Ukujamelana Namanqam Ezonyango

“NDIZA kuthetha ngokuphandle; unethumba elinwenwayo. Ukuba asilisusi kuselithuba, liya konakalisa amanye amalungu abalulekileyo. Kungoko ndicebisa ukuba umlenze wakho unqunyulwe.”

Amazwi alo gqirha anditsho ndabanda, njengethunga lamanzi, ngokwendlela ekuthethwa ngayo apha ePeru. Ndandineminyaka nje engama-21 ubudala. Kwinyanga engaphambili ndandiqalise ukuva iintlungu kwidolo lasekhohlo yaye ndafumana unyango lwesifo samathambo. Noko ke, kwiintsuku ezimbalwa ndandingakwazi nokuma.

Ngelo xesha, ndandikhonza njengomlungiseleli wexesha elizeleyo wamaNgqina kaYehova kwiintaba zeAndes kumbindi wePeru. Emva kokubuyela kwidolophu yakowethu eHuancayo, ndahamba nomama ukuya kwisixeko saseLima esiselunxwemeni. Apho, ngoJulayi 22, 1994, ndaya kwesona sibhedlele siphambili sokunyanga umhlaza kwelo lizwe, kulapho ndafumanisa khona ukuba isifo endinaso sasibizwa ngokuba yiosteosarcoma.

Umbandela Wesazela

Kungekudala ndaxelelwa ukuba esi sibhedlele sasingalwenzi utyando ngaphandle kokusebenzisa igazi. Omnye ugqirha wada wathi: “Ndikhetha ukuba uye kufela kowenu kunokuba ndibekek’ ityala ngokufa kwakho.” Kodwa iKomiti Yokunxibelelana Nezibhedlele yasekuhlaleni (HLC [Hospital Liaison Committee]), iqela lamaNgqina kaYehova elikhuthaza intsebenziswano phakathi kwesibhedlele nomguli, yandithethela. Ngenxa yoko, ugqirha oyintsumpa yesibhedlele wanika imvume kuye nawuphi na ugqirha osebenza ngaphantsi kwakhe ukuba andityande ukuba wayekulungele ukwamkela olu celomngeni. Omnye ugqirha wayekulungele, yaye ngokukhawuleza ndalungiselelwa utyando.

Ndafikelwa ziindwendwe ezininzi ngaphambi kokuba ndityandwe. Umfundisi, owayephethe iBhayibhile ngesandla, wandityelela waza wandixelela ukuba ukugula kwam kwakusisohlwayo esivela kuThixo. Wandibongoza ngelithi ukwamkela naluphi na unyango kwakunokubusindisa ubomi bam. Ndamxelela ukuba ndandizimisele ukuthobela umyalelo weBhayibhile ‘wokukhwebuka egazini.’—IZenzo 15:19, 20, 28, 29.

Kwakhona abongikazi babedla ngokufika baze badumzele besithi: “Obunjani bona ubudenge, obunjani bona ubudenge!” Kwafika noogqirha bengamaqela. Babefuna ukubona lo mfana wala ukwamkela utofelo-gazi kuhlobo lotyando abebelugqala lungenakwenziwa ngaphandle kokusetyenziswa kwegazi. Noko ke, ezona ndwendwe zazibalulekile kum, yayingamaKristu endikhonza nawo nezalamane. Abongikazi babechukumiseke gqitha koku kutyelelwa kwam ngabantu abaninzi nababendikhuthaza.

Unyango Olunempumelelo Ngaphandle Kwegazi

Kwimizuzu nje embalwa ngaphambi kokuba ndilaliswe, ndeva enye yeengcali zokuphelisa iintlungu ebudeni botyando isithi: “Andiyi kubekwa tyala ngento eya kwenzeka!” Kodwa enye ingcali yokuphelisa iintlungu ebudeni botyando kunye nogqirha owayeza kundityanda nabalathisi besibhedlele, basihlonela isicelo sam sokungalitofelwa igazi. Emva koko ndeva ingcali yokuphelisa iintlungu ebudeni botyando isithi: “Samuel, vuka. Sele lugqityiwe utyando.”

Nangona umlenze wam wonke wawususiwe, ndaqalisa ukuva iintlungu ezingathethekiyo kwindawo owawukuyo. Ndafuna ukuphozisa iintlungu ngokuhlikihla ithanga, eneneni, elalingasekho. Ndandinento engaqhelekanga ekuthiwa yiphantom pain. Ndandisiva iintlungu ngokwenene, yaye zazindingcungcuthekisa, nangona umlenze owawubonakala ngathi nguwo obangela iintlungu wawususiwe.

Emva koko, kwenziwa amalungiselelo okuba ndifumane unyango lwemichiza (chemotherapy). Umphumo ongemhle wolu nyango uba kukulahlekelwa ziiseli ezimhlophe nezibomvu zegazi kunye neeplatelet zegazi, eziluncedo ekwenzeni igazi linqume. Oku kwakuthetha ukuba kwakumele kuxelelwe iqela elitsha loogqirha ngokwala kwam ukwamkela utofelo-gazi. Kwakhona iHLC yanxibelelana nabasemagunyeni, yaye aba gqirha bavuma ukulwenza olu nyango ngaphandle kwegazi.

Ngokuqhelekileyo kwabakho imiphumo engemihle emva kolu nyango lwemichiza—inwele zam zavuthuluka yaye ndaba nesicaphucaphu, ndahlanza yaye ndadandatheka. Kwakhona ndandisele ndixelelwe ukuba ndiya kuba sengozini kangangama-35 ekhulwini yokuba ubuchopho bam buchatshazelwe ligazi. Ndaziva ndinyanzelekile ukubuza omnye woogqirha ngoko kwakuza kundibulala—umhlaza okanye unyango lwemichiza.

Emva koko, oogqirha bathi babengenakulwenza unyango lwesibini lwemichiza ngaphandle kokuba kuqala bandise umlinganiselo wegazi lam ngokunditofela igazi. Omnye ugqirha enomsindo wandixelela ukuba ukuba ebenako, ebeya kundilalisa aze anditofele igazi. Ndamxelela ukuba ngaphambi kokuba ndivumele oko kwenzeke, ndandiya kuluyeka ngokupheleleyo unyango lwemichiza. Lo gqirha wakuncoma ukuma kwam ngokuqinileyo.

Ndavuma ukuthabatha incindi eyenziwe ngedlala (erythropoietin) ukuze yandise umlinganiselo wegazi lam. Xa yasetyenziswayo, umlinganiselo wegazi lam wenyuka. Emva koko, ndenziwa unyango lwemichiza ngokuthi lufakwe ngqo emithanjeni kangangethuba leentsuku eziliqela. Ndandidla ngokulala apho ndicinga, ‘Ngaba lo mlinganiselo wonyango lwemichiza nguwo owawuya kubangela ubuchopho bam buchatshazelwe ligazi?’ Okuvuyisayo kukuba ndagqiba ukusebenzisa onke amayeza kungazange kubekho imiphumo eyintlekele.

Ngaphambi kokuba ndityandwe kwakungumgaqo wesi sibhedlele ukwala ukunyanga abantu ukuba babengalwamkeli utofelo-gazi. Kodwa lo mgaqo watshintsha. Enyanisweni, kanye ngemini esemva kokuba ndityandiwe ugqirha owayendityanda wenza olunye utyando ngaphandle kokusebenzisa igazi, yaye ngesi sihlandlo umguli wayengenguye omnye wamaNgqina kaYehova! Ngoku oogqirha abaninzi kwesi sibhdlele basebenza ngokusondeleyo neHLC, yaye baye bavuma ukwamkela abaguli abafuna utyando ngaphandle kwegazi.

Ukuzilungelelanisa Nokusikelwa Umda

Ukususela ebuntwaneni, ndiye ndafundiswa iindlela zikaThixo. Ndiqinisekile ukuba oku kwandinceda ekulondolozeni iinkolelo zam ezisekelwe eBhayibhileni kula manqam ezonyango. Noko ke, mvanje ndiye ndanxunguphaliswa kukungakwazi ukwenza okungakumbi kangangoko bendiya kuthanda ukwenza enkonzweni kaThixo. Ndachazela umalume ongumdala ongumKristu ngendlela endivakalelwa ngayo. Wandikhumbuza ukuba nompostile uPawulos waba noko wakubiza ngokuba ‘liliva enyameni yakhe’ yaye oku kwamthintela ekukhonzeni uThixo ngokuzeleyo njengoko wayefuna. Kodwa uPawulos wenza oko wayenokukwenza. (2 Korinte 12:7-10) Amazwi kamalume andinceda ngokunzulu.

Kutshanje ndiye ndafakelwa umlenze owenziweyo. Ndinethemba lokuba oku kuya kundenza ndikwazi ukunikela inkonzo eyandisiweyo kuThixo wethu, uYehova. Ndinombulelo kuba ndiye ndalondoloza isazela esihle ebudeni bamanqam ezonyango. Ndiqinisekile ukuba ukuba ndiqhubeka ndithembekile, uYehova uya kundivuza ngomzimba osempilweni nobomi obungunaphakade kumhlaba oyiparadisi, apho iintlungu nokubandezeleka kungasayi kuphinda kubekho.—ISityhilelo 21:3, 4.—Ngokubaliswa nguSamuel Vila Ugarte.