Ucwangciso-ntsapho—Imbono YamaKristu

NGOWE-1974 kwiNgqungquthela yokuqala Yehlabathi Ngemibandela Yabemi, amazwe ali-140 awayelapho agqiba kwelokuba zonke izibini ezitshatileyo “zinelungelo elisisiseko lokugqiba ngokukhululekileyo nangokunembopheleleko ngenani nangethuba eliphakathi kokufumana abantwana nelokufumana inkcazelo, imfundo nezinto zokwenjenjalo.”

Abaninzi basigqala eso sigqibo njengesilungileyo. Kuyinyaniso ukuba, uThixo waxelela uAdam noEva waza kamva waxelela intsapho kaNowa oku, “qhamani, nande, niwuzalise umhlaba,” kodwa awukho umthetho onjalo owawunikelwe kumaKristu. (Genesis 1:28; 9:1) IZibhalo azizikhuthazi izibini ezingamaKristu ukuba zibe nabantwana zingatsho nokuba mazingabi nabo. Izibini ezitshatileyo zisenokuzenzela izigqibo zokuba zibe nabantwana okanye zingabi nabo zize, ukuba ziceba ukuba nabantwana, zigqibe ngenani nexesha eziya kubafumana ngalo.

Imbopheleleko Enikelwe NguThixo

Noko ke, ngaba uye waphawula ukuba ingxelo kwiNgqungquthela Yehlabathi Ngemibandela Yabemi yathi izibini ezitshatileyo zifanele zenze isigqibo “ngokunembopheleleko ngenani nangethuba eliphakathi kokufumana abantwana”? Kwakhona lo mgaqo ungembopheleleko ukwavisisana neBhayibhile. Abazali abangamaKristu bayaqonda ukuba nakubeni abantwana besisipho esixabisekileyo esivela kuThixo, eso sipho sihamba nembopheleleko enkulu.

Okokuqala, kukho imbopheleleko yokunyamekela abantwana ngezinto eziphathekayo. IBhayibhile ithi: “Ukuba ke umntu akabakhathelele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.”—1 Timoti 5:8.

Ukulungiselela intsapho kabani kubandakanya okungakumbi kunokubeka nje ukutya etafileni nokuhlawula amatyala, nakubeni oku ngokufuthi kungumsebenzi omkhulu kukodwa. Izibini ezitshatileyo ezingamaKristu eziyikhathaleleyo imbopheleleko, ekucebeni ubukhulu beentsapho zazo, ziqwalasela impilo-ntle kamama engokwasemzimbeni ndawonye nempilo-ntle yakhe engokweemvakalelo, engokwasengqondweni neyokomoya. Ukunyamekela umntwana kuthabatha ixesha elininzi kakhulu, yaye xa abantwana bengumkrozo omnye emva komnye, oomama ngokufuthi bancama kungekuphela nje ixesha labo lokuphumla, lokuzihlaziya, lenkqubela phambili yobuqu nelokubandakanyeka kwimisebenzi yobuKristu kodwa kwanempilo engokwasemzimbeni neyokomoya.

Abazali abangamaKristu abayikhathaleleyo imbopheleleko yabo bakwaqwalasela iintswelo zabantwana babo. IThe State of the World’s Population 1991 ithi: “Abantwana abazelwe bebaninzi, kwiintsapho apho abantwana bangxulelwayo kuye kufuneke baphangelane nabantakwabo noodade wabo ngokutya, bakhuphisane ngempahla baze bamonelane ngokuthandwa ngabazali. Kukwayinto elula ngokungakumbi ukuba bangenwe zizifo ezasulelayo. Ukuba aba bantwana bayasinda kwiminyaka yabo yobuntwana yokuchanabeka, kunokwenzeka ngakumbi ukuba badodobale ekukhuleni yaye ukukhula kwabo ngokwasengqondweni kuphazamiseke. Amathemba aba bantwana xa bengabantu abakhulu amfiliba kakhulu.” Kambe ke, oku akunjalo kuzo zonke iintsapho ezinkulu, kodwa yinto izibini ezitshatileyo ezingamaKristu ezifanele ziyiqwalasele xa zicwangcisa inani labantwana eziza kuba nabo.

Abazali abangamaKristu banembopheleleko yokunyamekela abantwana babo ngokomoya, njengoko iBhayibhile iyalela: “Nani boyise, musani ukubacaphukisa abantwana benu; bondleleni ekuqeqesheni nasekululekeni kweNkosi.”—Efese 6:4.

UEmeka, umKristu ongumhlohli wezomthetho eNigeria, unonyaka etshatile yaye akakungxamelanga ukuba nguyise wentsapho enkulu. “Mna nomkam siye saxubusha ngenani labantwana esiya kuba nabo. Siye sacinga ngokuba nabahlanu kodwa sigqibe kwelokuba babe bathathu. Kamva sigqibe kwelokuba ababini baya kuba balunge ngakumbi. Ukukhulisa abantwana ngokwemigaqo yeBhayibhile akuyondlwan’ iyanetha. Kuyimbopheleleko enkulu.”

Zimbi izibini ezitshatileyo ezingamaKristu ziye zagqiba kwelokuba zingabi nabantwana ukuze zinikele lonke ixesha lazo ekukhonzeni uThixo. Omnye umvangeli wasemazweni eAfrika owavumelana nomyeni wakhe ukuba bahlale bengenabantwana wathi: “Andivakalelwa ngokungathi kukho into endiphosayo ngokungabi nabantwana. Nangona mna nomyeni wam singakhange sibe novuyo lokuba ngabazali, ubomi bethu bebuzeliswe zezinye izinto ezivuyisayo. Ngokubandakanyeka ekuncedeni abanye bafunde inyaniso yeBhayibhile, sinabantwana bokomoya kwiindawo ezininzi zehlabathi. Siyabathanda, yaye nabo bayasithanda. Kukho umanyano olukhethekileyo phakathi kwethu. Ngesizathu esilungileyo, umpostile uPawulos wazifanisa nomdlezana ngenxa yothando awayenalo ngabo wayebancedile ngokomoya.”—1 Tesalonika 2:7, 8.

Uqingqo-nzala

Ngaba iBhayibhile iyalwalela uqingqo-nzala? Hayi, ayilwaleli. Ukhetho luyekelwa kwisibini esitshatileyo eso. Ukuba isibini esitshatileyo sigqiba kwelokuba sisebenzise uqingqo-nzala, ukhetho lwaso lwezinto zokuthintela ukukhawula ngumbandela wobuqu. Noko ke, inkqubo yoqingqo-nzala ekhethwa sisibini esitshatileyo esingamaKristu ifanele ilawulwe kukuhlonela ubungcwele bobomi. Ekubeni iBhayibhile ibonisa ukuba ubomi bomntu buqalisa ekukhawulweni, amaKristu ebeya kuziphepha iinkqubo zezinto zokuthintela ukukhawula eziqhomfayo, okanye eziphelisa ubomi bomntwana osakhulayo.—INdumiso 139:16; thelekisa iEksodus 21:22, 23; Yeremiya 1:5.

Ngoko ngokufanelekileyo izibini zinokwenza ukhetho olwahlukahlukeneyo xa kufikelelwa kumbandela wocwangciso-ntsapho. Zimbi zisenokunqwenela ukulinganisela inani labantwana eziya kuba nabo. Ezinye, zisebenzisa izinto zokuthintela ukukhawula, zisenokugqiba kwelokuba zingabi nabantwana kwaphela. Iinkqubo ezininzi zoqingqo-nzala ziyafumaneka, nganye ineengenelo neengxaki zayo. Ekwenzeni isigqibo ngenkqubo ezilungeleyo, izibini zifanele zikhumbule ukuba zimbi iinkqubo zisebenza kakhulu kunezinye. Zikwafanele zibuze nangezinto ezizezinye ezinokwenzeka. Oogqirha neekliniki zocwangciso-ntsapho zikulungele ukunikela icebiso mayela neenkqubo zoqingqo-nzala zize zincede izibini ukuba zikhethe eyona inokuhlangabezana neentswelo zazo.

Isigqibo isibini esisenzayo sokuba nabantwana abaninzi, abambalwa, okanye ukungabi nabo sesobuqu. Sikwasisigqibo esibalulekileyo esinemiphumo emininzi eyahlukahlukeneyo. Izibini ezitshatileyo bekuya kuba bubulumko ngazo ukuba ziwuhlolisise ngenyameko lo mbandela nangomthandazo.

[Ibhokisi ekwiphepha 30, 31]

Iinkqubo Ezaziwayo Zoqingqo-nzala

Ukuzenza Idlolo

Emadodeni: Inkqubo yotyando olungephi apho kusikwa kancinane isingxobo samasende kuze kuqhawulwe imibhobho ethwala amadlozi.

Kumabhinqa: Inkqubo yotyando ekuthi kuyo imibhobho yesibeleko iqhinwe okanye iqhawulwe ukuze kuthintelwe iqanda lingadluleli esibelekweni.

Iingenelo: Kuzo zonke iinkqubo zoqingqo-nzala; ukuzenza idlolo kuyeyona isebenzayo.

Iingxaki: Kunokuba sisigxina. Kumadoda nakumabhinqa, utyando luye lwababuyisela kwimeko yokukwazi ukufumana abantwana kwakhona, kodwa oku akunakuqinisekiswa.a

Iipilisi Zoqingqo-nzala

Ezi ziquka iiprogestin-only minipill. Ziphazamisa imilinganiselo eqhelekileyo yokukhutshwa kwencindi yedlala lebhinqa ukuze zithintele iqanda ukuba lingakhuli okanye likhutshwe.b

Iingenelo: Zisebenza kakhulu ekuthinteleni ukukhulelwa.

Iingxaki: Kubakho imiphumo eyiyeminye engokwasemzimbeni kodwa iba mincinane kubantu abangaphantsi kweminyaka engama-40 abasempilweni abangatshayiyo.

IDiaphragm Nezinto Zokubulala Amadlozi

Idiaphragm yirabha engqukuva emile okwekomityi etwatyululwa phezu komphetho othambileyo. Emva kokuthambisa ijeli okanye ucwambu olubulala amadlozi (izinto zokubulala amadlozi) kuloo nto imile okwekomityi, ifakwa kumjelo oya esibelekweni ukuze ingene ngokujikeleze umlomo wesibeleko.

Iingenelo: Luhlobo loqingqo-nzala olukhuselekileyo, oluthembeke ngokupheleleyo xa lusetyenziswe ngokufanelekileyo.

Iingxaki: Imele isetyenziswe onke amaxesha isibini sisiba neentlobano zesini. Kufuneka ubuchule ekufakeni esi sixhobo ngokufanelekileyo, yaye sifanele sifakwe ngaphambi kokuba neentlobano zesini size sishiywe apho iiyure ezintandathu ukuya kwezisibhozo emva koko.

ICervical Cap

Sisixhobo esenziwe ngeplastiki okanye ngerabha esimile okwekomityi nesincinane kunediaphragm. Njengediaphragm, sifakwa phezu komlomo wesibeleko kodwa sona sihlala kakuhle ngakumbi yaye sifuna ucwambu okanye ijeli encinane yokubulala amadlozi.

Iingenelo: Esi sivalo siyafana nediaphragm ngendlela esisebenza ngayo, yaye sinokushiywa apho kangangeeyure ezingama-48. Akuyomfuneko ukuba kusetyenziswe izinto zokubulala amadlozi xa kuphindwa iintlobano zesini.

Iingxaki: Kunzima ngakumbi ukusifaka kunediaphragm, yaye ukuma kwaso phezu komlomo wesibeleko kufanele kuhlolwe ngaphambi nasemva kwesenzo ngasinye seentlobano zesini. Kusenokubakho iingozi zezifo zesibeleko okanye zomlomo wesibeleko. Esi sivalo sifanele sifakwe kuphela ngamabhinqa aye axilongwa umhlaza (Pap test) aza afunyanwa engenawo.

Isiponji

Esi sisiponji esinezinto zokubulala amadlozi ezixutyiweyo esifakwa kumjelo oya esibelekweni ukuze sigqume umlomo wesibeleko, ngaloo ndlela sivalela amadlozi ngokoqobo nangokwemichiza. Siyakhutshwa emva kokusetyenziswa.

Iingenelo: Esi siponji sinokushiywa apho kangangeeyure ezingama-24 yaye siyasebenza ukuba iintlobano zesini ziye zaphindwa ebudeni belo xesha.

Iingxaki: Kuye kwanikelwa ingxelo yokuba oku akuvisisani nemizimba yabathile yaye neemeko ezimbalwa zokuba netoxic shock syndrome.

Isixhobo Sokuthintela Ukukhawula

Sikwabizwa ngokuba yi-IUD, iloop, okanye icoil, esi sisixhobo sesinyithi okanye seplastiki esifakwa phakathi esibelekweni. Nangona kusekho ukungaqiniseki ngendlela esisebenza ngayo, oogqirha bakholelwa kwelokuba sithintela ukukhawula ngeendlela ezahlukeneyo. Mhlawumbi enye yezi ndlela kukuthintela iqanda elihlangene nedlozi ukuba linganamatheli esibelekweni.

Iingenelo: Olu luhlobo loqingqo-nzala oluthembekileyo.

Iingxaki: Maxa wambi olu hlobo luphumela ekopheni okanye ekuveni iintlungu, yaye maxa wambi indlela olusebenza ngayo isenokufana nokuqhomfa.c

Iicondom

Sisingxobo ekufakwa kuso ilungu lesini lendoda ukuze sithintele amadlozi ukuba angangeni kumjelo oya esibelekweni.

Iingenelo: Yindlela ekhuselekileyo, esebenzayo yoqingqo-nzala. Inciphisa amathuba okudlulisela izifo ezidluliselwa ngeentlobano zesini, kuquka uGawulayo.

Iingxaki: Bambi abayithandi ngenxa yokuba ukuyisebenzisa kufuna ukuphazanyiswa kweentlobano zesini.

Ukukhutshwa

Ukukhutshwa kwelungu lesini lendoda kwilungu lesini lomntu obhinqileyo kanye ngaphambi kokuba kuphume amadlozi.

Iingenelo: Akufuni nkcitho, kulungiselela, okanye izixhobo ezingaphandle.

Iingxaki: Le ndlela ayanelisi ngokwesini, ifuna ukuzeyisa okukhulu, yaye ayithembekanga kakhulu.

Inkqubo Yokungabi Neentlobano Zesini Ngamaxesh’ athile

Ukungabi nantlobano zesini kwesibini ebudeni beentsuku zokuba sexesheni kwebhinqa (rhythm method) xa sele lilungele kakhulu ukuvelisa umntwana.

Iingenelo: Ikhuselekile, ayinamiphumo eyingozi esecaleni, ayifuni senzo sithile ebudeni bexesha lokuba neentlobano zesini.

Iingxaki: Asiyonkqubo iphumelela kakhulu ekuthinteleni ukukhulelwa ngaphandle kokuba isibini sizimisele kakhulu yaye sinamathela ngokungqongqo kwimiyalelo yale nkqubo.

Ukufakelwa Kwencindi Yedlala

Yinkqubo entsha kraca yoqingqo-nzala ethintela ukukhawula, ekuthi kuyo ungcelele lweesilinda ezincinane zesilicon zifakwe phantsi kwesikhumba sengalo yebhinqa. Ukuya kutsho kwiminyaka emihlanu, zona ngokuqhubekayo zikhupha imilinganiselo emincinane kakhulu yencindi yedlala egazini. Ebudeni beli xesha likhuselekile ekukhulelweni.

Iingenelo: Isebenza kakhulu. Amandla okuzala asenokubuyiselwa ngokushenxisa oko kufakelweyo.

Iingxaki: Zincinane gqitha. Ifana neepilisi iiprogestin-only zoqingqo-nzala (i-minipill). Xa kusetyenziswa incindi yeprogestin-only, kusenokwenzeka ukuba ukukhulelwa kuthintelwe ngeendlela zokuqhomfa.d

[Imibhalo esemazantsi]