Indlela Onokuphila Ngayo Ngonaphakade
EKUBENI umzimba womntu kucacile ukuba unganako ukuphila ubomi obude kunobo bunanditshwa ngabantu namhlanje, bambi bathembela kwinzululwazi ukuba ifumanise indlela esinokuphila ngayo ngonaphakade. UGqr. Alvin Silverstein wabhala: “Njengoko sifumana ulwazi olungakumbi ngemichiza nendlela esebenza ngayo, siya kuthi siyiqonde intsingiselo yobomi. Siya kuthi siqonde . . . indlela aluphala ngayo umntu.”
Uya kuba yintoni umphumo? Luya kukhokelela “kwixesha elitsha kwimbali yomntu,” watsho okaSilverstein. Akusayi kuphinda kubekho bantu ‘balupheleyo,’ ekubeni ulwazi oluya kuvulel’ ithuba ukoyiswa kokufa kwangaxeshanye luya kwenza abantu babe batsha ngonaphakade.”
Ngaba abantu banokukufeza oku? IBhayibhile iyabongoza: “Musani ukukholosa ngamanene, ngonyana womntu, yena ungenalo usindiso. Uyaphuma umoya wakhe, abuyele yena emhlabeni wakhe; ngaloo mini ayatshitsha amabhongo akhe.” (INdumiso 146:3, 4) Abantu boyisiwe kukwazi, singasathethi ke ngokulungisa isiphene abasizuz’ ilifa esingunobangela wokwaluphala nokufa, njengoko sesibonile. NguMdali wethu kuphela onokukwenza oko.
Kanti, ngaba ngenene yinjongo kaThixo ukuba abantu baphile ngonaphakade emhlabeni?
Injongo KaThixo
UYehova uThixo wasibeka ukuba siphile phi isibini sokuqala esingabantu? Kumhlaba oyiparadisi. Sasiyalelwe ukuba ‘siqhame, sande, sizalise umhlaba siweyise.’ (Genesis 1:28) Ewe, injongo kaThixo yayiyeyokuba, ekugqibeleni, wonke umhlaba umiwe yintsapho yabantu abangamalungisa abahlala kunye ngoxolo nangolonwabo.—Isaya 45:18.
Nangona uThixo wawisa isigwebo sokufa kuAdam ngenxa yokungathobeli kwakhe, injongo yakhe yantlandlolo ngabantu yokuba baphile ngonaphakade kwiParadisi esemhlabeni ayizange iguquke. (Genesis 3:17-19) UThixo uthi: “Nditshilo, ndiya kukwenza.” (Isaya 46:11; 55:11) UThixo wabonisa ukuba injongo yakhe ngokuphathelele umhlaba ayiguqukanga xa wathi: “Amalungisa aya kulidla ilifa ilizwe, ahlale kulo ngonaphakade.”—INdumiso 37:29.
NjengoMdali wethu, uThixo unokusilungisa isiphene esingunobangela wokwaluphala nokufa kwabantu. Oku ukwenza ngasiphi isizinzi? Ekubeni eso siphene sazuzw’ ilifa kumntu wokuqala, uAdam, uThixo wanikela njengedini lentlawulelo ubomi obufezekileyo boNyana wakhe, uYesu Kristu, “ukuze bonke abakholwayo kuye bangatshabalali, koko babe nobomi obungunaphakade.”—Yohane 3:16; Mateyu 20:28.
Ngaloo ndlela uYesu Kristu, ngokwenene, uthabathel’ indawo uAdam wantlandlolo njengobawo wethu, okanye umniki-bomi. Kungenxa yeso sizathu iBhayibhile ibiza uYesu ngokuthi “owokugqibela uAdam.” (1 Korinte 15:45) Ngoko kunokuba bagwetyelwe ukufa njengabantwana bomoni onguAdam, abantu abathobelayo basenokugqalwa njengabo bafanelwe kukufumana ubomi obungunaphakade njengabantwana ‘bakaSonini-nanini,’ uYesu Kristu.—Isaya 9:6.
Kakade ke, “uKumkani wawo amaphakade” “noYise weNkosi yethu uYesu Kristu” nguYehova uThixo. (1 Timoti 1:17; ISityhilelo 15:3; Kolose 1:3) Kanti uYesu Kristu, ngaphandle kokuba ‘nguSonini-nanini’ ‘noMsindisi’ wethu, ‘ukwanguMthetheli woxolo.’ (Luka 2:11) Njengommeli kaYise, uKristu uya kusebenzisa igunya lokuba ngumthetheli ukuzisa uxolo emhlabeni.—INdumiso 72:1-8; 110:1, 2; Hebhere 1:3, 4.
Phantsi kolawulo lukaYesu Kristu, iParadisi yasemhlabeni eyalahlekayo iya kubuyiselwa. UYesu wathi, oku kuya kwenzeka “ekuzalweni okutsha, xa athe wahlala uNyana woMntu phezu kwetrone yozuko lwakhe.” (Mateyu 19:28) Abalandeli bakaKristu abathembekileyo—abali-144 000 xa bebonke—baya kulawula naye phezu komhlaba oyiParadisi. (2 Timoti 2:11, 12; ISityhilelo 5:10; 14:1, 3) Izigidi ziya kungenelwa kolo lawulo lobulungisa ngokuthi zinandiphe ubomi emhlabeni oyiParadisi. Phakathi kwazo kuya kubakho isaphuli-mthetho esafela ecaleni koYesu eso uYesu wenza kuso eli dinga: “Uya kuba nam eParadisi.”—Luka 23:43.
Ngaloo ndlela, kwanabafi abangengomalungisa baya kuvuswa baze banikwe ithuba lokuba bakufanelekele ukuphila ngonaphakade emhlabeni. (IZenzo 24:15) IBhayibhile ikuchaza kakuhle ukususwa kokugula, ukwaluphala nokufa, ngokuthi: “Yena uThixo abe nabo, enguThixo wabo. Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”—ISityhilelo 21:3, 4.
Indlela Yokuphila Ngonaphakade
Ngokuqinisekileyo ufuna ukuba phakathi kwabo baya kuwuma umhlaba baze bahlale kuwo ngonaphakade. Ukuba kunjalo, umele wenze okufunekayo ukuze uphile ngonaphakade eParadisi. Kumthandazo wakhe oya kuYise osemazulwini, uYesu Kristu wayichaza into esisiseko efunekayo, ngokuthi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.
AmaNgqina kaYehova aya kukuvuyela ukukunceda ukuba uzuze olu lwazi lunik’ ubomi. Wacele yaye, ngesisa, aya kukutyelela ngexesha elifanelekileyo aze axubushe ngeenjongo zikaThixo zokuvusela uluntu kwimfezeko yokomoya neyokwenyama. Qiniseka ukuba uMdali wethu ongusomandla unako ngokupheleleyo ukulungisa isiphene esibangela ukwaluphala nokufa. Ixesha liyeza, yaye lisondele, xa ubomi bungasayi kuphinda bube bufutshane kangaka. UYehova uya kusikelela abantu bakhe ‘ngobomi obungunaphakade.’—INdumiso 133:3.
[Umfanekiso okwiphepha 10]
Phantsi kolawulo lokuthethela lukaKristu, ukwaluphala nokufa kuya koyiswa