Ngaba Uyakukholelwa Ukuvela Ngokutsha?
EBHALELA unyana wakhe, ongumfundi kwiyunivesithi yaseUnited States uMukundbhai wathi: “Ngaba usayikhumbula intombazana eyayihlala elumelwaneni owawuthandana nayo ngoxa wawusakhula apha eIndiya? Iza kutshata kwiiveki nje ezimbalwa. Ndicinge ukuba umele ukwazi oku.”
Kwakutheni ukuze lo bawo abelane nonyana wakhe ngezi ndaba? Ngapha koko, uMukundbhai wabayekisa ukuthandana aba bakwishumi elivisayo kwiminyaka eyadlulayo. Ngokubhekele phaya, unyana wakhe wayeseUnited States ngenjongo yokufumana imfundo ephakamileyo kangangeminyaka emithandathu. Ngelo xesha, wayengazange aqhagamshelane naloo ntombazana yaye uMukundbhai wayekwazi oko.
Ngoko, kwakutheni ukuze axhalabe ngale nto? Kungenxa yokuba uMukundbhai wayekholelwa ekuzalweni ngokutsha, okanye ukuphinda uzalwe.a Ukuba mhlawumbi ukuthandana kwaba bantwana beselula kwakubangelwe kukuba babengamaqabane omtshato kwixa langaphambili, kwakuya kuba kukukhohlakala ukubahlula ekubeni ngoku bekwinqanaba lokuba bangatshata. UMukundbhai wayefuna nje unyana wakhe azi ngemeko ngaphambi kokuba le ntombazana ibe ngumfazi womnye umntu kobu bomi.
Khawucinge ngenye imeko. Intombazana eneminyaka emine eyayigcuma ziintlungu yayiquqa ibuyelela kwisibhedlele esiseMumbai, eIndiya. Yayinomthambo owawusebenza kwicala elinye lentliziyo yayo. Abazali bayo abazizityebi babengenakukwazi ukumbukela umntwana wabo ebandezeleka. Kodwa baqiqa ngelithi: “Simele siyamkele. Umele ukuba ikho into awayenzayo kubomi bakhe bangaphambili ukuze abe unje.”
Inkolelo yokuvela ngokutsha inendima ebalulekileyo kubomi bezigidi zamaHindu, amaBhuda, amaJain, amaSikh nakwezinye iinkonzo zaseIndiya. Amava obomi—asusela ekuthandaneni ukuya kutsho ekubandezelekeni okubuhlungu—zigqalwa njengemiphumo yezenzo ezenziwa kubomi bangaphambili.
Abaninzi kumazwe aseNtshona nabo bayavuyiswa yimfundiso yokuvela ngokutsha. UShirley MacLaine ongumdlali weqonga waseMerika uthi uyakholelwa kuko. Umbhali uLaurel Phelan waseVancouver, eBritish Columbia, eKhanada, uthi ukhumbula izihlandlo ezingama-50 zobomi bakhe bangaphambili. Kuhlolisiso lukaGallup lowe-1994 olwalusenzelwa iCNN/USA Today, kwafunyaniswa ukuba abantu abadala abangaphezu kwama-270 kwabali-1016 bathi bakholelwa ekuveleni ngokutsha. Ukukholelwa ekuveleni ngokutsha kukwayinxalenye yeenkolelo zesiZukulwana Esitsha. Kodwa bubuphi ubungqina obuxhasa le ngcamango?
“Iinkumbulo zobomi bangaphambili!” batsho abo bakholelwa ekuveleni ngokutsha. Ngenxa yoku, xa uRatana oneminyaka emithathu waseBangkok waqalisa ukuba “neenkumbulo zobomi bakhe bangaphambili njengomama owayeluthanda gqitha unqulo owafa ekwiminyaka yama-60,” uninzi lwabo babephulaphule lakwamkela oko njengobungqina obubambekayo bokuvela ngokutsha.
Noko ke, kuninzi okungakholelekiyo. Nezinye iinkcukacha zenkumbulo ezibalelwa kubomi bangaphambili zinokubakho.b Kwincwadi yaso ethi Hinduism: Its Meaning for the Liberation of the Spirit, isithandi sobulumko esingumHindu uNikhilananda sithi ‘amava oko kwenzeka emva kokufa akanako ukubonakala ngokwengqiqo.’ Sekunjalo uqinisekisa ngelithi “imfundiso engokuphinda uzalwe iyinyaniso ngakumbi kunokuba ingabi yiyo.”
Kodwa ngaba iBhayibhile iyayixhasa le mfundiso? Yaye liliphi ithemba ngabafi elinikelwa liLizwi likaThixo eliphefumlelweyo?
[Imibhalo esemazantsi]
a IThe New Encyclopædia Britannica, ithi, “ukuvela ngokutsha” kuthetha “ukuzalwa kwakhona komphefumlo kwisihlandlo esinye okanye ezingaphezulu ezilandelelanayo, okunokuba ngumntu, isilwanyana, okanye, ngamanye amaxesha, isityalo.” Kwakhona ibinzana elithi “ukuzalwa kwakhona” likwasetyenziswa ukuchaza eli binzana, kodwa igama elithi “ukuvela ngokutsha” lamkelwa ngokubanzi. Izichazi-magama eziliqela zeelwimi zaseIndiya zisebenzisa la magama elinye endaweni yelinye.
b Bona iphepha 20-2 lenkupho kaVukani! kaJuni 8, 1994.
[Umfanekiso okwiphepha 4]
Ngaba uyohlwaywa ngenxa yezono azenze kubomi bangaphambili?