Abantu Abaselula Bayabuza . . .
Ngaba Ngokwenene Ukungcakaza Kubi Ngolo Hlobo?
UANDREW oneminyaka elishumi elinesibini ubudala noJulian oneminyaka elishumi ubudala bada ekugqibeleni babonwa sele bephel’ emehlweni ngabazali babo. Intsapho yakowabo yayithabatha uhambo ngephenyane, yaye la makhwenkwe ayethabathekile ngoomatshini abahlukahlukeneyo bokungcakaza ababekwelo phenyane. Ebona umdla wabo, omnye umdlali wabanika ingulowo ingqekembe yemali ukuze balinge oomatshini ngokwabo. Yiyiphi ingxaki ababenayo? Abazali babo babebalele ukuba basondele kwabo matshini.
Sekunjalo, uAndrew noJulian bagqiba kwelokuba balinge ukwenza oko babekwalelwe. Izilumkiso zabazali babo zinkenteza ezindlebeni zabo, badlala koomatshini—yaye bayiphinda kabini imali yabo! Baphinda badlala kwakhona. Ngeli xesha babemangalisiwe sisixa semali esasiphokoka! Bazibuza, ‘Kungaba yingozi njani oku? Kulula gqitha ukwenza imali! Ngaba ngokwenene ukungcakaza kubi ngolo hlobo?’
Njengolutsha oluninzi kumazwe apho ukungcakaza kuxhaphake khona, uAndrew noJulian babona kungekho ngozi ingako kuko. Oku kulula ukukuqonda xa uqwalasela umzekelo omiselwa ngabanye abantu abakhulu kulo mbandela. Abaninzi abangcakazi nje kuphela kodwa banikela izingxengxezo ezisengqiqweni zokuxhasa imikhwa yabo. Ngokomzekelo, baya kuthi ukungcakaza ngokwenene kuluncedo olukhulu, besalatha kwiingxelo zamajelo eendaba ezingokwemali evela kwiilottery, esetyenziswa ngendlela eluncedo. (Kodwa oku kuyafana nokuthi umnikelo ovela kumthengisi omkhulu weziyobisi oya kusetyenziselwa injongo eluncedo ukwenza kufaneleke ukuthengiswa kweziyobisi!) Kanti abanye bathi ukungcakaza kukuzonwabisa nokuziyolisa okungenangozi, kusongezelela kumlinganiselo wokuziyolisa owamkelekileyo ebomini.
Phofu ke eBritani naseIreland, njengakwamanye amazwe, amawakawaka olutsha angabangcakazi. Yaye nethemba lokwenza imali eninzi ngomgudu omncinane kusenokubonakala kunomtsalane othile kuwe.
Ukungcakaza—Iingozi Ezifihlakeleyo
Sekunjalo, ukungcakaza kubangela iingozi zokwenene kubantu abaselula. Iingxelo zithetha “ngamakhoboka okungcakaza” “nangezinto ezimanyumnyezi ezinokuziswa kukungcakaza, xa umdlalo ongenabungozi ukhulela ekubeni sisiqhelo esinokuguqulela umntu ekubeni yinto engakwazi kuzilawula.” Ngokutsho kweThe Buzz (ingxelo yaseBritani kamabonwakude), ukungcakaza ebantwaneni “kusenokukhokelela ekutshinizeni [ukuzimela esikolweni], kugonyamelo, kukuphanga nakubusela, kubukhoboka bokungcakaza nasekuhenyuzeni yaye, kwiimeko ezigqith’ emgceni, kukuzibulala okanye kumzamo wokuzibulala.” Ukuba ukungcakaza ngokwenene kusenokukhokelela kwezinjalo iintlekele kungqinwa ngala mava obomi bokwenene.
UAdrian uthi, “Ndaqalisa ukungcakaza xa ndandineminyaka eli-11 ubudala. Ndandihamba nomalume nomza ukuya kukhuphiswano lomdyarho lwamahashe. Okokuqala nje ndandinethamsanqa yaye ndandiphumelela ngokufuthi.” Waba yintoni umphumo kuAdrian? Uthi, “Ndandingathandabuzi ekuqwebeni ibali—ukuxoka—kutata ukuze ndifumane imali, yaye ngaphambi kokuba ndibe ngaphezu kweminyaka yam yeshumi elivisayo, ndandingenasazela ekubeni imali kumatshini wokugcina imali kwivenkile katata ukuze ndifumane imali yokwanelisa umkhwa wam wokungcakaza.”
UAdrian walatha komnye umphumo onganqwenelekiyo. Uthi, “Ngokulula ungasuka ube livila, kuba imali oyifumanayo ngokuyisebenzela ngokunyanisekileyo isenokubonakala ingumvuzo omncinane ngokwentelekiso noko ucinga ukuba ungakufumana.”—Thelekisa IMizekeliso 13:4; INtshumayeli 2:24.
URobert (asilogama lakhe lokwenene), waqalisa ukungcakaza xa wayeneminyaka eli-12 ubudala. Walatha kwenye ingozi esithi: “Usuka ube neenkolo gqitha.” Uthi: “Utata wayenoomatshini bokungcakaza kwivenkile yasekhaya. Ndandiyazi ngqo indlela ababesebenza ngayo, yaye sekunjalo ndandisenza izinto endandiba nenkolo yokuba ziza kubangela okuthile, njengokucinezela iqhosha lokudlala ngendlela ethile okanye ndishiye imali endiyifumeneyo kwisitya semali kangangexesha elithile. Bambi abantu babethetha ngokoqobo noomatshini.” Ewe, abangcakazi abaninzi bengaqondanga baba ngabanquli abaneenkolo bothixo wethamsanqa—uqheliselo olugwetyiweyo nguThixo.—Isaya 65:11.
Ukungcakaza Okukhobokisayo
Enye ingozi efihlakeleyo lutyekelo lokungcakaza de ubani abe likhoboka lako. “Bangaphezu kwama-2 000 abantwana abangaphantsi kweminyaka eli-16 ubudala abasiwa ngabazali babo kwiGamblers Anonymous (umbutho wokunceda abangcakazi boyise umkhwa wabo) nyaka ngamnye, yaye inani elikhoyo ngoku labaquqa apho . . . kucingelwa ukuba kukuyigwengula kuphela ingxaki ekhoyo eBritani.” (The Buzz) Banokukhotyokiswa kangakanani? Enye ingxelo yathi: “Ukuba bakhotyokisiwe, bamele bangcakaze enoba bayaphumelela okanye babuya nembande yesikhova.”
URobert ukhumbula ebona elinye ibhinqa lingcakaza nge£90 (iiR385) yonke imihla. Omnye umngcakazi oselula wayekufuna ngamandla ukufumana imali ukuze anelise umkhwa wakhe wokungcakaza koomatshini bokungcakaza, kangangokuba wazama ukubulala unina! UPaddy, waqalisa ukungcakaza xa wayeselula gqitha ngokufanayo akazange akwazi ukuzibamba kumkhwa wakhe wokungcakaza. Ekhumbula oku uthi: “Ndakhulela kwintsapho engcakazayo. Ndandidla ngokungcakaza kuyo yonke into nangayo yonke into. Ndakuba ndikhulile ndaza ndatshata, ukungcakaza kwakumbulalisa ngendlala umfazi wam nabantwana bam yaye ekugqibeleni kwandikhokelela kwinqanaba lokulinga ukuzibulala.”
Umgibe Woomatshini Bokungcakaza
Naluphi na uhlobo lokungcakaza lusenokuvelisa imiphumo emibi ngolo hlobo, kodwa enye yezona ngxaki zinkulu kubantu abatsha ngumatshini wokungcakaza. IJournal of Gambling Behavior, Spring 1989 ithi oku “ngoku sekugqalwa njengeyona ngxaki inkulu ngokunxulumene nabangcakazi abaselula.” Aba matshini, abachazwa kakuhle njengezihange ezinengalo enye, “bazizixhobo ezinobugcisa nezihendayo. Okukhona udlala, kokukhona ngokunokwenzeka ufuna ukudlala,” itsho njalo iThe Buzz.
Ngaba kukho ngqiqo ithile ekudlaleni umdlalo, nokuba ungahenda ngaluphi na uhlobo, apho uqinisekileyo ukuba uya kuthi ngamaxesha amaninzi ubuye nembande yesikhova ngaphezu kokuphumelela? IYoung People Now ichaza amathuba akho okuphumelela ngale ndlela: “Musa ukunika umntu osisimathane ithuba lokuphumelela. Oomatshini bokungcakaza abakwenzi oko . . . [Ukuba] ufaka i£10.00 ematshinini ngokomlinganiselo uya kugcina i£7.00 uze ukubuyisele i£3.00.”
Akumangalisi ukuba uMark Griffiths, umphandi ngemiphumo yokungcakaza kubantu abaselula, wathi: “Ekuphela kwendlela yokwenza imali kumatshini wokungcakaza kukuba ube nowakho.” Ngaba kubonakala kusengqiqweni kuwe ukubandakanyeka kwimfeketho enjalo?
Sekunjalo, aba matshini benziwe ngobuchule ukuze bakubambisele ekudlaleni ngakumbi. Njani? Ngokubonakalisa imigca emithathu yeempawu zomfanekiso weziqhamo kunomgca nje wokuphumelela! IYoung People Now ithi: “Kubonakaliswa imigca engaphezulu nengasezantsi kwemigca yokuphumelela ukuze kudyojwe abadlali ngentshongo emehlweni ngokuba ‘baphose kancinane’ yaye ngaloo ndlela kubakhuthaza ukuba baphinde bazame.” Okufanwe kubizwe ngokuba kukuphosa kancinane, iimpawu ezimbini zokuphumelela nolwesithathu lokukatya, ngokufuthi zibonwa ngumngcakazi “njengokuphantse uphumelele,” yaye ngaloo ndlela ukhuthazelwa ukuba alinge kwakhona—aze aphindaphinde.
Kodwa oku kunjalo ngoshishino lokungcakaza. Abenzi boomatshini babenza aba matshini nemidlalo yokungcakaza ngendlela yokuba bakukhohlisele ekucingeni ukuba kunokuba ube ukatyile, uphose nje kancinane! Uphantse waphumelela! Oku kukwenza ukuba uqhubeke udlala ngenxa yemvakalelo engamandla yokuphantse “uphumelele.” Yongezelela koku izibane ezilenyezayo nezandi ezinomphumo onombizelane, yaye uba nengcamango yeengcinezelo ezinamandla zengqondo ezisetyenziswayo ukuze zikurhwebeshele ukuba udlale—uqhubeke udlala—yaye uqhubeke ubuya nembande yesikhova.
Ukwenza Isigqibo Esilungileyo
Ngoko, eyona ndlela ilungileyo yokuphepha ukuba likhoboka lokungcakaza, kukuphepha ukungcakaza kwasekuqaleni. Phepha naluphi na uhlobo lwako, kuquka nokubheja ngemalana encinane. Kumaxesha amaninzi umkhwa wokungcakaza oye wahlala ukho kangangexesha elide ebomini uye waqala ngokungcakaza ngemali encinane. Yaye ukuba kuvela ithuba lokungcakaza, qwalasela umgaqo uYesu Kristu awawubekayo kuMateyu 7:17 othi: “Yonke imithi elungileyo ivelisa iziqhamo ezihle, ke wona umthi ongenguwo uvelisa iziqhamo ezibi.”
Khawufan’ ucinge: Ngaba ngokwenene ukungcakaza kuvelisa ntoni ebomini babantu? Ngaba kuyamnceda ubani ukuba abe neziqhamo zomoya kaThixo, ezinjengovuyo, uxolo, nokuzeyisa, okanye ngaba kubangela ukruthakruthwano, imisindo, nokubawa? (Galati 5:19-23) Khumbula, ukubawa kugwetyiwe nguThixo. Isenzo nje esinye sokubawa sinokukwenza ube ngomangalelekayo emehlweni akhe. Zibuze enoba abangcakazi bayafaneleka phakathi konxulumano lolutsha olungamaKristu. (1 Korinte 15:33) Khumbula ukuba “ihlabathi liphela lilele kongendawo.” (1 Yohane 5:19) Ngaba ukungcakaza akuphumezi injongo kaSathana uMtyholi? Ngoko kutheni uhendelwa ekubandakanyekeni kuko?
Xa okokuqala kwaveliswa ilottery karhulumente waseIreland, ngokukhawuleza yaqhulwa ngokuba yirhafu kwiziphukuphuku! Leyo yindlela okuchazwa ngayo ukungcakaza. Ngubani ofuna ukuthathwa njengesidenge aze aqhathelwe ekubeni nomnqweno ongasokuze uzaliseke womngcakazi? Ngethamsanqa, uAndrew noJulian (abakhankanywe ekuqaleni) bakubona kwangexesha ukuba ukungcakaza ngumdlalo wezidenge. Bazibona ngokucacileyo iingozi zako baze baziphepha. Bathi, “Kakade, kukho izinto ezingakumbi ezifanelekileyo ezinokwenziwa ebomini kunokuchitha kakubi imali yakho ungcakaza.”
[Umfanekiso okwiphepha 20]
Ukungcakaza nangemalana encinane kusenokumenza ubani abe likhoboka lako