Ngaba ILizwi LikaThixo Liyakufundisa Ukuvela Ngokutsha?
NABANI na ohlolisisa iBhayibhile enethemba lokufumana into exhasa imfundiso yokuvela ngokutsha ubuya nemband’ esikhova. Akunakuze uyifumane indawo ethi abantu bakha baphila ngaphambili. Ngaphezu koko, akunakuze uwabone eBhayibhileni amabinzana anjengelithi “ukuvela ngokutsha” okanye “ukufuduswa komphefumlo” okanye “umphefumlo ongafiyo.”
Noko ke, abathile abakholelwa ekuveleni ngokutsha bazama ukuchaza isizathu sokuba iBhayibhile ingakuxhasi oku ngokuthi ingcamango yokuvela ngokutsha yayixhaphake gqitha kumaxesha amandulo kangangokuba bekungayi kuba yimfuneko ukuyicacisa. Liyinyaniso elokuba le mfundiso yokuvela ngokutsha indala gqitha, kodwa kungakhathaliseki ukuba indala kangakanani na okanye yayixhaphake okanye ingaxhaphakanga kangakanani, umbuzo usemi, Ngaba iBhayibhile iyayifundisa?
Kweyesi-2 kuTimoti 3:16, 17, umpostile uPawulos wabhala wenjenje: “Sonke isibhalo, siphefumlelwe nguThixo nje, sikwancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke, exhobele wonke umsebenzi olungileyo.” Ewe, iBhayibhile iliLizwi likaThixo eliphefumlelweyo, anxibelelana ngalo nentsapho engabantu. Yaye njengokuba uPawulos wabhalayo, yenza lowo ufuna ukwazi ngokunyanisekileyo “afaneleke, exhobele” ukuphendula yonke imibuzo ebalulekileyo engobomi, kuquka nemibuzo engezinto zexa eladlulayo, elimiyo nelizayo.
Kwakhona uPawulos wathi: “Nathi, ukulamkela ilizwi likaThixo lodaba kuthi, analamkela lililizwi labantu; nalamkela, njengokuba kunjalo okwenyaniso, lililizwi likaThixo.” (1 Tesalonika 2:13) Ekubeni iBhayibhile ineengcinga zikaThixo, kungekhona ezomntu ongafezekanga, ayifanele isimangalise into yokuba iBhayibhile isoloko isahluka kwiingcinga zabantu nangona zisenokuba bezithandwa ukutyhubela iminyaka. Kodwa usenokuthi, ‘Ngaba iBhayibhile, kwiindawo ezithile, ayikhe ithethe into eyelele ekuveleni ngokutsha?’
Iindinyana Eziqondwa Phosakeleyo
Abo bakholelwa ekuveleni ngokutsha bathi iBhayibhile iwuthi tshuphe lo mbandela kuMateyu 17:11-13, apho uYesu adibanisa uYohane umBhaptizi nomprofeti wamandulo uEliya. Le ndinyana ifundeka ngolu hlobo: “Okunene kufika uEliya tanci, abuye azimise zonke izinto. Ke ndithi kuni, uEliya uselefikile . . . Bandula ukuqonda abafundi ukuba ubethetha kubo ngaye uYohane umbhaptizi.”
Ngokukhankanya oku, ngaba uYesu wayethetha ukuba umprofeti uEliya wayevele ngokutsha wanguYohane umBhaptizi? Naye uYohane wayesazi ukuba kwakungenjalo. Kwesinye isihlandlo xa wabuzwayo, “UnguEliya na?” UYohane waphendula ngokucacileyo wathi: “Andinguye.” (Yohane 1:21) Noko ke, kwakuxelwe kwangaphambili ukuba uYohane wayeza kuvulela indlela uMesiya “enomoya enamandla kaEliya.” (Luka 1:17; Malaki 4:5, 6) Ngamanye amazwi, uYohane umBhaptizi wayengu-“Eliya” ngengqiqo yokuba wayesenza umsebenzi ofanayo nokaEliya.
KuYohane 9:1, 2, sifunda oku: “Uthe ke edlula, wabona umntu obe eyimfama kwasekuzalweni kwakhe. Bambuza abafundi bakhe, besithi, Rabhi, ngubani na owonayo, ngulo, ngabazali bakhe, sini na, ukuze azalwe eyimfama nje?” Bambi abakholelwa ekuveleni ngokutsha bathi kuba le ndoda yazalwa iyimfama, imele ukuba yenza isono kubomi eyayibuphila ngaphambili.
Kodwa enoba yintoni eyabangela abafundi babuze, impendulo eyanikelwa nguYesu imele isincede ekwenzeni isigqibo. Wathi: “Akone lo, akone bazali bakhe.” (Yohane 9:3) Oku kuyaphikisana nemfundiso yokuvela ngokutsha, yona ebonisa ukuba iziphene zibangelwa zizono owazenza xa wawuphila ngaphambili. Ingongoma yokuba akukho mntu unokona ngaphambi kokuzalwa kwakhe yakwaphuhliswa nguPawulos xa wabhala wathi ngoEsawu noYakobi “bengekazalwa, bengekenzi nto nelungileyo nembi.”—Roma 9:11.
Ukuvuka, Kungekhona Ukuvela Ngokutsha
Nangona iBhayibhile ingayixhasi imfundiso yokuvela ngokutsha, akukho mntu ufanele azive edanile. Isigidimi seBhayibhile sinikela into ethuthuzela ngakumbi kunengcamango yokuphinda uzalwe kwakweli hlabathi lizaliswe kukugula, usizi, intlungu nokufa. Yaye oko kuthenjiswa yiBhayibhile akwaneli nje ukuthuthuzela kodwa kuyinyaniso, kuliLizwi likaThixo.
UPawulos wayichaza ngolu hlobo le mfundiso ikhuthazayo: “Ndinethemba kuThixo . . . ukuba kuza kubakho uvuko lwabafileyo, lwamalungisa kwanolwabangemalungisa.” Igama elithi “uvuko,” okanye iindawo ezithetha ngalo, libonakala izihlandlo ezingaphezu kwama-50 kwiZibhalo zamaKristu zesiGrike, yaye uPawulos uthetha ngalo njengemfundiso yokuqala kukholo lwamaKristu.—IZenzo 24:15; Hebhere 6:1, 2.
Ngokucacileyo, into yokuba kuvukwe ekufeni ithetha ukuba ukufa kuyinto ekhoyo. Ayikho indawo eBhayibhileni ebonisa ukuba umntu unomphefumlo ongafiyo. Ukuba umntu ubenomphefumlo ongafiyo owushiyayo umzimba akufa uze uye kuphila ngonaphakade ezulwini okanye esihogweni okanye uvele ngokutsha, ngoko uvuko belungayi kuba yimfuneko. Kwelinye icala, iindinyana zeBhayibhile ezimalunga nekhulu zibonisa ukuba umphefumlo womntu, awunguwo ongafiyo, kodwa uyafa yaye uyatshabalala. Ngokuvisisanayo iBhayibhile ithetha ngokufa njengokusisichasi sobomi, oko kukuthi, kukungaphili asikokuphila.
Ukufa, okanye ukungaphili, kwakusisohlwayo esanikwa uAdam noEva ngenxa yokona kuThixo. Kwakusisohlwayo, kungekhona indlela yokuya kobunye ubomi bokungafi kwenye indawo. UThixo wayichaza kakuhle into yokuba babeya kubuyela apho babevela khona—eluthulini lomhlaba: “Kuba uthatyathwe kuwo; ngokuba uluthuli, uya kubuyela kwaseluthulini.” (Genesis 3:19) Babengenamphefumlo ungafiyo ngaphambi kokudalwa kwabo nguThixo waza wababeka emhlabeni, kumyezo wase-Eden, ibe babengenamphefumlo unjalo nasemva kokufa kwabo.
Ukuvuswa kwelabafileyo kufana nokuvuswa ebuthongweni, okanye ekuphumleni. Ngokomzekelo, uYesu wathi ngoLazaro awayeza kumvusa: “ULazaro . . . ulele; ndiyaya ukuba ndimvuse.” (Yohane 11:11) Sifunda oku ngomprofeti uDaniyeli: “Uya kuphumla, uvuke, uye eqashisweni lakho ekupheleni kwemihla.”—Daniyeli 12:13.
Ubomi Obungunaphakade Emhlabeni
Yintoni eya kufunyanwa ngabo bavuke ekufeni? IBhayibhile ithetha ngeendidi ezimbini zovuko—olwasezulwini nolwasemhlabeni. Uvuko lwasemhlabeni luza kufunyanwa yinkoliso yabo bakha baphila baza bafa. Liqaqobana elinethemba lovuko lwasezulwini, eliya kulawula noKristu kuBukumkani bukaThixo basezulwini. (ISityhilelo 14:1-3; 20:4) Luya kuqala nini uvuko lwasemhlabeni? Luya kuqala emva kokuba uThixo eyitshabalalisile le nkqubo yezinto kwaza kwakho ‘umhlaba omtsha,’ olibutho elitsha labantu abangamalungisa.—2 Petros 3:13; IMizekeliso 2:21, 22; Daniyeli 2:44.
‘Kumhlaba omtsha,’ akusayi kuphinda kubekho kugula okanye kubandezeleka. Nkqu nokufa akusayi kuphinda kubekho kodwa endaweni yako kuya kubakho ithemba lobomi obungunaphakade. “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” (ISityhilelo 21:4) Kwakhona, umdumisi waxela kwangaphambili wathi: “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) Ngokufanayo, uYesu wathi: “Banoyolo abanobulali; ngokuba umhlaba baya kuwudla ilifa bona.”—Mateyu 5:5.
Khawuthelekise la madinga azukileyo kaThixo nemfundiso yokuvela ngokutsha. Ngokwaloo ngcamango, kucingelwa ukuba sihlandlo ngasinye uyabuya uze kuphila kwakule nkqubo yezinto indala yonakeleyo. Oku bekuya kuthetha ukuba uya kuqhubeka ungqongwe bubungendawo, ukubandezeleka, ukugula nokufa yaye oku kusenzeka ngokungapheliyo. Hayi indlela enganiki themba ngayo loo mbono!
Ngaloo ndlela, imibuzo enjengethi, Ngaba wakha waphila ngaphambili? nothi, Ngaba uza kuphila kwakhona? iBhayibhile iyiphendula ngokuthi: Hayi, akuzange uphile obunye ubomi ngaphandle kobu ubuphilayo ngoku. Kodwa kunokwenzeka ubomi bakho ubenze bube ngunaphakade, ewe, obungapheliyo. Namhlanje, kule “mihla yokugqibela” yale nkqubo ikhoyo, unokuba nethemba lokusinda kwisiphelo seli hlabathi uze ungene kwihlabathi elitsha likaThixo ungakhange ufe. (2 Timoti 3:1-5; ISityhilelo 7:9-15) Okanye ukuba uyafa ngaphambi kokufika kwehlabathi elitsha likaThixo, unokuba nethemba lokuvuselwa ebomini obungunaphakade kwiparadisi esemhlabeni.—Luka 23:43.
Ukuba unokholo kuYesu, nokuba kusenokwenzeka ntoni na, amazwi awathethwa nguYesu kuMarta xa umnakwabo uLazaro wafayo ayasebenza nakuwe: “Ndim uvuko, ndim ubomi; lowo ukholwayo kum, nokuba ubethe wafa, wodla ubomi. Bonke abadla ubomi bekholwa kum, abasayi kufa naphakade.”—Yohane 11:25, 26.
[Amagama acatshulweyo akwiphepha 23]
UAdam wayengenamphefumlo ungafiyo kodwa ekufeni kwakhe wabuyela eluthulini
[Umfanekiso okwiphepha 24]
ILizwi likaThixo lifundisa ngokuvuka, alikufundisi ukuvela ngokutsha