Ukusebenza KobuKristu—Phezu Kwaso Nje Isiphithiphithi
KONKE oku kwaqala ngesiquphe ngenye imini ngoAprili 1994. Ukuwa kwenqwelo-moya kwabulala umongameli waseBurundi nowaseRwanda. Ngesithuba nje seeyure ezimbalwa eRwanda kwabakho ugonyamelo olothusayo. Kungaphelanga neenyanga ezintathu, abantu baseRwanda abangaphezu kwama-500 000—amadoda, abafazi nabantwana—babefile. Abanye abantu babhekisela kwesi siganeko njengexesha “lokutshatyalaliswa kohlanga.”
Isiqingatha sabahlali baseRwanda abazizigidi ezisi-7,5 kwakumele sibaleke. Oku kuquka abazizigidi ezisi-2,4 ezabhacela kumazwe angabamelwane. Yayiyeyona mfuduko yeembacu ekhawulezileyo nenkulu kuyo yonke imbali yale mihla. Iinkampu zeembacu zakhawuleza zakhiwa eZaire (ngoku eyiDemocratic Republic of Congo), eTanzania naseBurundi. Ezinye zezi nkampu—eyona inkulu emhlabeni wonke—yaba likhusi kubantu abangama-200 000.
Phakathi kwezi mbacu kwakukho amaNgqina kaYehova amaninzi, abantu abathanda uxolo nabasebenzisa imigaqo yeBhayibhile ebomini babo. Kulo naliphi na ilizwe ahlala kulo, ngokungqongqo ahlala engoondilele aze asebenzise isiluleko esiqulethwe kula mazwi kaIsaya 2:4 athi: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” AmaNgqina kaYehova aziwa ngokubanzi njengeqela lonqulo elalingazange libe nesabelo ekutshabalaliseni uhlanga eRwanda.
UYesu Kristu wathi abalandeli bakhe ‘abayonxalenye yehlabathi.’ Noko ke, ekubeni ‘besehlabathini’ abanakukwazi ukusoloko beziphepha iziphithiphithi zeentlanga. (Yohane 17:11, 14) Ebudeni bokutshatyalaliswa kohlanga eRwanda, amaNgqina anokuba ngama-400 afa. AmaNgqina amalunga nama-2000 nabantu abanomdla kwisigidimi soBukumkani aba ziimbacu.
Ngaba ukungabi yonxalenye yehlabathi kuthetha ukuba amaNgqina kaYehova akukho nto ayenzayo xa kusenzeka intlekele? Akunjalo. ILizwi likaThixo lithi: “Ukuba umzalwana okanye udade ukwimo yokuba ze yaye eswele ukutya okulingene imini, kanti uthile kuni uthi kubo: ‘Hambani ngoxolo, hlalani nifudumele yaye nondleke kakuhle,’ kodwa ningabaniki izinto eziyimfuneko kumzimba wabo, kunangenelo ngantoni oko? Ngaloo ndlela, nalo, ukholo, ukuba alunayo imisebenzi, lufile ngokwalo.” (Yakobi 2:15-17) Kwakhona uthando ngommelwane lushukumisa amaNgqina ukuba ancede nabo bangavisisaniyo neenkolelo zawo zonqulo.—Mateyu 22:37-40.
Nangona amaNgqina kaYehova ehlabathini lonke ayelangazelela ukunceda abo akholwa nabo xa babejamelene namaxesha entlekele eRwanda, kwabelwa iNtshona yeYurophu ukuba ilungelelanise uncedo. Ngehlobo lowe-1994, iqela lamaNgqina angamatsha-ntliziyo elalisuka eYurophu lakhawuleza ukuya kunceda abazalwana noodade abangamaKristu eAfrika. Kwalungiswa iinkampu ezilungelelaniswe kakuhle nezibhedlele ukuze kuncedwe iimbacu zaseRwanda. Iimpahla ezininzi, iingubo, ukutya noncwadi lweBhayibhile zathunyelwa ngenqwelo-moya ezinye zathunyelwa kubo ngezinye iindlela. Abantu abangaphezu kwama-7000 abenzakalayo—abaphantse bawaphindaphinde kathathu amaNgqina kaYehova eRwanda ngelo xesha—bangenelwa gqitha kwelo phulo lokunceda. NgoDisemba waloo nyaka, amawaka eembacu, kuquka uninzi lwabo babengamaNgqina kaYehova, babuyela eRwanda ukuze baphinde bazinze kwakhona.
Imfazwe ECongo
Ngowe-1996, kwaqhambuka imfazwe kummandla okwimpuma yeDemocratic Republic of Congo. Lo mmandla ukumda weRwanda neBurundi. Kwakhona abantu babedlwengulwa yaye bebulawa. Phakathi kothotho lweembumbulu needolophana ezazisitsha, abantu babebaleka ukusindisa ubomi babo. AmaNgqina kaYehova avaleleka kwesinye isiphithiphithi, yaye kwafa amalunga nama-50. Wambi abulawa ziimbumbulu ezazingajoliswanga kuwo. Amanye abulawa ngenxa yokuba ayengawohlanga oluthile okanye kwakucingwa ukuba aziintshaba. Enye idolophana apho kwakuhlala amaNgqina ali-150 yatshiswa ngomlilo. Kwezinye iidolophana uninzi lwezindlu nezinye iiHolo zoBukumkani zatshiswa. Ngenxa yokuba engenamakhaya nazindlu, amaNgqina abalekela kwezinye iindawo yaye ancedwa ngabo anqula nabo apho ayebalekela khona.
Emva kwemfazwe kulandela indlala, njengoko izityalo zitshatyalaliswa, kukho ubusela nakwiindawo ezigcina ukutya, yaye kwakunzima nokufika apho uya khona. Ukutya okwakukho kwakubiza ixabiso elikhulu kakhulu. EKisangani, ekuqaleni kukaMeyi 1997, ikhilogram enye yeetapile yayibiza ishumi elinesithathu leerandi, ixabiso ekwakunzima ukuba abantu abaninzi balifikelele. Uninzi lwalukwazi ukutya kanye nje ngosuku. Kakade ke, izifo ziyalandela xa kunqabe ukutya. Ukungondleki kuyawadodobalisa amandla omzimba okulwa nesifo seengcongconi, isifo sorhudo nezinye iingxaki zesisu. Abantwana bachanabeka ngakumbi baze bafe.
Ukuhlolisisa Imfuneko
Kwakhona amaNgqina kaYehova eYurophu ayesabela ngokukhawuleza xa kukho imfuneko. NgoAprili 1997 iqela labahlanguli lamaNgqina elaliquka oogqirha ababini lezisa amayeza kunye nemali ngenqwelo-moya. EGoma amaNgqina asekuhlaleni ayesele elungiselele iikomiti zokunikela uncedo ukuze zihlolisise imeko ukuze kunikelwe uncedo olukhawulezileyo. Elo qela lasikhenketha eso sixeko nemimandla esingqongileyo. Kwathunyelwa abanye abathunywa ukuze bakwazi ukuya kufumana ingxelo kwezinye iindawo ezikude. Kwafunyanwa nenkcazelo eKisangani, emi kwisithuba esimalunga neekhilomitha ezili-1000 kwintshona yeGoma. Abazalwana basekuhlaleni banceda ekulungelelaliseni imizamo yokunikela uncedo eGoma, apho kwakuhlala amaNgqina anokuba ngama-700.
Omnye wabadala ongumKristu eGoma wathi: “Sasichukumiseke gqitha kukubona abazalwana bethu ababesuka kude beze kusinceda. Ngaphambi kokuba bafike, sasincedana. Abazalwana kwafuneka besukile emaphandleni baye eGoma. Abanye babengasenawo amakhaya, yaye bashiya naloo masimi abo. Sabasa emakhayeni ethu yaye sabelana nabo ngeempahla nokutya okuncinane esasinako. Kwakungekho nto ingako sasinokuyenza apho. Uninzi lwethu lwalungondlekanga.
“Noko ke, abazalwana abasuka eYurophu, basizisela imali eyasinceda sakwazi ukuthenga ukutya okwakunqabile yaye kunexabiso eliphakame gqitha. Ukutya kwafika ngexesha elalibaluleke gqitha, ekubeni uninzi lwalungasenako ukutya emakhayeni alo. Sasa ukutya kwabo babengamaNgqina nakwabo babengengomaNgqina. Ukuba uncedo lwalungazange lufike ngexesha olwafika ngalo, ngekwafa abaninzi, ngokungakumbi abantwana. UYehova wabasindisa abantu bakhe. Abo babengengomaNgqina bachukumiseka gqitha. Uninzi lwagqabaza ngomanyano nothando esinalo. Abanye bavuma ukuba thina sinonqulo lokwenyaniso.”
Nangona ukutya kwakuthengwa ekuhlaleni namayeza ekho, kwakusafuneka okungakumbi. Kwakukho imfuneko yeempahla neengubo kwanokutya namayeza amaninzi. Kwakhona kwakufuneka noncedo ukuze kuphinde kwakhiwe amakhaya awayetshatyalalisiwe.
Abantu Banikela Ngesisa
Abazalwana baseYurophu babekulungele ukunceda kwakhona. Iofisi yamaNgqina kaYehova eLouviers, eFransi, yachazela onke amabandla aseRhône Valley, eNormandy kwanakwinxalenye yeParis. Apha kwasetyenziswa isiluleko seZibhalo esithi: “Lowo uhlwayela ngokuvimba uya kuvuna kwangokuvimba; yaye lowo uhlwayela ngokuyintabalala uya kuvuna kwangokuyintabalala. Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.”—2 Korinte 9:6, 7.
Amawaka alixhakamfula ngovuyo eli thuba lokupha. Iibhokisi neebhegi zempahla, izihlangu nezinye izinto zasiwa kwiiHolo zoBukumkani emva koko zathunyelwa kwiofisi yesebe yamaNgqina kaYehova eFransi. Apho amatsha-ntliziyo angama-400 ayekulungele ukuba nenxaxheba kwinyathelo elilandelayo elithi “Nceda iZaire.” Njengokuba impahla ekwakunikelwe ngayo yayifika, la matsha-ntliziyo ayilungisa, ayisonga aze ayipakisha ezibhokisini lbe loo mpahla yazalisa amaplanga ekupakishwa kuwo angama-30. Abantwana bacinga ngabazalwana noodadewabo baseAfrika baza babathumelela izinto zokudlala—iinqwelo-mafutha zokudlala, nezinye ezijikelezayo, oonodoli, nooteddy bear. Zonke ezi zinto zazidityaniswe nezinye zezinto eziyimfuneko ebomini. Lilonke, kwazaliswa kwaza kwathunyelwa iibhokisi ezisithoba ezinobude obuziimitha ezili-12 eCongo.
Lungakanani uncedo olwathunyelwa kuMbindi Afrika ngoncedo lwamawaka amaNgqina aseBelgium, eFransi, naseSwitzerland? NgoJuni 1997 iikhilogram ezingama-500 zamayeza, iitoni ezili-10 zamaqebengwane aneprotini, neetoni ezingama-20 zokunye ukutya, iitoni ezingama-90 zeempahla, izihlangu ezingambini ezili-18 500 neengubo ezili-1000. Kwathunyelwa noncwadi lweBhayibhile ngenqwelo-moya. Konke oku kwaxatyiswa gqitha, kuthuthuzela yaye kunceda iimbacu ukuba zikwazi ukunyamezela izilingo ezijamelana nazo. Kukonke oko kwaxabisa malunga nee-R4400 000. Iminikelo enjalo yangqina ubuzalwana nothando phakathi kwabo babekhonza uYehova.
Ukusasazwa Kwezinto ECongo
Njengokuba loo mpahla yafikelela eCongo, abazalwana ababini nodade bafika bevela eFransi beze kusebenza neekomiti zokunikela uncedo zasekuhlaleni. Ngokuphathelele ububele obaboniswa ngamaNgqina aseCongo, uJoseline wathi: “Safumana iileta eziliqela zoxabiso. Omnye udade olihlwempu wandipha into yokuhombisa eyenziwe ngelitye eliluhlaza nelinqabileyo. Abanye basipha iifoto zabo. Njengokuba sasihamba, oodade bandincamisa, bandanga baza bakhala. Nam ndakhala. Uninzi luthetha lusithi ‘uYehova ulungile. UYehova uyacinga ngathi.’ Ngoko baqonda ukuba udumo lumele luye kuThixo ngenxa yesi sipho. Xa sasisasaza ukutya, abazalwana noodade babemdumisa uYehova ngeengoma zoBukumkani. Oko kwakuchukumisa ngenene.”
Ugqirha ogama linguLoic wayelilungu lelo qela. Uninzi lwaya kwiHolo yoBukumkani lwaza lwalinda ngomonde ukuze akwazi ukulubona. Efuna ukuba nenxaxheba naye, omnye udade waseCongo wenza iidoughnut ezimalunga nama-40 waza wanika abo babeze kubona ugqirha. Ekubeni kwakukho abantu abanokuba ngama-80 ababelindile, ngamnye kubo wafumana icala ledoughnut.
Ukunikela Uncedo Kwabo BangengomaNgqina
Lo msebenzi unegalelo kwintlalo-ntle yabantu awuzange wenziwe kumaNgqina kaYehova kuphela. Nabo bangengomaNgqina bangenelwa, njengokuba kwaba njalo kwabanye ngowe-1994. Oku kuvisisana nencwadi yabaseGalati 6:10, ethi: “Ngokwenene, ngoko, lo gama sinexesha elilungileyo loko, masisebenze oko kulungileyo kubo bonke, kodwa ngokukodwa kwabo bahlobene nathi elukholweni.”
AmaNgqina asasaza amayeza neempahla kwizikolo eziliqela zabaqalayo nakumzi wokugcina iinkedama kufuphi naseGoma. Lo mzi ugcina abantwana abangama-85. Kuhambo lwangaphambili lokuya kuhlolisisa imeko, iqela labanikela uncedo latyelela umzi ekugcinwa kuwo iinkedama laza labathembisa ngokubanika iibhokisi ezingama-50 zamaqebengwane aneprotini, iibhokisi zeempahla iingubo ezili-100, amayeza kunye nezinto zokudlala. Abantwana bema ngomgca baza baculela iindwendwe. Emva koko benza isicelo esikhethekileyo—ngaba babenokuyifumana na ibhola ukuze badlale ibhola ekhatywayo?
Kwiiveki eziliqela kamva iqela labanikela uncedo lasizalisekisa isithembiso sokuzisa izinto. Echukumiseke bububele nakoko wayekufunde kuncwadi lweBhayibhile awayelunikiwe, umalathisi walo mzi wathi sekukufuphi ukuba abe ngomnye wamaNgqina kaYehova. Yaye ngaba abantwana bayinikwa ibhola ekhatywayo? “Hayi,” waphendula uClaude, ongumalathisi weqela labanikela uncedo elalivela eFransi. “Sabanika iibhola ezikhatywayo zambini.”
Iinkampu Zeembacu
Uncedo lwalungapheleliselwanga eCongo. Amawaka eembacu asuka kuloo ndawo yayigquba imfazwe aya kwilizwe elikufuphi apho kwakumiselwe khona iinkampu zeembacu ezintathu ngokukhawuleza. NamaNgqina aya apho ukuze abone into awayenokuyenza. Xa kwakusenziwa le ngxelo, iinkampu zazihlalisa iimbacu ezingama-211 000, uninzi lwazo lwalusuka eCongo. Ezimalunga nama-800 yayingamaNgqina nabantwana bawo nabo babenomdla kwiindaba ezilungileyo zoBukumkani. Eyona ngxaki yayinkulu kwezi nkampu yayikukunqongophala kokutya. Kwenye inkampu, kwakukho ukutya kweentsuku nje ezintathu kuphela, yaye kwakuquka iimbotyi ezazineminyaka emithathu zikho.
Sekunjalo, amaNgqina ayenomoya omhle gqitha. Nangona ayenoncwadi oluncinane lweBhayibhile, rhoqo ayeqhubela iintlanganiso zawo phandle ukuze akheke ngokomoya. Kwakhona ayexakekile eshumayela neendaba ezilungileyo zoBukumkani bukaThixo kwabanye apho ezinkampini.—Mateyu 24:14; Hebhere 10:24, 25.
Iqela labaphandi elingamaNgqina laliquka ugqirha. Nangona abasemagunyeni balivumela ukuba lichithe iintsuku nje ezimbalwa kwinkampu nganye, lalinyanga abantu. Lashiya amayeza nemali kubadala abangamaKristu. Ngaloo ndlela, abazalwana bakwazi ukuphila. Kwakhona lalinethemba lokuba amaNgqina ayekulo nkampu ayeza kubuyela emakhaya kungekudala.
Kuthekani ngekamva? UYesu Kristu waxela kwangaphambili ukuba imihla yethu yayiya kuzaliswa sisiphithiphithi, ixesha elizaliswe ziimfazwe nokunqongophala kokutya. (Mateyu 24:7) AmaNgqina kaYehova ayazi ukuba buBukumkani bukaThixo kuphela obuya kuphelisa ukubandezeleka okukhoyo ngoku emhlabeni. Ngaphantsi kolo lawulo, ikhaya lethu elingumhlaba liya kuba yiparadesi yoxolo, enentabalala nolonwabo olungapheliyo kuluntu oluthobelayo. (INdumiso 72:1, 3, 16) Okwangoku, amaNgqina aya kuvakalisa iindaba ezilungileyo zobo Bukumkani basezulwini yaye kwakhona aya kuqhubeka enceda abo anqula nabo nabanye xa kukho imfuneko.
[Amagama acatshulweyo akwiphepha 4]
Ukususela ngowe-1994, amaNgqina kaYehova aseYurophu kuphela aye athumela iitoni ezingaphezu kwe-190 zokutya, zempahla, zamayeza nezinye izinto zokunikela uncedo ukusa kummandla weGreat Lakes zaseAfrika
[Ibhokisi ekwiphepha 6]
Ukubonakaliswa Kothando LobuKristu Ngemisebenzi
Phakathi kwabo baba nesabelo kwilungiselelo elithi “Nceda iZaire” eFransi kwakukho uRuth Danner. Esengumntwana, wabanjwa kwiinkampu zoxinaniso zamaNazi ngenxa yokholo lwakhe lobuKristu. Wathi: “Savuya gqitha xa sabenzela okuthile abazalwana noodade wethu baseAfrika! Kodwa kukho into eyandonwabisa ngakumbi. Ngowe-1945, xa sabuyela ekhaya sisuka eJamani, sasingenayo nento. Kwanempahla yokunxiba sasiyibolekile. Noko ke, kungekudala, safumana uncedo lwezinto eziphathekayo kubazalwana bethu bokomoya eMerika. Ngoko lo msebenzi wokunceda undenze ndafumana ithuba lokubuyisela ububele obabuboniswe kuthi kudala. Elinjani lona ilungelo lokuba yinxalenye yale ntsapho inkulu kangaka yabazalwana abalubonakalisa ngemisebenzi uthando lobuKristu!”—Yohane 13:34, 35.
[Umfanekiso okwiphepha 7]
Kungekudala—kuza kubakho umhlaba oyiparadesi onentabalala yabo bonke