Abantu Abaselula Bayabuza . . .

Kuthekani Ngokukhenketha Neklasi?

“UFUMANA ixesha lekhefu esikolweni.” “Uba nethuba lokubona izinto ezintsha.” “Uba nethuba lokubazi ngakumbi abo ufunda nabo eklasini.” Basicacisa ngaloo ndlela abaselula abathathu baseJamani isizathu sokuba bekunandipha ukukhenketha neklasi. Uhambo olunjalo baluthanda gqitha abantu abaselula ehlabathini lonke.

Noko ke, asingobafundi kuphela abaluncomayo ukhenketho lweklasi. Omnye umfundisi-ntsapho uthi: “Ukhenketho lweklasi olulungelelaniswe kakuhle luyingenelo ngokwenene koselula, luyenza banzi ingqiqo yakhe luze lumncede akwazi ukuzimela. Ngokubhekele phaya, ulwalamano phakathi komfundisi-ntsapho neklasi luyaqiniswa.” Alithandabuzeki elokuba abafundisi-ntsapho abanenkathalo ndawonye neklasi eziphethe kakuhle banokumanyana ekwenzeni ukhenketho lweklasi lube lolufundisayo noluyolisayo.

Sekunjalo, kusenokubakho oothunywashe abaliqela ababandakanyekileyo abaxhalabisa ngokufanelekileyo ulutsha olungamaKristu nabazali balo. Ngokomzekelo, eJamani nakwamanye amazwe aseYurophu, ngokuqhelekileyo abafundi besini esahlukileyo bahamba kunye kukhenketho olude lweklasi. Ngokufuthi oku kubandakanya ukulala kude nekhaya. Izihlandlo ezininzi oku kudla ngokuba yinkathazo. UAnna-Laura oneminyaka eli-14 ubudala ukhumbula oku: “Emva kweentsuku ezimbalwa sikukhenketho, izinto azizange zilawuleke. Kwanasebusuku sasingalufumani uxolo nenzolo. Inkoliso eklasini yaziphatha ngokuzingca nangokungakhathali.”

Ngoko, yintoni ofanele uyenze ukuba unikwa ithuba lokukhenketha neklasi?

Ukubala Iindleko

KuLuka 14:28, uYesu Kristu wathi: “Nguwuphi na kuni othi, ethanda ukwakha inqaba, angakhe ahlale phantsi kuqala, abale indleko, ukuba unazo na izinto zokuyigqiba?” Ngaphambi kokuba wena nabazali bakho nigqibe enoba ukhenketho lweklasi lufanelekile na kuwe, hlolisisani ngenyameko zonke izinto ezibandakanyekileyo. Nantsi eminye imibuzo eninokuyiqwalasela:

Niya kukhenketha niye phi? Enoba lubandakanya imini enye yotyelelo kwimyuziyam okanye luhambo olude ekuza kulalwa kulo lunokwenza umahluko omkhulu. Ukongezelela, ukuba ngabazali bakho abaza kuhlawula iindleko, basenokufuna ukugqiba enoba bangakwazi na ukuzihlawula.

Yintoni ekucwangciso? Ukuba suku ngalunye kulungiselelwe izinto ezakhayo nezibangel’ umdla, oku kuya kuyigcina iklasi ixakekile kuze kunciphise ingozi yokwenzeka kwento ephosakeleyo. Ngoko luhlolisise ngenyameko ucwangciso ngaphambi kokugqiba ngokukhenketha neklasi. Ukutyelela iimyuziyam okanye ukuya kubona izinto zendalo kunokufundisa. Kodwa ukuqhelisela iYoga neenkonzo zaseAsia—njengoko kwakucwangciswe njalo kolunye ukhenketho lweklasi—ngokuqinisekileyo akufanelekanga kumKristu.—1 Korinte 10:21.

Ngaba niya kusoloko nibekwe esweni ngokufanelekileyo? Intombazana engumKristu egama linguJulia eneminyaka eli-15 ubudala ikhumbula oku: “Ndandikwiklasi enesimilo esihle kakhulu, ngoko uMama noBawo abazange bazikhathaze ngokuthelela kwam olu khenketho. Abafundisi-ntsapho babesijonge ngenyameko enkulu.” Noko ke, ukubekw’ esweni ngolo hlobo kusenokunqaba kule mihla. Njengoko omnye umfundisi-ntsapho waseJamani evuma, ukubekw’ esweni ngenyameko nangokuthembeka “ngokuqinisekileyo akuqinisekiswa.” Eneneni, omnye osemtsha emva kokhenketho lweklasi wazigwagwisa ngelithi: “Emva kokuqhatha abafundisi-ntsapho bobabini, senza unothanda.”

Bambi abafundi baya kwenza inkathazo kwanokuba abafundisi-ntsapho benza unako nako ukubanqanda. Omnye umntu owayesakuba ngumfundisi-ntsapho ukhumbula oku: “Ulutsha lufumana iindlela ezichuliweyo zokuthubelezisa utywala, ngoko ukugqogqa amagumbi alo kwakulilize. Ndaqonda ukuba lwalusela kanobom utywala xa omnye wamantombazana waqalisa ukuhlanza.” Licacile elokuba, kunokuba nzima gqitha ukuqinisekisa ukuba ukhenketho luya kulawulwa ngokufanelekileyo. Ukanti kusenokukusindisa kwixhala nodano olukhulu ukuba wena nabazali bakho nihlolisisa ngenyameko amalungiselelo enziweyo okulawulwa. IMizekeliso 22:3 ithi: “Onobuqili ubona into embi, azifihle; ke zona iziyatha ziya kugqitha kuyo, zihlawuliswe.”

Ngokuqhelekileyo basabela njani abo ufunda nabo esikolweni kulwalathiso lwabafundisi-ntsapho? Oku kuya kukunika imbono entle ngendlela abaya kuziphatha ngayo kukhenketho lwesikolo. Kwanikelwa ingxelo yokuba, esinye isikolo samabanga aphakamileyo saseJamani kwafuneka silunciphise ukhenketho lweklasi lweentsuku ezintathu ngenxa yokuba abafundi abangalawulekiyo abazange bayikhathalele “imiyalelo ecacileyo nenikelwa ngomonde” ngabafundisi-ntsapho.

Ibhinqa eliselula laseJamani eligama linguStephanie lakha langenela ukhenketho olunjalo kwixa elidluleyo yaye ngenxa yamava alo lincomela ukuba uzibuze le mibuzo ilandelayo: ‘Ngaba abo ndifunda nabo eklasini banengqiqo ngokwaneleyo yokuphulaphula abafundisi-ntsapho? Ngaba isikolo sizabalazela ukulondoloza udumo oluhle? Ngaba abafundisi-ntsapho bangqongqo ngokwaneleyo ekunikeleni ulwalathiso olufanelekileyo? Ngaba ulutsha luyithabatha nzulu imilinganiselo yokuziphatha okuhle? Ngaba luyabusebenzisa utywala neziyobisi?’ Enyanisweni, uStephanie uyavuma ukuba okuninzi “kuxhomekeke kuwe, enoba unikezela ngokulula okanye akunjalo.” Kodwa unokuthandaza njani kuYehova ukuba ‘angakungenisi ekulingweni’ wandule ke ngabom uzibeke kwimeko enokukubangela ulalanise ngokulula?—Mateyu 6:13.

Ngenxa yoko uPetra oneminyaka eli-17 ubudala akazange avume ukukhenketha neklasi. Uthi: “Ndandiyazi indlela ababeya kuziphatha ngayo abo ndifunda nabo eklasini. Ndabona kwangaphambili ukuba iimeko ezibandakanya utywala nesini zaziya kusivavanya ngokwenene isazela sam. Okwenzekayo kukuba, amakhwenkwe amahlanu akhulula iimpahla zenye intombazana aza ayifota, kamva ezo foto zasasazwa kuso sonke isikolo.”

Ngaba iinkolelo zakho zonqulo ziya kuhlonelwa? Ngokomzekelo, uTimon oselula, wathi: “Kusoloko kukho itheko lomhla wokuzalwa, nto leyo ekunzima ukuyiphepha.” Njengomnye wamaNgqina kaYehova, akathabathi nxaxheba kwimibhiyozo enjalo.a Ngaba abafundisi-ntsapho nabo ufunda nabo eklasini baya kuyihlonela imbono yakho ukuba umbhiyozo onjalo unokuba yinxalenye yokhenketho lweklasi?

Luhlobo olunjani lonxulumano oya kuchanabeka kulo? AmaKristu ayazi ukuba uThixo uyakugweba ukutshaya, ukusebenzisa iziyobisi, ukusebenzisa kakubi utywala, okanye ukuzifica kwisini sangaphambi komtshato. (1 Korinte 6:9, 10; 2 Korinte 7:1) Kungenxa yeso sizathu le nto unxulumano nolutsha olwenza ezo zinto ngobulumko luphetshwa. (1 Korinte 15:33) IMizekeliso 13:20 iyalumkisa: “Olikholwane lesidenge uya konakaliswa.” Kukhenketho lweklasi, uchitha ixesha elingakumbi kuneliqhelekileyo nolutsha olunjalo, ibe nilichitha nizonwabisa. UAndreas oselula wakubeka ngale ndlela oku: “Kukhenketho lweklasi, ngalo lonke ixesha uchanabeke kumoya wehlabathi, nawo wonke umculo wehlabathi nentetho engamanyala.”

Omnye uthunywashe kukuba kulula ukuziva ulilolo xa ukude nekhaya. Ukhenketho lweklasi luye lwavuselela uthando kuninzi lwabeshumi elivisayo. Ngaba unokuchanabeka engozini yokuthandana nongakholwayo? Eyoku-1 kwabaseKorinte 10:12 iyalumkisa: “Lowo uba umi, makalumke angawi.” Kwanokuba ubunamandla okuxhathisa isilingo, ngaba ubukho bakho kukhenketho olunjalo bunokulukhubekisa olunye ulutsha olungamaKristu?—Thelekisa eyoku-1 kwabaseKorinte 8:7-13; 10:28, 29.

UYvonne oneminyaka eli-14 ubudala warhoxa kukhenketho lweklasi olwalusiya kutyibilika ekhephini. Uyacacisa: “Ndandiza kuchitha iveki yonke nolutsha nabafundisi-ntsapho behlabathi. Ukongezelela koko, ubudlelane babazalwana bam, umsebenzi wokushumayela, kunye neentlanganiso—ezo zizinto endandiya kuzikhumbula ngokwenene. Esinye isizathu yindlela inkoliso yolutsha oluziphatha ngayo xa kungekho mntu ulujongileyo.”

Ukukholisa UThixo Ngokupheleleyo

Ekubeni ngokuqhelekileyo ukhenketho lweklasi lungabandakanyi ngokuthe ngqo unqulo, iipolitiki, okanye ezinye izinto ezalelweyo kumaKristu, umfundi nabazali bakhe banokugqiba enoba ukhenketho olunjalo luyacebiseka kusini na. (Thelekisa uIsaya 2:4; ISityhilelo 18:4.) Iimeko ziyahluka ngokweendawo nangokweeklasi; ngoko ke amaKristu enye indawo kusenokufuneka alwisane neengxaki ezahlukileyo kunezo zamanye akwenye indawo.

UStephan uthi: “Umama wayeqhelene nolutsha endandifunda nalo eklasini yaye wayemazi umfundisi-ntsapho ukuba unenkathalo. Ngoko ukhenketho lweklasi lwaba nempumelelo. Kodwa xa ndandisele ndikhulile yaye ukhenketho lokugqibela lusondela, umbandela wokuhamba kwam wawahluke ngokupheleleyo.” Kwakutheni? Uyaqhubeka: “Kwiminyaka nje emithathu ngaphambili, abo ndandifunda nabo eklasini babelungile yaye behloniphekile. Kodwa iziyobisi nokuziphatha okubi ukususela ngoko kwaba yinxalenye yobomi babo bemihla ngemihla. Ngoko andizange ndihambe. Ngokungalindelekanga, ukhenketho lokugqibela lwancitshiswa ngaphambi kokuba luphele.”

Phofu ke, ekugqibeleni, wena nabazali bakho nimele nihlole bonke oothunywashe ababandakanyekileyo nize nizenzele isigqibo. Qinisekani ukuba, enoba nigqiba kwelithini na, usukelo lwenu ‘kukuhamba ngokuyifaneleyo iNkosi, nise kuko konke ukukholisa.’—Kolose 1:10.

[Umbhalo osemazantsi]

[Umfanekiso okwiphepha 17]

Luhlobo olunjani lonxulumano oya kuchanabeka kulo ukuba uza kungenela ukhenketho lweklasi oluza kufuna ukuba kulalwe?