Iimvakalelo Ezidakumbisayo—Ngaba Unokuzoyisa?
“UNOTSHE! iimvakalelo ezidakumbisayo zinamandla kakhulu. Akukho nto ndinokuyenza ngaphandle nje kokuzinyamezela zide zidlule.”
Leyo yindlela abaninzi abasabela ngayo kwimbono yokoyisa iimvakalelo ezinjengokuba nexhala, uloyiko, umsindo, unxunguphalo, ukuziva unetyala, ubuhlungu yaye udandathekile. Kodwa ezo mvakalelo zinako ukoyiswa. Kunokunikezela kuzo nanini na zivela, unokufunda ukunciphisa ubunzulu bazo, mhlawumbi ude uziphelise.
Kambe ke, kukho umahluko ophawulekayo ophakathi kweemvakalelo ezidakumbisayo eziqhelekileyo ezifunyanwa ngabo bonke abantu nodandatheko oluqatha. Udandatheko oluqatha lusenokufuna unyango. Iimvakalelo ezidakumbisayo azifuni nyango yaye zona ziziimvakalelo esinokufunda ukumelana nazo.
Kuyinyaniso ukuba, ayizizo zonke iimvakalelo ezidakumbisayo eziyingozi. Ngokomzekelo, xa usenza impazamo enzulu, usenokubonakalisa ukuzisola ngaloo mpazamo. Ukuba oku kukushukumisela ukuba uyilungise uze uphephe ukuyiphinda kamva, ngoko loo mvakalelo iye yaba nomphumo ofanelekileyo ohlala ithuba elide. Okanye inkxalabo eqhelekileyo osenokuba nayo ngengxaki isenokukushukumisela ekubeni ufune ngamandla ukuyithi qhwi uze ufune isicombululo esisengqiqweni. Nako oko kuyintsabelo efanelekileyo.
Noko ke, kuthekani ukuba emva kokuba wenze konke okusemandleni akho ukulungisa impazamo ethile, usaziva unetyala okanye ungento yanto, mhlawumbi oko kuzingise kangangethuba elide emva koko? Okanye kuthekani ukuba emva kokuba uyicombulule ingxaki kangangoko unako, ukukhathazeka kwakho kuhlala kuhleli yaye kuya kusiba nzulu? Ngoko intsabelo yakho engokweemvakalelo isenokukubangela ubandezeleke. Ngoko, unokuyoyisa njani loo ntsabelo ingokweemvakalelo? Isikhokelo sisenokufunyanwa ngokulawula indlela esicinga ngayo.
Sinako Ukulawula Ukucinga Kwethu
Abantu abaninzi abasebenza ngezigulo zengqondo bame ngelokuba iimvakalelo zethu zibangelwa ziingcinga zethu. Ngokomzekelo, uGqr. Wayne W. Dyer uthi: “Akunakuba nemvakalelo ngaphandle kokuba ucinge okuthile kuqala.” Ngokubhekele phaya uGqr. David D. Burns uthi: “Zonke iimvakalelo ezimbi onazo zingumphumo wokucinga okuphosakeleyo nokugqwethekileyo.”
Okubangel’ umdla kukuba, ngokufanayo iBhayibhile ithi inkoliso yendlela esivakalelwa ngayo ibangelwa yindlela esikhetha ukucinga ngayo, ngoko ibethelela imfuneko yokulawula ukucinga kwethu. Phawula iindinyana ezilandelayo:
“Yonke imihla yosizana mibi; intliziyo echwayithileyo inesidlo ngamaxesha onke.”—IMizekeliso 15:15.
“Ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.”—Roma 12:2.
“Iingqiqo zonke sizithimbela ekululameleni uKristu.”—2 Korinte 10:5.
“Nithi ngakwihambo yangaphambili nimlahle umntu omdala, . . . ; nihlaziywe ke kuwo umoya wengqiqo yenu, nimambathe umntu omtsha, othe ngokukaThixo wadalelwa ebulungiseni, nasebungcweleni benyaniso.”—Efese 4:22-24.
“Iinto zonke eziyinene, into zonke ezindilekileyo, iinto zonke ezibubulungisa, iinto zonke ezinyulu, iinto zonke ezithandekayo, iinto zonke eziludumo lulungileyo, ukuba kukho sidima, ukuba kukho ndumiso, zithelekeleleni [“hlalani nicinga,” NW] ezo zinto.”—Filipi 4:8.
“Iingqondo zenu zimiliseleni kwizinto zaphezulu, kungabi kwezasemhlabeni.”—Kolose 3:2, TE.
Ekubeni iimvakalelo zakho ngokuyintloko zibangelwa kukucinga kwakho, isikhokelo sokoyisa iimvakalelo ezidakumbisayo kukuthintela iingcinga ezixhasa ezo mvakalelo. Ngomgudu nexesha elaneleyo, unako ukufunda ukuzilawula ngakumbi iingcinga zakho. Ngoko ke ngokusengqiqweni oku kubonisa ukuba unako ukwenza okufanayo ngeemvakalelo zakho.
Kuyinyaniso ukuba kulula ukutsho ngomlomo sithi sinako ukuzoyisa imvakalelo zethu ezidakumbisayo. Kodwa enyanisweni ukukwenza oko kuyenye into. Ngoko, sinokuqhubeka njani sijamelana nezi mvakalelo zisenokusibangela ubunzima obukhulu kangaka?
[Amagama acatshulweyo akwiphepha 4]
Ayizizo zonke iimvakalelo ezidakumbisayo eziyingozi