Indlela Abanye Abaye Bafunda Ngayo Ukoyisa Iimvakalelo Ezidakumbisayo
MAXA wambi wonke uba-ni uba nazo iimvakalelo ezidakumbisayo. Ngenxa yeengxaki eziqatha, njengokugula okunzulu, ukwaluphala, okanye ukufelwa ngabathandekayo, bambi basenokuba neemvakalelo ezidakumbisayo ezendeleyo nezinokubuchaphazela ngokungenalusini ubomi babo.
Noko ke, kwanaphakathi kwabanjalo, bakho abo baye bafunda ukuzilawula ezi mvakalelo ukuze bakwazi ukuqhubeka nemisebenzi yabo yemihla ngemihla ngokunempumelelo. Nantsi imizekelo elandelayo yabo banjalo, njengokuba kuye kwadliwan’ iindlebe nabo liphephancwadi uVukani!
UJanis unyangwa isigulo esichaphazela iimvakalelo zakhe. Noko ke, uthi: “Ndafumanisa ukuba eyona ndlela inomphumo yokujamelana nale ngxaki kukulawula iingcinga zam. Oku ndikwenza ngokwenzela abanye abantu izinto, njengokubhaka nokuthunga. Kwakhona ndenza unako nako wokuhlala ndikhumbula izinto ezonwabisayo neziganeko zexesha elizayo endikhangele phambili kuzo. Ngenxa yesigulo endinaso, konke oku akuyondlwan’ iyanetha. Maxa wambi bekusiba lula ukunikezela ndize ndive ubuhlungu. Kodwa imiphumo emihle iwufanele umgudu.”
Emva kweminyaka engama-45 betshatile, indoda kaEthel yafa. Nangona engazange angabi buhlungu, uEthel uyakwazi ukulawula iimvakalelo zakhe. Uthi: “Ndizixakekisa ngokwenzela abanye izinto. Ngokomzekelo, ndiyakunandipha ukufundisa abanye ngeenjongo zikaThixo ezifumaneka eBhayibhileni. Elinye inenekazi eliselula lavuyiswa kakhulu zizinto ezilungileyo elalizifunda kangangokuba uxabiso lwalo lwandinceda ndavuya ngakumbi. Njengokuba ndinikela ingqalelo kwizinto ezakhayo eziseBhayibhileni ukuze ndifundise abanye, kuyandinceda ndikhuphe iingcinga eziphosakeleyo engqondweni yam. Kwakhona, amabhinqa aselula ayeza kum aze kufuna uncedo kwiingxaki zawo ezahlukahlukeneyo, kwaye ukuthetha ngezinto ezifanelekileyo abanokuzenza ebomini babo kukwandinceda ndoyise iimvakalelo ezidakumbisayo.”
Kangangeminyaka emininzi uArthur wayephila ubomi obuxakekileyo, ekhuthele. Ngoko, ngenxa yokugula okunzulu, kwafuneka ayeke umsebenzi wempangelo kwaye azisikel’ umda kuyo yonke imisebenzi yangaphandle kwekhaya. Kangangeenyanga ezininzi uArthur wayeziva engento yanto yaye edandathekile. Wazisingatha njani ezi mvakalelo? “Ndayeka ukube ndicingana noko ndingasenakukwenza. Kunoko, ndaphethulel’ ingqalelo koko ndinokukwenza ukunceda abanye abantu baphucule ndize ndibakhuthaze xa bedandathekile. Njengokuba ndikuloo miqathango ekhayeni lam, ndiwusebenzisa kakhulu umnxeba. Njengokuba ndaye ndaxakeka ekuncedeni nasekukhuthazeni abanye, ndaba nexesha elincinane lokuzisizela.”
Emva kongcelele lwamanqam, aquka ukufa kwendoda yakhe, kuyaqondakala ukuba uNita waba nentlungu nodandatheko oluqatha. Ekuhambeni kwexesha wafunda ukuzilawula ezo mvakalelo: “Xa imvakalelo yobuhlungu iqalisa, ndifuna indlela eyakhayo yokuyiphepha. Ndiyazinyanzela ukuba ndihambahambe, nditsalele umnxeba umhlobo onobubele, ndiphulaphule umculo, okanye ndenze nayiphi na into endiyaziyo ngokusuka kumava ukuba iya kuluthomalalisa udandatheko. Ndizama ukuziphatha ngovelwano njengokuba bendiya kwenza kumhlobo olungileyo.”
UMary waye wagula ngokuqatha kangangeminyaka engama-32. Ugogeke kwisitulo esinamavili, uphuma ekhaya kuphela xa esiya kwagqirha. UMary uzilondoloza njani ukuba angakhathazwa kukudimazeka? Uthi: “Indoda yam iye yaba lolona ncedo. Kwakhona, ndisoloko ndifunda imibandela eyakhayo. Nditsalela umnxeba abahlobo bam rhoqo ndize ngokufuthi ndibe ngowokuqala ukubamemela ekhayeni lam. Ndiyawanandipha amatyelelo abo yaye loo mathuba andiwasebenziseli ukukhalaza okanye ukuzisizela. Andichithi xesha ndicingana nezinto ezingahambi kakuhle ebomini bam ngenxa yokuba ndinezinto ezininzi ezifanelekileyo endinomdla kuzo.”
UMargaret ngokwemvelo ucinga izinto zokwenene. Uthi: “Xa iimvakalelo ezidakumbisayo zivela, ndifuna ukunxulumana nomntu ocinga ngokufanelekileyo—kungekhona olandela iingcamango—kodwa uthile ondazi kakuhle noza kundikhumbuza ngeempumelelo zam aze andikhuthaze.”
URose Marie kwiminyaka edluleyo waye wafumana uqhaqho izihlandlo ezihlanu, yaye kutshanje kwithuba elingangonyaka onesiqingatha yena nendoda yakhe baye bafelwa izihlandlo ezisixhenxe kwiintsapho zabo. Ngokuqinisekileyo, ingcinezelo yoku yabangela iimvakalelo ezidakumbisayo. Noko ke, abahlali becingana nezo zinto. NjengamaNgqina kaYehova, balondolozwe lithemba elifanelekileyo nelithuthuzelayo elinikelwa yiBhayibhile elingehlabathi elitsha lobulungisa elisondelayo apho uThixo ‘aya kuzisula iinyembezi emehlweni abo, kungabi sabakho kufa kungabi sabakho nasijwili nakukhala nantlungu.’ Kwanabafileyo baya kuvuswa, kunjengokuba uYesu wathi, “Kuza ilixa abaya kuthi ngalo bonke abasemangcwabeni balive ilizwi [loNyana kaThixo] baphume ke.”—ISityhilelo 21:4; Yohane 5:28, 29.
[Umfanekiso okwiphepha 9]
UJanis ulawula iimvakalelo zakhe ngokwenzela abanye izinto, ngokuhlala ekhumbula izinto ezonwabisayo nokukhangela phambili kwiziganeko zekamva