Ukuchazwa Kwengcamango Yokuvela Ngokutsha
ENYE yezinto ezibangela ingakholeleki ingcamango yokuvela ngokutsha kukuba abantu abaninzi emhlabeni abazikhumbuli tu bephila ngaphambili. Ngaphezu koko, abayicingi nokuyicinga into yokuba banokuba bakha baphila ngaphambili.
Liyinyaniso elokuba maxa wambi ukhe wenzeke umhlola wokunakana umntu ongazange wambona nasemdudweni. Kusenokwenzeka ukuba indlu, idolophu, okanye imbonakalo yelizwe elithile ibonakale iqhelekile, nangona sisazi ukuba siyaqala ngqa ukuya apho. Noko ke, ezi zinto zinokuchazwa kungakhange de kubhenelwe kwingcamango yokuvela ngokutsha.
Ngokomzekelo, iindawo ezithile ezikwimimandla eqeleleneyo zisenokufana ngandlel’ ithile, ngokokude xa sityelela indawo esiqalayo ukuya kuyo, sivakalelwe kukuba sakha saya apho ngaphambili, nangona singazange silibeke apho. Kwezinye iindawo ehlabathini uninzi lwezindlu, iiofisi, iivenkile iidolophu nembonakalo yelizwe zifana twatse nezinye ezikwezinye iindawo. Into yokuba zibonakale zifana nezinto esakha sazibona ngaphambili asibobungqina bokuba sakha saphila kwezo ndawo ngaphambili. Nto nje zifana neendawo esiziqhelileyo.
Oku kukwanjalo nangabantu. Abanye abantu bafana nqwa, kangangokuba kude kuthiwe bangumceph’ ucandiwe. Umntu usenokuba nezimbo ezisikhumbuza omnye umntu osaphilayo okanye ongasekhoyo. Kodwa abo bantu sibazela kobu bomi sibuphilayo, kungekhona kobunye esakha sabuphila ngaphambili. Into yokufana kwembonakalo okanye kweempawu zobuntu ayithethi ukuba aba bantu sibazela kubomi esakha sabuphila ngaphambili. Ngokungathandabuzekiyo sonke sakha sayenza impazamo yokubhidanisa abantu. Kodwa abo bantu bobabini bebephila ngexesha elinye nawe kungekhona kubomi enakha nabuphila ngaphambili. Oku akunanto yakwenza nokuvela ngokutsha.
Impembelelo Yokulalisa Ngomlingo
Kwanento eyenzeka xa umntu elaliswe ngomlingo inokuchazwa kungakhange kubhenelwe kwingcamango yokuvela ngokutsha. Indawo esengqondweni yethu yokugcina izinto esizilibeleyo inguvimba wenkcazelo ephangalele ngakumbi kunokuba sicinga. Le nkcazelo ingena kulo vimba ivela kwiincwadi, kumaphephancwadi, kumabonwakude, kunomathotholo nakwamanye amava nezinto esizibonayo.
Inkoliso yale nkcazelo igcinwa kwindawo yezinto ezisengqondweni yethu esingazikhumbuliyo ngenxa yokuba akukabikho nto ingqalileyo okanye ekhawulezileyo efuna ukuba isetyenziswe. Indawo esezingqondweni zethu yokugcina izinto esizilibeleyo ifana neencwadi ezikumzi wogcino-zincwadi ekungekho mfuneko yazo kangako okwangoku zaza ngenxa yoko zabekwa kwelinye ithala elisecaleni.
Noko ke, xa umntu elaliswe ngomlingo, indlela yakhe yokucinga iyaguquka ukuze akhumbule izinto azilibeleyo. Abanye abantu bakutolika oku njengoko kwenzeka kubomi ababebuphila ngaphambili, kodwa kona kuzizinto ezenzeke kobu bomi sibuphila ngoku nto nje besisazilibele okwexeshana.
Noko ke, zikho iimeko ezimbalwa ebekuya kuba nzima ngakumbi ukuzichaza ngendlela yokwemvelo. Umzekelo wezo meko ngulowo waxa umntu asuka athethe olunye “ulwimi” xa elaliswe ngomlingo. Maxa wambi sukuba ethetha ulwimi olwaziwayo, kodwa amaxesha amaninzi sukuba ilulwimi olungaziwayo. Abo bakholelwa ekuveleni ngokutsha basenokuthi olo lulwimi loo mntu awayeluthetha kubomi awayebuphila ngaphambili.
Ukanti, yaziwa nanguthathatha into yokuba oko kufane kubizwe ngokuthi kukuthetha ngeelwimi abantu bayakwenza xa bethabatheke yinto engaziwayo okanye besemoyeni wonqulo. Abo benza oko beyisekile lelokuba akunanto yakwenza nobomi abakha babuphila ngaphambili kodwa baphenjelelwa ngamandla angabonakaliyo kobu bomi babuphilayo ngoku.
Zisabethabethana iimbono ngokuphathelele into ayiyo loo mandla. Kwisindululo esakhutshwa yiFountain Trust idibene neBhunga Levangeli LeCawa YamaTshetshi, kwathiwa ngokuthetha ngeelwimi: “Siyazi nokuba into efana nale inokwenzeka ngenxa yempembelelo yobugqi/yeedemon.” Ngoko ukucinga ukuba izinto ezinjalo zibubungqina bokuba sakha saphila ngaphambili bekuya kuba kukwenza isigqibo esiphosakeleyo.
Amava Abo Babefe Isiqaqa
Ngoko, kuthekani ngamava abantu ababefe isiqaqa abathi bakha banawo? Abanye baye bawatolika njengento ebubungqina bokuba umntu unomphefumlo oqhubeka uphila kwakufa umzimba. Kodwa zininzi iindlela eziphucukileyo ezingokwemvelo anokuchazwa ngazo la mava.
Kwinkupho kaMatshi 1991 yephephancwadi lezenzululwazi lesiFrentshi iScience & Vie, amanqanaba awahlukeneyo amava abantu ababefe isiqaqa abizwa ngokuba “ayinto eqhelekileyo efanayo nokukhohliseka ubone uze uve izinto ezingekhoyo” ekukudala kusaziwa. Asingabo babefe isiqaqa kuphela abaye banamava anjengala. Asenokubakho nangenxa “yokudinwa, umkhuhlane, isifo sokuwa, ukusebenzisa kakubi iziyobisi.”
Umsunguli wotyando lwemithambo-luvo, uWilder Penfield, owayesenza utyando kubantu abanesifo sokuwa esebenzisa isithomalalisi-zintlungu, wafumanisa into ebangel’ umdla. Wafumanisa ukuba ngokuvuselela amacandelo awahlukeneyo engqondo ngesixhobo sombane, wayemenza umguli azive ngathi akakho semzimbeni wakhe, ngathi uhamba kwitonela aze abe ngathi udibana nezalamane zakhe ezingasekhoyo.
Elinye isolotya elibangel’ umdla kule nkalo kukuba abantwana abakhe banamava okufa isiqaqa, endaweni yokudibana nezalamane zabo ezingasekhoyo, badibana nabantwana abafunda nabo okanye abafundisi-ntsapho babo—abasadl’ amazimba. Oku kubonisa ukuba amava anjalo anxulumene nesithethe esithile. Izinto ababa namava azo zizinto ezinxulumene nobomi ababuphila ngoku, kungekhona ezasemva kokufa.
UGqr. Richard Blacher ubhala oku kwiphephancwadi iThe Journal of the American Medical Association: “Ukuba sekhukweni lokufa okanye ukulala ngandletyana-nye, yinto odlula kuyo; ukufa yimeko oba kuyo.” Ngokomzekelo, lo kaBlacher uthetha ngomntu oqalayo ukuhamba ngenqwelo-moya esuka eUnited States esiya eYurophu. Ubhala athi: “Ukuhamba ngenqwelo-moya [akuthethi] ukuba sele useYurophu.” Umkhenkethi ondulukayo esinge eYurophu, kodwa inqwelo-moya ayikhweleyo isuke ijikeleze ize iphinde ihlale emva kwemizuzu embalwa emva kokuba ibisukile, akanakubalisela abantu ngeYurophu njengokuba umntu obefe isiqaqa engenakubalisela abantu ngokufa.
Ngamanye amazwi, nabo babefe isiqaqa abazange bafe ngokwenene. Baba namava ezinto ezenzeka ngoxa babesaphila. Ibe umntu usaphila nakwimizuzwana embalwa ngaphambi kokuba afe. Babefe isiqaqa kodwa bengekafi.
Nkqu nabo bebekhe bamelwa ziintliziyo okwethutyana baza babuyiselwa ebomini abanakukhumbula nanye into eyenzeke ngelaa xesha bebengekho zingqondweni xa bekusithiwa “bafile.” Into abayikhumbulayo, ukuba ikho kwaukubakho, iba yileyo yenzeke kanye ngaphambi kokuba baphazamiseke okwethutyana, kungekhona oko kwenzeke ebudeni beso siganeko.
Amava apapashiweyo abo babefe isiqaqa phantse asoloko eboniswa emahle, nangona kusaziwa ukuba akho namabi awenzekayo. Ingcali engumFrentshi yonyango lwezigulo zengqondo uCatherine Lemaire ukuchaza oku ngale ndlela: “Abo bangakhange babe namava [okufa isiqaqa] afana nalawo achazwa yi-IANDS [International Association for Near-Death Studies] abanamdla wokubalisa ngamava abo.”
Abakhumbuli Nto
Inyaniso ikukuba abukho obunye ubomi esinamava abo ngaphandle kobu sibuphila ngoku, enokuba bubomi bangaphambili okanye bubomi basemva kokufa. Ngenxa yoko, azikho izinto zokwenene esizikhumbulayo ngaphandle kwezobomi esibuphilileyo.
Abo bakholelwa ekuveleni ngokutsha bathi isizathu sokuba sizalwe kwakhona kukuze sifumane elinye ithuba elitsha lokuphucula imeko yethu. Ukuba ngenene sakha saphila ngaphambili, size sijike siyilibale yonke loo nto, oko kulibala kokona bekuya kuba yingozi. Kuba ukuze sikwazi ukungenelwa kwiimpazamo zethu kufuneka sizikhumbule.
Kwakhona, abo baxhasa unyango lokuvela ngokutsha bavakalelwa kukuba unokuhlangabezana bhetele neengxaki onazo ngoku ukuba, ngokusebenzisa ukulalisa ngomlingo, unokukhumbula izinto ezenzeka kubomi bangaphambili. Le ngcamango ithi sizalwa kwakhona ukuze siphucule okuthile, kodwa sikulibele oko simele sikuphucule.
Ukungabi nankumbulo kobu bomi sibuphilayo ngoku kujongwa njengokuyingozi. Nakule meko kumele ukuba kunjalo. Ukuphikisa oku ngelithi ukulibala akunamsebenzi, ekubeni ingabantu abalungileyo kuphela abazalwa kwakhona njengabantu, akusosizathu sivakalayo namhlanje nakweli xesha apho ubungendawo bugqubayo ehlabathini kunanini na ngaphambili. Ukuba ngabantu abalungileyo kuphela abazalwa kwakhona njengabantu, bavela phi ke abantu abangendawo? Bebengamele babe mbalwa ngakumbi abantu abangendawo? Inyaniso yile: Akukho mntu, elungile okanye engendawo, ovela ngokutsha ukuze aphile obunye ubomi njengomntu okanye aphile njengenye into.
Noko ke, usenokuthi, ‘Kanti ukuvela ngokutsha akuyomfundiso yeBhayibhile?’ Makhe sihlolisise lo mbuzo kwinqaku elilandelayo.
[Amagama acatshulweyo akwiphepha 21]
Indawo esengqondweni yethu yokugcina izinto esizilibeleyo ifana novimba wenkcazelo ebibekelwe ecaleni kodwa esenokukhunjulwa kamva
[Amagama acatshulweyo akwiphepha 22]
“Ukufa yimeko oba kuyo,” asiyonto odlula kuyo.—UGqr. Richard Blacher kwiThe Journal of the American Medical Association