Abantu Abaselula Bayabuza . . .

Ndinokuzikhupha Njani Ezi Mvakalelo?

“Nangona ngoku ndibufumanisa buyinto embi gqitha ubufanasini, maxa wambi ndizifumana nditsaleleke kubo. Ziyandiphazamisa ezi mvakalelo, maxa wambi imini nobusuku. Ndiye ndathandaza kuYehova ngokuzingisileyo, ‘Khupha ezi mvakalelo zingalunganga kum!’ Ngaba ziya kuze ziphume?”—Dennis.a

IQELA lolutsha olungamaKristu—amadoda namabhinqa—luye lwenza izibongozo ezifanayo lufuna uncedo. Luziva lutyekele kubufanasini kodwa alufuni kubandakanyeka ekuziphatheni vakalala, ekubeni nesifo, nakwihambo ewohlokileyo ngokuziphatha ebalaselisa loo ndlela yokuphila. Okubaluleke nangakumbi kukuba lufuna ukukholisa uThixo, yaye eLizwini lakhe ubugweba kabukhali ubufanasini.—Roma 1:26, 27; Kolose 1:10.

Ngokufuthi kuthiwa amafanasini akanakuguquka. Noko ke, oku akuyonyaniso. Wambi amaKristu angaphambili kuqala ayengamafanasini, kodwa aguquka. (1 Korinte 6:9-11) Ewe, ngokuchasene neentsomi ezidumileyo, abantu banako yaye bayaguquka. Phofu ke, ngoxa oselula esenokuziphepha ngokunempumelelo izenzo zobufanasini, usenokufumanisa kunzima ukuyisusa ngokupheleleyo inkanuko yobufanasini. Omnye umfana wavuma esithi: “Ndiye ndazama ukuguqula iimvakalelo zam. Ndiluthandazele uncedo lukaYehova. Ndiyifundile iBhayibhile. Ndiye ndaphulaphula iintetho ngalo mbandela. Kodwa andazi ukuba ndinokulufumana phi uncedo.”

Abunyangwa ngomlingo okanye ngephanyazo. UDennis ukhumbula oku: “Ndazinyanzelela ekubeni ndiziphathe vakalala nabesini esahlukileyo kumgudu wokuba ‘yindoda.’ Konke oku kwakulilize yaye kwadala nje iintlungu ezingakumbi.” Sekunjalo, ngokusebenzisa imigaqo yeBhayibhile, ubani unokuzilwa iimvakalelo ezinjalo.

Ukuqonda Imizekelo Yokucinga Okuphosakeleyo

Okokuqala, khumbula ukuba izenzo zandulelwa ziingcinga. (Isaya 55:6, 7; Yakobi 1:14, 15) Eneneni, uGqr. Wayne W. Dyer uthi: “Akunakuba neemvakalelo ngaphandle kokuba uqale ucinge.” Ngoko unobangela weminqweno yobufanasini unokuba kukucinga okugqwethekileyo ngokuphathelele umntu siqu, abesini esahlukileyo, uthando, njalo njalo. Ngaphambi kokuba ubani abe ‘nokuguqula ingqondo yakhe’ aze aguqule iingcinga ezinjalo, ufanele aziphawule kuqala. (Roma 12:2) Ukwenjenjalo kunokwenza asiqonde ngokuxabiseke kunene isizathu sokuba ubani atsaleleke kubantu besini esifanayo.

Umntu unokukwenza njani oku? Enye indlela kukuthandaza, njengoko wenzayo umdumisi: “Ndigocagoce, Thixo, uyazi intliziyo yam; ndicikide, uzazi iingcinga-ngcinga zam; ubone ukuba kukho ndlela yobubi na kum.” (INdumiso 139:23, 24) Kwakhona kusenokunceda ukuba ubani axubushe iimvakalelo zakhe nomKristu oqondayo noqolileyo. Njengoko IMizekeliso 27:17 ikubeka oku ngokuthi, “isinyithi silola isinyithi.” Ngaloo ndlela omnye umfana wazityand’ igila kumdala othile ongumKristu owayesaziwa ngokuba novelwano nemfesane. Kwakungelula nakancinane ngaye ukuthemba omnye umntu ngento eyimfihlo kuye, kodwa kukhule ulwalamano oluxabiseke kunene. Uthi: “Ndingathetha nangantoni na naye.” Lo mdala akaphulaphuli nje kuphela, kodwa imibuzo yobuchule iyamnceda arhole iimvakalelo neengcinga zalo mfana.—Thelekisa IMizekeliso 20:5.

Ukuba indoda yayinoyise ongakhathaliyo okanye oxhaphazayo, isenokufumanisa ukuba ukutsaleleka kwayo kwabesini esifanayo ngokwenene ngumzamo olilize wokuzalisa imfuno yothando lukatata. Ekubeni ingazange ibe namzekelo wobudoda eyayifanele iwuxelise, kwakhona isenokuva oko uGqr. Joseph Nicolosi akubiza ngokuthi “yimvo yokuba buthathaka nokungafaneleki ngokuphathelele ezo mpawu zinxulumene nobudoda, ezizezi, amandla, igunya, nokomelela.” Ukuba umntu uhlolisisa iimpawu ezithile avakalelwa kukuba uziswele, usenokumangaliswa kukufumanisa ukuba ezi ziimpawu kanye ezenza azifumane etsaleleke kwamanye amadoda.

“Amava” Abuhlungu Angaphambili

Olunye ulutsha luyaqonda ukuba ingxaki yalo inxulumene nokwenzakala kwexa elidluleyo. Enye intombazana ikhumbula oku: “Ndandiqhelene nezinto ezibonisa amanyala anxulumene nobufanasini. Ndaqalisa ukuhlakulela iminqweno engekho ngokwemvelo.” Omnye umfana uthi: “Ndandilixhoba lokuxhatshazwa ngutata ngokwesini. Ngenxa yoko, iintlobano zesini nendoda zabonakala ziqhelekile kum.” Amava anjalo ukuba buhlungu asenokufundisa amaxhoba ukuba abathiye okanye ade aboyike abesini esahlukileyo okanye anxulumanise uthando neentlobano zesini. Ngaloo ndlela elinye ixhoba lichaza iinkanuko zalo zesini “njengezingokweemvakalelo, kungekhona intswelo engokwasemzimbeni—intswelo yokuthantanyiswa nokuqondwa.”

Noko ke, kuyavunywa ukuba, oonobangela bobufanasini bantsonkothile, yaye kwiimeko ezininzi abanakucaciswa nje ngokulula.b Phofu ke, kungakhathaliseki oko kubangele iingcinga ezigqwethekileyo, kuninzi ubani anokukwenza ukulungisa ezo ngcinga.

Ukuguqula Ingqondo Kabani

Eyona ndlela ilungileyo kukusebenzisa iLizwi likaThixo. Ngokomzekelo, khawucinge ngomfana ozifumanisa etsaleleke kwindoda ebonakalisa iimpawu zobudoda avakalelwa kukuba yena akanazo. Okanye khawucinge ngebhinqa eliselula eliboyikayo abantu besini esahlukileyo. Enye indlela abanokuhlakulela ngayo imbono ephilileyo yobudoda kukufunda ngomzekelo kaYesu. (1 Petros 2:21) Wayengumzekelo ofezekileyo womntu onamandla endoda ahambisana nokuthantamisa. (Mateyu 19:14; Yohane 19:5) Ngaloo ndlela omnye umfana ukufumanisa kuluncedo ukufunda incwadi ethi Oyena Mntu Ubalaseleyo Wakha Waphila.c Uthi: “Ukwazi uYesu kuvuselela umbono wam ngendlela indoda efanele ibe yiyo.”

Ukucamngca ngeendinyana zeBhayibhile ezixubusha ngemibandela enjalo njengembono kaThixo ngesini, ngothando, nobuhlobo kwabesini esifanayo ngokukwanjalo kuluncedo ekulungiseni ukucinga kukabani.—Genesis 1:27, 28; Rute 1:16,  17; 1 Samuweli 18:1; IMizekeliso 5:18, 19; 1 Korinte 13:4-8.

Kwakhona kubalulekile ukukuphepha ukusoloko uneengcinga ezingalunganga. Amaxesha amaninzi ezi mvakalelo zinamandla ngakumbi xa ubani elilolo, edandathekile, okanye edimazekile. (IMizekeliso 24:10) Elinye ibhinqa elingumKristu lithi: “Ekuphela kwendlela esinokuguqula ngayo oko sikuko kukuguqula iingcinga ezimbi zibe zezilungileyo.” Xa lifikelwa ziimvakalelo ezingekho nyulu, lizikhumbuza ngembono kaThixo ngobufanasini. Enye inkwenkwe ekwishumi elivisayo ithi: “Nanini na ndineemvakalelo zobufanasini, ndicamngca ngesicatshulwa endisithandayo seBhayibhile.” (Thelekisa eyesi-2 kwabaseKorinte 10:4; Filipi 4:8.) Abanye baye bakufumanisa kuluncedo ukulala bephulaphule iikhasethi ezahlukahlukeneyo zeWatch Tower Society ezisekelwe eBhayibhileni.

Kanye njengokuba indlela esicinga ngayo ichaphazela indlela esizenza ngayo izinto, indlela esizenza ngayo izinto inokuyichaphazela indlela esicinga ngayo nesivakalelwa ngayo. Ngoko kwakhona ubani ufanele akuphephe ukuziphatha nonxulumano olwenza okanye olukhuthaza umnqweno ongalunganga. (1 Korinte 15:33) Kwakhona ubani kusenokufuneka ‘azigcine’ xa kufikelelwa kwizindlu zangasese zikawonke-wonke, kwiindawo zokuqubha eziselunxwemeni, kwigumbi lokutshintshela iimpahla, nakwezinye iindawo ezinokubeka ubani esilingweni.—INdumiso 119:9.

Ukuphulula amaphambili lolunye uqheliselo ubani afanale aluphephe. Kumafanasini amaninzi angamadoda nangamabhinqa, kungumkhwa ongalawulekiyo. Omnye umfana uyavuma esithi: “Ndandinengxaki yokuphulula amaphambili ukususela ngexesha endandineminyaka emithandathu ubudala. Ukusoloko ndicinga ngesini kwazikhuthaza iimvakalelo zam zobufanasini.” Wulwe lo mkhwa ungcolileyo!d—Kolose 3:5.

Kwelinye icala, kukwabalulekile ukuba ubani abe ngumzekelo omhle wokuziphatha. Bambi bacinga ukuba ukuba umfana uhlakulela iimpawu zobudoda, usenokungatsaleleki kangako kwamanye amadoda. Kakade ke, umfana usenokungayazi indlela anokukwenza ngayo oku ukuba akazange abe nomzekelo owomeleleyo wobudoda afanele awulandele esengumntwana. Usenokude abe neentloni ngomzimba wakhe yaye azive eliathalala okanye engungantweni. Ukubandakanyeka kumsebenzi ofuna amandla, ukwenza umthambo ngobungcathu, okanye imidlalo ephumza ingqondo ngokufuthi kuyanceda kulo mbandela. (Thelekisa eyoku-1 kuTimoti 4:8.) Kodwa kanye njengokuba umfana uTimoti waba njengonyana kumpostile uPawulos, ubani usenokukufumanisa kuluncedo ukuhlakulela ukuqondana okuhle nomKristu oselekhulile oyindoda elungeleleneyo. (Filipi 2:19-22; 2 Timoti 3:10) Ngokuzibekela imida ecacileyo yokuziphatha nokuhlakulela ukuncokolisana okukhululekileyo, ulwalamano olunjalo lunokuba lolufudumeleyo nolunokuthenjwa, ukanti kungabikho naziphi na iimvakalelo ezivuselela inkanuko yesini.

Ngaphezu koko, ubani umele azondle ngokuqinileyo ngokomoya. Isifundo esithe rhoqo seBhayibhile, umthandazo, nokwabelana nabanye ngokholo lukabani kuyanceda ukugcina ingqondo kabani icinga ngezinto zokomoya. (INdumiso 55:22; 119:11; Roma 10:10) Maxa wambi iimvakalelo zokungaxabiseki zisenokwenza kube nzima ukuba ube phakathi kwamaKristu okholwa nawo, kodwa iBhayibhile iyalumkisa nxamnye nokuba ubani azikhethe kwabanye. (IMizekeliso 18:1) Unxulumano olucocekileyo namaKristu esini esahlukahlukeneyo kunokunceda ubani ukuba ahlale elungelelene.—Hebhere 10:24, 25.

Ukuba uthwaxwa yinkanuko yobufanasini, la macebiso asenokungqineka eluncedo. Noko ke, musa ukudimazeka ngokugqithiseleyo, ukuba ezi mvakalelo zimbi ziyazingisa. UThixo uyaziqonda iimvakalelo onazo yaye unemfesane ngabo bazabalazela ukumkhonza. (1 Yohane 3:19, 20) Kwihlabathi elitsha, uluntu luza kubona ukunyangwa kwabo bonke ubulwelwe obusicinezelayo. (ISityhilelo 21:3, 4) Okwakalokunje, thembela kuThixo uze ulwe nxamnye neenkanuko ezingalunganga. (Galati 6:9) Ngokuchitha ixesha nokwenza umgudu ngokuzimisela, mhlawumbi kwaneenkanuko ezingalunganga zinokuncipha.

[Imibhalo esemazantsi]

[Amagama acatshulweyo akwiphepha 22]

Hlakulela imbono ephilileyo yobudoda ngokufunda ngomzekelo kaYesu