Ukusindiswa Ekufeni Lunyango Olungenagazi

Ngokubaliswa lelinye ilungu labasebenzi bakwikomkhulu leHlabathi lamaNgqina kaYehova

KWAKUBONAKALA kusisimanga. NgoFebruwari wowe-1991, ndandiye eBuenos Aires, eArgentina, ndiyokunceda ekuqhubeni iintlanganiso ezazingokusetyenziswa kwezinye iindlela kunotofelo-gazi. Yaye ngoku ndandisemlonyeni wengcwaba, ndisophela ngaphakathi kakhu⁠lu.

Le ngxaki yaqalisa kwiveki engaphambi kokuba ndiye apho, xa ndandiseMexico. Ndeva iingqaqambo emazantsi esisu kodwa andizange ndicinge ukuba zazinobuzaza ngolo hlobo. Omnye ugqirha wasekuhlaleni wathi kwakuyinto eqhelekileyo ngabantu baseMerika ukuba babe neengxaki zesisu xa betyelele loo mmandla. Wandinika amayeza okuthomalalisa iingqaqambo.

Xa ndandisiya eBuenos Aires ngosuku olulandelayo ndikhwele inqwelo-moya, iingqaqambo zaqinisa. Ndeva ngokungathi kukho into etshisayo apha emazantsi esisu, yaye iintsuku ezimbini kamva kwaba ngathi ngamadangatye omlilo. Ndahlatywa inaliti yokuthomalalisa iingqaqambo. Yandenza ndakwazi ukugqibezela iintetho zam kuloo ntlanganiso. Emva koko, ndasiwa kwisibhedlele sasekuhlaleni ndisuka kwisebe lamaNgqina kaYehova, apho mna nomfazi wam sasihlala khona. Apho kwathiwa ndinesilonda ekwakubonakala ukuba sasisandul’ ukuyeka ukopha.

Oko kwabonwa ngugqirha kwandidida noko, ekubeni ndingazange ndibe naso isilonda ngaphambili okanye iimpawu zaso. Phofu ke, kwakuthenjwa ukuba ndandiya kuchacha xa ndithe ndalala, ndafumana iipilisi zokuthomalalisa iasidi ndatya nokutya okuthambileyo. Ngelishwa, emva kokubuyela kwindawo yokunyamekela abagulayo kwisebe, ukopha kwaphinda kwaqala phantsi.

Ilindle lam lalimnyama, lizaliswe ligazi, yaye ndandimbatshile njengesidumbu. Ekugqibeleni, ndafa isiqaqa, ngempazamo nditsala umbhobho ongena emithanjeni owawusengalweni yam. Umfazi wam wabaleka wehla ngepaseji ekhwaza umongikazi.

Ngaba Kwakufuneka Utyando Okanye Lwalungafuneki?

Ngokukhawuleza oogqirha ababini babesele besecaleni lebhedi yam. Ngetoliki, bandazisa ukuba isibomvisi-gazi sam sasehle saya kutsho kwiidesilitha ezi-⁠6,8 kwigram nganye (esiqhelekileyo li-15). Bathi babeqhagamshelana ngemfonomfono nomnye ugqirha oyingcali ekutyandeni ngaphandle kokusebenzisa igazi. Wayencomela utyando olukhawulezileyo. Ndabuza ngezinto ezizezinye ezaziya kusetyenziswa kolo tyando.

Kwaqhagamshelwana nogqirha wezigulo zesisu. Wathi kwakungenzeka ukuba kufakwe isixhobo esithile esifana nekhamera emqaleni wam esasiza kubonisa le ndawo yayinesilonda kumzi (duodenum), inxalenye yokuqala yethunjana. Xa sikuloo ndawo yophayo, iyeza elinqumamisa ukopha lalinokuthiwa thontsi kwelo nxeba kuzanywa ukunqanda ukopha.

Ndabuza oku: “Ngaba akho amathuba okuphumelela?”

Waphendula wathi: “Nguqash-qash.” Noko ke, lo gqirha wotyando wathi ukuba ukusetyenziswa kweli yeza lokunqumamisa ukopha kuyasilela, ukulibaziseka nokulahlekelwa ligazi mhlawumbi kwakungasayi kuvumela ukuba utyando luqhubeke. Kwabonakala ukuba ndandinyanzelekile ukuba ndilwamkele olo tyando.

Kwaba yimeko echukumisa iimvakalelo. Mna nomfazi wam sangana. Ngaphambi kokuba ndimke ngenqwelo yezigulana ukuya esibhedlele, ndenzelwa uxwebhu lokubhala ilifa, ndaza ndalityobela. Abahlobo bethu bavakalelwa kukuba mhlawumbi ndandingasayi kusinda kolo tyando.

Utyando

Kwigumbi lotyando, ndabekwa kwinto eyabonakala ngathi yitafile enkulu yegilasi. Ukukhanya kwagqobhozela ngaphantsi kwaza kwakhanyisa phantsi ukusuka phezulu. Ndaba nexhala gqitha, nto leyo eyayifanele ukuba yayibonwa nangabanye, ekubeni omnye ugqirha wotyando weza kum. Wathi: “Ungakhathazeki. Yonke into iza kulunga.” Inkxalabo yakhe efudumeleyo yayithuthuzela. Bathi mandisele isidambisi zintlungu, yaye nje ngomzuzwana, ndatyhafa, ndandindisholo ndaza ekugqibeleni andabikho zingqondweni.

Ndavuka xa babendisusa kwibhedi enamavili bendibeka kwibhedi eqhelekileyo yasesibhedlele. Ndaqalisa ukuba nexhala xa ndeva iingqaqambo ezingathethekiyo kule ndawo ndandenziwe kuyo utyando nakwimibhobho eyayisempumlweni nasemqaleni. Umfazi wam, kunye nomhlobo wethu, bandithuthuzela. Ukukhotheka kwam lunxano kwancitshiswa kukundiqaba kwabo ngamanzi apha emilebeni. Ndandivuya kuba ndandiphilile.

Nangona ndandiqinisekisiwe ngokuba olo tyando lwalwenziwe ngokunempumelelo, umlinganiselo wegazi lam waqhubeka usihla. Kwakonakele phi? Ukuhlolisiswa kwelindle lam kwatyhila ukuba ndandisopha. Oogqirha babeqinisekile ukuba kwakungophi kulaa ndawo babesandula ukuyityanda​—⁠kodwa ke, kwakusopha phi?

Oogqirha bavakalelwa kukuba mhlawumbi ndiye ndasela ityhefu eye yathunuka elo nxeba, mhlawumbi kubhobhosi. Bathi ndandingekabi namandla okuba ndiphinde ndityandwe.

Ingcinezelo Yokwamkela Igazi

Njengokuba umlinganiselo wegazi lam wawuqhubeka usihla, ingcinezelo yokuba ndamkele igazi yaye isiba qatha. Umongikazi owayendinyamekela wathi ukuba yena wayengugqirha, wayeya kusuka nje aqhubele phambili andinike igazi engandibuzanga. Malunga nentsimbi yesithathu ekuseni, omnye ugqirha weza kum waza wathi: “Umele wamkele igazi ukuba ufuna ukuphila.”

Ndamcacisela ukuba ndingomnye wamaNgqina kaYehova yaye ngezizathu ezingokonqulo nezamayeza, ndandingazukulwamkela utofelo-gazi. (Levitikus 17:​10-14; IZenzo 15:​28, 29) Wayebonakala enomsindo, kodwa isimo sakhe sengqondo ndasibalela ekubeni sasibangelwa kukungaqondi nokungahloneli ukuma kwam okuqinileyo.

Ngenxa yengcinezelo eyayisanda, kwakunye nezinye iimeko esibhedlele, ndacela ukuba bandikhulule ndihambe. Kungabanga thuba lide ndabuyiselwa kwindawo yokunyamekela abagulayo ekwelo sebe ndisisiwa yinqwelo yezigulana.

Unyango Olwaphumelelayo Olusindis’ Ubomi

Ndacela omnye ugqirha apho, ongomnye wamaNgqina kaYehova, ukuba andiqinisekise ukuba wayendinike iEPO (erythropoietin), incindi yedlala eyenziwayo evuselela umongo emathanjeni ukuba wenze iiseli ezibomvu ngokukhawulezileyo. Wathi wayekwenzile oko. Kakade ke, umzimba usafuna izinto ezisisiseko zokuwakha ukuze uvelise iiseli zegazi ezibomvu eziphilileyo. Ezi zinto zokwakha umzimba yifolic acid, uvitamin B ingakumbi i-iron. I-iron dextran (I-Imferon) iyeyona ndlela ikhawulezayo yokunikela i-iron efunekayo xa ifakwe ngokuthe ngqo kwimithambo, yaye ndayicela.a

Noko ke, i-Imferon yayingafumaneki eArgentina. Kwakunzima ukuba ifumaneke kwanaseUnited States, ekubeni eninzi yayithunyelwe kuMbindi Mpuma ngenxa yemfazwe eyayikwiPersian Gulf. Sekunjalo, ekugqibeleni enye yafumaneka, yaye ngoko nangoko yaphathiswa omnye wamaNgqina kaYehova owayesendleni eya eArgentina.

Ngeli xesha isibomvisi-gazi sam salinganiselwa kwisi-4 kuphela. Ndisazi ukuba ukutsala igazi elininzi ukuze liye kuhlolwa kwakunokufak’ isandla kumlinganiselo omncinane weeseli ezibomvu, ndaxelela ingcali yezonyango eyayize kwelo sebe ukuba ndandingasayi kuphinda ndiyivumele ukuba inditsale igazi. Yabhebhetha ngelithi: “Simele silitsale ukuze sazi oko kuqhubekayo.”

Ndaphendula ndathi: “Niyayazi into eqhubekayo. Ndiyopha, yaye yiyiphi eyona ncindi ixabisekileyo emzimbeni wam?”

Wathi: “Ligazi.”

Ndaphendula ndathi: “Yaye okwangoku ndigqibe kwelokuba ndinganikeli elingakumbi.” Ukuba inani leeseli zam ezibomvu lehla kangakanani na akwaziwa.

Ngobo busuku ndathandaza ngokuzingisileyo kuYehova, ndicela ukhokelo lwakhe ndikwavakalisa ithemba lam lokuphinda ndivuke ngosuku olulandelayo. Ndavuka, kodwa ndava ukuba amandla am obomi ayendiphelela. Ukufa kwabonakala kundisongela. Inani leeseli ezibomvu kwisibomvisi-gazi sam ngokuqhelekileyo siba malunga needesilitha ezili-17,2 kwigram nganye, xa likowona mkhamo uphakamileyo wenqanaba elamkelekileyo, ngoko ndandilahlekelwe ligazi elingaphezu kwama-75 ekhulwini. Kwakusafuneka kwenziwe okuthile.

Ngaloo ntsasa ndacela ukuba nengxubusho noogqirha ababendinyamekela ngokumayela nonyango lwam. Uvitamin K, obalulekileyo ekwenzeni igazi libe nqumbululu, ndandingekamnikwa, kodwa ngoku bavuma ngoko nangoko ukuba babeza kuqalisa ukundinika. Ngokulandelayo ndabuza oku: “Akungebi mhlawumbi amanye ala mayeza nindinika wona abangela okanye afak’ isandla ekopheni?”

Baphendula bathi: “Akunjalo.”

Ndabuzisisa ndathi: “Ngaba niqinisekile?”

Ngentseni yosuku olulandelayo, omnye wabo gqirha weza kum waza wandixelela ukuba kuphando olubhekele phaya bafumanise ukuba elinye lamayeza ngokwenene lalimele ukuba lifak’ isandla ekopheni. Ngoko nangoko ndayeka ukulisebenzisa. Ukukulungela koogqirha ukundiphulaphula njengomguli nokuhlolisisa ngenyameko unyango lwam kwayenza banzi intlonelo yam ngabo.

Ngokwesicelo sam, uncwadi lwezamayeza lwaziswa ecaleni kwebhedi yam, yaye mna nomfazi wam saqalisa ukwenza uphando kulo. Elinye inqaku lathetha ngomchiza othintela ukopha, iyeza elithintela ukopha. Kungekudala silifumane elo nqaku kwangena uGqr. Marcelo Calderón Blanco, iNgqina esikhonza kunye nalo, waza wandazisa ukuba wayenomnqweno wokusebenzisa iyeza elikwafanayo! Elo yeza ndalinikwa ngendlela efana neyokucima. Malunga nexesha elinye, i-Imferon yafika ivela eUnited States ndayinikwa ngokuthi ifakwe ngqo emithanjeni.

Ngoku kwakufuneka kuphela silinde. Ngolo suku, ndaziva ndisiba namandla. Iintsuku ezintathu kamva ndabavumela ukuba batsale igazi ukuze liye kuhlolwa. Okumangalisayo kukuba, isibomvisi-gazi sam sasinyuke saya kutsho kwisi-6! Kanti, xa lalihlolwa kwiintsuku ezintlanu ngaphambili, sasifikelele kwisi-4 yaye sasisehla! Oogqirha babengaqinisekanga. Bayalela ukuba kwenziwe olunye uhlolisiso. Lwaqinisekisa olokuqala. I-EPO neImferon zazisebenza kakuhle!

Ingcali ekwikliniki eyayihlola igazi lam yatsala umnxeba yaza yathi ugqirha umele ukuba wayenditofele igazi. Wema ngelithi: “Akukho nani leeseli ezibomvu elinokunyuka ngokukhawuleza kangaka ngaphandle kotofelo-gazi.” Ugqirha wamqinisekisa ukuba andizange ndinikwe gazi. Wayefun’ ukwazi oku: “Nguwuphi lo mgaqo ulandelwayo unyusa umgangatho wegazi ngokukhawuleza kangaka?” Waxelelwa ngokusetyenziswa kwe-EPO neImferon.

UGqr. Amilcar Fernández Llerena, omnye woogqirha bam abangengomaNgqina, wandityelela ngosuku ekwafunyanwa ngalo iziphumo zokuvavanywa kwegazi lam. Emva kokuba endihlolile, emangalisiwe wathi: “Ndikuthiya igama elitsha​—⁠unguLazaro.” (Thelekisa uYohane 11:​38-44.) Kwafuneka ndibambe iinyembezi ngamandla am onke.

UGqr. Llerena wathi: “Ungambulela uThixo wakho, uYehova, ngokuba uphila.” Ndambuza ngentsingiselo yoko wayekuthetha. Waphendula wathi: “Ukuba ubuyintshayi, usebenzisa kakubi iziyobisi, okanye ulinxila, ubungasayi kusinda kolu tyando. Kodwa ekubeni umzimba wakho ucocekile yaye womelele ngenxa yokuthobela imithetho kaThixo, uye wasinda.”

Inkcazelo endayisebenzisayo kwimeko yam ngokuyintloko yayikoko sasikufundisa iiKomiti Zokunxibelelana Nezibhedlele kwiintlanganiso ezazikuMntla Merika, eYurophu nakuMzantsi Merika. Ingongoma eyintloko kolo cwangciso yayizezinye iindlela ezinempumelelo ezinokusetyenziswa kwiimeko zezonyango ngaphandle kwegazi. Okuvuyisayo kukuba inkcazelo emayela nezinye iindlela iyafumaneka koogqirha ngeKomiti Yokunxibelelana Nezibhedlele, ekukho ezingaphezu kwama-800 ehlabathini jikelele.

Ndinethemba lokuba amava am aya kunceda amanye amaNgqina afuna unyango olungasebenzisi gazi. Isibhedlele endafumana kuso utyando kamva saqhagamshelana nesebe lamaNgqina kaYehova laseArgentina saza sathi ngoku sasiyiqonda into yokuba sasinomgaqo onempumelelo ekunyangeni abantu abagulayo ngeemveliso ezingafuni gazi yaye baya kukuvuyela ukusebenzisana nathi kwixesha elizayo.

[Umbhalo osemazantsi]

[Umfanekiso okwiphepha 23]

Ndisinikela umva isibhedlele emva kotyando lwam