INdibano Yokuqala Yezizwe Ngezizwe YamaNgqina KaYehova ERashiya
IST. PETERSBURG, eRashiya, yaziwa ngokubanzi ngoko abemi balapho bakubiza ngokuba “bubusuku obumhlophe”—ithuba elinokuba ziiveki ezintathu ngoJuni xa isibhakabhaka singaze sibe mnyama ngokupheleleyo. Kodwa umhla wama-26 ukuya kowama-28 kuJuni wowe-1992 wawukhethekile.
Ngezo ntsuku, amaNgqina kaYehova aqhuba indibano eyatsalel’ ingqalelo, kungekhona kukukhanya kokoqobo okwakuhleli kukhanya kwisixeko iSt. Petersburg, kodwa kukukhanya kokomoya okubonakaliswa ngamaKristu okwenyaniso. Ngenxa yoko umxholo wendibano wawusithi: “Abathwali Bokukhanya.”
Le yayiyindibano yokuqala yezizwe ngezizwe yamaNgqina kummandla owawusakuba yiSoviet Union. Kwakukho iindwendwe ezazivela kumazwe anokuba ngama-30 ehlabathini jikelele, kuquka iBritani, iDenmark, iFinland, i-Italy, iJamani, iJapan, iKhanada, iNetherlands, iNorway, iSweden, iSwitzerland neUnited States.
Ukongezelela, kwakukho amaNgqina angama-29 000 awayevela kummandla owawusakuba yiSoviet Union. Wambi ayevela e-Estonia, eGeorgia, eLatvia, eLithuania, eMoldova naseUkraine. Le ndibano yayiyephawulekayo xa siqwalasela isibakala sokuba iRashiya yayinobunzima kuhlengahlengiso lwezoqoqosho. Eyona nto yayibalasele yayibubukho beendwendwe ezazivela eRashiya ezahamba iikhilomitha ezingama-8 000 ukusuka eVladivostok nakwezinye iindawo ezikunxweme olungasempuma lwaseRashiya.
Ezona ndwendwe zininzi nezazivela kwamanye amazwe zazivela kwilizwe elikufuphi iFinland, zazinabameli abangaphezu kwe-10 000. Ibala lemidlalo lahlulahlulwa lanamacandelo amabini—elabathetha isiRashiya nelabathetha isiFinnish, icandelo ngalinye lineqonga lalo apho ucwangciso lwalunikelwa khona.
Amalungiselelo
Indibano yaqhutyelwa kwiBala Lezemidlalo iKirov elineminyaka engama-42 likho, kwisiqithi iKrestovsky, esikude kangangeekhilomitha ezimbalwa ukusuka kumbindi weSt. Petersburg. Linokuhlala abantu abanokuba ngama-60 000 yaye lelesibini kwawona mabala ezemidlalo makhulu kummandla owawusakuba yiSoviet Union. Ngemva kwalo kubonakala indawo angena kuyo amanzi oMlambo iNeva kwiNyoba yaseFinland.
Noko ke, eli bala lezemidlalo lalifanele lilungiswe. Kwacocwa imibhobho yamanzi, kwaza kwakhiwa izindlu zangasese ezongezelelekileyo. Indawo ekuhlalwa kuyo kweli bala lezemidlalo eziikhilomitha ezingama-30 kwakufuneka ipeyintwe. Ukongezelela, kwagawulwa amatyholo angqonge eli bala lezemidlalo nengca yachetywa. Kwathabatha iiveki ezininzi ukuze kugqitywe lo msebenzi.
Ukuthuthwa Kwabantu Neendawo Zokulala
Ekubeni kwakumenywe iindwendwe ezili-17 000 zakwamanye amazwe, ukulungiselela indlela yokuthutha abantu nokubafunela iindawo zokulala kwangqineka kungumsebenzi omkhulu gqitha. Abasemagunyeni eRashiya babenentsebenziswano gqitha kungekuphela nje kwizakhiwo zaseburhulumenteni ezahlukahlukeneyo kodwa kwanasemideni nasesikhululweni seenqwelo-moya sezizwe ngezizwe eSt. Petersburg.
Kwenziwa amalungiselelo neehotele ezingama-32 ukuze kuhlale uninzi lweendwendwe ezili-17 000 zakwamanye amazwe. Iindwendwe ezingama-29 000 ezazivela kwiindawo ezahlukahlukeneyo zommandla owawusakuba yiSoviet Union zalungiselelwa iindawo zokulala kwizikolo ezili-132 nakumaziko okunyamekela abantwana ebudeni bemini. Kwakhona iindwendwe kwakufuneka zithuthwe suku ngalunye zisiwe kumabala endibano, yaye kwaqeshwa ooduladula abangama-390 ukwenzela oku.
Iindwendwe ezininzi zakwamanye amazwe zazisitya kwiihotele ezazihlala kuzo. Noko ke, kwiinyanga eziliqela ngaphambi kwendibano, abasemagunyeni eSt. Petersburg bavakalisa ukuxhalaba ngengxaki yokutyisa amawaka amaninzi eendwendwe ezazivela kwiindawo ezahlukahlukeneyo zommandla owawusakuba yiSoviet Union. Bachaza ukuba akunakubakho ukutya okwaneleyo kweso sixeko yaye bathi amaNgqina kuza kufuneka eze nokutya kwezinye iindawo.
Yaye enza kanye oko. Amasebe aliqela eWatch Tower Society anikela ngokutya okuninzi okwathunyelwayo. Isebe laseFinland kuphela lanikela ngeetoni ezingama-200 zokutya kuloo ndibano! Ukongezelela, inkoliso yeendwendwe ezazivela kwamanye amazwe zeza nokutya okunkonkxiweyo, iziqhamo eziqwayitiweyo, isonka nokunye ukutya okuninzi. Kusuku lokugqibela lwendibano, iibhokisi ezinokutya ezazizalise iilori zasiwa kwibala lezemidlalo ukuze zinikwe iindwendwe ezazivela kummandla owawusakuba yiSoviet Union ukuze zibe nomphako wokubuyela ekhaya.
Iphulo Lokubhengeza Ngokubanzi
ISt. Petersburg sisixeko sesibini kwezona zikhulu eRashiya, esinabemi abanokuba zizigidi ezihlanu. Okwesihlandlo sokuqala, amaNgqina kaYehova eRashiya avunyelwa ukuba enze iphulo lokubhengeza ngokubanzi.
Eli phulo lingenakuthelekiswa nanto laqalisa kwiiveki eziliqela ngaphambi kwendibano. Kwashicilelwa amaphetshana anokuba sisigidi ngesiRashiya aza asasazwa. Ngaphambili kwiphetshana kwakukho isimemo sentetho yesidlangalala eyayiza kuba ngemva kwemini ngoMgqibelo. Ngasemva, kwakukho inkcazelo engocwangciso lwangeCawa. Ukongezelela, imibhalo ephantse ibe ngama-750-000 yephecana elinomxholo othi Yintoni Ayikholelwayo AmaNgqina KaYehova? yanikwa abemi baseSt. Petersburg. Oku kwabenza baqhelana neemfundiso zamaNgqina.
Uninzi lweendwendwe lwafika eSt. Petersburg kusuku okanye kwiintsuku ezine ngaphambi kwendibano. Ebudeni bezo ntsuku, amawaka eendwendwe ayesezitratweni esasaza amaphetshana yaye enikela amaphecana nolunye uncwadi ngesiRashiya. Ukongezelela, kwalungiselelwa iibhodi ezinkulu zesibhengezo eziliqela zaza zabekwa ecaleni kwezona zitrato zinabantu abaninzi kumbindi wesixeko iSt. Petersburg. Zaziziimitha ezi-3 ubude ne-1,5 ububanzi, zinesimemo sentetho yesidlangalala esibangel’ umdla ngaphambili nangasemva. Zimbi zagxunyekwa kanye kwiindawo ekungenwa kuzo kwiindlela ezingaphantsi ezinabantu abaninzi.
Ucwangciso
Ekugqibeleni, usuku lokuqala lwendibano lwafika, kwakukho abangaphezu kwama-45 000! Ucwangciso lwahlengahlengiswa ukuze kungenelwe iindwendwe ezininzi ezazingathethi isiRashiya okanye isiFinnish. Ngokomzekelo, iintetho eziliqela zanikelwa ngesiNgesi zaza zatolikwa ngesiFinnish nangesiRashiya. Ezininzi kuzo zanikelwa ngamalungu asixhenxe eQumrhu Elilawulayo lamaNgqina kaYehova.
Suku ngalunye lwendibano, kwakubakho iingxelo namava avela kwamanye amazwe abalaselisa indlela uYehova awusikelela ngayo umsebenzi wokushumayela kuloo mazwe. Ezi ngxelo, kunye namava amaninzi, ngokufanayo zanikelwa ngesiNgesi zaza zatolikwa ngesiRashiya nangesiFinnish.
Intetho yesidlangalala kwicandelo lesiRashiya yayixubusha ngombuzo obaxhalabise gqitha abantu abaninzi baseRashiya namhlanje. Umxholo wayo wawusithi “Ngaba Ngokwenene UThixo Usikhathalele?” Emva kwaloo ntetho ababekho endibanweni bakuvuyela ukufumana incwadana enemifanekiso entsha enomxholo othi Ngaba Ngokwenene UThixo Usikhathalele? ngesiRashiya nangesiFinnish.
Iculo elisetyenziswa ngamaNgqina kaYehova kwiintlanganiso zawo alikabikho ngesiRashiya. Ngenxa yoko, iWatch Tower Society yalungiselela incwadana ekhethekileyo equlethe amazwi azo zonke iingoma ezaziza kuculwa ebudeni bendibano. Iindwendwe ezazivela eRashiya zazifumanela imibhalo yobuqu ngoxa zazingena kwibala lezemidlalo. Hayi indlela ekwakuchwayitisa ngayo ukuphulaphula abantu abangama-46 000 abavela kumazwe awahlukahlukeneyo angama-30 bevumela uYehova uThixo iindumiso ngeelwimi zabo ezahlukahlukeneyo, kuquka isiRashiya!
Kangangamashumi eminyaka ingcamango yendaleko iye yafundiswa kwimimandla emininzi yehlabathi, kuquka imimandla eyayisakuba yiSoviet Union. AmaNgqina kaYehova kule mimandla ngoku axhotyiswe kakuhle ukuze abhence indlela ekhohlisa ngayo le ngcamango aze asasaze inyaniso engoMdali wobomi. Hayi indlela ababenemincili ngayo abo babekho endibanweni ekuqukunjelweni kocwangciso lwakusasa ngeCawa xa ilungu leQumrhu Elilawulayo lakhupha incwadi enomxholo othi Life—How Did It Get Here? By Evolution or by Creation? ngesiRashiya! Bonke baphiwa umbhalo waloo ncwadi.
Iindwendwe ezazivela kwamanye amazwe zaxelelwa kwangaphambili ukuba amaNgqina amaninzi eRashiya awanazo iiBhayibhile. Ngoko kwaziswa amawaka eeBhayibhile ngesiRashiya njengezipho. IiBhayibhile zaqokolelwa ndawonye ukuze kamva zisiwe kumabandla amaNgqina kaYehova zize zinikwe abo bazifunayo.
Bamangaliswa!
Ukususela kusasa ukusa emva kwemini ngoMgqibelo, abantu abangengomaNgqina babethontelana kwibala lemidlalo. Babefuna ukwazi yaye befuna ukuzibonela into eyayiqhubeka. Abaninzi bamangaliswa. Uninzi lwabo aluzange luve nto ngamaNgqina kaYehova ngaphambi kokufumana isimemo sentetho yesidlangalala. Bambi babevile ngendibano kwiindaba zikamabonwakude. Bebonke ababekho endibanweni babengama-46 214.
Elinye ibhinqa eliselula elingena kwiCawa yobuOthodoki baseRashiya lathi: “Ndiwathanda gqitha amaNgqina. Angabantu abanoxolo, abazolileyo nabanesidima.” Omnye owayetyelele wathi: “Sithemba ukuba amaNgqina kaYehova aya kuba nezinye iindibano ezingakumbi apha eSt. Petersburg.” Umphathi wamapolisa aseRashiya, owayabelwe ukusebenza kwindawo enendibano wathi “bekuvuyisa ukubakho kule ndibano.”
Igosa lasekuhlaleni lathi ‘amaNgqina kaYehova agqalwa ngabathile njengohlobo lwehlelo olungekho mthethweni nolusebenza ngokufihlakeleyo yaye abaphatha kakubi abantwana yaye nawo aziphatha kakubi. Kodwa ndiwabona engabantu abaqhelekileyo, abancumileyo, nabalunge ngakumbi kunabantu abaninzi endibaziyo. Anoxolo yaye azolile, yaye athandana gqitha.’ Longezelela lathi: “Andisiqondi ngokwenene isizathu sokuba abantu bathethe ubuxoki obunjalo ngani.”
Emva kwemini ngoMgqibelo abachasi abathile bazama ukuphazamisa indibano. Babephethe iibhanile ezinkulu ezazinezityholo zobuxoki ngokunxamnye namaNgqina. Njengokuba isihlwele sabaqhankqalazi sasisiba sikhulu saza sangxola ngakumbi, amapolisa abiza eminye imikhosi yokuwanceda ukukhusela ababeze endibanweni. Abaqhankqalazi abazange bakwazi ukungena kumasango angaphambili. Ekupheleni kolo suku, basuka nje bahamba, bedanile.
Omnye owayeze endibanweni owabona oko kwenzekayo wayethabatheke ngokukodwa ngumoya wentsebenziswano wamapolisa. “Iyandimangalisa into yokuba ndibone amapolisa esenza umgudu okhethekileyo wokusikhusela. Kwiminyaka nje embalwa edluleyo, amaNgqina kaYehova ebegqalwa eziintshaba zikaRhulumente. Kodwa ngoku amapolisa ayasikhusela!” Elinye ipolisa lavakalisa ngokunyanisekileyo iimvakalelo zalo xa laxelela iqela leendwendwe oku: “Asifuni ukuba nisoyike. Size apha ukuze sinikhusele size siqinisekise ukuba yonke into ihamba kakuhle.”
Yonke into yahamba kakuhle. Kwanemozulu yayizolile. Lalizole nasebukhweni bezinja kuzo zonke iintsuku zendibano.
Amawaka Ayabhaptizwa
Kwabaninzi eyona mbalasane yendibano yayikukubhaptizwa kwamawaka abantu. Elinye ibandla eSt. Petersburg, elinabavakalisi abangama-254, lanikela ingxelo yokuba kubhaptizwe abali-108! Kunzima ukuyichaza indlela abachukumiseka ngayo abo babezile xa babona abangama-3 256 ababeza kubhaptizwa bephakama. Isithethi sabuza imibuzo emibini ngokuphathelele uzahlulelo lwabo kuYehova, yaye baphendula bekhwaza ngamandla bathi “da” (ewe).
Emva komthandazo, amabhinqa awayeza kubhaptizwa alathiswa indlela eya kumagumbi awo okutshintshela, yaye amadoda alathiswa indlela eya kwawawo amagumbi okutshintshela. Njengokuba amakhulu abo ayesimka phambi kweqonga, ayebulisana yaye ebulisa nabaphulaphuli ngokuwangawangisa izandla.
Abaninzi kubaphulaphuli balila luvuyo. Abanye baqhwaba izandla bengayeki ngaphezu kwemizuzu engama-45. Olunye undwendwe lwaseFinland aluzange lukwazi ukuzibamba lwaza lwaqalisa ukulila. Luyacacisa: “Ngowe-1943, ndagayelwa ukuba ndingenele umkhosi waseFinland owawuza kulwa namaRashiya. Yayiyimfazwe emasikizi. Yaye ngoku, kule ndibano, ndibone amawaka abantu baseRashiya besahlulela ubomi babo kuYehova! Xa bendibona abanye babo bekwizihlalo ezinamavili yaye abanye babo beqhwalela, ndalila. Ndazibuza oku: ‘Ngaba nabo babesemfazweni? Ngaba bangxwelerhwa ngamajoni aseFinland?’ Mhlawumbi ngoku uYehova unokundinceda ukuba ndibe luncedo kubazalwana bam baseRashiya.”
Ngaba abazalwana abathetha isiRashiya bayalixabisa ilungiselelo likaYehova lesidlo sokomoya seentsuku ezintathu esilungiselelwe bona, ngale ndibano inkulu yokuqala eSt. Petersburg? Xa isithethi sokugqibela sasisenza amagqabaza aso okuqukumbela sathi: “Ngaphezu kwako konke sibulela uYehova uThixo ngale ndibano imangalisayo.” Abaphulaphuli baphakama baza ngehlombe baqhwaba izandla ngaphezu kwemizuzu emihlanu. Babephakamela ukudumisa uYehova!
Ngokwenene uYehova uThixo, uMthombo wokukhaya, uyawaxhasa amawaka abathwali bokukhanya kula mazwe awayesakuba yinxalenye yeSoviet Union. Emva kweminyaka engaphezu kwama-70 yokuthintelwa komsebenzi nokutshutshiswa, ngoku licacile elokuba ngalo lonke elo xesha uYehova ebezalisekisa isithembiso sakhe esikuIsaya 60:22, apho athi: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.”
Ukuba, emva kokufunda eli phephancwadi, unemibuzo ethile ngeBhayibhile, nceda uzive ukhululekile ukubonana namaNgqina kaYehova kwiHolo yoBukumkani ekummandla ohlala kuwo, okanye bhalela abapapashi beli phephancwadi. (Bona iphepha 5.)
[Ibhokisi ekwiphepha 31]
Ezinye Iindibano
Zintandathu xa zizonke iindibano eziqhutywe kweli hlobo lidluleyo kuwo wonke ummandla owawusakuba yiSoviet Union. Bebonke ababezile babengama-91 673 yaye kwabhaptizwa abangama-8 562. Oku kuthetha ukuba i-9,3 ekhulwini kwabo babekho babhaptizwa kwezi ndibano. Kakade ke, eli nani belisaya kuba likhulu kwanokuba iindwendwe ezazivela kwamanye amazwe ezili-17 000 zazingezanga kwindibano yezizwe ngezizwe yaseSt. Petersburg.
IVisoki Zamok, epapashwa eLviv (eyayisakuba yiLvov), yathi: “Ububele nokunyaniseka kuye kwesamela ngokwenyaniso kwibala lemidlalo ebudeni beentsuku ezintathu zendibano. Phezu kwabo nje ubukho bezihlwele ngezihlwele, amabala asacoceke njengokuba ebenjalo ngaphambi kwendibano. Imizekelo yokulungelelana neyoxolo ibinokufunyanwa kuyo yonke indawo.”
Ngoku njengokuba amaNgqina kaYehova enandipha inkululeko yokunqula uThixo ngokukhululekileyo kummandla owawusakuba yiSoviet Union, uninzi apho lunethuba lokuzibonela oko amaNgqina akuko ngokwenene. IKrasnoyarskii Komsomolets, iphephandaba laseRashiya, lithe: “Angabantu abanomtsalane, abanobuhlobo gqitha nabangoondilele ngokupheleleyo kwiipolitiki; akhuthaza ukusebenza ngenkuthalo, kungekhona ukusukela ‘iindlela zokuzuza imali ngokulula.’”
Iindibano Kummandla Owawusakuba YiSoviet Union
INCOPHO ABABHAP-
UMHLA ISIXEKO YABEBEZILE TIZIWEYO
Juni 26-28 ESt. Petersburg, eRussia 46 214 3 256
Julayi 10-12 ELviv, eUkraine 15 011 1 326
EAlma-Ata, eKazakhstan 6 605 829
Julayi 17-19 EKharkov, eUkraine 17 425 2 577
Julayi 24-26 EIrkutsk, eSiberia 5 051 536
ETallinn, e-Estonia 1 367 38
ISIMBUKU 91 673 8 562
[Umfanekiso okwiphepha 28]
Iibhodi ezinkulu zezibhengezo zabhengeza indibano
[Imifanekiso ekwiphepha 29]
Undwendwe oluvela eRashiya lufumana umbhalo walo weBhayibhile
Kwasetyenziswa iincwadana ezikhethekileyo ezazineengoma
[Imifanekiso ekwiphepha 30]
Ngokuchukumisayo kwabhaptizwa abangama-3 256