Ngaba Ukuvela Ngokutsha Kusisicombululo Seemfihlelo Zobomi?
Ngaba wakha waphila ngaphambili?
Ngaba uza kuphila olunye uhlobo lobomi kwakhona wakuba ufile?
Le mibuzo yenza kuthi qatha engqondweni yakho imfundiso yokuvela ngokutsha.
IThe New Encyclopædia Britannica ikuchaza “ukuvela ngokutsha” ngale ndlela ilandelayo: “Yinkolelo yokuba umphefumlo uzalwa kwakhona uphuma ungena kwinto okanye kwizinto eziphilayo ezilandelelanayo, usenokuba ngumntu, isilwanyana, okanye, kwezinye iimeko, ube ngumfuno.”
Ukuvela ngokutsha kubaluleke gqitha kwiinkonzo zaseMpuma, ngokukodwa ezo zivela eIndiya, njengobuBhuda, ubuHindu, ubuJain nobuSikh. Ngokomzekelo, phakathi kwamaHindu eIndiya, ubomi bujongwa njengomjikelo oqhubekayo wokufa nokuzalwa kwakhona.
Noko ke, kutshanje ingcamango yokuvela ngokutsha iye yanomtsalane kwabaninzi abahlala kumaZwe aseNtshona, kuquka iqela labantu abaselula. Ngokutsho komnye umbhali wemihlathi ebhala kwiSunday Star yaseKhanada, isizathu sokuba kubekho umdla ongaka ubukhulu becala “kungenxa yempembelelo yeengcamango zonqulo lwaseMpuma kwibutho lethu labantu laseNtshona, eyaqala ngeminyaka yee-1960.”
Esinye isizathu sokuba abantu babe nomdla ekuveleni ngokutsha sikukuba abanye abantu abadumileyo baye bazingomb’ isifuba esidlangalaleni yaye besitsho bengaqhuli besithi bakha baphila kwakanye okanye kaninzi ngaphambili. Kwakhona, unomathotholo, umabonwakude, amaphephancwadi namanye amajelo eendaba abonise umdla ekuveleni ngokutsha, njengokuba benjenjalo nabanye abantu abafundileyo abahlukahlukeneyo abanjengoogqirha nabafundisi-ntsapho.
Konke oku kubangele umdla ongathethekiyo. Ngaloo ndlela, ngokutsho kolunye uhlolisiso, abantu abamalunga nekota eKhanada naseUnited States ngandlel’ ithile babonise ukuba bayakwamkela ukuvela ngokutsha.
Abo Bathi Bakha Baphila Ngaphambili
Umdlali kwimifanekiso eshukumayo uShirley MacLaine wathi kudliwano-ndlebe noPhyllis Battelle kwiLadies’ Home Journal izihlando eziliqela ukhe “wabuyela” emva ecinga ngezinto zexa elidluleyo. Wathi: “Ndikhumbula izihlandlo ezininzi endakha ndaphila ngazo ngaphambili—maxa wambi ndandiba yindoda, ngamanye amaxesha ndibe libhinqa.”
Kwincwadi ethi Coming Back, uGqr. Raymond Moody wachaza ulingelo awalwenza kubafundi bakhe nakwabanye abantu. Wathi ngokubalalisa ngomlingo wayebabuyisela kwixesha langaphambi kokuzalwa kwabo, yaye babesithi babekhumbula izinto ezenzeka kubomi ababuphila ngaphambili. Omnye umntu wathi wakha waphila njengomEskimo phakathi kwamaEskimo. Omnye wathi wakha waphila ‘kwixesha langaphambi kwempucuko,’ kumawaka eminyaka eyadlulayo.
UGqr. Moody naye wathi wakha waphila kasithoba ngaphambili. Wayephila ubomi obahlukahlukeneyo ukususela ekuphileni ehlala phezulu emithini njengohlobo oluthile “lomntu wakudala-dala” ukuya kutsho kubomi awabuphila ngemihla yoBukhosi baseRoma, awathi, ngokutsho kwakhe, wahlaselwa waza wabulawa yingonyama kwibala lemidlalo.
Ukusetyenziswa kokulalisa ngomlingo ukuze abo bathanda ukwazi babuyiselwe kwixesha ekucingelwa ukuba lelangaphambi kokuzalwa kwabo nako kuye kwathiwa kuyingenelo kwabanye. Oogqirha bakusebenzisile xa benyanga izigulo ezingokweemvakalelo. Kuthiwa uloyiko olungaqhelekanga luye lwancedwa ngokulanda ingxaki kwinto eyenzeka kubomi bangaphambili. Iyinyaniso kangakanani le ngcamango?
Ukubaliswa Kwamava Abo Babefe Isiqaqa
Amava abo babefe isiqaqa abaliswe ngabantu abathile enze ingcamango yokuvela ngokutsha yathandwa. Kwincwadi ethi Life After Life, uGqr. Moody unikela ingxelo yoko wakufumanisayo kumava awabaliswa ngabantu abangama-50 ababefe isiqaqa.
Ngoxa amava abo engafani, lo kaMoody ucingela ukuba anento afana ngayo. Aba bantu babeziva ngathi bahamba kwitonela elide nelimnyama. Babeziva ngathi bahlukanisiwe nemizimba yabo, ngathi bayandanda. Babevakalelwa kukuba babetyhubela kwelo tonela besiya ngasekukhanyeni okuqaqambe gqitha, yaye ekupheleni kwelo tonela, babona amalungu eentsapho zabo awafa kudala. Ekugqibeleni, bavuka besekwimizimba yabo. Noko ke, asingabo bonke abawatyhubela onke la manqanaba.
Kuthiwa amava anjalo aye abanceda abo baba nawo. Ukuba kunjalo, bekufanele ukuba aye abanceda bayeka ukoyika ukufa yaye bekufanele ukuba aye abenza banentembelo yokuba ubomi bunentsingiselo. Kodwa bekungasoloko kunjalo. Abaninzi baqhubeka bekoyika ukufa yaye bengenantembelo yokuba ubomi bunentsingiselo yokwenene.
Abo bakholelwa ekuveleni ngokutsha bathi amava anjalo bawabona exhasa ingcamango yokuba umphefumlo womntu uzalwa kwakhona kwiindidi ezahlukeneyo zobomi. Kodwa ngaba le mfundiso iyakholeleka? Ngaba ngokwenene ukuvela ngokutsha kunikela isicombululo kwiimfihlelo zobomi? Ngaba singafumana nayiphi na impendulo kwimibuzo ethi, Ngaba wakha waphila ngaphambili? Ngaba uza kuphila kwakhona? Ngaba abantu banomphefumlo oshiya umzimba ekufeni? Le mibuzo iza kuxutyushwa kumanqaku alandelayo.
[Amagama acatshulweyo akwiphepha 19]
Ukuvela ngokutsha kubaluleke gqitha kwiinkonzo zaseMpuma
[Umfanekiso okwiphepha 19]
Ivili lobomi lamaHindu