Imbono YeBhayibhile
Ngaba Kunomsebenzi Oko Ukukholelwayo?
“UMNTU UKHETHA UKUKHOLELWA OKO AKUTHATHA NJENGENYANISO.”—FRANCIS BACON, 1561-1626, UMBHALI WEZINCOKO OLINGESI NOKWALIGOSA LASEBURHULUMENTENI.
XA KUFIKELELWA kwiimfundiso zonqulo, abantu abaninzi bavakalelwa kukuba logama nje ubani ekholelwa ngokunyanisekileyo ukuba ‘kukho uThile emazulwini’ aze athande abanye abantu, okunye akukholelwayo akunamsebenzi. Abanye basenokujonga iimbono ezingqubanayo ezifundiswa ngamaqela onqulo ngokuphathelele uThixo, injongo yakhe, nendlela yokumnqula baze bagqibe kwelokuba oko kungavisisani akunabunzulu, kufana nje neendlela ezahlukahlukeneyo anxiba ngazo lo mntu ukwamnye. Basenokude bavakalelwe kukuba abo baphikisana ngoko kungavisisani abawuqondi kwaphela umoya wobuKristu bokwenyaniso.
IZibhalo ziyavuma ukuba asizizo zonke iingxoxo ngeemfundiso zonqulo ezifanelekileyo. Ngokomzekelo, kwiincwadi zakhe eziphefumlelweyo eziya kuTimoti, umpostile uPawulos wabhekisela kubantu ababexhokonxa “iimpikiswano zochuku.” UPawulos wabachaza ‘njengabafa kukukhanuka iimbuzwano namaphike amazwi.’ (1 Timoti 6:4, 5) Wayalela uTimoti ukuba ‘ayinxweme imibuzwana yobudenge engenangqeqesho, esazi ukuba izala imfazwe,’ aze ayalele amabandla ukuba ‘angenzi mfazwe yamazwi angancedi lutho.’ (2 Timoti 2:14, 23) Iingxoxo ezininzi zonqulo kumhla wethu ziyile nto kanye ichazwe apha kwaye ziye zangqineka zingenantsingiselo yaye ziyinkcitha-xesha.
Noko ke, ngaba oko kuthetha ukuba zonke iingxoxo ezingeenkolelo zonqulo azinantsingiselo? Kaloku, besingenakuze siyeke ngokupheleleyo ukunxiba impahla ngenxa nje yokuba ezinye iimpahla zingakufanelanga ukunxitywa, akunjalo na? Ngoko kutheni siwuyeka njengongabalulekanga ngokupheleleyo umbandela weenkolelo zonqulo ngenxa nje yokuba eminye imibuzo engeemfundiso kungekho mfuneko yokuba ixutyushwe? Umongo wamazwi kaPawulos acatshulwe ngasentla ubonisa ukuba wayewugqala umbandela weemfundiso njengobalulekileyo. Ngokuphindaphindiweyo walumkisa ngelokuba iimfundiso zobuxoki zisenokumbangela ubani alahlekane nokholo, kwaye wayalela uTimoti ukuba ‘abathethele abanye, bangafundisi mfundiso yimbi.’ (1 Timoti 1:3-7; 4:1; 6:3-5; 2 Timoti 2:14-18, 23-26; 4:3, 4) Ngokuqinisekileyo, ngewayengazange athethe ngendlela egxininisa ngolo hlobo kanti kwakungabalulekanga oko loo maKristu enkulungwane yokuqala ayekukholelwa.
Ngoko, kwakutheni ukuze anikele isiluleko sokuba kuyekwe imibuzo engemfundiso? Kungenxa yokuba ngomhla kaPawulos abantu abathile—awabachaza ‘njengabonakele ingqiqo, nabahluthwe inyaniso’—babexubusha imibandela engemfundiso kuphela ngenjongo yokubhukuqa ukholo lwabanye. (1 Timoti 6:5) Kuphela kwakungokunxulumene nemibuzo eyayibuzwa ngabo bantu bonakeleyo awathi uPawulos wacebisa uTimoti ukuba aziphephe iingxoxo ezingeenkolelo zonqulo.
Ngaba Iinkolelo Ziyakuchaphazela Ukuziphatha?
Noko ke, abanye basenokubuza enoba iinkolelo zethu zonqulo zinempembelelo enkulu kusini na kuhlobo lwabantu esiba ngabo—iimpawu zethu zobuqu nokuziphatha. Basenokuzijonga iinkolelo nokuziphatha njengezinto ezahlukeneyo nezingadibaniyo, njengomntu okhetha ukunxiba ibhatyi engafaniyo nebhulukhwe. Noko ke, eBhayibhileni iinkolelo nokuziphatha zifana nqwa nesuti yona nto ingohlulwayo.
IBhayibhile ityhila ukudibana okuthe ngqo phakathi koko sikukholelwayo nohlobo lwabantu esiba ngabo. AbaFarisi bomhla kaYesu ababezigqala bengamalungisa bangumzekelo obonisa indlela iinkolelo ezingachananga ezikuchaphazela ngayo ukuziphatha. (Mateyu 23:1-33; Luka 18:9-14) Kwelinye icala, amaKolose 3:10 ayaluleka: ‘Nambathe lowo umtsha, uhlaziyelwa ekumazini okuhle [“kulwazi oluchanileyo,” NW], ngokomfanekiselo walowo wamdalayo.’ (Akekeliswe sithi.) Phawula ukuba amandla okuphila ubomi bokuhlonela uThixo anxulunyaniswe nokuba nolwazi oluchanileyo ngoThixo.
Ibinzana lesiGrike eliguqulelwe ngokuthi “ulwazi oluchanileyo,” elivela izihlandlo ezingama-20 kwiZibhalo zamaKristu zesiGrike libhekisela kulwazi oluthe ngqo, oluchanileyo, okanye olupheleleyo. Umphengululi ongumGrike uNathanael Culverwel ulichaza eli binzana “njengokuqhelana ngakumbi nento ebendiyazi ngaphambili; ukubona ngokucace ngakumbi into endakha ndayibona ngaphambili ndimgama.” Kanye njengokuba umrhwebi wamatye anqabileyo ehlola ilitye elinqabileyo ukuze akwazi ukubona iimpawu nexabiso lalo, umKristu ufanele ahlole iLizwi likaThixo ukuze afikelele kulwazi oluthe ngqo, oluchanileyo nolupheleleyo ngoThixo amkhonzayo. Oku kuquka ukufikelela ekwazini ubuntu bukaThixo, iinjongo zakhe, imilinganiselo yakhe nazo zonke iimfundiso ezibumba “umzekelo wamazwi aphilileyo”—nto leyo eyahluke gqitha ekukholelweni nje kuphela ukuba ‘kukho uThile emazulwini.’—2 Timoti 1:13.
Umzekelo wesiqhamo esibakho xa ubani engamazi uThixo ngokusondeleyo ubhalwe kwisahluko sokuqala sencwadi ephefumlelweyo eya kwabaseRoma. Apho, kubhekiselwa kubantu abathile abathe, ‘bemazi uThixo, bakumangala ukuhlala bemazi kakuhle [“benolwazi oluchanileyo,” NW] uThixo.’ (Akekeliswe sithi.) Imiphumo yeenkolelo zabo eziphosakeleyo ichaziwe ngumpostile uPawulos: “UThixo wabanikela engqiqweni engacikidekileyo, ukuba benze izinto ezingafanelekileyo; bezele yiyo yonke intswela-bulungisa, okungendawo, ukubawa, ulunya; bezele ngumona, kukubulala, ziinkani, yinkohliso, bubumenemene; abasebezi, abahlebi, abathiyekileyo kuThixo, abasileyo, abanekratshi, abaqhankqalazi, abacebi bezinto ezimbi, abangabevayo abazali, abangenakuqonda, abaphuli beminqophiso, abangenabubele, abangenatarhu, abangenanceba.”—Roma 1:21, 28-31.
Ngokungathandabuzekiyo, iinkolelo zabo bantu zawachaphazela ngokungqalileyo amandla abo okuphila ubomi bobuKristu. Ngokufanayo namhlanje, iinkolelo nokuziphatha zinokufaniswa nesinxibo esingenamthungo, esidityaniswe ngokulukwa. Ngoko ke, kubalulekile ukuba bonke abanqwenela ukuba uThixo akholiswe ngabo baqinisekise ukuba iinkolelo zabo zonqulo ziyinyaniso ngokwenene, zisekelwe ngokupheleleyo kwiLizwi likaThixo. Ngokuba ‘[uThixo] unga bangasindiswa bonke abantu, bafikelele ekuyazini [“kulwazi oluchanileyo,” NW] inyaniso.’ (Akekeliswe sithi.)—1 Timoti 2:4.
[Umfanekiso okwiphepha 16]
Ukuzigqala komFarisi elilungisa kwakubonisa iinkolelo zakhe