Ihlabathi Elitsha—Ngaba Loze Lifike?
NGOAPRILI 13, 1991, uGeorge Bush, ngelo xesha owayengumongameli waseUnited States, wanikela intetho eMontgomery, eAlabama, enomxholo othi: “Ukuqiniseka Kolungelelwaniso Olutsha Lwehlabathi.” Ekuqukumbeleni, wathi: “Elo hlabathi litsha sijamelene nalo . . . , lihlabathi elimangalisayo elakha lafunyanwa.”
Kwiinyanga ezimbini kamva iThe Bulletin of the Atomic Scientists yathi ngokuwa kweenkqubo zolawulo zobuKomanisi eMpuma Yurophu, “ulungelelwaniso olutsha lwehlabathi olusekelwe eluxolweni, kokusesikweni nakwinkqubo yolawulo-melo lwabonakala lusondele.”
Nakulo we-1993 ibisaqhubeka intetho enjalo emayela nehlabathi elitsha. NgoJanuwari iThe New York Times yanikela ingxelo engesivumelwano sokuncitshiswa kwezixhobo zenyukliya. Elo phephandaba lathi: “Oko kuthetha ukuba iMerika neRashiya ‘zisemgubasini wehlabathi elitsha lethemba,’ ngokwamazwi acwangciswe kakuhle awasetyenziswa nguMongameli Bush.”
Kwiiveki ezimbini kamva umongameli omtsha waseUnited States, uBill Clinton, kwintetho yokufungiswa kwakhe wavakalisa oku: “Namhlanje, njengoko ulungelelwaniso oludala lusiya lunyamalala, ihlabathi elitsha likhululeke ngakumbi kodwa alizinzanga kangako.” Wade wathi: “Eli hlabathi litsha sele libangele ukuba ubomi bezigidi zamaMerika bube nentsingiselo ngakumbi.”
Ngoko kuye kwathethwa kakhulu ngehlabathi elitsha—elahlukileyo neliphucuke ngakumbi. Ngokutsho kolunye ubalo, ebudeni bethuba elifutshane ngokwentelekiso, uGeorge Bush ethetha esidlangalaleni walikhankanya izihlandlo ezingama-42 ibinzana elithi “uLungelelwaniso Olutsha Lwehlabathi.”
Kodwa ngaba le yintetho eyahlukileyo? Yakhe yaviwa na ngaphambili?
Eneneni Asinto Intsha
NgoMeyi 1919, kanye emva kweMfazwe Yehlabathi I, iBhunga loManyano lweeCawa zikaKristu eMerika laba nentlanganiso eCleveland, eOhio, kuyo ekwenziwa isaziso ‘ngokuqiniseka kwehlabathi elitsha nelilunge ngakumbi.’ Esinye isithethi sathi: “Iya kuba lihlabathi elitsha ekuya kuthi kulo umgaqo wokukhuphisana ubekelwe ecaleni kuze kulawule umgaqo womanyano nobudlelane. Iya kuba lihlabathi elitsha ekuya kuthi kulo umgaqo wokumanyana uthabathel’ indawo umgaqo wentswela-mvisiswano . . . Iya kuba lihlabathi elitsha ekuya kuthi kulo ubuzalwana nobuhlobo buthabathel’ indawo zonke iimfazwe ngaphandle kwemfazwe yokulwa nobubi.”
Iicawa zazikholelwa ukuba liya kubakho njani eli hlabathi litsha? Ngorhulumente woBukumkani bukaThixo othenjiswe eBhayibhileni? Akunjalo. Zazikhangele kwintlangano yezobupolitika ukuba izise elo hlabathi litsha. Enye inkokeli yecawa yathi, “Oko namhlanje sithetha ngako ngokuthi luManyano Lwezizwe, ngumphumo ongenakuze uthatyathelwe indawo nongenakuphepheka walo lonke ukholo nomzabalazo wethu njengamaKristu ehlabathini.” Iinkokeli zecawa zelo xesha zade zabalaselisa uManyano Lwezizwe “njengembonakaliso yezobupolitika yoBukumkani bukaThixo emhlabeni.”
Kwelinye icala, inkokeli enamandla yaseJamani, uAdolf Hitler, yaluchasa uManyano Lwezizwe yaza kwiminyaka yee-1930 yamisela ubuRhulumente Besithathu baseJamani. Yema ngelithi obo buRhulumente babuya kuhlala iminyaka eliwaka yaye babuza kufeza oko iBhayibhile ithi kunokufezwa buBukumkani bukaThixo kuphela. Lo kaHitler wathi, “Ndiqalisa ngabaselula. Ndinokwakha ngabo ihlabathi elitsha.”
Lo kaHitler wayalela ukuba kwakhiwe ibala elikhulu lezemidlalo eNuremberg ukuze kuboniswe amandla obuNazi. Okuphawulekayo kukuba, kwiqonga eliphantse libe ziimitha ezingama-300 ubude kwamiswa iintsika ezili-144. Kutheni kwamiswa iintsika ezili-144? IBhayibhile ithetha ngabali-144 000 ababeya kulawula ‘neMvana’ uYesu Kristu, yaye ithi ulawulo lwabo lwaluya kuba lolweminyaka eliwaka. (ISityhilelo 14:1; 20:4, 6) Kubonakala ukuba, ukumiswa kweentsika ezili-144 kwibala lemidlalo laseNuremberg kwakungeyonto nje eyazenzekelayo, ekubeni ngokweengxelo ezibhaliweyo amagosa amaNazi ayelusebenzisa ulwimi nemifuziselo eseBhayibhileni.
Waba yintoni umphumo wemigudu yabantu yokufeza oko iBhayibhile ithi kuya kuphunyezwa ngoBukumkani bukaThixo kuphela?
Ukusilela Kwemigudu Yomntu
Imbali ibonisa ngokucacileyo ukuba uManyano Lwezizwe aluzange luzise ihlabathi elitsha elinoxolo. Loo ntlangano yaphanza xa iintlanga zatshona azavela nangonwele kwiMfazwe Yehlabathi II. Ngaphezu koko, emva nje kweminyaka eli-12, ubuRhulumente Besithathu babungamabhodlo. Basilela ngokupheleleyo, bushiya intsapho yabantu ihlazekile.
Kuyo yonke imbali imigudu yabantu yokuzisa ihlabathi elitsha elinoxolo ibisoloko ingaphumeleli. Owayesakuba nguMphathiswa Wezangaphandle eUnited States uHenry Kissinger wathi, “Yonke inkqubo yempucuko ekhe yakho ekugqibeleni iye yaphanza. Imbali libali lemigudu eye yasilela, ulangazelelo olungazange luzaliseke.”
Ngoko, kuthekani ngolungelelwaniso olutsha lwehlabathi olo iinkokeli zehlabathi bezililisela ngalo kutshanje? Ukuqhambuka kogonyamelo lobuhlanga kubangele ukuba kwanengcamango yelo hlabathi litsha ibe yinto yokuhlekisa. Ngokomzekelo, ngoMatshi 6 odluleyo, umbhali wemihlathi yamaphephandaba uWilliam Pfaff egculela wathi: “Ulungelelwaniso olutsha lwehlabathi lufikile. Luqhuba kakuhle yaye lutsha ngokwenene, lungcwalisa ukuhlasela, ukulwa nokutshabalalisa ezinye iintlanga njengehambo eyamkelekileyo kwizizwe ngezizwe.”
Ungquzulwano olumanyumnyezi nezenzo zenkohlakalo eziye zenzeka ukususela ekuweni kobuKomanisi ziyanxunguphalisa. KwanoGeorge Bush, kamsinya nje ngaphambi kokushiya isikhundla sakhe ngoJanuwari, wavuma oku: “Ekuhambeni kwexesha, ihlabathi elitsha linokuba sisisongelo njengelo lidala.”
Ngaba Sikho Isizathu Sokuba Nethemba?
Ngaba oku kuthetha ukuba imeko ayiniki themba nje kwaphela? Ngaba ihlabathi elitsha liphupha nje lokunqwenela okuthile? Licacile elokuba, abantu abakwazanga ukuzisa ihlabathi elitsha. Kodwa kuthekani ngedinga loMdali lokwenjenjalo? IBhayibhile ithi, “Ngokwedinga lakhe [likaThixo] silinde elitsha izulu, nomtsha umhlaba.”—2 Petros 3:13.
La mazulu matsha uThixo awathembisileyo lulawulo olutsha phezu komhlaba. Olu lawulo lutsha buBukumkani bukaThixo, urhulumente wakhe wasezulwini lowo uYesu wafundisa abantu ukuba bamthandazele. (Mateyu 6:9, 10) Ngelo xesha loo rhulumente wasezulwini uya kubunjwa nguYesu Kristu nabali-144 000 abaya kulawula naye, ibe ihlabathi elitsha iya kuba libutho elitsha labantu. Ewe, baya kuphila kwihlabathi elitsha nelizukileyo bexhasa ngokunyanisekileyo ulawulo lukaThixo.
Urhulumente woBukumkani bukaThixo uya kulawula phezu kwehlabathi elitsha elithenjisiweyo. Ngoko eli hlabathi litsha aliyi kuziswa ngumntu. Enye intyila-lwazi yeBhayibhile icacisa isithi, “Ubukumkani bukaThixo abuze busingisele kwinyathelo eliya kuthatyathwa ngabantu okanye ummandla abawusekayo. Obo bukumkani linyathelo elingokobuthixo, asinto ifezwa ngabantu yaye ayifezwa nkqu nangamaKristu azinikeleyo.”—The Zondervan Pictorial Encyclopedia of the Bible.
Ngokuqinisekileyo ihlabathi elitsha phantsi koBukumkani bukaThixo liyeza. Unokukholosa ngedinga lokuza kwalo ngenxa yokuba elo lidinga elenziwa ‘nguThixo, ongenakuxoka.’ (Tito 1:2) Nceda uqwalasele uhlobo lwehlabathi oluya kuba lulo ihlabathi elitsha eliya kuziswa nguThixo.
[Inkcazelo Ngomfanekiso okwiphepha 24]
NASA photo