Umlo Nxamnye Neentlekele Uphunyelelwe
IMIGUDU yeZizwe Ezimanyeneyo neyoorhulumente yokunciphisa imiphumo yeentlekele zokwemvelo ngokuqinisekileyo iyancomeka. Amaphulo afana neInternational Decade for Natural Disaster Reduction abonisa ukuba abantu banako ukuzinceda xa bejamelene neentlekele ezinjalo. Ukuba abantu, amabutho noorhulumente bangathabatha amanyathelo afanelekileyo, kunokusindiswa ubomi.
Oku kubangel’ umdla kakhulu, ngenxa yokuba iBhayibhile isixelela ukuba kungekudala kuza kubakho inguqulelo kurhulumente wabantu. Ukususela ngemihla kaYesu, amaKristu ebethandaza uMthandazo weNkosi (“UBawo Wethu Osezulwini”), oneli binzana: “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:9, 10) UBukumkani bukaThixo bungurhulumente wokwenene. Ngokutsho kwesiprofeto seBhayibhile, kungekudala buza “kuzicola buzigqibe zonke ezo zikumkani [zabantu], bona bume ngonaphakade.” (Daniyeli 2:44) Khawube nomfanekiso-ngqondweni wabantu bonke bephantsi korhulumente omnye ofezekileyo. Enjani yona inguqulelo oko okuya kuba yiyo!
Ukuba oorhulumente banamhlanje babona imfuneko yokuthabatha amanyathelo ukuze iingozi zokwemvelo zingabi ziintlekele zokwemvelo, sinokuba nentembelo yokuba urhulumente kaThixo uya kuqinisekisa ukuba abalawulwa bakhe abayi kuze babandezeleke ngale ndlela. UBukumkani bukaThixo buya kuzisa uxolo olusisigxina kwesi sijikelezi-langa okokuqala ukususela kwixesha uKayin awabulala ngalo uAbheli. Phantsi kobo Bukumkani, “abalulamileyo baya kulidla ilifa ilizwe, baziyolise ngobuninzi boxolo.” (INdumiso 37:11) UBukumkani buya kufundisa abantu ukuze ngokoqobo ‘bonke abantu babe ngabafundi bakaYehova, lube lukhulu uxolo lwabo.’—Isaya 54:13.
Namhlanje, amaxhoba amaninzi eentlekele zokwemvelo ngamahlwempu. Noko ke, ngenxa yolawulo olufezekileyo nemfundo efanelekileyo, phantsi koBukumkani bukaThixo, abantu abayi kuthwaxwa bubuhlwempu. Exela kwangaphambili iimeko ezinjalo ngendlela abantu bomhla wakhe ababeya kuyiqonda, umprofeti uIsaya wabhala: “UYehova wemikhosi uya kuzenzela zonke izizwe isidlo sezinto ezityebileyo kule ntaba, isidlo sewayini egcinwe ngeentsipho, sezinto ezityebileyo ezinomongo, sewayini egcinwe ngeentsipho, yaza yahluzwa.” (Isaya 25:6) Ewe, isidlo sezinto ezilungileyo! Echaza ngokubhekele phaya ubomi phantsi kolawulo loBukumkani, umdumisi wabhala: “Makubekho intabalala yengqolowa ezweni, ise encotsheni yeentaba; ukuqhama kwayo makurhashaze njengeLebhanon; mabatyatyambe emizini yabo njengemifuno yomhlaba.”—INdumiso 72:16.
Ngokucacileyo, umlo wabantu neentlekele zokwemvelo uya kuba uphelile. Ngolwalathiso lomoya kaThixo nangolawulo loBukumkani bukaThixo, abantu aboyika uThixo baya kube bephumelele kulo mlo. Enjani yona inkululeko okuya kuba yiyo oko!