Abantu Abaselula Bayabuza . . .

Ndilikhoboka Lako! Ndinokukuyeka Njani Ukungcakaza?

UDAVID uyavuma, “Ndaqalisa ukudlala koomatshini bokungcakaza xa ndandineminyaka eli-13 ubudala. Ndafikelela kwinqanaba apho ndandingenakudlula kwindawo yolonwabo ndingakhange ndiye kungcakaza koomatshini bokungcakaza.” Omnye owayesakuba ngumngcakazi, ogama linguThomas uyavuma: “Ndandide ndibe izinto zabahlobo, zentsapho nezabanye endisebenza nabo ukuze ndiqhubeke nomkhwa wam. Ndandingcakaza nangantoni na endiyifumanayo.”

Bobabini uDavid noThomas bakhuliswa njengamaKristu. Bobabini babengamakhoboka okungcakaza—babebanjiswe ngulo mkhwa uyingozi. Abaphengululi bathi kukho amanani othusayo olutsha oluye lwaba ngamaxhoba amacebo akhohlisayo atsalela abantu abaselula ekubeni bangcakaze. Iphephancwadi iTime lithi: “Abaphengululi ngokungcakaza bathi kwinani elithelekelelwa lizizigidi ezisibhozo lamakhoboka okungcakaza eMerika, isigidi esinye ngabakwishumi elivisayo.” Bambi bakholelwa ukuba eUnited States, ukususela kwisi-4 ukusa kwisi-6 ekhulwini sabo bonke abaselula ngabangcakazi abangakwazi ukuzibamba.

Ulutsha luzama iindlela ezininzi ezahlukeneyo zalo mkhwa mbi. EJapan phezu kwayo nje imithetho engqongqo eyalela ukubheja kwabaselula, ngokutsho kweMainichi Daily News ulutsha “luye lwaduma njengamaqela anwenwa okomlilo wedobo angcakaza [kwizakhiwo zokubhejela umdyarho] nangaphandle kwazo, ngendlela eyandayo nephazamisayo.” Kwakhona ukudlala umdlalo welottery, ukubhejela ukhuphiswano lwezemidlalo nokudlala amakhasi ziindlela eziqhelekileyo kulutsha zokuyekelela kumnqweno wokubheja.

Ukukhotyokiswa Kukungcakaza—Imiphumo

UGordon Moody, weGamblers Anonymous, uthi: “Ekuqaleni, [ukungcakaza] ngamava amangalisayo namatsha, njengokufumana okuthile okubalulekileyo okanye ukuthandana nothile. . . . Ukudlala ujonge ithamsanqa kubangel’ ihlombe ibe kuyayithimba ingqondo.” (Quit Compulsive Gambling) Ewe, kubantu abaninzi kubangel’ ihlombe elihamba nemvakalelo ethabathekisayo ukuhlala bephumelela. Kodwa awunakuze uphumelele ngamathuba onke. Ekugqibeleni, umngcakazi ubuya nemband’ esikhova. Yaye iingxaki zakhe ziqalisa ngokuthi atshone ematyaleni nokungabi namali.

Umdlalo wokuchith’ isithukuthezi okhobokisayo, njengayo nayiphi na into ekhobokisayo, unokubangela umonakalo ongathethekiyo ngokomoya, ngokwemvakalelo, nangokokuziphatha. Unokukuzisela oko uGordon Moody akubiza ngokuba “yinkohliso . . . eya kukwenza ikhoboka ekugqibeleni.” Sikhunjuzwa amazwi ompostile uPawulos athi: “Anazi na ukuba lowo nizinikela kuye ukuba ngabakhonzi bokumlulamela, ningabakhonzi ngoku kulowo nimlulamelayo?” (Roma 6:16) Inguqulelo kaJ. B. Phillips iyiguqulela ngolu hlobo le ndinyana: “Ningaphantsi kwegunya enikhetha ukulilulamela.” Khawufan’ ucinge, ukulawulwa ngumkhwa ongenakukwazi ukuwulawula!

Kuba ngokufuthi oselula kunyanzeleka ukuba axoke, akhohlise, abe lisela ukuze aqhubeke nomkhwa wakhe, ngokuqinisekileyo nolwalamano lwakhe lwentsapho luyonakala. Iphephancwadi laseBritani iYoung People Now lithi: “Xa uziphawula ukuba ulisela, ixoki, yaye ungumthwalo, kubantu obathandayo nabakuthandayo, ngokukhawuleza uphelelwa kukuzixabisa.” Akumangalisi ukuba, iThe Harvard Mental Health Letter inikela ingxelo yokuba amakhoboka okungcakaza achanabeke “kudandatheko oluqatha, izigulo ezibangelwa lixhala,” nakwiingxaki ezininzi zasemzimbeni, ezifana “neengxaki zesisu, ukuphelelwa bubuthongo, intloko ebuhlungu, uxinzelelo lwegazi, isifuba, umqolo obuhlungu, neentlungu zesifuba.”

Noko ke, owona mphumo uyingozi ngakumbi, kukonakala kobumoya bukabani. IBhayibhile iyakugweba ukubawa nokuthanda imali. (1 Korinte 5:10, 11; 1 Timoti 6:10) Njengako nakuphi na ukukhotyokiswa, ukuba likhoboka lokubheja ‘kukudyobheka kwenyama nokomoya.’ (2 Korinte 7:1) Okukhona ubheja, kokukhona usonakalisayo isazela sakho kunye nolwalamano lwakho noThixo.—Thelekisa eyoku-1 Timoti 4:2.

Isigqibo Sokuyeka

Unokuwaqhawula njani la makhamandela alo mkhwa mbi kangaka? Okokuqala, umele ukufune ngokupheleleyo ukwahlukana nawo. Kwincwadi yakhe ethi Addictions uLiz Hodgkinson uthi, “Abukho ubukhoboka obunokuze boyiswe ngaphandle kokuba ikhoboka likufuna ngokwenene ukuguquka.” Oku kuthetha ‘ukuthiya okubi,’ ukukucekisa ukungcakaza. (INdumiso 97:10) Njani? Ngokucinga ngemiphumo yako kungekhona iindlela okuyolisa ngazo. Ngaba ‘ukuxhamla isono okomzuzwana’—uvuyo lokuphumelela kumdlalo othile—kubaluleke ngaphezu kobomi obungunaphakade? (Hebhere 11:25) Ukucinga ngolu hlobo kunokukunceda wenze isigqibo sokuyeka.

Noko ke, umphengululi uLiz Hodgkinson uthi: “Ukuba likhoboka layo nayiphi na into kwendela ngokunzulu kangangokuba ukuzikhwebula kuko kunokuba ngathi ususa ilungu lomzimba.” Kodwa uYesu wathi: “Ukuba ke iliso lakho lokunene liyakukhubekisa, linyothule ulilahle kuwe; kuba kukulungele kanye ukuba kutshabalale libe linye emalungwini akho, kunokuba umzimba wakho uphela uphoswe esihogweni.” (Mateyu 5:29) Nantoni na eyonakalisa ulwalamano lwakho noThixo umele uyisuse ebomini bakho!

Oku kuthetha ukuhlakulela ukuzeyisa. Umpostile uPawulos wayeneminqweno ezingisileyo awayenokuyivumela ukuba imoyise, kodwa akazange avume ukuba likhoboka lweminqweno yakhe. Wathi, “Ndisuka ndiwuqobe umzimba wam, ndiwuxinzelele phantsi.” (1 Korinte 9:27) Nawe umele ufunde ukuzibamba, ungavumeli ukuba iminqweno yakho ikulawule.

Ukwazi Unobangela Wale Ngxaki

Noko ke, ukuphumelela eli dabi, kuya kufuna okungaphezulu kokuzimisela nje. Ngokufuthi amakhoboka anezinye iingxaki ezinzulu. Olikhoboka lokungcakaza ogama linguDick uthi: “Ixesha lam lobuntwana lalinzima kakhulu. Lwalungekho konke konke uthando kwintsapho yasekhaya. . . . Ndandisoloko ndithotywa. Ndandizisingela phantsi gqitha.” Ngenxa yoxinezeleko olunjalo, ukuze akwazi ukukuphosa kwelokulibala oko wangcakaza.

Ngoku uninzi lwabo basebenza ngezigulo zengqondo bathi iindlela ezininzi zokukhotyokiswa zibangelwa kukwenzakala ngokweemvakalelo okwabangelwa kukuphatheka kakubi kwanokutyeshelwa ebuntwaneni. Enoba siyintoni na isizathu, ukwazi unobangela wale ngxaki kusenokukunceda uyoyise. Umdumisi wathandaza wenjenje: “Ndigocagoce, Thixo, uyazi intliziyo yam; ndicikide, uzazi iingcinga-ngcinga zam; ubone ukuba kukho ndlela yobubi na kum, undikhaphele kwindlela engunaphakade.” (INdumiso 139:23, 24) Ukuxubusha nomKristu oqolileyo ngeengcinga ezikwenza udandatheke, mhlawumbi umdala webandla, kunokuba negalelo elikhulu ekukuncedeni uqonde isizathu sokuba ungcakaze nomele ukwenze ukuze uguqule indlela ocinga ngayo noziphethe ngayo.a

“Okuthile Okulunge Ngakumbi”

Ngokutsho kwencwadi ethi Quit Compulsive Gambling, ukuyeka [linyathelo] nje lokuqala ekulweni nale ngxaki.” Kufuneka wenze iinguqulelo ezinkulu kwindlela ophila ngayo. Ukuze uthintele ukubuyela ekungcakazeni, umele uzikhwebule kwizinxulumani obukade ungcakaza nazo yaye uziphephe iindawo zokubutha ekungcakazwa kuzo, ezifana nezindlu zokungcakaza, iindawo zikawonke wonke ezinemidlalo yebhiliyadi, ngokufuthi ephelekwa kukubheja, nezinye ezifana nezo. (IMizekeliso 13:20) Oku akuthethi ukuba yiba yinkom’ edla yodwa. (IMizekeliso 18:1) Sebenzela ukufumana abahlobo abafanelekileyo nabalukhuthazo ebandleni lamaKristu. Zigcine uxakeke ngumsebenzi onemveliso, imisebenzi yokomoya, kunye nokuzihlaziya okunik’ impilo.

Noko ke, uHodgkinson usikhumbuza ukuba, ikhoboka liya kuwuphumelela umlo walo kuphela xa “liqonda ukuba kukho okuthile okubaluleke ngakumbi ngaphambili—ukuba ubomi buliqulathele okungakumbi kunokuzama ukukholisa ukukhotyokiswa.” Ngoko ke, yintoni enokuba yelunge ngakumbi kunethemba elixelwa yiBhayibhile?

Indoda egama linguRoddy yakufumanisa kuyinyaniso oku. Izichaza ngokuthi “ibilikhoboka lokungcakaza ngokupheleleyo” kangangeminyaka engama-25, esusela xa yayikwiminyaka yeshumi elivisayo. URoddy waphantse wazilinga zonke iindlela zokungcakaza—imidyarho yamahashe, eyezinja, ukubhejela imiphumo yemidlalo ekhatywayo, ukungcakaza kwizindlu zokungcakaza. Kodwa wandula wasebenzisa iinyaniso eziseLizwini likaThixo awayezifundiswa ngamaNgqina kaYehova. URoddy uthi, “Kwiinyanga nje ezintathu, kwenzeka inguqulelo engummangaliso ebomini bam.” Wayeka ukungcakaza, yaye namhlanje ukhonza njengomdala kwibandla lamaKristu.

Noko ke, mhlawumbi sele unokuthile okwaziwayo ngeemfundiso zeBhayibhile. NjengoDavid noThomas, abakhankanywe ekuqaleni, kude kube ngoku usenokuba uyasilela ukwenza iinyaniso zeBhayibhile zibe yindlela yakho yokuphila. Ukuba kunjalo, kutheni ‘ungakucikidi into okuyiyo ukuthanda kukaThixo okulungileyo, okukholekileyo, okuzalisekileyo’ ngokuyifundisisa ngokunzulu iBhayibhile? (Roma 12:2) Bakuba uDavid noThomas beqalise ukusebenzisa oko babekufundile baze bakhulisa ukholo nenzondelelo yokwenene, bakoyisa ukuba ngamakhoboka okungcakaza. Nawe unokoyisa!

Ukuzibhokoxa ekufundisiseni iBhayibhile kuya kwenza ithemba eliseBhayibhileni ngekamva—okuthile okubaluleke ngakumbi kunokungcakaza—libe yinto yokwenene ngakumbi kuwe. Kwangaxeshanye, liya kukunceda ukhulise ulwalamano lobuqu noThixo. Ngaloo ndlela uya kuziva ukhululekile ekubeni ‘uthandaze ungayeki’ ucela uncedo kuye, unentembelo yokuba uyaziqonda iimvakalelo zakho. (1 Tesalonika 5:17; INdumiso 103:14) Uya kuyivuza imigudu yakho yenkuthalo ngokukunika amandla afunekayo okuphumelela eli dabi nxamnye nokuba likhoboka lokungcakaza.—Galati 6:9; Filipi 4:13.

[Umbhalo osemazantsi]

[Umfanekiso okwiphepha 18]

Abantu abangcakazayo ngokufuthi kunyanzeleka ukuba baxoke babe ngamasela ukuze baqhubeke nomkhwa wabo wokungcakaza