Ngaba Ubutyebi Bunokuluthenga Ulonwabo?
NGOKUCACILEYO ukuba nemali eninzi ngakumbi akubenzi abantu bonwabe ngakumbi. Iphephancwadi iPsychology Today lithi: “Xa udlulile kumgangatho wokuba lihlwempu, okothusayo kukuba ukwanda kwengeniso akunanto yakwenza ingako nolonwabo lobuqu.”
Oku kwaqinisekiswa ngumphanga owawukwiNew York Times kaOktobha 29, 1993, owawunomxholo othi: “UDoris Duke, Onama-80 Ubudala, Indlalifakazi Engazange Ikwazi Ukuthenga Ulonwabo Ngobutyebi Bayo Obuninzi, Ifile.” Eli nqaku lathi: “Ngenye ingokuhlwa eRome ngowe-1945, uNkosazana Duke, owayeneminyaka engama-33 ubudala ngoko, waxelela umhlobo wakhe ukuba ubutyebi bakhe obuninzi babungumqobo kulonwabo lwakhe ngeendlela ezithile.”
UDuke wazityand’ igila kumhlobo wakhe esithi: “Maxa wambi yonke laa mali iba yingxaki. Emva kokuba ndizikhuphe izihlandlo ezimbalwa nendoda, iqalisa ukundixelela indlela endithanda ngayo. Kodwa ndingazi njani ukuba ngokwenene inyanisile? Ndingaze ndiqiniseke njani?” ITimes yathi: “Amazwi akhe ngobo busuku abonisa ukuba ubomi bakhe babonakaliswe ngokunzulu, kwakhona esoyikiswa bubutyebi bakhe.”
Ngokufanayo, uJean Paul Getty, owakha waduma njengeyona ndoda isisityebi ehlabathini, wathi: “Akunyanzelekanga ukuba imali ibe nalo naluphi na unxibelelwano nolonwabo. Mhlawumbi inxibelelene nokungonwabi.” Yaye uJane Fonda, umdlali weqonga odumileyo waseHollywood, owathi ebudeni beminyaka yee-1970 wazuza isiqingatha sesigidi seedola ngomfanekiso-bhanyabhanya ngamnye, wathi: “Ndiye ndabungcamla ubutyebi nazo zonke izinto eziphathekayo. Azibalulekanga. Zonke iintsapho ezimi kakuhle zisoloko zibonana nogqirha wengqondo ngenxa yeengxaki ezinazo, kungasathethwa ke ngoqhawulo-mtshato nangabantwana ababathiyileyo abazali babo.”
Nangona ubutyebi bubodwa bungenakuze buzise ulonwabo, nobuhlwempu obugqithiseleyo abusayi kwenjenjalo. Ngenxa yoko, indoda esisilumko yakudala yathi: “Musa ukundinika ubuhlwempu nobutyebi.” (IMizekeliso 30:8, 9) Omnye umbhali weBhayibhile wathi oko kufunekayo emntwini ukuze onwabe ‘kukuhlonela uThixo, ndawonye nokwanela. Kuba sibe singangenanga nanto ehlabathini; kuyabonakala kananjalo ukuba asinakuphuma nanto. Sinento ke edliwayo neyambathwayo, masanele zezo zinto.’—1 Timoti 6:6-10.