Intsingiselo Yokwenene Yowe-1914
NJENGOKUBA kubonisiwe kwiphepha 4, “eli phephancwadi lakha intembelo kwidinga loMdali lehlabathi elitsha loxolo nonqabiseko ngaphambi kokuba isizukulwana esabona iziganeko zowe-1914 sidlule.”
Alithandabuzeki elokuba abaninzi kubafundi bethu bayifumanisa imangalisa loo nkcazelo. Ukanti, kude kudala ukususela ngoDisemba 1879—iminyaka emalunga nama-35 ngaphambi kowe-1914—IMboniselo (ngoko eyayisaziwa ngokuba yiZion’s Watch Tower and Herald of Christ’s Presence) yanikela ubungqina beBhayibhile obungqina ukuba owe-1914 wawuya kuba ngunyaka onentsingiselo. Kwanangaphambi koku—phakathi kwinkulungwane ye-19—abanye abafundi beBhayibhile baye bayithi thsupha into yokuba owe-1914 ngokunokwenzeka wawungunyaka owaphawulwayo kwiziprofeto zeBhayibhile.a
Isiprofeto siye sachazwa njengembali eyabhalwa kwangaphambili. Le nkalo yeBhayibhile inikela ubungqina bokuba ivela kuThixo. Ukongezelela ekusixeleleni kwayo ngeziganeko zekamva, iBhayibhile maxa wambi ichaza ubude bexesha eliya kudlula ngaphambi kokuba kwenzeke into ethile. Ezinye zezi ziprofeto zingqalileyo zibhekisela kwiintsuku ezimbalwa, ezinye kwiminyaka yaye ezinye kwiinkulungwane.
UDaniyeli, owaprofeta ngexesha lokubonakala okokuqala kukaMesiya, kwakhona watyhila ixesha laxa uMesiya wayeza kubuya ‘kubukho’ bakhe koko kubizwa ngokuthi ‘lixesha lokuphela.’ (Daniyeli 8:17, 19; 9:24-27) Esi siprofeto seBhayibhile sinabela kwixesha elide, kungekhona nje kumakhulu ambalwa eminyaka, kodwa ngaphezu kwamawaka amabini—iminyaka engama-2 520! KuLuka 21:24, uYesu ulibiza eli xesha ngokuthi “amaxesha eentlanga.”b
Owe-1914 Uqalisa Ixesha Lokubandezeleka
Ukuzaliseka kwesiprofeto seBhayibhile kubonisa ukuba besiphila kwixesha lesiphelo ukususela ngowe-1914. UYesu walichaza eli xesha ‘njengokuqalisa kokubandezeleka.’ (Mateyu 24:8, NW) KwiSityhilelo 12:12, sifunda oku: “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.” Oku kucacisa isizathu sokuba ihlabathi liye lakwingxubakaxaka engakumbi ukususela ngowe-1914.
Noko ke, eli xesha lesiphelo ngokwentelekiso liza kuba lixesha elifutshane—lichaphazela isizukulwana esinye. (Luka 21:31, 32) Isibakala sokuba ngoku sikwiminyaka engama-80 sidlule kowe-1914 sibonisa ukuba kamsinya sinokulindela ukusindiswa okuza kuziswa buBukumkani bukaThixo. Oku kuthetha ukuba siya kubona “ophantsi ebantwini”—uYesu Kristu—elawula ngokupheleleyo “ebukumkanini babantu” aze azise ihlabathi elitsha elinoxolo nokusesikweni.—Daniyeli 4:17.
[Imibhalo esemazantsi]
a Ngowe-1844, umfundisi waseBritani, uE. B. Elliott, watsalela ingqalelo kowe-1914 njengexesha lokuphela ‘kwamaxesha asixhenxe’ akuDaniyeli isahluko 4. Ngowe-1849, uRobert Seeley, waseLondon, wawuxubusha ngendlela efanayo lo mbandela. UJoseph Seiss, waseUnited States, walatha kowe-1914 njengexesha elinentsingiselo kubalo-maxesha lweBhayibhile kwimpapasho eyahlelwa malunga nowe-1870. Ngowe-1875, uNelson H. Barbour kwiphephancwadi lakhe elithi Herald of the Morning wabhala ukuba owe-1914 waphawula ukuphela kwexesha uYesu awalibiza ngokuba ‘ngamaxesha eentlanga.’—Luka 21:24.
b Ukuze ufumane iinkcukacha ngenkcazelo yesiprofeto sikaDaniyeli, bona incwadi ethi Ukuqiqa NgeZibhalo, iphepha 133-5, epapashwe yiWatchtower Bible and Tract Society of New York, Inc.
[Ibhokisi ekwiphepha 11]
Amagqabaza Ngowe-1914 Nasemva Kwakhe
“Kusenokuba, emva kweemfazwe zehlabathi ezimbini ezazibonakala zingenakuphepheka, ukwenziwa kwezixhobo zenyukliya kwakusisilumkiso, esasisindisa kungquzulwano lwesithathu lwamazwe anamandla kwaza kwatshayelela elona thuba lide loxolo lwazwenibanzi, ngokuphathelele uxolo loloyiko, ukususela ngamaxesha kaVictoria. . . . Konakele phi kuluntu? Kutheni isithembiso senkulungwane yeshumi elinesithoba saphoswa kwelokulibala? Kutheni inkulungwane yamashumi amabini iye yaguqukela ekubeni lixesha loloyiko okanye, njengokuba abanye besenokuthi, lobubi?”—IA History of the Modern World—From 1917 to the 1980s, nguPaul Johnson.
“Kuzo zonke iinguqulelo eziphazamisayo zenkqubo yaseYurophu, iMfazwe Enkulu noxolo olwamiselwayo lwazisa umahluko omkhulu kunakwixesha elidluleyo, kwezoqoqosho nakwezentlalo ngokukwanjalo nakwezopolitiko. . . . Uzuko oluyolisayo lwenkqubo eyayihamba ngokutyibilikayo nangokunemveliso lwaphel’ emehlweni kwintlekele yemfazwe. Kunoko, iYurophu kwafuneka ihlangabezane nokudodobala kwezoqoqosho nokuphazamiseka kwezoqoqosho kuyo yonke indawo. . . . Umonakalo wawumkhulu kangangokuba ezoqoqosho zaseYurophu azizange zihambele phambili zize zizinze ngaphambi kokuba imfazwe yehlabathi elandelayo iqhambuke.”—IThe World in the Crucible 1914-1919, nguBernadotte E. Schmitt noHarold C. Vedeler.
“KwiMfazwe Yehlabathi Yesibini lonke umanyano olwalukho ebantwini lwaphela. Ulwaphulo-mthetho lwalusenziwa ngamaJamani phantsi kolawulo lukaHitler awazivumela ukuba ngabalawulwa kulo, nto leyo eyawenza atsiba ilitye likaPhungela ngomlinganiselo nakubungendawo kuyo nayiphi na into eye yangcolisa ingxelo yoluntu. Xa kuthelekiswa amanani okubulawa ngolunya ngeenkqubo ezichuliweyo kwabantu abazizigidi ezithandathu okanye ezisixhenxe zamadoda, amabhinqa nabantwana kwiinkampu zokubulala zaseJamani ngokumanyumnyezi awodlula lee awokubulawa nguGenghis Khan. Ukubulawa ngabom kwabemi bonke kwaqaliswa kwaza kwalandelwa ngamaJamani namaRashiya kwimfazwe yaseMpuma. . . . Ukusa kumkhamo othile siye savela kwixesha lokonakaliswa kwezinto eziphathekayo nokonakala kokuziphatha nto leyo engazange ibonwe kwiinkulungwane zangaphambili.”—IThe Gathering Storm, Umqulu I weThe Second World War, nguWinston S. Churchill.
“Sithetha nje amalungelo abantu bazo zonke iindidi, iintlanga nezizwe ayanyanyekelwa; ukanti kwangaxeshanye sitshone asavela nangonwele kwimfazwe yezizwe neyeentlanga zabantu. Ezi zinto zingathandekiyo zizibonakalisa kwinkohlakalo engenalusini necetywe ngokwenzululwazi; yaye iindlela ezimbini zokucinga nemigaqo yokuziphatha engangqinelaniyo namhlanje ziyabonakala, zihamba kunye, kungekhona kwihlabathi elikwalinye, kodwa maxa wambi kwilizwe elinye kwanakumphefumlo omnye.”—ICivilization on Trial, nguArnold Toynbee.
“Njengomshologu ohleli wada washiywa lixesha, inkulungwane yeshumi elinesithoba—inolungelelwano lwayo olubalulekileyo, ukuqiniseka kwayo, nokukholosa kwayo ngenkqubela yoluntu—iye yahlala de kwangoAgasti 1914, xa amagunya ayintloko aseYurophu aye ngokuyintlanganisela adideka nto leyo eyakhokelela ngokungqalileyo ekubulaweni kwezigidi ngokungekho ngqiqweni zabona bafana beso sizukulwana. Iminyaka emine enesiqingatha kamva, njengokuba ihlabathi lalizama ukuziqokelela emva kweshwangusha elantlithayo leMfazwe Enkulu, kwabonakala kubakhi-mkhanya abaninzi (kodwa ngokuqinisekileyo ingengabo bonke) ababephila ngelo xesha ukuba imizila yokugqibela eyayisele yenkqubo endala iye yatshayelwa, nokuba uluntu luye lwangenelela isizukulwana esitsha esasigqalwa njengesingakuqondi kangako nesingakuxoleli kangako ukungafezeki komntu. Abo babelindele ukuba uxolo lutshayelele ihlabathi elilunge ngakumbi bafumanisa ukuba amathemba abo akazange azaliswe ngowe-1919.”—Intshayelelo kwi-1919—The Year Our World Began, nguWilliam K. Klingaman.
[Umfanekiso okwiphepha 10
I-Bavarian Alps