Uloyiko—Luqhelekile Ngoku Kodwa Kungekhona Ngonaphakade!
ABAFUNDI beLizwi likaThixo abothuswa kukuba uloyiko luluninzi kangaka. Njengoko amaNgqina kaYehova evakalise ngokubanzi kubulungiseleli bawo, kukho intabalala yobungqina bokuba siphila kwixesha eliphawulekayo kwimbali yoluntu. Uyazi ukuba iphawuleka ngoloyiko oluninzi. Kodwa kwakudala uYesu waphawula, okanye walatha, kwixesha lethu. Wayephendula imibuzo yabapostile malunga nobukho bakhe nokupheliswa kwenkqubo yezinto, okanye ‘isiphelo sehlabathi.’—Mateyu 24:3.
Nantsi inxalenye yoko uYesu wakuxela kwangaphambili:
“Uhlanga luya kuvukelana nohlanga, nobukumkani buvukelane nobukumkani. Kuya kubakho iinyikima zomhlaba ezinkulu kwiindawo ngeendawo, neendlala, neendyikitya zokufa; kuya kubakho izinto ezoyikekayo, kwanemiqondiso emikhulu evela ezulwini.”—Luka 21:10, 11.
Ngaba uwaphawule amagqabaza akhe ‘ngezinto ezoyikekayo’? Kamva kwakuloo mpendulo, uYesu wachaza enye into ephawulekayo ngoloyiko esenokukuchaphazela ngokungqalileyo ize ikuqhubele ekwenzeni isigqibo wena nabathandekayo bakho. Kodwa ngaphambi kokunikela ingqalelo koko, ngokufutshane makhe sihlolisise ubungqina obungakumbi bokuba siphila kwimihla yokugqibela.—2 Timoti 3:1.
Izizathu Ezivakalayo Zokoyika Imfazwe
Iimfazwe ziye zashiya iinxalenye ezininzi zomhlaba ziphanzile. Ngokomzekelo, iphephancwadi iGeo lawabiza amaqula eoli awashiywa esitsha ekupheleni kongquzulwano lwakutshanje kuMbindi Mpuma ngokuthi “yeyona ntlekele inkulu yakha yenziwa ngabantu kwimeko-bume.” Iimfazwe ziye zabulala okanye zalimaza amashumi ezigidi zabantu. Ukongezelela kwizigidi zamajoni nabemi ababulawa kwiMfazwe Yehlabathi I, abangama-55 ezigidi babulawa kwiMfazwe Yehlabathi II. Khumbula ukuba njengenxalenye yomqondiso wokuba isiphelo sehlabathi sasikufuphi, uYesu wathi “uhlanga luya kuvukelana nohlanga, nobukumkani buvukelane nobukumkani.”
Kwakhona asinakuwabetha ngoyaba amalinge omntu okutshabalalisa uhlanga luphela. Ukufa kwezigidi zabemi baseArmenia, baseKhambodiya, baseRwanda, baseUkraine, amaYuda, nabanye kuye kongezelela kwityala legazi elikhwankqisayo loluntu ebudeni benkulungwane yama-20. Ukubulalana kuyaqhubeka kumazwe apho intiyo yobuhlanga ikhuthazwa ngabakhonzi bezonqulo abaneembono ezigabadeleyo. Ewe, iimfazwe zisaliphalaza igazi labantu emhlabeni.
Iimfazwe zale mihla ziqhubeka zisiba namaxhoba kwanasemva kokuba ukulwa kuphelile. Ngokomzekelo, qwalasela ukutyalwa nje naphi na kwezigcayiseli emhlabeni. Ngokwengxelo ekhutshwe yintlangano yophando iHuman Rights Watch, “malunga ne-100 lezigidi zezigcayiseli ehlabathini lonke zisongela abemi.” Ezo zigcayiseli ziqhubeka ziyingozi kumadoda, amabhinqa nabantwana abamsulwa kangangethuba elide emva kokuba idlulile imfazwe ezazisetyenziswe kuyo. Kuthiwa nyanga nganye amawaka enzakaliswa okanye abulawe zizigcayiseli ezityalwe emhlabeni kumazwe angaphezu kwama-60. Kutheni ezi zigcayiseli ezisongela ubomi nezichanaba abantu engozini zingashenxiswa ngokucokisekileyo nje? IThe New York Times yathi: “Kutyalwa izigcayiseli ezininzi ngakumbi suku ngalunye kunezo zitshatyalaliswayo kwiinkqubo zokuziphelisa, ngoko inani leengxwelerha landa ngokuthe ngcembe.”
Elo nqaku lephephandaba lowe-1993 labika ukuba ukuthengiswa kwezi zigcayiseli kuye kwaba lishishini “elinengeniso yama-$200 ezigidi [R725 ezigidi] ngonyaka.” Kuhlanganisa “malunga ne-100 leenkampani nabameli baseburhulumenteni kumazwe angama-48 abaye bathumela iindidi ezingama-340 ezahlukeneyo” zezigcayiseli. Ngenkohlakalo, zimbi iziqhushumbisi zenziwa zifane nezinto zokudlala ukuze zibe nomtsalane ebantwaneni! Khawufan’ ucinge, ukurhwebesha ngabom abantwana abamsulwa ukuze babenzakalise baze babatshabalalise! Inqaku elalinomxholo othi “Oomatshini Abazizigidi Ezili-100 Abenzelwe Ukutshabalalisa Ngolunya” lathi izigcayiseli ziye “zabulala okanye zenzakalisa abantu abangakumbi kunemfazwe ekusetyenziswe kuyo imichiza, ityhefu nenyukliya.”
Kodwa ayizozigcayiseli kuphela izinto ezibulalayo ezithengiswa kumaziko ezorhwebo ehlabathi. Abathengisi bezixhobo ababawayo baqhuba ishishini elingenisa izigidi ngezigidi zeerandi emhlabeni jikelele. IThe Defense Monitor, eyapapashwa yiCenter for Defense Information, ithi: “Kwiminyaka elishumi edluleyo [ilizwe elinkqenkqeza phambili] lithumele kwamanye amazwe izixhobo ezixabisa i-$135 lamaWaka ezigidi [R490 amawaka ezigidi].” Kwakhona eli lizwe linamandla “lagunyazisa ukuthengiswa kwezixhobo zemfazwe, ukwenziwa kwazo nokuqeqeshwa okwaba nexabiso elikhulu lama-$63 amaWaka ezigidi [R228 amawaka ezigidi], kumazwe ali-142.” Ngaloo ndlela kuhlwayelwa imbewu yemfazwe yekamva nokubandezeleka kwabantu. NgokweThe Defense Monitor, “ngowe-1990 kuphela, abantu abazizigidi ezi-5 baqeqeshelwa ukulwa imfazwe, kuchithwa ngaphezu kwama-$50 amaWaka ezigidi [R180 lamawaka ezigidi], kwaza kwabulawa abantu abayikota yesigidi, uninzi lwabo ingabantu ababengenanxaxheba emfazweni.” Ngokuqinisekileyo unokucinga ngeemfazwe eziliqela eziye zaliwa ukususela ngaloo nyaka, zisizisa uloyiko nokufa kwizigidi ezingakumbi!
Ukonakaliswa Okungakumbi Komhlaba Nezinto Eziphilayo Ezikuwo
UNjingalwazi Barry Commoner ulumkisa ngelithi: “Ndikholelwa ukuba ungcoliso lomhlaba oluqhubekayo, ukuba alunanzwa, ekugqibeleni luya kukutshabalalisa ukufaneleka kwesi sijikelezi-langa njengendawo yokuphila umntu.” Uhlabela mgama esithi ingxaki asikokungazi kodwa kukubawa kwangabom. Ngaba ucinga ukuba uThixo wethu wokusesikweni nonothando uya kuyinyamezela ngokungenasiphelo le meko, esichanaba kuloyiko olwandayo longcoliseko? Ukuphangwa komhlaba kukhalela ukuphindezelelwa kubaphangi nokuhlaziywa kwesi sijikelezi-langa nguThixo. Oko kuyinxalenye yoko uYesu waxubusha ngako kwimpendulo yakhe kubapostile ngokuphathelele ‘ukupheliswa kwehlabathi.’
Ngaphambi kokuba siqwalasele indlela uThixo aya kuyizisa ngayo loo mpindezelo, makhe sihlole ingxelo yomntu ngokubhekele phaya. Kwanokuqwalasela inxalenye nje encinane yekhondo elibi lomntu kusenza sibe buhlungu: imvula eneasidi noqheliselo lokugecwa kwemithi ngokubawa kutshatyalaliswa amahlathi ephela; ukulahlwa kwenkunkuma yenyukliya naphi na, imichiza eyityhefu namanzi amdaka; ukonakaliswa kweozone layer; nokusetyenziswa ngokungakhathali kwemichiza yokutshabalalisa izityalo nezilwanyana.
Umdla kwezorhwebo nawo uyawungcolisa umhlaba ngezinye iindlela ngenxa yemali. Iitoni zenkunkuma zilahlwa mihla le emilanjeni, kumalwandlekazi, emoyeni nasentlabathini. Izazinzulu zingcolisa isibhakabhaka ngenkunkuma eziyishiya apho, ngokuthi zingaqoqoshi zakungcolisa, ngokungathi kunjalo. Ngokukhawuleza umhlaba ungqongwa yinkunkuma esesibhakabhakeni. Ukuba bekungengenxa yeenkqubo zemvelo uThixo azilungiseleleyo zokuba umhlaba uzihlaziye, eli khaya lethu belingayi kuba nako ukunyamekela izinto eziphilayo, yaye ngokunokwenzeka umntu ngewayerhaxwe kudala yinkunkuma yakhe.
Umntu uzingcolisa ngokwakhe. Ngokomzekelo, ukusetyenziswa kakubi kwecuba nezinye iziyobisi. EUnited States, ukusetyenziswa kakubi kweziyobisi ezinjalo kuye kwabizwa ngokuba “yeyona ngxaki yezempilo iphambili elizweni.” Elo lizwe lichitha ama-$238 amawaka ezigidi (R863 amawaka ezigidi) ngonyaka, ekuthi kuwo ama-$34 amawaka ezigidi (R123 lamawaka ezigidi) achithwe “kunyango olungeyomfuneko [oko kukuthi, obelunokuphepheka].” Ucinga ukuba icuba lixabisa imali nobomi obungakanani apho uhlala khona?
Ubomi bukavula-zibhuqe nobugqwethekileyo, abaninzi abathi banelungelo lokubuphila, buvelise isivuno esoyikisayo sezifo ezibulalayo ezosulelwa ngesini, ezibulala abaninzi ngaphambi kwexesha. Kuye kwaphawulwa ukuba imihlathi yemiphanga kumaphephandaba aphambili ezixekweni ngoku ibonisa inani elandayo labo bafa bekuma-30 nama-40 eminyaka. Kutheni? Ngokufuthi kungenxa yemikhwa yabo etshabalalisayo. Oko kwanda kulusizi kwezifo zesini kwanezinye kukwazalisekisa isiprofeto sikaYesu, kuba wathi kwakuya kubakho ‘iindyikitya zokufa kwiindawo ngeendawo.’
Noko ke, olona ngcoliso lukhulu lolo lwengqondo nomoya womntu, okanye isimo sengqondo. Ukuba uhlolisisa zonke iintlobo zongcoliso esizikhankanyileyo ukuza kuthi ga ngoku, aliyonyaniso na elokuba inkoliso yazo ingumphumo weengqondo ezingcolileyo? Jonga nje imbuqe ebangelwa kukungaphili engqondweni njengokugebenga, ukudlwengula, ukuphanga nezinye iintlobo zobundlobongela obubangelwa ngomnye umntu komnye. Kwakhona, abaninzi bayaqonda ukuba ukuqhomfwa kwezigidi zeentsana nyaka ngamnye kuluphawu lokungcola ngokwengqondo nangokomoya.
Sibona lukhulu kwisimo sengqondo solutsha. Ukungahloneli igunya labazali namanye amagunya kufak’ isandla ekuwohlokeni kwentsapho nasekwaphulweni komthetho nocwangco. Oku kungoyikwa kwegunya kunxibelelene ngqo nentswelo yolutsha yokomoya. Ngoko ke, abo bafundisa indaleko, inkolelo yokungabikho kukaThixo nezinye iingcamango ezitshabalalisa ukholo banetyala elikhulu. Abanye abakwanetyala ngabafundisi abaninzi bonqulo abaye bathi, ngokufuna ukwamkeleka njengabasexesheni “nabachanileyo,” balinikel’ umva iLizwi likaThixo. Bekunye nabanye abazaliswe bubulumko behlabathi bafundisa iintandabulumko eziphikisanayo zabantu.
Imiphumo namhlanje icacile. Abantu baqhutywa, kungekhona luthando ngoThixo nangabanye abantu, kodwa kukubawa nayintiyo. Isiqhamo esibi kukwanda kokuziphatha okubi, ugonyamelo nokuphelelwa lithemba. Okubuhlungu kukuba, oku kushiya abantu abanyanisekileyo benoloyiko, kuquka uloyiko lokuba umntu uya kuzitshabalalisa yena kwakunye nesi sijikelezi-langa.
Ngaba Le Meko Iza Kuba Mandundu Okanye Iza Kuphucuka?
Yintoni equlethwe likamva elikufuphi ngokuphathelele uloyiko? Ngaba uloyiko luya kuqhubeka lusanda, okanye ngaba luya kupheliswa? Kwakhona makhe siphawule oko uYesu wakuxelela abapostile bakhe.
Walatha kwinto eza kwenzeka kungekudala—imbandezelo enkulu. Wathi: “Kwaoko ke, emveni kwembandezelo yaloo mihla, ilanga liya kwenziwa mnyama, ithi nenyanga ifiphale, zithi neenkwenkwezi ziwe ezulwini, athi namandla amazulu azanyazanyiswe. Uya kubonakala ngelo xesha umqondiso woNyana woMntu ezulwini; zimbambazele ngelo xesha zonke izizwe zomhlaba, zimbone uNyana woMntu esiza phezu kwamafu ezulu, enamandla, nobuqaqawuli obukhulu.”—Mateyu 24:29, 30.
Ngoko sinokulindela ukuba imbandezelo enkulu iza kuqalisa kungekudala. Ezinye iziprofeto zeBhayibhile zibonisa ukuba inxalenye yayo yokuqala iya kuba yimpindezelo kunqulo lobuxoki emhlabeni wonke. Kwandule ke kufike iziganeko ezothusayo ezisandul’ ukucatshulwa, kuquka nemiqondiso ethile ephawulekayo evela esibhakabhakeni. Oku kuya kuzichaphazela njani izigidi zabantu?
Ngoko, khawuqwalasele le ngxelo efanayo yempendulo kaYesu, apho sifumana khona amagqabaza angakumbi abuprofeti:
“Kuya kubakho imiqondiso elangeni nasenyangeni nasezinkwenkwezini; nasemhlabeni kubekho ukuxinezeleka kweentlanga, zithingaza; lugquma ulwandle namaza; abantu besifa kukoyika nakukulindela izinto ezilizelayo elimiweyo; kuba amandla ezulu aya kuzanyazanyiswa.”—Luka 21:25, 26.
Oko kuza kwenzeka kungekudala. Kodwa asingabo bonke abantu abaya kufa kukoyika. Ngokwahlukileyo koko, uYesu wathi: “Zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”—Luka 21:28.
Wabhekisa loo mazwi akhuthazayo kubalandeli bakhe bokwenyaniso. Kunokuba bafe okanye batyhwatyhwe luloyiko, baya kuba nesizathu sokuphakamisa iintloko zabo ngokungenaloyiko, nangona besazi ukuba incopho yembandezelo enkulu isondele. Kutheni bengayi kuba noloyiko nje?
Kungenxa yokuba iBhayibhile itsho ngokucacileyo ukuba kuya kubakho abasindayo kule ‘mbandezelo enkulu.’ (ISityhilelo 7:14) Ingxelo ethembisa oku ithi ukuba siphakathi kwabasindi, sinokunandipha iintsikelelo ezingenakulinganiswa nanto ezivela kwisandla sikaThixo. Iqukumbela ngesiqinisekiso sokuba uYesu ‘uya kubalusa, abakhokelele emithonjeni ephilileyo yamanzi; waye uThixo eya kuzisula iinyembezi zonke emehlweni abo.’—ISityhilelo 7:16, 17.
Abo—nathi sinokuqukwa—banandipha ezo ntsikelelo abayi kuba nalo uloyiko oluthwaxa abantu namhlanje. Kanti, oko akuthethi ukuba abayi kuba nalo kwaphela uloyiko, kuba iBhayibhile ibonisa ukuba kukho uloyiko olulungileyo nolufanelekileyo. Inqaku elilandelayo liza kuhlolisisa olu hlobo loloyiko nendlela olufanele lusichaphazele ngayo.
[Umfanekiso okwiphepha 8]
Ngovuyo abanquli bakaYehova balindele ihlabathi elitsha elizayo
[Inkcazelo Ngomfanekiso okwiphepha 7]
Ungcoliso: Photo: Godo-Foto; isiphekepheke: U.S. Army photo; ukutsha kwemithi: Richard Bierregaard, Smithsonian Institution