Siyintoni Isiseko Seenkolelo Zakho?

Ukukholelwa kuye kwachazwa ngokuba “kukwamkela okuthile njengenyaniso, okanye njengento yokwenene.” IUnited Nations Universal Declaration of Human Rights ikhusela “ilungelo lenkululeko yokucinga, isazela nonqulo” lomntu ngamnye. Eli lungelo liquka inkululeko “yokutshintsha unqulo okanye inkolelo kabani” ukuba ufuna ukwenjenjalo.

NOKO ke, kutheni umntu enokufuna ukutshintsha unqulo okanye inkolelo yakhe? “Ndineenkolelo zam, yaye ndanelisekile zizo,” leyo yimbono eqhelekileyo yabantu. Abaninzi bavakalelwa kukuba iinkolelo ezingachananga aziyongozi ingako emntwini. Ngokomzekelo, umntu okholelwa ukuba umhlaba uthe tyaba, kusenokuba akazenzakalisi okanye akenzakalisi mntu. “Sifanele sikwamkele ukuba sahlukile,” bambi batsho. Ngaba oko kusoloko kububulumko? Ngaba ugqirha angamgqala njengowenza izinto ngokwahlukileyo omnye asebenza naye ukuba uqhubeka ekholelwa ukuba emva kokuphatha izidumbu kwindawo ezigcinwa kuyo unokuya kuhlola abantu abagulayo kwigumbi lesibhedlele?

Xa kufikelelwa kumba wonqulo, iinkolelo ezingachananga ziye zabangela umonakalo omkhulu embalini. Cinga ngamashwangusha awenzekayo xa iinkokeli zonqulo “zaphembelela amaKristu anenzondelelo kugonyamelo olubuhlungu” ebudeni beeMfazwe Zomnqamlezo zamaXesha Aphakathi. Okanye cinga ngamadoda anamhlanje “angamaKristu” awayexhobe ngemipu kwimfazwe yamakhaya yakutshanje awayefana “namajoni amaxesha aphakathi awayenamagama eengcwele kwiziphatho zamakrele awo, efake imifanekiso kaMariya Onyulu koombayimbayi bawo.” Onke la maKristu anenzondelelo ayekholelwa ukuba ayechanile. Sekunjalo, kucacile ukuba kwezi ziganeko neminye imizabalazo nemilo yonqulo, kwakukho into ephosakeleyo kuyo.

Kutheni kukho isiphithiphithi neengxabano ezingaka? Impendulo yeBhayibhile ithi uSathana uMtyholi “ulahlekisa umhlaba omiweyo uphela.” (ISityhilelo 12:9; 2 Korinte 4:4; 11:3) Okubuhlungu kukuba umpostile uPawulos walumkisa ukuba abantu abaninzi bonqulo “baya kutshabalala” kuba babeya kukhohliswa nguSathana, oya “kwenza imimangaliso ukuze akhohlise.” UPawulos wathi abanjalo, “baya kuzivala iingqondo zabo kuthando lwenyaniso enokubasindisa” yaye ngaloo ndlela ‘bakhohliseke ngokukholelwa koko kububuxoki.’ (2 Tesalonika 2:9-12, iThe New Testament nguWilliam Barclay) Sinokukunciphisa njani ukukholelwa kubuxoki? Enyanisweni, kutheni unale nkolelo unayo?

Ngaba Ukhuliselwe Kuloo Nkolelo?

Mhlawumbi ukhule intsapho yakowenu ikholelwa ngale ndlela. Isenokuba yinto entle leyo. UThixo ufuna abazali bafundise abantwana babo. (Duteronomi 6:4-9; 11:18-21) Ngokomzekelo, indoda eselula uTimoti yangenelwa kukuphulaphula unina noninakhulu. (2 Timoti 1:5; 3:14, 15) IZibhalo zikhuthaza ukuba ubani akuhlonele oko abazali bakukholelwayo. (IMizekeliso 1:8; Efese 6:1) Kodwa ngaba uMdali wakho ufuna ukholelwe izinto kuba nje abazali bakho bezikholelwa? Enyanisweni, kusenokuba yingozi ukubambelela ungacinganga koko izizukulwana ezingaphambili zazikukholelwa nezazikwenza.—INdumiso 78:8; Amosi 2:4.

Ibhinqa elingumSamariya eladibana noYesu Kristu lalikhuliselwe kunqulo lwamaSamariya. (Yohane 4:20) UYesu wayihlonela inkululeko yalo yokukhetha oko lalifuna ukukukholelwa, kodwa wathi kulo: “Nina ninqula eningakwaziyo.” Enyanisweni iinkolelo ezininzi zonqulo lwalo zazingachananga, yaye walixelela ukuba kuza kufuneka lenze utshintsho kwiinkolelo zalo ukuze linqule uThixo ngokwamkelekileyo—“ngomoya nenyaniso.” Kunokuba banamathele kwiinkolelo ababezixabisa ngokungathandabuzekiyo, ekuhambeni kwexesha lona nabanye abafana nalo, ‘baluthobela ukholo’ olwavezwa ngoYesu Kristu.—Yohane 4:21-24, 39-41; IZenzo 6:7.

Ngaba Wafundiswa Ukwamkela Iinkolelo Zeengcali?

Abafundisi-ntsapho neengcali ezininzi kwiinkalo ezikhethekileyo zolwazi bafanele bahlonelwe ngokunzulu. Sekunjalo, imbali izele yimizekelo yabafundisi-ntsapho abadumileyo ababefundisa izinto ezingachananga. Ngokomzekelo, ngokuphathelele iincwadi ezimbini zemibandela yenzululwazi ezibhalwe sisithandi sobulumko esingumGrike uAristotle, umbhali-mbali uBertrand Russell wathi “akukho nasinye isivakalisi kwezi ncwadi esinokwamkelwa ngokwembono yenzululwazi yezi mini.” Ngokufuthi neengcali zale mihla ziyazenza izigqibo eziphosakeleyo. Ngowe-1895 isazinzulu saseBritani uLord Kelvin satsho siqinisekile ukuba “akunakwenzeka ukuba kubekho oomatshini ababhabhayo abanzima kunomoya.” Ngoko ke, umntu onobulumko akakholelwa ukuba into iyinyaniso kuba nje ithethwa ngumfundisi-ntsapho onokuthenjwa.—INdumiso 146:3.

Ngokufanayo, kufuneka umntu alumke xa kufikelelwa kwimfundiso yonqulo. Umpostile uPawulos wafundiswa kakhulu ngabafundisi-ntsapho bakhe bonqulo yaye “wayenenzondelelo kakhulu kwizithethe zikayise.” Noko ke, inzondelelo yakhe kwinkolelo yezithethe zookhoko bakhe ngokwenene yamzisela iingxaki. Yamkhokelela ‘ekulitshutshiseni ibandla likaThixo yaye eliphanzisa.’ (Galati 1:13, 14; Yohane 16:2, 3) Okona kubi ngakumbi kukuba, kangangexesha elide, uPawulos waqhubeka ‘ekhaba iimviko,’ ezikhaba ngawo omane iimpembelelo ezaziza kumkhokelela ekukholelweni kuYesu Kristu. Kwafuneka uYesu angenelele ngokuphawulekayo ukuze ashukumisele uPawulos ukuba enze uhlengahlengiso kwiinkolelo zakhe.—IZenzo 9:1-6; 26:14.

Ngaba Uphenjelelwe Lijelo Leendaba?

Kusenokwenzeka ukuba ijelo leendaba liye laziphembelela kakhulu iinkolelo zakho. Inkoliso yabantu iyavuya kuba kukho inkululeko yokuthetha kwijelo leendaba, eyinika inkcazelo enokuba luncedo. Noko ke, kukho imikhosi enamandla enokusoloko isebenzisa ijelo leendaba. Ngokufuthi oko ukufumana apho yinkcazelo etyekele kwicala elithile enokuyichaphazela ngendlela echuliweyo indlela ocinga ngayo.

Ukongezelela, ukuze litsale abaphulaphuli abaninzi, ijelo leendaba lidla ngokusasaza oko kubangela umdla nokungaqhelekanga. Izinto ekwakungavumelekanga ukuba zithethwe okanye zishicilelwe ukuze zifundwe ngabantu kwiminyaka nje embalwa edlulileyo iye yaba zizinto eziqhelekileyo namhlanje. Nangona oku kusenzeka ngokuthe ngcembe, imilinganiselo yokuziphatha iyawohloka. Ngokuthe ngcembe indlela abantu abacinga ngayo iye igqwetheka. Baqalisa ukukholelwa ukuba “okulungileyo kubi nokubi kulungile.”—Isaya 5:20; 1 Korinte 6:9, 10.

Ukufumana Isiseko Esiqinileyo Sokukholelwa

Ukwakha phezu kweengcamango neentanda-bulumko zabantu kunjengokwakha phezu kwentlabathi. (Mateyu 7:26; 1 Korinte 1:19, 20) Ngoko ke, unokuzisekela entwenini iinkolelo zakho? Ekubeni uThixo eye wakunika amandla okuqonda okuba uhlolisise izinto ezikungqongileyo uze ubuze imibuzo ephathelele imibandela yokomoya, ngaba akukho ngqiqweni ukuba ebeya kwenza iindlela zokuba ufumane iimpendulo ezichanileyo kwimibuzo yakho? (1 Yohane 5:20) Ewe, kakade ebeya kwenjenjalo! Noko ke, unokuyifumanisa njani inyaniso ngemibandela yonqulo? Asithandabuzi ukuthi iLizwi likaThixo, iBhayibhile linikela ekuphela kwesona siseko sokwenza oku.—Yohane 17:17; 2 Timoti 3:16, 17.

Omnye umntu usenokuthi, “Khawume kancinane, ngaba asingabo kanye aba bantu baneBhayibhile abaye babangela ezona ngxabano zininzi neempikiswano kwimicimbi yehlabathi?” Kaloku, kuyinyaniso ukuba iinkokeli zonqulo ezithi ziphila ngokuvisisana neBhayibhile ziye zavelisa iingcamango ezininzi ezididayo nezingqubanayo. Enyanisweni, oku kungenxa yokuba iinkolelo zazo azisekelwanga eBhayibhileni. Umpostile uPetros uzichaza ‘njengabaprofeti bobuxoki’ kwakunye ‘nabafundisi bobuxoki’ abaye babangela “amahlelo atshabalalisayo.” Ngenxa yezo zenzo zazo, uPetros uthi, “iya kutshabhiswa indlela yenyaniso.” (2 Petros 2:1, 2) Sekunjalo, uPetros ubhala esithi, “sinelizwi lesiprofeto elenziwa laqiniseka ngakumbi; yaye nenza kakuhle ukunikela ingqalelo kulo njengakwisibane esikhanya kwindawo emnyama.”—2 Petros 1:19; INdumiso 119:105.

IBhayibhile isikhuthaza ukuba siqiniseke ngeenkolelo zethu ngokukhangela oko ikufundisayo. (1 Yohane 4:1) Izigidi zabafundi beli phephancwadi zinokungqina ukuba ukwenjenjalo kuye kwabangela ukuba ubomi bazo bube nentsingiselo yaye ziye zaba ngabantu abazinzileyo. Ngoko yiba njengabantu baseBhereya ababechubekile. ‘Zincine ngenyameko iZibhalo mihla le’ ngaphambi kokuba ugqibe ngoko uza kukukholelwa. (IZenzo 17:11) AmaNgqina kaYehova aya kukuvuyela ukukunceda wenze oku. Kakade ke, nguwe omele wenze isigqibo ngoko ufuna ukukukholelwa. Noko ke, kulikhondo lobulumko ukuqinisekisa ukuba iinkolelo zakho ziphenjelelwa, kungekhona bubulumko okanye iminqweno yomntu, kodwa, kunoko, liLizwi likaThixo lenyaniso elityhiliweyo.—1 Tesalonika 2:13; 5:21.

[Imifanekiso ekwiphepha 6]

Ngokuqiniseka unokuzisekela iinkolelo zakho eBhayibhileni