzo sokufa kukaYesu Kristu, yaye kweza abantu abali-1 318! Ukususela ngoko aqhubeka esanda amaKristu eAlbania.
Ndandidla ngokuma kwiveranda yam ekumgangatho wesine eTiranë ndizibuze, ‘Siya kuze sifikelele nini kubo bonke aba bantu?’ UYehova uThixo wakunyamekela ngokwakhe oko. Ngoku kukho amabandla amaNgqina kaYehova angama-23 eTiranë. Kulo lonke elo lizwe, kukho amabandla angama-68 namaqela angama-22, anamaNgqina angama-2 846. Lonke olo lwando lwenzeke kwiminyaka embalwa nje kuphela! Yaye kwakukho abantu abangama-12 795 kwiSikhumbuzo sowama-2002!
Kule minyaka ilishumi ndiseAlbania, ndiye ndanelungelo elikhulu lokunceda ubuncinane abantu abangama-40 babhaptizwa. Abaninzi kubo ngoku bakhonza njengoovulindlela nakwezinye iintlobo zenkonzo yexesha elizeleyo. Kule minyaka, kuye kwathunyelwa amaqela amathandathu oovulindlela baseItali ukuba aye kuncedisa kumsebenzi owenziwa eAlbania. Qela ngalinye belinikwa iinyanga ezintathu zokufunda ulwimi lwalapho, yaye ndiye ndamenywa ukuba ndiye kufundisa kwiiklasi ezine zokugqibela.
Xa abahlobo bam beva ngesigqibo sam sokuyeka icawa, bothuka kakhulu. Noko ke, njengoko bebona indlela endizole nendiseluxolweni ngayo emva kwale minyaka, baye batshintsha isimo sengqondo bathamba. Okuvuyisayo kukuba, ndifumana inkxaso engathethekiyo kwintsapho yam, nakudadobawo wam oneminyaka engama-93 ubudala osengunongendi nangoku.
Oko ndathi ndamazi uYehova, uye wandinyamekela ukutyhubela iinzima ezahlukahlukeneyo! Wandalathisa intlangano yakhe. Nangoku ndisayikhumbula indlela endandikulangazelela ngayo ukunceda amahlwempu, nabasweleyo nomnqweno wokufuna ukuzibhokoxa ekukhonzeni uThixo. Kungenxa yeso sizathu ndimbulela uYehova, kuba uye waqinisekisa ukuba luyaneliswa unxano lwam lokomoya.
Ukuba ungayivuyela inkcazelo engakumbi okanye ungathanda ukuba uthile eze ekhayeni lakho ukuze akuqhubele isifundo seBhayibhile sesisa, nceda ubhale, uthumele igama nedilesi ohlala kuyo kule dilesi, AmaNgqina KaYehova, Private Bag X2067, Krugersdorp, 1740, South Africa, okanye kwidilesi efanelekileyo kwezidweliswe kwiphepha 5.
[Umfanekiso okwiphepha 31]
Intsapho yaseAlbania endandifunda nayo iBhayibhile. Abali-11 kuyo baye babhaptizwa
[Umfanekiso okwiphepha 31]
La mabhinqa ndiye ndafunda nawo iBhayibhile eAlbania, yaye ngoku inkoliso yawo ikubulungiseleli bexesha elizeleyo