Ukuyila Imisebenzi Kumazwe Asakhasayo
NGUMBHALELI KAVUKANI! ESENEGAL
OTHILE okwishumi elivisayo wafelwa nguyise xa wayesengumntwana, eshiya unina nentsapho enkulu enabantwana abasibhozo. Ngoku ekubeni unina esaluphala, lo okwishumi elivisayo kufuneka abe negalelo ekuxhaseni intsapho ngokuba afumane umsebenzi. Iphupha lakhe lokuqhubeka nemfundo lidakile. Kufuneka asebenze, nangona engenabuchule okanye imfundo esisiseko ngokwasemthethweni.
Iimeko ezifana nezi ziqhelekile kumazwe asakhasayo. Imisebenzi inqabile, kwanakwabo banezidanga zaseyunivesithi. Sekunjalo, ngokuzimisela nangokusebenzisa iziphiwo zabo, abaninzi baye bakwazi ukuziyilela imisebenzi. Imisebenzi enjalo isenokungambeki ebhotolweni umntu, kodwa iBhayibhile kweyoku-1 kuTimoti 6:8 ithi: “Sinento ke edliwayo neyambathwayo masanele zezo zinto.”
Sicinga ngaloo mazwi enza ubani alungelelane, makhe siqwalasele ezinye zeendlela zobulumko amaKristu akumazwe asakhasayo ebephila yaye ephumelela ngazo.
Ishishini Lokutya—Indlela YaseAfrika
Ukutya kusoloko kufuneka. Kweli laseNtshona Afrika, amabhinqa ashishinayo afumene iindlela ezinomtsalane ezahlukahlukeneyo zokusebenzisa esi sibakala ukuzuza ingeniso. Ngokomzekelo, wambi, akha ishedi encinane kufutshane nendawo ekwakhiwa kuyo aze abaphekele isidlo sasemini abo basebenzayo. Amanye alungiselela ukudla abo basinge emsebenzini kusasa. Amisa itafilana ngeebhanka, abilise amanzi ngembawula, alungiselele isidlo sakusasa esiqhelekileyo—ikofu eshushu nesonka esisandul’ ukubhakwa nebhotolo. Ngokuhlwa ayavula kwakhona aze athengisele abantu abasebenzayo iintwana ntwana ekupheleni kosuku. Ukuqhuba olu hlobo lwekhefi kuthetha ukusebenza ngocwangciso olungqongqo kodwa oku kubenza abo bakhutheleyo bakwazi ukuhlawula amatyala abo.
Kwakhona kukho ithuba lokuthengisa amashwamshwam. Wambi amabhinqa aye afune indawo ezele ngabantu kufutshane nemarike aze aqhotse amandongomane. Iifataya—iipayi zenyama ezincinane ezihamba nesosi eshushu—nazo zithengiseka lula. Ngokukwanjalo namaqebengwane ahlohliweyo enziwe ngesosi yenyama enongiweyo. Ezi zizinto ezihamba ngokukhawuleza kumazwe aseAfrika njengeGambia neMali.
EGuinea-Bissau naseSenegal, iqela elikhulu labaselula abangamaNgqina kaYehova lizixhasa kubulungiseleli bexesha elizeleyo ngokubhaka lize lithengise enye into ethandwayo ngabantu: amaqebengwana. UMoses, ongummi kwisixeko esilikomkhulu eSenegal, eDakar, uyachaza: “Mna kunye nenkosikazi yam sasikhonza njengoovulindlela abakhethekileyo [abavangeli bexesha elizeleyo] xa saqalisa ukuba nabantwana. Ngoku kwakufuneka ndifumane indlela yokubaxhasa, ngoko kwathi qatha icebo lokuba ndenze ndize ndithengise amaqebengwana.
“Imali endandiza kuqalisa ngayo yayincinane kakhulu, ngoko ngobulumko kwakufuneka ndahlule phakathi kwemali endandinokuyigcina njengengeniso nemali eyayifuneka ukuze ndihlale ndiseshishinini nendandiza kuthenga ngayo izinto zokuthengisa, njengomgubo namaqanda. Ngoku ndiyakwazi ukuthengisa amaqebengwana aneleyo ukuze ndinyamekele inkoliso yeemfuno zentsapho yam encinane.
“Ukufak’ isandla, inkosikazi yam, uEsther, ithunga iilokhwe ekhaya. Oku kuyenza ikwazi ukuba sekhaya namakhwenkwana ethu amabini. Ngoko xa sisobabini, siyakwazi ukuyinyamekela kakuhle intsapho yethu, phezu kwako nje ukuba siphila kumaxesha anzima.”
Nali elinye icebiso leshishini elincinane: Ekubeni abantu abaphangelayo bexakekile yaye ngokufuthi bengenalo ixesha lohambo olude oluya emarikeni, baya kuzixhasa izirhoxwana zasekuhlaleni ezithengisa iziqhamo okanye imifuno. Bambi abanini zirhoxo bade banikele inkonzo yokuzihambisa izinto, besisa imifuno esandul’ ukuvunwa kanye kwizindlu zabathengi. Inokukhawuleza yaziwe into yokuba unyanisekile yaye uthengisa izinto ezisemgangathweni. Noko ke, lumka, ungabizi mali igqithiseleyo, okanye abantu baya kusuka babuyele kwimarike yesiqhelo.
Amashishini Okunikela Inkonzo
Ukuba akukuthandi ukuthengisa, cinga ngokunikela iinkonzo ezahlukahlukeneyo. Basoloko befunwa abantu abanokwenza umsebenzi wasekhaya, onjengokucoca, ukupheka, nokuhlamba nokolula iimpahla. Yaye kukho nentlaninge yamanye amathuba.
Ngokomzekelo, ngaba uhlala kufuphi nolwandle okanye kufuphi nemarike yeentlanzi? Kutheni ungaceli ukucoca iintlanzi—ngokukhawuleza nangexabiso eliphantsi? Ekuphela kwezinto ezifunekayo sisiqobo somthi esomeleleyo nemela yokusik’ intlanzi ebukhali. Ukuhlamba iinqwelo-mafutha yenye indlela esebenzayo yokufumana imali. Ziziphi izixhobo ezifunekayo? Yiemele, amanzi, isepha encinane, nelaphu elisemgangathweni. EDakar, ulutsha olunengqondo yoshishino lubonakala phantse kuwo onke amabala okupakisha iinqwelo-mafutha nakwizitalato ezinomthunzi ezininzi lusenza lo msebenzi.
Ngaba iindawo zokukha amanzi zinqabile kwindawo ohlala kuyo? Maxa wambi amabhinqa aye adwele kangangeeyure kumthombo wamanzi omnye ukuze azalise iimbombozi zawo. Emva koko kufuneka azithwale entloko ezo zitya zisindayo wonke loo mgama usinge ekhaya. Ngoko abaninzi bakulungele ukumhlawula uthile oya kubakhelela amanzi. Icebo kukuya kwasekuseni emthonjeni ukuze ukwazi ukuzizalisa iimbombozi zakho uze uzilayishe kwinqwelo etyhalwayo okanye etsalwa ziidonki. Ngoku ukulungele ukuwasa amanzi emakhayeni okanye kwiindawo ekusetyenzwa kuzo.
Ngaba unemfundwana yehlabathi? Mhlawumbi unokucela ukufundisa abantwana abaselula ngeempela-veki. Amagumbi okufundela asoloko ezala kumazwe asakhasayo, yaye abazali basenokukulungela ukuhlawula ukuze abantwana babo bafumane ingqalelo yobuqu.
Obunye ubuchule obuluncedo osenokuba uhleli unabo ngumsebenzi wobuchule bokuphotha iinwele. Ekubeni indlela yokuphotha iinwele ithandwa kakhulu ngamabhinqa aseAfrika, banokushishina ngalo msebenzi abantu abanobuchule bawo.
Ukusebenzisa Ubuchule
Kumaxesha okubhalwa kweBhayibhile, umfazi onesidima wayekwazi ukufumana iindlela zobulumko zokuzuza imali. IMizekeliso 31:24 ithi: “Wenza iingubo zelinen entle, athengise ngazo, athengise ngemibhinqo kumaKanan.” Ngokufanayo, abaninzi kumazwe asakhasayo baye baphumelela ekuzenzeleni imisebenzi ekhaya okanye amashishini amancinane. Ngokomzekelo, umchweli, usenokwenza indlwana yokusebenzela aze enze izihlalo, iibhanka, nezinye izinto zasekhaya ezingantsonkothanga. Kuphela zizixhobo zokuchwela ezisisiseko ezifunekayo. Ukuba unobuchule obuthile ngezolimo, mhlawumbi unokuqalisa ishishini leenkuku uze uthengise amaqanda neenkuku.
Ubuchule bubaluleke kakhulu ekuqaliseni amashishini amancinane. Bambi abantu baye baguqula amagogogo aba ziisutikheyisi neetranki ezinemibala-bala. Abanye baye benza iimbadada ngamathayara eenqwelo-mafutha. Kanti abanye baye benza amabhakethi ngemibhobho emikhulu yeplastiki. Zininzi gqitha izinto onokucinga ngazo.
Kumazwe asakhasayo kufuneka ubuchule nokucinga ukuze ubani aphile, kodwa kukwafuneka ube nomonde nesimo sengqondo esingqalileyo. Musa ukuncama lula. Yiba bhetyebhetye, ukulungele ukutshintsha imisebenzi ukuba kuyimfuneko. Ukuba uqalisa ishishini okanye ukunikela inkonzo ethile, qiniseka ukuba uyayihlolisisa imithetho nemimiselo yasekuhlaleni. Kulindelwe ukuba amaKristu awuhlonele umthetho welizwe.—Roma 13:1-7.
Ngaphambi kokulinga ukunikela imveliso okanye inkonzo ethile, zibuze: ‘Ziintoni iimfuno nezithethe zasekuhlaleni? Injani imeko yezoqoqosho yasekuhlaleni? Ngaba abathengi banokukwazi ukukuhlawula oko ndikuthengisayo? Bangaphi abanye abathengisa imveliso okanye abanikela inkonzo ekwanye? Ngaba ngenene ndinabo ubuchule, amandla, inkuthalo, isimilo, nomoya wolungelelwano ofunekayo ukuqhuba lo msebenzi? Lungakanani utyalo-mali oluza kubandakanyeka? Ngaba kuza kufuneka ndiboleke? Ngaba ndiya kukwazi ukuyihlawula imali-mboleko?’
Umbuzo kaYesu okuLuka 14:28 ungofanelekileyo: “Kuba nguwuphi na kuni othi, ethanda ukwakha inqaba, angakhe ahlale phantsi kuqala, abale indleko, ukuba unazo na izinto zokuyigqiba?”
Liyinyaniso elokuba, asingabo bonke abanobuchule nesimo sokuba neshishini lobuqu. Sekunjalo uYehova uThixo unokuwasikelela amanyathelo akho okuqala nomgudu wakho onyanisekileyo xa usenziwa ngentsusa-senzo efanelekileyo. (Thelekisa eyesi-2 kaPetros 1:5.) Ngoko yenza konke okusemandleni akho ukufumana umsebenzi—kwanokuba kuza kufuneka uwuyile ngokwakho!
[Imifanekiso ekwiphepha 12, 13]
Ukuthunga iilokhwe, ukuhlamba iinqwelo-mafutha, ukuhambisa amanzi acocekileyo, nokucoca iintlanzi zezinye zeendlela abaphila ngazo abantu