Ukhokelo Olugqibeleleyo Olungokuziphatha

UMQHUBI wenqanawa ufuna iimaphu nezixhobo ezinokuthenjwa ukuze aqhubeke kakuhle nohambo lwakhe. Ngokufanayo, abantu bafuna ukhokelo olunokuthenjwa ukuze benze izigqibo ezingokuziphatha abahlangabezana nazo mihla le. Ukhokelo olungokuziphatha oluguquguqukayo okanye olungangqinelaniyo alunakukufeza oko, nokhokelo olusebenza kuphela kwibutho elithile loluntu nalo alunako. Ukhokelo olugqibeleleyo olungokuziphatha alufanele luphelele kuhlanga okanye kwibutho elithile labantu.

Kubonakala kuhlekisa ukuba iBhayibhile—incwadi kanye eye yachaswa zizigidi, incwadi eye yabizwa ngabathile njengencwadi nje ebalisa intsomi emnandi, incwadi eye yagxekwa gqitha kunayo nayiphi na enye incwadi embalini—ibe lolo khokelo lugqibeleleyo olungokuziphatha. IBhayibhile izibanga iyincwadi yoMdali enokhokelo olungokuziphatha kuluntu, ‘isisibane’ esinokukhanyisela umendo wethu ‘kwiindlela zobulungisa.’—INdumiso 23:3; 119:105.

Ngaba kukho nabuphi na ubungqina obuxhasa elo bango libalaseleyo? Ngaba bukho ubungqina bokuba ukuphila ngemilinganiselo yeBhayibhile kungaphezulu kunokuphila ngemilinganiselo yokuziphatha eyenziwe ngumntu?

IBhayibhile Nokuziphatha Okuhle Ngokwesini

Khawuqwalasele umbandela wokuziphatha okuhle ngokwesini. IBhayibhile inikela umyalelo wokuzikhwebula kwiintlobano zesini ezingaphandle komtshato, isithi: “Kubalekeni ukuziphatha okubi ngokwesini.” (1 Korinte 6:18, New International Version; Efese 5:5) Iluleka izibini ezitshatileyo isithi: “Umtshato mawubekeke ngeendlela zonke, nesilili masingadyojwa; ke abenza umbulo nabakrexezi, uThixo uya kubagweba.” (Hebhere 13:4) IBhayibhile ihlabela mgama ibonisa ukuba lowo ungawuthobeliyo lo myalelo uyazenzakalisa yaye akawahloneli amalungelo omnye.—IMizekeliso 6:28-35; 1 Tesalonika 4:3-6.

Iingxaki ezitshabalalisayo zokukhulelwa kwabeshumi elivisayo, isisongelo sikaGawulayo, iherpes, igcushuwa nezinye izifo ezidluliselwa ngeentlobano zesini, nokuphakama kwenani labo baqhawula umtshato zonke ezi zinto zibubungqina bokuba eli cebiso lisasebenza kubomi babantu kule minyaka yee-1990. Umntu onamathele ekuziphatheni okuhle kweBhayibhile ukhululekile kwizinto ezininzi ezibangela ukukhathazeka nentlungu enkulu. Okubaluleke nangakumbi, unesazela esilungileyo. (1 Petros 3:16) UJonathan oneminyaka engama-24 ubudala uthi: “Ndiyazihlonela yaye ndanelisekile kuba ndisenza oko kufanelekileyo phambi koThixo.” Ungomnye wamaNgqina kaYehova. “Ngoxa abantu abaselula abaninzi bebulawa nguGawulayo, ukuhlala ndinyulu ngokuziphatha kusenokubusindisa ngokoqobo ubomi bam.”

Izibini ezoyik’ uThixo ziye zafumanisa ukuba ukulandela ukuziphatha okuhle kweBhayibhile kuye kwanemiphumo emihle kumtshato wazo. Omnye umfazi oneminyaka engama-23 ubudala uthi: “Mna nomyeni wam sasinyulu ekutshateni kwethu. Ndivakalelwa kukuba sasinokuthile okukhetheke gqitha esasinokwabelana ngako, okuthile abambalwa kakhulu abantu abaselula abanokwabelana ngako neqabane kule mihla. Ndiyazi ukuba oku kuye kwalomeleza umanyano lothando phakathi kwethu.”

IBhayibhile Nezoshishino

Kwakhona iBhayibhile inemimiselo yayo yemilinganiselo yokuziphatha kwezoshishino. Ngoxa ivuma ukuba abantu abanganyanisekanga basenokubonakala bephumelela, sekunjalo isibongoza ukuba sihlale sinyanisekile. (INdumiso 73:1-28) “Iintlobo ezimbini zamatye okulinganisa [elichanileyo lokuthenga nelingachananga, elinganyanisekanga lokuthengisa] neentlobo ezimbini zesilinganiso se-efa—ngamasikizi kuYehova ezo nto zombini.” (IMizekeliso 20:10, NW) Ngenxa yoku amaNgqina kaYehova ayakuphepha ukusebenzisa iindlela ezingacacanga zokuphumelela kwishishini.

Eneneni, umKristu usenokuhlangabezana neengxaki xa esenza oko. Kusenokuba nzima ngaye ukukhuphisana noosomashishini abanganyanisekanga kangako. Abanye basenokukucingela ukunyaniseka kwakhe njengento emangalisayo, bade bakucingele njengobudenge, kodwa ulondoloza isazela esilungileyo—nto leyo ebaluleke ngakumbi kunemali. Unoxolo lwengqondo yaye unandipha ubuthongo obumnandi. Akathuthunjiswa luloyiko olukrekrethayo lokubanjwa aze ohlwaywe ngenxa yokunganyaniseki.—Thelekisa IMizekeliso 3:21-26.

Ngokubhekele phaya, amaNgqina amaninzi aye afumanisa ukuba ubani unokulondoloza ukuziphatha okuhle kweBhayibhile aze eme kakuhle ngokwasemalini. Ngokufuthi umntu onyanisekileyo uyathenjwa ngabaqeshwa, abathengi, abo athenga kubo, kunye nabo anamatyala kubo. Oku kunokuba yingenelo kuye.

Ngaba Oko Ukufumeneyo Ufanele Uzigcinele Kona?

Njengoko siphawulile ngaphambilana, isimo sengqondo sokuthi oko ukufumeneyo ufanele uzigcinele kona siye senza nabo bantu ekunokwenzeka ukuba bebenyanisekile baba ngamasela. Noko ke, iBhayibhile yabaxelela oku abantu bakaThixo bamaxesha amandulo: “Uze ungathi, uyibona inkomo yomzalwana wakho, nokuba yigusha yakhe, ilahleka, uzisithelise kuyo; woyibuyisela nokuba kutheni kumzalwana wakho. Ke, ukuba akasondelelene nawe umzalwana wakho, akumazi, wozihlanganisela ekhayeni lakho, zibe kuwe, ade azifune umzalwana wakho, uzibuyisele kuye ke. Uya kwenjenjalo kwiesile lakhe, wenjenjalo kwingubo yakhe, wenjenjalo kwinto yonke yomzalwana wakho elahlekileyo, ethe yalahleka kuye wayifumana wena; akunakuzisithelisa kuyo.”—Duteronomi 22:1-3.

Namhlanje amaNgqina kaYehova ayaqhubeka ewulandela lo mgaqo. Elinye iNgqina eBrooklyn, eNew York, lafumana ingxowa eyayinemali ezii-R74 000 isesitratweni. Ebudeni bengozi engephi, yawa ingaqondwanga kwinqwelo-mafutha ethwala imali. Nakubeni le mali yayingamaphepha ambalwa asetyenzisiweyo—ngenxa yoko kungenakwenzeka ukuba ifunyanwe lula—wayisa emapoliseni. Abo wayesebenza nabo bamgculela ngesigqibo awasenzayo. Okumangalisayo kukuba, namapolisa amhleka ngokunyaniseka kwakhe. Kodwa le ndoda ingumKristu icacisa isithi: “Ndizama ukubambelela kwimfundiso yeBhayibhile kubomi bam bemihla ngemihla.” KumaHebhere 13:18 iBhayibhile ithi: “Sithandazeleni; kuba sikholosekile kukuthi sinesazela esilungileyo, singa ezintweni zonke singahamba kakuhle.”

Umtsalane Kwindalo Iphela!

Kwakhona iBhayibhile inikela imigaqo efanelekileyo ekhokelayo kwezinye iinkalo zokuziphatha. Ikhuthaza ububele, ukulunga, okusesikweni, inyaniso, imbeko, intlonelo, imvakalelo yokuba nembopheleleko nokuba nenkxalabo yobuntu ngabanye. Icebiso layo lokuziphatha lishwankathelwe kuMthetho Omkhulu othi: “Zonke izinto ngoko enisukuba ninga bangazenza abantu kuni, yenzani ezikwanjalo nani kubo.”—Mateyu 7:12.

Ngokuvisisana noMthombo wayo, imigaqo engokokuziphatha yeBhayibhile isebenza kulo naliphi na ilizwe okanye ibutho labantu. Kwincwadi ethi Christianity’s Contributions to Civilization, uCharles D. Eldridge uthi: “Iincwadi ezibhalwe kwelinye ilizwe kunqabile ukuba zidume kwamanye amazwe; zinjengemithi engenakukunyamezela ukumiliselwa kwenye indawo . . . Akunjalo ngeBhayibhile: iye yamiliselwa nakuwuphi na umhlaba phantsi kwelanga ngaphandle kokuphulukana ngokunzulu namandla nomtsalane enawo.”

Ngoko, ngokwahlukileyo, iBhayibhile iye yanomtsalane kwindalo iphela, kungakhathaliseki ulwimi, ibutho labantu nohlanga. Omnye umbhali weBhayibhile wakubeka ngale ndlela oku: “Sonke isibhalo siphefumlelwe nguThixo yaye siluncedo ekufundiseni ngokholo nasekulungiseni iimpazamo, ekubuyiseleni ubomi bomntu kwindlela eyiyo nasekumqeqesheni ukuba aphile ubomi obulungileyo.” (2 Timoti 3:16, Phillips) Liyinyaniso elokuba, maxa wambi kunzima ukuyiqonda iBhayibhile. Kumaxesha amandulo omnye umfundi okhutheleyo weBhayibhile wabuzwa enoba wayekuqonda na oko wayekulesa. Waphendula esithi: “Ndingaba nako ngani na, kungekho undikhokelayo nje?”—IZenzo 8:29-35.

Loo ndoda yafumana uncedo lobuqu ekuqondeni iBhayibhile. Namhlanje, uncedo olunjalo lobuqu luyafumaneka ngomsebenzi wokufundisa iBhayibhile owenziwa ngamaNgqina kaYehova. Sele encede izigidi zabantu kumazwe angaphezu kwama-200 ukuba zifikelele ekwazini iLizwi likaThixo. Yaye ayakumema nawe ukuba uqhelane ngokungakumbi naloo Ncwadi iNgcwele ngokutyelela iHolo yoBukumkani ekufuphi nawe.

Okubangel’ umdla kukuba, kuye kwathiwa ihambo engemilinganiselo emihle yokuziphatha “inokufundwa ngokubonela umzekelo omhle, . . . okanye nje ‘ngokuba phakathi’ kwabantu abanemilinganiselo emihle yokuziphatha.” Esi sesinye isizathu esinamandla sokuba uqhelane nabo bezayo kwiHolo yoBukumkani yasekuhlaleni. Asikuko ukuba ngokwemvelo amaNgqina kaYehova alunge ngakumbi kunabanye abantu, kodwa impumelelo yawo ekuziphatheni ingqina ukuba namandla kweLizwi likaThixo.—2 Korinte 4:7.

Ihambo yokuziphatha yehlabathi iya kuqhubeka iwohloka. IBhayibhile ixela kwangaphambili oku: “Abantu abangendawo noosiyazi kukhona baya kuhambela phambili ebubini.” (2 Timoti 3:13) Noko ke, akuyomfuneko ukuba ukhukuliswe ngulo msinga utshabalalisayo. UThixo unikele ulwalathiso olunyanisekileyo, olungenakuze lusilele. Ngaba uya kululandela?

[Amagama acatshulweyo akwiphepha 8]

IBhayibhile izibanga isisikhokelo esingokokuziphatha soMdali kubantu, ‘isisibane’ esinokukhanyisela umendo wethu

[Amagama acatshulweyo akwiphepha 9]

Imigaqo engokokuziphatha yeBhayibhile isebenza kulo naliphi na ilizwe okanye ibutho labantu

[Amagama acatshulweyo akwiphepha 10]

“Zonke izinto ngoko enisukuba ninga bangazenza abantu kuni, yenzani ezikwanjalo nani kubo.”—Mateyu 7:12

[Umfanekiso okwiphepha 9]

Izibini ezoyik’ uThixo ziye zafumanisa ukuba ukulandela imilinganiselo yokuziphatha okuhle eseBhayibhileni kube nemiphumo emihle kumtshato wazo