Icandelo 6

Inzululwazi—Iphulo Elingapheliyo Loluntu Lokufuna Inyaniso

Ukuhlangabezana Nocelomngeni Lwenkulungwane Yama-21

SITHOBA, sibhozo, sixhenxe, uze uqhubeke usihla njalo! Ngaba sibalela ukunduluka kwesiphekepheke? Akunjalo, kunoko sibala iminyaka eseleyo ngaphambi kokuba uluntu lungene kwizinto ekungaqinisekwanga ngazo zenkulungwane yama-21.a

Ngokusekelwe koko kuphunyezwe yinzululwazi yenkulungwane edluleyo, abaninzi basenokukholelwa ngokunyanisekileyo ukuba inzululwazi inokuhlangabezana nalo naluphi na ucelomngeni olusenokuziswa yinkulungwane yama-21.b Basenokuvakalelwa ngendlela efana neyombhali ongumFrentshi ekuqaleni kwenkulungwane yama-20. Wabhala oku: “Inzululwazi namhlanje izimisele ukulawula ihlabathi. Ukususela ngoku ukusa phambili ulawulo lwehlabathi aluxhomekekanga kuthixo othile, kodwa kwinzululwazi, kwinzululwazi njengomncedi wabantu nanjengomkhululi woluntu.”

Ukuze inzululwazi izalisekise la mathemba ifanele iphelise uninzi lweengxaki eye yazibangela.

Umonakalo kwimekobume obangelwe yinzululwazi ube mkhulu kakhulu. Incwadi ethi 5000 Days to Save the Planet iyavuma: “Ukuba siyaqhubeka neli khondo lethu lokusetyenziswa kakubi kwemekobume, umbuzo awuthi ngaba ibutho labantu liya kusinda na kwinkulungwane elandelayo, kodwa ngaba liya kutshabalala ngesihlo esikhulu okanye ngokuthe ngcembe?”

Oku akubonakali kulukhetho olwamkelekileyo.

Oko Inzululwazi Ingenakukwenza

Incwadi ethi The Scientist ithi: “Izazinzulu ezininzi zenkulungwane ye-19 . . . ngokufuthi zazivakalelwa kukuba ngenye imini zaziya kufikelela inyaniso epheleleyo nokuqonda okugqibeleleyo.” Le ncwadi iyaqhubeka isithi, “Abalandeli bazo bathetha ngokufikelela kuphela ‘inxalenye yokuqonda,’ ngokusoloko besondela kwinyaniso kodwa bengade bayifikelele ngokupheleleyo.” Oku kuswela ulwazi olupheleleyo kukusikel’ umda ngokunzulu oko kunokwenziwa yinzululwazi.

Izibakala zenzululwazi azikhange ziguquke ukutyhubela iminyaka, ngoxa iingcamango zayo ziye zaguquka—yaye oku kusenzeka ngokuphindaphindiweyo. Enyanisweni, maxa wambi iingcamango zayo ziye zaguquka ngokupheleleyo ukusuka kwelinye icala ukuya kwelinye. Ngokomzekelo, izazinzulu kwezonyango zakha zacinga ukuba, ukukhupha igazi emzimbeni womntu ogula ngokungaginyisi mathe kwakuyinto eyeza nenzululwazi. Kamva zagqiba kwelokuba ukulifaka igazi kwakusesona sicombululo. Ngoku ezinye ziqalisa ukubuqonda ubulumko bokungenzi nanye kwezi zinto nobokuphanda ngolunye unyango ezinokulusebenzisa nolungelongozi.

Licacile elokuba, oko izazinzulu zikwaziyo kuncinane kakhulu kunoko zingakwaziyo. IThe World Book Encyclopedia ithi: “Iingcaphephe ngobomi bezityalo azikayazi ngokuthe ngqo indlela esebenza ngayo inkqubo yefotosintesi. Iingcaphephe zebhayoloji nezazi ngemichiza azikayifumani impendulo engemvelaphi yobomi. Izazi ngeenkwenkwezi azikayivelisi inkcazelo eyanelisayo ngemvelaphi yendalo iphela. Izazinzulu zonyango kunye neengcaphephe zenzululwazi yamalungu omzimba azimazi unobangela okanye indlela yokunyanga umhlaza okanye indlela yokunyanga iindidi ezahlukahlukeneyo zezifo ezibangelwa ziintsholongwane. . . . Iingcaphephe zezifundo ngengqondo yomntu azibazi bonke oonobangela bezigulo zengqondo.”

Inzululwazi ikwamiselwe umda ngengqiqo yokuba ayinakuzodlula izazinzulu. Ngamany’ amazwi, ukuswela kwesazinzulu ulwazi kubangelwa kukungafezeki kwaso. Ababhali bencwadi ethi 5000 Days to Save the Planet bafumanisa ukuba “ngokufuthi . . . iintlangano ezineenjongo ezikhethekileyo ziye zalusebenzisa kakubi uphando, zayigqwetha inkcazelo engenkcitho nenzuzo zaza zayifihla enye inkcazelo ngenjongo yokuthengisa imveliso eyingozi okanye ziqhubeke nemisebenzi eyonakalisa imekobume.”

Kwanaxa uninzi lwezazinzulu lunyanisekile, esi ayisosizathu sokuba zona okanye umsebenzi wazo uzukiswe. UEdward Bowen oyinzalelwane yaseBritani, okwasisazinzulu, uthi: “Ziyafana nje nabanye abantu. Zonke zinazo iintsilelo zazo. Ezinye zizinikele, zimbi azinyanisekanga, ezinye zikrelekrele kakhulu, zimbi zizityhakala. Ndazi abadume kakhulu kwezenzululwazi, amadoda enze izinto eziluncedo gqitha ehlabathini. Yaye ngoxa ndingazi nasinye isazinzulu esakha savalelwa entolongweni, ndazi ngezithile ebezifanele ukuba kudala zabanjwa.”

Ngokucacileyo, ngenxa yokuninzi engakufikeleliyo, inzululwazi yanamhlanje ayinakuhlangabezana nocelomngeni lwenkulungwane yama-21. Ngokukodwa iye yasilela ukukhusela imekobume, yaye kunokuba incedise ekupheliseni iimfazwe, iye yancedisa ekuveliseni izixhobo zokubulala abantu abaninzi ngaxeshanye.

Kufuneka Kwenziwe Okuthile Ngokukhawuleza

Wonk’ ubani uyavuma ukuba kukho okuthile okumele kwenziwe kamsinya. KuNovemba wonyaka odluleyo, iqela lezazinzulu ezili-1 575, kuquka ezingama-99 ezaphumelela ibhaso likaNobel, lapapasha inkcazelo enomxholo othi “Isilumkiso Sezazinzulu Zehlabathi Kuluntu” apho zabhala zisithi: “Akusekho mashumi eminyaka maninzi aseleyo ngaphambi kokuba ixesha lokuthintela izisongelo esijongene nazo liphele yaye amathemba oluntu aphele tu.” Zavuma zisithi: “Abantu nehlabathi elidaliweyo zikwindlela eya kungquzulwano.”

Izilumkiso ezifanayo zaye zahlokonyiswa ngaphambili. Enyanisweni, ngowe-1952, uBertrand Russell, isithandi-sobulumko saseBritani senkulungwane yama-20 naye owayexhasa inzululwazi, wathi: “Ukuba ubomi bomntu buza kuqhubeka phezu kwayo nje inzululwazi, uluntu kuya kufuneka lufunde ukuqeqesha iimvakalelo, nto leyo, kwixesha elidluleyo ebingeyomfuneko. Abantu kuya kufuneka bazithobe phantsi komthetho, kwanaxa becinga ukuba umthetho awukho sesikweni yaye awulunganga. . . . Ukuba oku akwenzeki uhlanga loluntu luya kutshabalala, yaye luya kutshabalala ngenxa yenzululwazi. Ukhetho olucacileyo lumele lwenziwe ebudeni beminyaka engamashumi amahlanu, ukhetho phakathi kweNgqiqo noKufa. Yaye ngokuthi ‘iNgqiqo’ ndithetha ukukulungela ukuzithoba phantsi komthetho njengoko umiselwe ligunya lezizwe ngezizwe. Ndiyoyika hleze uluntu lukhethe uKufa. Ndinqwenela ukuba ndibe kanti ndiyaphazama.”

Inyaniso ikukuba, abantu abakulungeleyo ukuhlala ngemilinganiselo yobulungisa kule mihla banqabile. Inkokeli eyayilwela amalungelo abantu engasekhoyo uMartin Luther King wakubeka ngokuchanileyo oku xa wathi: “Amandla ethu enzululwazi aye odlula amandla ethu ezinto zokomoya. Siye sajolisa imijukujelwa saza salahlekisa abantu.” Sekunjalo, uRussell engaqondanga wayesifumene isicombululo kwiingxaki zehlabathi xa wathi uluntu lumele “luzithobe phantsi komthetho njengoko umiselwe ligunya lezizwe ngezizwe.”

Ngubani Onokuyicombulula Le Ngxaki?

Enyanisweni, uBertrand Russell wayengabhekiseli kwigunya likaThixo xa wayethetha ngomthetho omiselwe ligunya lezizwe ngezizwe. Sekunjalo, ukuhlonela imithetho yegunya elinjalo yeyona nto ifunekayo. Imithetho yabantu namagunya abantu ngokuqinisekileyo awasiso isicombululo. Awanakuze aliguqule ihlabathi aze ngaloo ndlela akhusele intlekele. Ingxelo elusizi yembali ingqina ukuba uluntu lufuna ulawulo lukaThixo.c

Eneneni, nguThixo uSomandla kuphela, ogama linguYehova, onokunikela igunya lezizwe ngezizwe elinamandla nelinokukwazi ukuhlangabezana nocelomngeni lwenkulungwane yama-21. (INdumiso 83:18) Igunya bonke abamele bazithobe kulo ukuba bafuna ukufumana ubomi buBukumkani bukaThixo, obungurhulumente wehlabathi osezulwini owasekwa nguMdali, uYehova uThixo.

Kwakudala iBhayibhile yaxela kwangaphambili ngalo rhulumente: “Kuba sizalelwe umntwana, sinikwe unyana: yaye urhulumente uya kuba semagxeni akhe: yaye igama lakhe liya kuba . . . yiNkosana Yoxolo. Ukwanda korhulumente wakhe noxolo akuyi kuba nasiphelo.” (Isaya 9:6, 7, King James Version) Lo mntwana owaxelwa kwangaphambili, uYesu Kristu, wakhawulwa ngokungummangaliso yintombi enyulu uMariya waza wazalelwa eBhetelehem kwelakwaYuda.—Luka 1:30-33.

Ngoxa wayesemhlabeni uYesu wafundisa abalandeli bakhe ukuthandazela urhulumente kaThixo xa wathi: “Thandazani ngoko nina nenjenje: . . . Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:9, 10) Kuphela ngumoya oyingcwele onamandla kaYehova uThixo, okanye amandla akhe asebenzayo, onokunceda abantu abanomdla wokwenza iinguqulelo ezifunekayo ebomini babo ngokuvisisana nemithetho yobulungisa yorhulumente wakhe. Inzululwazi ayinako. Amawaka eminyaka empikiswano nokudideka angqina ukuba ayinako.

UYehova uThixo, onolwazi oluchanileyo olungasikelwanga mda lwenzululwazi, uya kuqinisekisa ukuba emhlabeni kubakho iimeko zeParadisi, kanye njengokuba zazinjalo kumyezo wase-Eden, xa wadala isibini sokuqala esingabantu. Ngelo xesha wabayalela oku: “Qhamani, nande, niwuzalise umhlaba niweyise.” (Genesis 1:28) Nangona bengazange bathobele baza abasiphumeza eso sabelo, uYehova uThixo uya kuqinisekisa ukuba injongo yakhe yantlandlolo yokuba lo mhlaba ube yiparadisi iyazalisekiswa. Uthi: “Nditshilo, ewe, ndiya kukufeza.” (Isaya 46:11) Kodwa iya kuzalisekiswa nini injongo kaThixo yantlandlolo ngalo mhlaba?

UYesu Kristu nabapostile bakhe bazichaza iimeko ezaziya kubakho emhlabeni “ngemihla yokugqibela,” kamsinya ngaphambi kokuba uBukumkani bukaThixo buthabathel’ indawo bonke oorhulumente babantu. (2 Timoti 3:1-5; Mateyu 24:3-14, 37-39; 2 Petros 3:3, 4) Xa ubani efunda ezi ziprofeto zeBhayibhile zicatshulwe apha aze azithelekise neziganeko zehlabathi, kuyacaca ukuba siphila kwixesha laxa uBukumkani bukaThixo buya kuthabatha isenzo esichazwe eBhayibhileni kuDaniyeli 2:44: “Ngemihla yabo kumkani [oorhulumente babantu abalawulayo ngoku], uThixo wamazulu uya kumisa ubukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade.”

Ubomi Kwikamva Elingekude

Khawufan’ ucinge oko kuya kuthethwa koku ngekamva elingekude! Ezinjani ukumangalisa izinto ezigcinelwe uluntu ebudeni benkulungwane ezayo, ukuba azenzekanga kwanangaphambi koko! Imiphumo emibi yamawaka eminyaka yolawulo olungafezekanga lomntu, unqulo oluhanahanisayo, urhwebo olubawayo nenzululwazi yeli hlabathi ziya kuthatyathelw’ indawo lulawulo lobuthixo, oluya kusikelela uluntu ngeentsikelelo ezingaphaya kolindelo lwalo.

Nantsi indlela iBhayibhile ezichaza ngayo iziganeko eziya kwenzeka ngokuqinisekileyo kwihlabathi lobulungisa likaThixo: “Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”—ISityhilelo 21:3, 4.

Ngoko ke, okona kubalulekileyo kuwe kukulumkela ixesha eliya kuphela kamsinya ngokutshatyalaliswa kwale nkqubo yehlabathi ephantsi kolawulo lomlawuli ongabonakaliyo wehlabathi onamandla, uSathana uMtyholi. (Yohane 12:31; 2 Korinte 4:3, 4) Kubalulekile ukuba ufunde oko kukuko ukuthanda kukaThixo uze ukwenze, kuba iBhayibhile iyathembisa: “Ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.”—1 Yohane 2:17.

Ngoko ke, okwangoku ixesha lisavuma, ngamana ungawasebenzisa ngokuyingenelo amalungiselelo kaYehova ukuze usinde. Uya kwandula ube nelungelo lokunandipha ubomi kwikamva, ewe, ebudeni benkulungwane yama-21 esondelayo—nasebudeni beyama-22, neyama-23 nezininzi ezilandelayo.

Ukuba, emva kokufunda eli phephancwadi, unayo nayiphi na imibuzo ngeBhayibhile, zive ukhululekile ukuqhagamshelana namaNgqina kaYehova kwiHolo yoBukumkani ekummandla okuwo, okanye ubhalele abapapashi beli phephancwadi. (Bona iphepha 5.)

[Imibhalo esemazantsi]

[Ibhokisi ekwiphepha 31]

Phakathi Kweendaba Ezimbi, Kukho Ezilungileyo

Phezu kwayo nje inkqubela yenzululwazi kusekho izihlwele zabantwana abalambayo nabantu abadala abangondlekanga. Kodwa kungekudala phantsi koBukumkani bukaThixo obungoMesiya, ‘kuya kubakho intabalala yengqolowa ezweni, ise encotsheni yeentaba.’—INdumiso 72:16.

Phezu kwayo nje inkqubela yenzululwazi ingcinezelo nogonyamelo ziseyingxaki yezigidi zabantu. Kodwa kungekudala uKumkani woBukumkani bukaThixo obungoMesiya “uya kulihlangula ihlwempu elizibikayo, nabaziintsizana abangenaluncedo. . . . Akhulule imiphefumlo yawo ekuxinezelweni nasekugonyamelweni.”—INdumiso 72:12-14.

Phezu kwayo nje inkqubela yenzululwazi inani labantu abangenamakhaya, abaswele iindawo zokuhlala nokutya okwaneleyo, liyaqhubeka lisanda ehlabathini lonke. Kodwa kungekudala phantsi koBukumkani bukaThixo obungoMesiya, abantu “baya kwakha izindlu, bazihlale . . . Abayi kwakha, kuhlale bambi; abayi kutyala, kudle bambi.”—Isaya 65:21, 22.

Phezu kwayo nje inkqubela yezonyango izifo ezinokukhuselwa ziyaqhubeka zibulala izigidi. Kodwa kungekudala phantsi koBukumkani bukaThixo obungoMesiya, “akayi kuthi ummi wakhona, Ndiyafa.”—Isaya 33:24.

[Umfanekiso okwiphepha 32]

Kuwo wonke umhlaba ubomi buya kuyolisa

[Inkcazelo]

Courtesy Hartebeespoortdam Snake and Animal Park