Abantu Abaselula Bayabuza . . .

Ndinokuyeka Njani Ukusela?

“Ndandisoloko ndingaziva mnandi ngosuku olulandelayo, ngokweemvakalelo nangokwasemoyeni!”—Bob.

“Ndandisoloko ndisenkathazweni ekhaya, esikolweni, nabahlobo kunye nabakwantsasana!”—Jerome.

UBOB noJerome baba sezinkathazweni ngenxa yokusela utywala ngokugqithiseleyo nangokufuthi. Bobabini bakhotyokiswa butywala. Yaye ngoxa uBob ekugqibeleni wakwazi ukukuyeka ngokupheleleyo ukusela, uJerome usazama ukuwoyisa lo mkhwa wokukhotyokiswa butywala.

Ukukhotyokiswa butywala yingxaki eyandayo phakathi kwabantu abaselula kwimimandla emininzi yehlabathi. Bambi bathelekelela ukuba eUnited States kuphela, ngabaselula abamalunga nezigidi ezihlanu abanengxaki enzulu yokusela. Noko ke, ukuba ungumKristu oselula, alithandabuzeki elokuba uye wakuphepha ukulinga ukusela utywala, ngokukodwa ukuba ukusela kwabeshumi elivisayo kuchasene nomthetho wendawo ohlala kuyo. Sekunjalo, le nkcazelo ilandelayo inokukunceda ekomelezeni isigqibo sakho sokungaqalisi kwaukuqalisa ukubandakanyeka ekuseleni—ubuncinane de ube umdala yaye ukulungele ngakumbi ukumelana nako. Kodwa ukuba ungomnye osele ekhotyokisiwe butywala, sinethemba lokuba le nkcazelo iza kukunceda ukuba ulwe nale ngxaki. Ngomgudu wokwenene owenzayo nangoncedo lukaYehova uThixo, unako ukuchacha.

Ukoyisa Ukukhanyela

Inyathelo lokuqala nelona linzima omele ulithabathe lelokoyisa ukukukhanyela oku. Ngokuqhelekileyo amakhoboka otywala akavumi ukukholelwa ukuba anayo nayiphi na ingxaki ngokusela. ‘Ndinokumelana nako,’ leyo yindlela ebangel’ usizi elizigwagwisa ngayo ikhoboka lotywala. Ngokomzekelo, khawucinge ngomnye oneminyaka eli-15 ubudala owathi: “Andilonxila eliyingxaki noko. Ndisela nje iinkonkxa ezithandathu kuphela zebhiya ngobusuku.” Sikhunjuzwa ngenkcazelo eseBhayibhileni yomntu “ozibone emsulwa kakhulu emehlweni akhe ukuba angafumana ubugwenxa bokuba abuthiye.”—INdumiso 36:2, NW.

Ewe, ukukhanyela kuyatshabalalisa. Ngoko ukuba unengxaki yokusela, umele uyivume loo nyaniso nokuba iyakrakra.a Musa ukubatyeshela abahlobo, abantakwenu okanye abazali bakho abakuxelela ukuba usela ngokugqithiseleyo. Abazizo iintshaba zakho kuba bekuxelela inyaniso. (Thelekisa amaGalati 4:16.) UBob (ekukhankanywe amazwi akhe ekuqaleni) wayedla ngokusela ngokugqithiseleyo ngempela-veki nganye. Xa umhlobo wakhe wathetha naye ngale nto, uBob waphika walala ngomqolo ukuba wayenengxaki yokusela, yaye wayiphelisa ingxoxo. Kodwa utywala babuyichaphazela njani impilo kaBob? UBob uyavuma esithi: “Ndandidandatheka gqitha xa ndingaselanga yaye ndandingalawuleki xa ndisele. Ubomi bentsapho yam babahlulelene—njengoko kwakunjalo nangolwalamano lwam noThixo.”

Ngesinye isihlandlo, ekugqibeleni uBob wayeka ukuyikhanyela imeko yakhe waza wavuma kumhlobo wakhe ukuba ngenene wayebulangazelela ngamandla utywala. Emva kokuba ewususile umqobo wokukhanyela, uBob wakwazi ukuphucula imeko yakhe.

Zimisele Ngokuqinileyo Ukuyeka

UNjingalwazi uGeorge Vaillant ubhala ukuba: “ukukhotyokiswa butywala . . . kuyanyangeka ngokuphumelelayo kakhulu, kodwa . . . oko kuya kuxhomekeka ikakhulu kumguli.” Oko kuquka ukuzimisela kwakho ekuyekeni ukusela utywala. Ukungakwazi ukwenza isigqibo esiqinileyo kunokuthetha ukuphila—nokufa—njengekhoboka lotywala. Yintoni enokunceda? Ukucingisisa nzulu ngentshabalalo ebangelwa kukukhotyokiswa butywala kunokukunceda ukuba ‘uthiye okubi’ yaye kunokomeleza isigqibo sakho sokuyeka ngokupheleleyo ukusela.—INdumiso 97:10.

Ngokomzekelo, usenokucinga ngokubanzi ngomonakalo omkhulu obangelwa kukukhotyokiswa butywala emzimbeni, ngokweemvakalelo, nangokokuziphatha. Kuyavunywa ukuba, isiselo esinxilisayo sinokubonakala siyidambisa okwexeshana intlungu okanye iimvakalelo zokungabi nto yanto onazo ngaphakathi. Kodwa ekugqibeleni, ukuxhomekeka etywaleni ngokucacileyo kudala iingxaki ezingakumbi; ubuhlobo buyaphela, yaye ulwalamano lwentsapho luba buthathaka. Ngokubhekele phaya, kuba utywala bukwenza uzive ungenantloni kangako, ngokulula ‘bunokuyiwexula intliziyo’ buze bukukhokelele ekuziphatheni okubi okunzulu.—Hoseya 4:11.

Kwakhona, khawucinge ngoko kunokwenziwa butywala obuninzi emzimbeni wakho, butyhefa ngokuthe ngcembe amalungu abalulekileyo omzimba wakho. Ngaloo ndlela iBhayibhile ithi ukusela ngokugqithiseleyo kuphumela ubuncinane kokungakumbi ‘kunokungonwabi, ekuzisoleni, kwiingxabano, kumaxhala, nasekubeni namanxeba.’ (IMizekeliso 23:29, 30, The New English Bible) Ngaba naluphi na uyolo lokomzuzwana olufumanayo liwufanele lo mvuzo?

Kwakhona kusenokuba luncedo ukuzikhumbuza ukuba akufuneki ukuba ude usele ukuze wonwabe. Kungafuneki nokuba ude ube semqheleni ukuze ube nokuzihlonela, ube sempilweni entle, ube nabahlobo abanyanisekileyo, nokuba nentsapho enothando. Impumelelo kwezi nkalo zobomi ifumaneka ngokusebenzisa iLizwi likaThixo. (INdumiso 1:1-3) Elo Lizwi likwakunika ithemba ngekamva eliqaqambileyo—ubomi obungunaphakade obungenayo intlungu engokwemvakalelo okanye engokomzimba! (ISityhilelo 21:3, 4) Kanti ukuba nethemba elinjalo kusesinye isizathu sokuba ubuyeke utywala.—Thelekisa eyoku-1 yabaseKorinte 6:9, 10.

Fumana Uncedo

Noko ke, ngokuqhelekileyo ukuba nomnqweno nje wokuphucula akwanele. Kwakhona kuya kufuneka ufumane inkxaso noncedo lwabanye. UKumkani uSolomon wathi: “Kulungile ukuba babe ngababini kunokuba abe mnye. Ngokuba xa bathe bawa, omnye unokumphakamisa uwabo.” (INtshumayeli 4:9, 10) Ukuthemba uthile wokukunceda ngengxaki yakho akuyi kuba lula. Kodwa ikhoboka lotywala eliphuculayo elibizwa ngokuba nguKaty linikela eli cebiso: “Zifundise ukubathemba abantu, ngokungakumbi intsapho yakokwenu.” Ewe, kwiimeko ezininzi intsapho yakokwenu ikwimo elunge ngakumbi yokubonakalisa kuwe uthando ize ikunike inkxaso oyifunayo.

Enyanisweni, imeko yentsapho yakokwenu isenokuba ifake isandla ekubandakanyekeni kwakho okokuqala ekuseleni. Kodwa ukuba abazali bakho bebenziwe bayiqonda imeko yakho, ngaba bebengayi kubona kuyimfuneko ukuziphucula izinto ekhaya? Ngoko kutheni ungazami ukuthetha nabazali bakho, ubazise ukuba unengxaki enzulu? Kunokuba ubabek’ ityala, cela uncedo nenkxaso yabo. Ukuba ngokhululekileyo nonyanisekileyo kubazali bakho kuya kuyinceda intsapho yakowenu ukuba ‘imanyane ngemvisiswano’ kanye njengokuba injalo indlu kaThixo. (Efese 4:16, NW) Ngale ndlela nonke ninokuqalisa ukusebenza kunye ukuze niphucule ngokuphumelelayo.

Ukuba inkxaso evela entsatsheni ayifumaneki, abanye banokunceda.b (IMizekeliso 17:17) UBob wafumana umhlobo ongumdala ongumKristu owayesiza kuye veki nganye ixesha elingaphezu kweenyanga eziliqela ukuza kuhlola inkqubela yakhe. UBob uthi: “Umdla nenyameko yakhe kum ezo zinto zandenza ndafumana ukuzixabisa endandikufuna ukuze ndiyeke umkhwa wam ongalunganga.”—Yakobi 5:13, 14.

Ngaphezu koko, qonda ukuba ufuna uncedo lukaYehova uThixo. Yayama ngaye ukuze ufumane amandla. Ewe, ngoncedo lukaThixo “abaphuke intliziyo” banokuba namava ‘okuphiliswa nokubotshwa amanxeba’ nguYehova.—INdumiso 147:3; kwakhona bona INdumiso 145:14.

Fumana Abahlobo Abatsha

Kuhlolisiso olwenziwa eNew Zealand kwanikelwa ingxelo yokuba abahlobo bayeyona mpembelelo inamandla kulutsha olusebenzisa kakubi utywala. Ngoko ke, uya kukufumanisa kunzima ukuyeka ukusela ukuba uzinxulumanisa nabantu abaselayo. Ngenxa yesi sizathu iBhayibhile ibongoza isenjenje: “Musani ukuba phakathi kwamasela-wayini.” (IMizekeliso 23:20) Zenzele abahlobo abatsha, abakhayo. Kanye njengoko kuyinyaniso ukuba “unxulumano olubi lonakalisa imikhwa elungileyo,” abahlobo abalungileyo bayimpembelelo eyakhayo.—1 Korinte 15:33.

UKim wakufumanisa kuyinyaniso oku. Uyavuma esithi: “Kwakunzima, kodwa kwafuneka ndibatshintshile abahlobo endandinabo . . . Ndandingafuni nokuphinda ndibubone utywala okanye iziyobisi.” Kuyavunywa ukuba, kusenokubonakala kunzima ukufumana abahlobo abangaseliyo. Noko ke, uya kufumanisa ukuba ulutsha olungumzekelo oluphakathi kwamaNgqina kaYehova alubandakanyeki ekuseleni ngokungekho mthethweni. Lungaxhomekekanga etywaleni njengomthombo wokuzonwabisa okanye wokubaleka iingxaki. Ngoko ke lunokukunceda—lungakuthinteli—kwimigudu yakho ‘yokuhluba umntu omdala kunye nezenzo zakhe.’—Kolose 3:9.

Unako Ukuphucula!

Ukuhlala ngaphandle kokusela utywala kuya kuba ngumlo osoloko ukho kuwe. Maxa wambi ukuzikhwebula ngokupheleleyo etywaleni kusenokuba nzima gqitha. UAna wavuma esithi: “Ndisaziva ndinyanzelelwa [ekuseleni] kakhulu, ingakumbi xa ndinomsindo, ndinxunguphele, ndidandathekile okanye ndibuhlungu.” Ngaloo ndlela akunto ingaqhelekanga ngekhoboka eliphuculayo lotywala ukuba lizive libuyel’ umva, nto leyo ekhokelela ekugutyungelweni ziimvakalelo zokuziva linetyala. Ukuba oko kungenzeka, khumbula ukuba “siyakhubeka kaninzi sonke.” (Yakobi 3:2) Kwakhona, khumbula nokuba, uYehova nguThixo wenceba obuqondayo ubuthathaka bakho.—INdumiso 103:14.

Sekunjalo, kulumkele ukubusebenzisa kakubi ububele bukaThixo. Funda kwimpazamo oyenzileyo, yaye uzimisele ngakumbi kunangaphambili ukuba ungabuyel’ umva kwakhona. Ngokubonisa uzimiselo olunjalo, uBob wakwazi ukuyeka ukusela. Ukususela ngoko, uye wakwazi ukunandipha ulwalamano oluseluxolweni nentsapho yakowabo kunye noThixo. Ubomi bakhe obonwabisayo ngoku buquka inkonzo yakhe njengomlungiseleli wexesha elizeleyo. Nawe ngokufanayo, uya kuba kwimeko yolonwabo nokuba noxolo lwengqondo, ukuba uyaphumelela kumlo nxamnye notywala.

[Imibhalo esemazantsi]

[Umfanekiso okwiphepha 16]

Amakhoboka otywala aselula atyekele ekuyikhanyeleni into yokuba anengxaki