Kwenzeka Ntoni Kootatomkhulu Noomakhulu?

NGUMBHALELI KAVUKANI! EITALI

“Ndandingakholelwa ukuba njengotatomkhulu abazukulwana bam babengaba nobubele obunjalo kum. Basisipho—ngabathunywa abanobubele, abamsulwa bokomeleza amaqhina omsa.”—UEttore, utatomkhulu.

PHEZU kwalo nje ulwalamano olwakhayo olukhankanywe ngasentla, ootatomkhulu noomakhulu, abazali nabazukulwana abasoloko bephathana kakuhle kule mihla. Kunokuba zisebenzisane, ezi zizukulwana zintathu ngokufuthi ziyangqubana. Uba yintoni umphumo? Ubulolo nokungonwabi kuthabath’ unyawo phakathi kwabalupheleyo, ootatomkhulu noomakhulu—abangamalungu entsapho adla ngokuba ngawona asesichengeni nangamalolo, yaye bangabo anokuthi amanye amalungu entsapho afune kubo uncedo xa eneengxaki zezoqoqosho. Injani imeko kweyakho intsapho? Ngaba ootatomkhulu noomakhulu baxatyiswe ngokwenene?

Kumashumi ambalwa eminyaka adluleyo, iinguqu eziphawulekayo zasentlalweni ehlabathini lonke ziye zachaphazela intsapho nolwalamano lwayo, nto leyo ephumele ekubeni baphantse banyamalala ngokupheleleyo oosolusapho. EYurophu, sisi-2 ekhulwini kuphela sabantu abalupheleyo abahlala nabantwana babo. Sekunjalo, kumazwe ahambele phambili kwezoshishino, ngenxa yokwanda kwabantu abakhulu nokwehla kwenani labantwana, ootatomkhulu noomakhulu kubemi jikelele banda ngokuqhubekayo. Oomakhulu nootatomkhulu bangama-26 ekhulwini kubemi baseYurophu, yaye ngokutsho kohlolisiso olwapapashwa yiEuropean Union, eli nani “kulindeleke ukuba linyuke.” IAsahi Evening News ithi, elaseJapan “lineqhayiya ngesithethe salo sokunyamekela abemi balo abakhulileyo.” Sekunjalo, kukho umkhwa owandayo, ngakumbi ezixekweni, wokushiywa kootatomkhulu noomakhulu ezibhedlele nakwiikliniki ezikhethekileyo naxa kungekho mfuneko yokwenene yokuba balale apho. NaseMzantsi Afrika, apho abantu abakhulileyo ngokwesithethe bebephathwa ngentlonelo, ngoku kukho umkhwa ombi wokutyeshela abantu abalupheleyo, litsho njalo iphephandaba laseKapa iThe Cape Times. Le ngxelo ilikhupha litsole elokuba iintsapho zifuna “ukuzonwabisa ebomini kangangoko kunokwenzeka” yaye “zizikhohlisa ngelokuba zakuba zibeke umakhulu notatomkhulu ngokukhuselekileyo kwikhaya labantu abalupheleyo, zikwenze konke okulindeleke ukuba zikwenze.”

Eli phephandaba linye lithetha ngesinye isiganeko apho umakhulu owalupheleyo wabekwa kwikhaya labantu abalupheleyo ngabantwana bakhe abathathu, “bemthembisa ngokumxhasa nokumtyelela rhoqo.” Kodwa kwenzeka ntoni kuye? “Ekuqaleni utyelelwa rhoqo. Emva kweeveki ezithile utyelelwa kathathu ngeveki. Kwandula ke kube kanye ngeveki. Emva konyaka kabini okanye kathathu ngenyanga, ekugqibeleni kahlanu okanye kathandathu ngonyaka yaye ekugqibeleni ubabona ngebhaqo.” Wazichitha njani lo makhulu ezi ntsuku zakhe zisisithukuthezi? Le nkcazelo ibuhlungu ithi: “Kwakukho umthi obonakalayo kwifestile ekwigumbi lakhe, yaye amaqabane akhe aphilayo yayingamahobe namasomi kuphela awayesithi ngcu kuwo. Wayekulinda ngolangazelelo ukufika kwawo ngokungathi yayizizalamane ezisenyongweni.”

Ngenxa yokwamkelwa kwendlela yokuphila yaseNtshona eMzantsi Afrika, enyanzelisa abaninzi ukuba bafune umsebenzi ezixekweni, kwenzeka into efanayo kwiintsapho zasezilalini. Ngaphandle kokuguquka kweemeko zasentlalweni, ezinye izizathu zokulahlwa kootatomkhulu noomakhulu zibangelwa kukuphela kweempawu zobuntu ezenza ibutho labantu neentsapho zonwabe—ukulunga, ukuhlonela ummelwane kabani, ukubonisa umsa kwintsapho—ukuxhaphaka komoya wokuzingca, ukwenza ulonwabo eyona nto ibalulekileyo, ikratshi nemvukelo. Ngokutsho kweZibhalo, ukuwohloka okunjalo kwemilinganiselo yokuziphatha kungumqondiso wokuba siphila ‘kwimihla yokugqibela.’ (2 Timoti 3:1-5) Ngaloo ndlela, kunokuba abantwana nabazukulwana bajonge ootatomkhulu noomakhulu njengendawo abanokufumana kuyo ukhuthazo nenokubenza balungelelane, ngokufuthi babagqala njengemiqobo eluxanduva, esadla ngendeb’ endala.a

Umsantsa wesizukulwana uya uvuleka, yaye uxhomis’ amehlo, ngokukodwa xa abantu abakhulileyo behlala neentsapho zabo. Kanti, igalelo lootatomkhulu noomakhulu linokuba yingenelo enkulu! Ngoko, ziziphi ezinye iingxaki eziphambili phakathi kwezizukulwana eziphazamisa ulwalamano olunomsa phakathi kootatomkhulu noomakhulu, kwabantwana nabazukulwana? Yaye ootatomkhulu noomakhulu banokuyizuza njani kwakhona indima yabo ebalulekileyo kwisangqa sentsapho?

[Umbhalo osemazantsi]