Xa Abantwana Bebiwa Ngabantu Abangabaziyo
“SINCEDENI SIMFUMANE. SIYANICELA, SIYANICELA NCEDANI USARA!”
Esi sikhalo sibuhlungu sabazali ababini abaxheleke umphefumlo sakhutshwa kumabonwakude kulo lonke elaseUnited States kuzanywa ukufumana intombazana yabo eneminyaka eli-12 ubudala, enguSara Ann Wood. Wayebiwe iiveki ezintathu ngaphambilana njengokuba wayekhwele ibhayisekile egoduka kwindlela yasezilalini apho wayehlala khona.
IQELA elikhulu labafuni lakhangela emahlathini, emasimini nakumachibi akufutshane lifuna umkhondo wentombazana elahlekileyo. Malunga nelo xesha, uTina Piirainen, omnye umzali oxheleke umphefumlo kwilizwana eliselumelwaneni, naye wakhutshwa kumabonwakude efunisa ngentombazana yakhe elahlekileyo. Etsalelwa kwindledlana eya ehlathini, uHolly oneminyaka elishumi ubudala waphel’ emehlweni kwixesha elingaphantsi kweyure. Kamva kwafunyanwa isidumbu sakhe entsimini.
Kubazali abalahlekelwe ngabantwana ubomi buba yincindi yekhala. Suku ngalunye babila besoma bengaqinisekanga enoba umntwana wabo uyaphila na, mhlawumbi uyenzakaliswa emzimbeni okanye uyaxhatshazwa ngokwesini, okanye ufile, njengokuba kwakunjalo ngoAshley omncinane. UAshley nentsapho yakowabo waya kubukela umntakwabo edlala kukhuphiswano lomdlalo webhola ekhatywayo. Edinwe kukubukela, waya kwibala lokudlalela—waza waphel’ emehlweni. Kamva, umzimba kaAshley wafunyanwa kwintsimi ekufutshane. Wayekrwitshiwe.
Amava Oyikisayo
Nyaka ngamnye eUnited States, iintsapho ezingama-200 ukusa kwezingama-300 ziya kuba namava oyikekayo okuqweqwediselwa umntwana zize mhlawumbi zingaphinde zimbone loo mntwana esaphila. Ngoxa la manani ebonakala emancinane xa ethelekiswa nolunye ulwaphulo-mthetho olunogonyamelo olwenziwayo, uloyiko nokuba nexhala olusasazeke entlalweni iphela luchaphazela amawaka abantu. Betyhwatyhwa kukothuka bazibuza oku, ‘Inokwenzeka njani intlekele enjalo apha? Ngaba kuya kulandela umntwana wam?’
EUnited States, inani laminyaka le lamatyala achazwayo abantwana ababiwayo liphakathi kwama-3 200 nama-4 600. Ababini kwabathathu okanye ngaphezulu kubo baxhatshazwa ngokwesini. UErnest E. Allen, umongameli weNational Center for Missing and Exploited Children, wathi: “Isizathu esiyintloko singokwesini, esilandelayo kukufuna ukubulala.” Kwakhona, ngokutsho kweSebe Lezobulungisa, nyaka ngamnye kuzanywa ukubiwa abanye abangaphezu kwe-110 000, inkoliso yabo bebiwa ngabantu abaqhuba iinqwelo-mafutha, ngokuqhelekileyo abangamadoda, bezama ukutsalela umntwana kwinqwelo-mafutha yabo. Kwakhona amanye amazwe akhathazwa lugonyamelo olwenziwa ebantwaneni.
Ngaba Ibutho Labantu Libekek’ Ityala?
Ngokuphathelele ukubulawa kwabantwana, umphengululi waseOstreliya ubonisa ukuba oko “akusosiganeko esenzeka ngamabona-ndenzile.” Kwincwadi yakhe ethi Murder of the Innocents—Child-Killers and Their Victims, uPaul Wilson uchaza ukuba “ababulali nabo babuleweyo barhintyelwa zizinto ezibuhlungu ezenziwe kwalibutho labantu.”
Kusenokubonakala kungaqhelekanga ukucinga ukuba ibutho labantu lisenokubekek’ ityala, okanye ubuncinane lifak’ isandla, kule ntlekele, ekubeni inkoliso yabantu ifumanisa ukuxhatshazwa nokubulawa kwabantwana kuzizenzo ezihambisa umzimba. Sekunjalo, amabutho abantu ahambele phambili kwezoqoqosho, kwanamanye amaninzi asakhasayo, azaliswe yimifanekiso bhanya-bhanya, iinkqubo zikamabonwakude neencwadi ezizukisa isini nogonyamelo.
Ngoku kukho imifanekiso bhanya-bhanya emininzi ebonisa amanyala angcole kakhulu ebonisa abantwana kwanabantu abakhulu abanxiba ngendlela yokuba babonakale bengabantwana. Le mifanekiso bhanya-bhanya ibonisa isini nogonyamelo olubandakanya abantwana. UWilson uhlabela mgama kwincwadi yakhe echaza ukuba kukho imifanekiso eshukumayo enemixholo enjengale Death of a Young One, Lingering Torture, nothi Dismembering for Beginners. Baninzi kangakanani ababukela olo gonyamelo lunenkohlakalo nezinto ezingamanyala? Lishishini elixabisa amakhulu ezigidi zeerandi!
Ugonyamelo oluboniswa ngokuphandle nezinto ezibonisa amanyala lunempembelelo enkulu kubomi babo baxhaphaza abantwana. Omnye owayebanjelwe ukubulala amakhwenkwe aselula amahlanu awayewaxhaphaza ngokwesini wavuma wathi: “Ndilifanasini elikhetha ukuxhaphaza abantwana ngokwesini elibanjelwe ukubulala, yaye izinto ezibonisa amanyala zibe ngunobangela oyintloko wokweyela kwam kulo mkhwa.” UNjingalwazi uBerit Ås, weYunivesithi yaseOslo, ucacisa isiphumo esibakho kubantwana ababukela izinto ezibonisa amanyala: “Senza impazamo enkulu ekupheleni kweyee-1960. Sasikholelwa kwelokuba izinto ezibonisa amanyala ziya kuthabathel’ indawo izenzo zolwaphulo-mthetho lwesini ngokunikela ithuba lokuzanelisa kwizaphuli-mthetho zesini, saza sazibhengeza. Ngoku siyazi ukuba sasiphosisile: izinto ezinjalo ezibonisa amanyala zenza zivumeleke ngokusemthethweni izenzo zolwaphulo-mthetho lwesini. Zikhokelela isaphuli-mthetho ukuba sicinge oku, ‘Ukuba ndingakubukela oku, kumele ukuba kulungile ukukwenza.’”
Umnqweno womntu omkhulu wokuzivuselela uyakhula njengokuba ekhotyokiswa zizinto ezibonisa amanyala. Ngenxa yoko, abanye bakulungele ukusebenzisa izisongelo okanye ugonyamelo ukuze bafumane abantwana ukwenzela injongo yabo egqwethekileyo, kuquka ukudlwengula nokubulala.
Bakho nabanye oonobangela bokubiwa kwabantwana. Kwamanye amazwe oku kuye kwanda ngenxa yeemeko ezimaxongo zoqoqosho. Betsalwa zizityhwentywe zemali yentlawulelo ehlawulwa ziintsapho ezizizityebi, abantwana baba ngamaxhoba abaqweqwedisi. Nyaka ngamnye iintsana ezininzi ziyebiwa zize zithengiswe kumaziko okugcina abantwana asebenzisa oondlela-mnyama maziko lawo azisa kwamanye amazwe.
Ngoobani ababumba eyona nxalenye inkulu yabantwana abalahlekayo? Yintoni eyenzekayo kubo? Amanqaku amabini alandelayo aza kuhlolisisa lo mbandela.
[Ibhokisi ekwiphepha 6]
Izigidi Zabantwana Abangamahenyukazi
Ngokutsho kweZizwe Ezimanyeneyo, malunga nabantwana abazizigidi ezilishumi, ikakhulu kumazwe asakhasayo, baye banyanzelelwa kubuhenyukazi, abaninzi kubo baye baqweqwediswa. Olu rhwebo lungendawo luye lwanda eAfrika, eAsia nakuMzantsi noMbindi Merika ngokulingana nokwanda kwabakhenkethi bamanye amazwe. Kweminye imimandla, kubakhenkethi abazizigidi, ngokukodwa abavela kumazwe afume ngakumbi, malunga nesibini kwisithathu “singabakhenkethi abanenjongo yokufumana amaqabane esini.” Kodwa ikho imini yomgwebo, ekubeni izenzo zolwaphulo-mthetho lomntu “zityhilekile, emehlweni alowo esinokuthana ni naye,” uYehova uThixo.—Hebhere 4:13.
[Umfanekiso okwiphepha 5]
Kuliphupha eloyikisayo xa umntwana ebiwa