Umanyano Olumangalisa Ihlabathi
IHLABATHI lothuswa kukuphela ngesiquphe kobuKomanisi yaye kutshanje lothuswe kukwanda kogonyamelo lobuhlanga. Sekunjalo, kwangaxeshanye, izigidi zabantu eMpuma Yurophu ziye zamangaliswa yimisebenzi eyenziwa ngomanyano nangovuyo yeqela eliboyisileyo ubutshaba obubangelwa bubuzwe nabubuhlanga—amaNgqina kaYehova.
AmaNgqina kaYehova aye aphumelela ekugcineni umanyano ekunquleni kwanaxa kugquba imfazwe kwindawo ahlala kuyo. Ngowe-1991, xa isihlwele sabantu bezizwe ngezizwe esingamaNgqina ali-14 684 sahlanganisana eZagreb, eCroatia, ipolisa elithile lathi: “Bekungakuhle ukuba amajelo eendaba akubone oku kwenzekayo kweli bala lezemidlalo, apha, sibona amaSerb, amaCroat, amaSlovene, amaMontenegrin nabanye behleli kunye ngoxolo.”
Kwangaloo nyaka umcholacholi weendaba kwindibano eyayiseSiberia wabona umntu waseRashiya esanga umntu owayesandul’ ukubhaptizwa waseBuryat. Esazi ukuba kunqabile ukuba kubekho ubuhlobo bokwenene phakathi kwabantu abahluke kangako, wabuza: “Nakwazi njani ukoyisa le miqobo yobuhlanga?”
Kunyaka ophelileyo kuqhutywe iindibano zamaNgqina kaYehova ezingama-45 eMpuma Yurophu naseAsia, eMoscow naseKiev kuqhutywe ezezizwe ngezizwe. Xa bebonke bangama-368 000 abantu ababekho kwezi ndibano zingama-45—bangaphezu kwe-112 000 kwindawo eyayisakuba yiSoviet Union yaye baphantse babe li-11 000 kwizixeko ezine ezazisakuba ngaphantsi kweYugoslavia.
Phezu kwako nje ukulwa kummandla ahlala kuwo, amaNgqina amalunga nama-215 akwazile ukuya kwindibano ebiseBelgrade, eSerbia, ngomhla we-19 ukusa kowama-22 kuAgasti. Kwakukho kuyo abantu abangama-3 241. Umcholacholi weendaba waphawula oku: “Amaqela abantu asuka kufutshane naseSarajevo nawo akwazile ukubakho. Aqesha uduladula, yaye kweza angama-56. La ayevela eLukavica, ePale, eIlidža naseVogošća. Kwakhona abantu abahlanu babevela eBenkovac. Enye ingongoma efanele iphawulwe yeyokuba abantu abangama-23 kwabali-174 ababhaptizwayo kule ndibano babevela kule mimandla yayineengxaki.”
EMoscow NaseKiev
NgoJulayi 28, 1993, iphepha elingaphambili leThe New York Times lalinomfanekiso omkhulu wamaNgqina kaYehova eMoscow, namagama athi: “Ukukhululwa kwenkonzo eRashiya kubangele ukuthontelana kwamaguquka eLocomotive Stadium eMoscow ukuze aze kubhaptizwa njengamaNgqina kaYehova.”
ITimes yanikela le ngxelo: “Ubuso bunyhidilili ziinyembezi amalungu ebesanga la maguquka matsha ngoxa esavuz’ amanzi. Ngokwahlukileyo kwindlela ekusoloko kuyiyo eLocomotive, akukho mntu utshayayo, akukho mntu uthukayo, akukho mntu unxilileyo.” Kangangeentsuku ezine amaNgqina asuka kwelaseRashiya nakwamanye amazwe angaphezu kwama-30 ebezalise eli bala lezemidlalo, incopho yabantu ababezile ibingama-23 743.
Indibano yezizwe ngezizwe yamaNgqina kaYehova enkulu ngakumbi yaqhutyelwa eKiev, ikomkhulu laseUkraine. Apho incopho yababekho yaba ngama-64 714 behlanganisene kwiRepublican Stadium, elinye lawona mabala makhulu eMpuma Yurophu. Iphepha elingaphambili le-Evening Kiev lanikela le ngxelo: “AmaNgqina kaYehova . . . amanyaniswe lukholo lokwenyaniso kungekuphela nje ziibheji eziluhlaza azinxibileyo ezibhalwe amagama athi ‘Imfundiso Yobuthixo’.”
Indlela Umanyano Olufumaneka Ngayo
Indlela olubakho ngayo olu manyano yaboniswa kakuhle liNgqina elisele likhulile laseUkraine kwindibano ebiseKiev. Lalatha phezulu laza lathi, “Yehova.” Landula ke, lenza isangqa ngeengalo zalo, laza laphakamisa umnwe omnye. Kwakucacile ukuba lalisithi: ‘Sonke sibanye, simanyaniswe ngemfundiso yobuthixo kaYehova uThixo.’
Okubangel’ umdla kukuba iEncyclopædia Britannica yabhala ngamaNgqina kaYehova kwindawo eyayisakuba yiSoviet Union, ibonisa isizathu sokumanyana kwamaNgqina. Yacacisa: “Ayazazi iimfundiso zawo [ezisekelwe eBhayibhileni], anenzondelelo kumsebenzi wokufuna amaguquka yaye ubomi bawo bonke abulungelelanisa ngokuvisisana neenkolelo zawo zonqulo.” Ngoko ke, hayi indlela ekwakufaneleke ngayo ukuba umxholo wendibano yonyaka ophelileyo yamaNgqina kaYehova uthi “Imfundiso Yobuthixo”!
UYesu Kristu, owayengummeli wemfundiso yobuthixo, walatha umgaqo obalulekileyo omanyanisayo xa wathandazela abalandeli bakhe wathi: “Abangabo abehlabathi, njengokuba nam ndingenguye owehlabathi.” Ewe, ubundilele bamaNgqina kaYehova buyawamanyanisa, kanye njengokuba uYesu wacela oko emthandazweni wakhe: “Ukuze bonke babe banye; njengokuba wena, Bawo, ukum, mna ndikuwe, ukuze nabo babe banye kuthi.”—Yohane 17:16-21.
Amava olunye undwendwe oluvela eSpeyin abonisa indlela ukungabi ngowehlabathi okubamanyanisa ngayo abantu bakaThixo. Endleleni eya kwindibano eyayiseMoscow, lwaluhleli ecaleni kwendoda evela eAfghanistan eyalucacisela ukuba kwanabantu bonqulo olufanayo babebulalana kwimfazwe yamakhaya kwelo lizwe. Yandula ke yalubuza ukuba, “Unqulo lwakho luxhasa owuphi umbutho wezobupolitika?” Impendulo yathi “Aluxhasi namnye.” Ekubeni amaNgqina kaYehova engathabathi cala kwezobupolitika, akabandakanyeki kwimilo yobuhlanga, exabanisa abantu.
Iindwendwe ezazisendibanweni ezazihamba zisuka kwindawo eyayisakuba yiriphabliki yaseSoviet zazibonela indlela imfazwe eyoyikeka ngayo. Uloliwe wazo wacanda kummandla ekwakuqhuma irhuluwa macala omabini kuwo. Hayi indlela ezavuya ngayo zakufika zikhuselekile eKiev zaza zanandipha uthando nomanyano phakathi kweentlanga ezininzi kwelo bala lezemidlalo!
Iindwendwe eziliqela ezisuka eJamani naseRashiya zakuxabisa ngokukodwa oko imfundiso yobuthixo izenzele kona. Ngoxa babesengabafana kwisizukulwana esidlulileyo, babezama ukubulalana kwiMfazwe Yehlabathi II. Kodwa ebudeni bendibano yaseKiev, babemanyene kunqulo lokwenyaniso, njengokuba sibona kwiphepha 23.
Ababukeli Babemangalisiwe
EMoscow, isixeko esinabemi abamalunga nezigidi ezisithoba, ngaphambili ayenqabile amathuba okuqhelana namaNgqina kaYehova. Liyinyaniso elokuba abaninzi babevile ngokutshutshiswa nokuvalelwa kwawo ezintolongweni ngexesha lobuKomanisi. Kwakhona, ebudeni behlobo lonyaka ophelileyo, kusekwe amabandla ali-18 eMoscow kunye nali-13 eKiev ukuze kulungiselelwe abantu abandayo ababakho kwiintlanganiso zamaNgqina. Kodwa ngoku abantu basekuhlaleni babebona amashumi amawaka abo babeze endibanweni benxibe iibheji kwiindawo ezazinendibano kuzo zonke izixeko zabo! Ababukeli abaninzi basala bebamb’ ongezantsi.
Umhloli oyintloko womlilo eMoscow wathi: “Le ndibano ichukumisa ngokwenene. Kuyamangalisa ukubona ukuba abantu abaninzi kangaka beentlanga ezahlukahlukeneyo banokufumana ulwimi olufanayo. Iyandimangalisa indlela abantu benu abalungelelene nabacoceke ngayo. Bendisebenza kweli bala lezemidlalo kangangeminyaka engama-20 yaye andikaze ndiyibone into enjengale.”
Omnye umkhenkethisi wathi: “Ngokuqhelekileyo xa ndikhenkethisa amaqela, kudla ngokubakho ukungamanyani zisuka nje sakuba sisishiyile isikhululo seenqwelo-moya. Akukhange kube njalo ngamaNgqina kaYehova.” Omnye owayemenyiwe endibanweni eKiev wathi: “Nimanyene ngokwenene. Nahluke ngokwenene kwindlela ekuyiyo ngaphandle kweli bala lezemidlalo!”
Ekuqaliseni kwendibano yaseMoscow ngoLwesine, ngoJulayi 22, abasebenzi abaliqela ababemi phezu kwesakhiwo esikhulu bakha banqumama umzuzwana emsebenzini wabo. Kubonakala ukuba babechukunyiswe sisandi samazwi abantu abangaphezu kwama-23 000 awayemanyene engomeni. Ngebabechukumiseke ngakumbi ukuba babazile ukuba ezo ngoma zaziculwa ngeelwimi ezahlukahlukeneyo ezingaphezulu kuhle kwishumi elinambini. KwanamaNgqina angevayo angakwaziyo ukucula ngamazwi awo “ayecula” ngezandla zawo esebenzisa intetho yezandla.
Indawo abaninzi ababethanda ukuhlanganisana kuyo ngeengokuhlwa yayiyiRed Square enkulu yaseMoscow, ngaphandle nje kweendonga zeKremlin. Ngengokuhlwa yangaphambi kokuba indibano iqalise (akuzange kube mnyama de kwaba semva kwentsimbi yeshumi), amakhulu amaninzi amaNgqina ezizwe neentlanga ezahlukahlukeneyo ayelapho esangana onwabile. Umcholacholi weendaba weMoscow Times kwenzeka wadlula apho ibe waba nomdla wokwazi oko kuqhubekayo. Wabuza: “Nimela eliphi iqela?” Akuba exelelwe, wathi: “Andizange ndibone abantu abonwabileyo beentlanga ezahlukahlukene kangaka eRed Square. Ngokuqhelekileyo iqela elikhulu kangaka libakho apha xa lize kuqhankqalazela okuthile.”
Abemi baseMoscow naseKiev babechukumiseke ngokwenene ngamawaka abo babeze endibanweni benxibe iibheji bebulisana, besangana bechulumancile, yaye bezama ukunxibelelana. Usomashishini waseIran owayetyelele eKiev wasondela kwelinye iNgqina laseUnited States waza wathi: “Kukho okuthile okumangalisayo ngani. Bendinibukele ezi ntsuku zimbalwa zidlulileyo. Ndifuna olunye uncwadi lwenu ngesiNgesi ukuze ndilufunde.” Wachaza ukuba ukuba kwakungengenxa yokuba kufuneka ehambile waya eIran ngentsasa elandelayo, wayeza kubakho endibanweni.
Kuyo yonke iMoscow neKiev—ngokukodwa ezitratweni, ezikwereni nakwimigaqo yoololiwe engaphantsi komhlaba—abo babeze endibanweni babesiya ebantwini bebanika amaphecana neencwadana ezinemifanekiso ezisekelwe eBhayibhileni. Ngengokuhlwa nganye amaNgqina ayebonakala emi kufutshane neNgcwaba likaLenin kwiRed Square encokola ngokuzolileyo esasaza namaphecana. Ngokufuthi la maphecana ayesamkelwa ngokukhawuleza, ngokufuthi ngoncumo olufudumeleyo. Ukuba ayenikelwa kuloliwe ohamba ngaphantsi komhlaba, ngokuqhelekileyo abantu bebeqalisa ukuwafunda ngoko nangoko. Kwakungento ingaqhelekanga ukubona abantu abahlanu okanye abathandathu kwikhareji elinye befunda amaphecana asekelwe eBhayibhileni.
Emva kokufunda esi sigidimi, ngokufuthi umntu okhwele kuloliwe wayevakalisa uxabiso. “Asizange khe silifumane ithuba lokufunda izinto ezinjengezi,” yatsho njalo enye indoda esele iqinile ngesiNgesi esophukileyo. “Ndiyabulela kakhulu.” Kwesinye isihlandlo, umfana othile nonina bachukumiseka kakhulu sesi sigidimi kangangokuba behla kuloliwe apho kwakuza kuhla khona lowo wayeze endibanweni ukuze baqhubeke naloo ncoko.
EKiev amaNgqina awayeze endibanweni ayengaphezu kwama-50 000 evela kumazwe angaphezu kwama-30, onke efuna indawo yokuhlala. Amaninzi ayehlala ezihotele, kumakhaya abantu, nasezikolweni, kodwa amalunga ne-1 800 ayehlala kumaphenyane amathandathu. Umntu owayecoca kwelinye laloo maphenyane washiyela amaNgqina ileta. Wathi: “Kum kubonakala ngathi nisuka kwesinye isijikelezi-langa. Nibahle gqitha yaye ninemvisiswano kakhulu kangangokuba niza neentsikelelo. Kusenokwenzeka ukuba ningabantwana bakaThixo. Ndicinga ngoku ngalo lonke ixesha.”
Hayi indlela ekufaneleke ngayo ukuba amaNgqina kaYehova akwazi ukuqhuba iindibano zawo ezinkulu yaye abasemagunyeni nabantu ngokufanayo babe nokubona iimpawu nehambo entle yobuKristu ezukisa uThixo! Abasemagunyeni basekuhlaleni ababesebenza namaNgqina ekuphela kwento ababenokuyitsho kukuwabulela ngokukhuthala, imbeko, nentsebenziswano entle neziphatha-mandla zebala lezemidlalo namanye amasebe esixeko.
Elinye igosa eKiev lathi: “Eli bala lezemidlalo alikaze licocwe kakuhle kangaka kangangeminyaka eli-13.” Ipolisa apho lathi: “Abanjani bona abantu! Kungathi ubani ukwihlabathi elitsha. Andikwazi tu ukusiqonda isizathu sokuba nanitshutshiswa.”
Iimbalasane Zendibano
KumaNgqina aseMoscow nawaseKiev, imbalasane ephambili mhlawumbi yayibubukho babo babeze endibanweni bevela kwamanye amazwe, kuquka amalungu eQumrhu Elilawulayo lamaNgqina kaYehova. Uvuyo nje lokuba kunye, lokumanyana ekunquleni ngoxolo neentlanga ezininzi ezahlukahlukene kangaka, alunakuchazwa ngamazwi. Xa isithethi sokugqibela eMoscow naseKiev sathi siyambulela kakhulu uYehova uThixo, obangele sakwazi ukuba nale ndibano, abaphulaphuli baphakama baza batsho ngentswahla yezandla ixesha elide kangangemizuzu eliqela de isithethi saqhubeka nentetho yaso.
Ezinye iimbalasane zendibano ziintetho ezazinikelwa suku ngalunye ngesiNgesi ngamalungu eQumrhu Elilawulayo neengxelo ezimfutshane ezazinikelwa ziindwendwe ezivela kumazwe ahlukahlukeneyo. Ezi ntetho zesiNgesi zaziguqulelwa ngaxeshanye ngeelwimi ezininzi. Ngokomzekelo, eKiev zaziguqulelwa ngeelwimi ezili-16! Ngoko ngokuhlala kuloo macandelo ayebekelwe bucala iqela lolwimi oluthile, abo babeze endibanweni babenokuyiva loo nxalenye yocwangciso ngolwimi lwabo.
Ukanti enye imbalasane yendibano yayikukukhululwa kwencwadana enemifanekiso entsha ethi Iyintoni Injongo Yobomi? ngesiRashiya nesiUkraine. Kwaxatyiswa ngokukodwa ukukhululwa ngesiRashiya kwencwadi ethi Incwadi Yesikhokelo Yesikolo Sobulungiseleli Sobuthixo, esetyenziselwa ukuxhobisela amaNgqina kaYehova ukunikela iinyaniso zeBhayibhile ngokunempumelelo ngakumbi. Kwakhona ngesiRashiya kwakhululwa incwadi ethi Incwadi Yam Yamabali EBhayibhile, ingxelo emfutshane, elandelelanayo yembali yeBhayibhile ebhalelwe ngokukhethekileyo abantu abaselula. Sithetha nje yimibhalo engaphezu kwezigidi ezingama-36 yale ncwadi esele ishicilelwe ngeelwimi ezingaphezu kwama-80.
Ukubhaptizwa kwabafundi abatsha abaninzi ngokwenene kwakuyimbalasane yendibano. Isibakala sokuba uninzi lwabo babhaptizwayo yayingabantu abaselula naso saphawulwa. Kwintlanganiso noonondaba eKiev, umbhaleli wephephandaba iOsvita wabuza: “Okuphawulekayo kwindibano yenu linani elikhulu labantu abaselula. Banobubele, bahle, yaye banesimilo. Nikwenza njani oku? Ngaba ninemigaqo ekhethekileyo yabantu abaselula? Ndisebenza nolutsha, ndingakuvuyela kakhulu ukwazi.”
Nangona ukuzahlulela kuThixo kumele kusekelwe kulwazi, kungekhona kwiimvakalelo, isihlandlo sobhaptizo sona siyazichukumisa iimvakalelo, sichukumisa intliziyo. EMoscow isihlwele esasikho sema ngeenyawo saza saqhwaba izandla kususela ekuqaliseni kwabo babeza kubhaptizwa abali-1 489 ukuphuma besiya kumaqula okubhaptizwa de baba babhaptizwe bonke, ngaphezu kweyure kamva.
EKiev, apho kwakukho abangaphezu kwama-64 000, kwamiswa amaqula amathandathu kwelinye icala lebala lezemidlalo ukwenzela ubhaptizo. Kwiqula ngalinye kukho ababhaptizi abathandathu okanye abangakumbi, rhoqo emva kwemizuzu emibini kwakubhaptizwa abantu abanokuba libandla elikhulu nje kakuhle. Sekunjalo, ubhaptizo lwaqhubeka ngaphezu kweeyure ezimbini! KwiNdibano Yezizwe Ngezizwe “Yokuthanda KukaThixo” eNew York ngowe-1958, kwabhaptizwa abantu abangama-7 136. Kodwa eKiev, amaNgqina kaYehova asandul’ ukumiselwa angama-7 402 avela eUkraine nakwezinye iiriphabliki ezazisakuba ngaphantsi kweSoviet Union abangela ukuba eli nani lababhaptizwayo libe lelona likhulu kubhaptizo lwamaKristu. Aba yayingabantu abathetha isiRashiya abavela kwimimandla apho amaNgqina kaYehova ebevaliwe kuyo de kwakutshanje, yaye ebekunjalo kangangamashumi eminyaka!
Imbalasane yendibano yaseBelgrade yayibubukho beendwendwe ezivela kwimimandla ekude ethwaxwa yimfazwe. Omnye owayesebenza endibanweni wanikela le ngxelo: “Izihlandlo ezininzi ezi ndwendwe zilibulela ngokufudumeleyo ilungelo ezilifumeneyo lokubakho endibanweni. Kodwa, sivakalelwa kukuba abona bantu bakhuthazwe ngokwenene sithi bakwazileyo ukudibana nazo size sibone uthando nenzondelelo yazo ngenyaniso yeBhayibhile.”
KwiiNdibano ezininzi “Zemfundiso Yobuthixo,” kwafundwa ileta ebhalwe kubusika obandulelayo evela eSarajevo. Lo wayeyibhala wathi: “Iqondo lobushushu limalunga nesi-5 ngokukaFahrenheit [-15°C.]. Ndikunye nomfazi noonyana bethu ababini yaye asinambane nazinkuni zaneleyo zokubasa . . . Siva izithonga zemipu nezeziqhushumbisi. Kodwa ezintliziyweni zethu sizolile yaye sifudumele ngenxa yenyaniso nangenxa yolwalamano lwethu oluhle noYehova. . . . Siyanibongoza ukuba niqhubeke nisithandazela kuYehova ukuze asincede sizingise size sinyamezele kuzo zonke ezi nkathazo, somelele elukholweni. Siyanithandazela!
Lubaluleke Ngantoni Olu Manyano?
Xa luthelekiswa nokungamanyani okubonakalayo kwiinkonzo zeli hlabathi, amaNgqina ahluke ngokucacileyo. Kodwa eneneni, anokunceda njani? Ngokuphathelele indibano yamaNgqina kwiminyaka eliqela eyadlulayo, inqaku lomhleli lathi: “Kwanele ukuba ukuba lonke ihlabathi beliphila ngeemfundiso [zeBhayibhile] zamaNgqina kaYehova bekuya kuphela oku kuphalazwa kwegazi nale ntiyo, ibe bekuya kulawula uthando.”
Kodwa, inkoliso yoluntu ayikaze iyilandele imfundiso yobuthixo. Kwinkulungwane yokuqala, bala kwanokuphulaphula uNyana kaThixo, uYesu Kristu. Ngoko ngaba kukulindela lukhulu ukulindela ukuba ngaminazana ithile ihlabathi liya kumanyana? Kunokwenzeka njani oko?
[Ibhokisi ekwiphepha 12]
IINDIBANO KWIMPUMA YUROPHU NASEASIA
Ilizwe Incopho Ababha-
Yababekho ptizwayo
EAlbania (1 indibano) 598 39
EBulgaria (1 indibano) 704 45
IRiphabliki YaseCzech 20 025 620
(2 iindibano)
Indawo Eyayisakuba YiSoviet Union
E-Estonia (2 iindibano) 4 732 383
ERashiya (3 iindibano) 32 582 2 454
EUkraine (2 iindibano) 69 333 7 797
EKyrgyzstan (1 indibano) 5 678 604
Indawo Eyayisakuba YiYugoslavia
ECroatia (1 indibano) 5 003 157
EMacedonia (1 indibano) 642 27
ESerbia (1 indibano) 3 241 174
ESlovenia (1 indibano) 1 961 69
EHungary (5 iindibano) 22 191 798
EPoland (13 iindibano) 152 371 4 352
ERomania (9 iindibano) 36 615 2 375
ESlovakia (2 iindibano) 13 215 473
ISIMBUKU: 368 891 20 367
[Umfanekiso okwiphepha 23]
Kwakuhlanganisene abangaphezu kwama-64 000 eRepublican Stadium, eKiev
[Umfanekiso okwiphepha 23]
Abo babeziintshaba ngeMfazwe Yehlabathi II baseJamani nabaseUkraine bamanyaniswe yinyaniso yeBhayibhile
[Imifanekiso ekwiphepha 24, 25]
Abanquli abamanyeneyo abangaphezu kwama-23 000 eLocomotive Stadium, eMoscow
Kwabhaptizwa abangama-7 402 e-Kiev, nabali-1 489 eMoscow
Iindwendwe ezivela kwamanye amazwe zeza neetoni zokutya zokunceda abo basweleyo
Phezulu nasembindini: Izizwe ezininzi zazihlanganisene zimanyene ngoxolo Ezantsi: Ukunikela ubungqina kwiRed Square
[Umfanekiso okwiphepha 26]
Ababekho endibanweni babechulumancile kukufumana ngolwimi lwabo incwadi “Yamabali EBhayibhile,” “Incwadi Yesikhokelo Yesikolo,” nencwadana entsha enemifanekiso