Kutheni Sisaluphala Size Sife?
“NGAPHANDLE kokufunyaniswa kokuba iinguqulelo zokukhula zenzeka kwiseli nganye,” uGqr. Leonard Hayflick uyavuma, “namhlanje asazi kangako ngoonobangela abasisiseko bokwaluphala kunokuba sasisazi kwinkulungwane edluleyo.” Enyanisweni, uthi: “Asinasizathu sibambekayo esisaziyo ngokuba kubekho ukwaluphala.”
Ulingelo olwenziwa elebhu kwiminyaka engama-30 eyadlulayo lwatyhila ukuba xa kuthatyathwe iiseli zomntu eziqhelekileyo kwimveku engekazalwa zakhuliselwa phantsi kwezona meko zilungileyo, zifa emva kokuba zahlulahluleke kangangama-50. Kwelinye icala, iiseli ezithatyathwe emntwini owalupheleyo zahlulahluleka malunga nezihlandlo ezibini okanye ezilishumi kuphela ngaphambi kokuba zife. Ngaloo ndlela, incwadi yeNational Geographic Society ethi The Incredible Machine yathi: “Ubungqina bolingelo buxhasa ingcamango yokuba ukufa kwangena kwasekuzalweni kwakhe ngamnye wethu.”
Noko ke, ngaba ukuyeka ukwahlulahluleka kweseli akunakuthinteleka? Hayi, akunjalo. Iingcali ezimbini ngezokwaluphala, uNjingalwazi Robert M. Sapolsky noCaleb E. Finch, zathi: “Enyanisweni, kubonakala kungokwemvelo ukuba izinto eziphilayo emhlabeni ziqhubeke zikhula [zingaluphali].” Kungumnqa ukuba, kwaneeseli zomntu ezinesiphako zingaluphali namhlanje.
Incwadi ethi The Body Machine, ehlelwe nguGqr. Christiaan Barnard, owenza uqhaqho-fakelo lwentliziyo lokuqala eyikhupha komnye umntu eyifakela komnye, yathi: “Ukufunyanwa ‘kweeseli ezingafiyo’ kwazishiya zime nematha izazinzulu ngebhayoloji ezinomdla ngokukhula, de kwacaca ukuba iiseli ezinjalo zazinesiphako.” Ewe, iqela elithile leeseli ezibangel’ umhlaza linokuqhubeka likhula ngokuqhubekayo ngokuphindaphindeka okungapheliyo! IThe World Book Encyclopedia yathi: “Ukuba izazinzulu zinokuyifumana indlela ezisinda ngayo ezo seli zinesiphako, zinokuyiqonda inkqubo yokwaluphala kweseli.” Ngaloo ndlela, namhlanje kuyabonakala ukuba iiseli ezithile ezibangel’ umhlaza zinokwanda ngokungenasiphelo elebhu, kodwa iseli eqhelekileyo ekhuliswayo iyaluphala ize ife.
Inkqubo Ebangela Isiphene
Njengoko iThe Body Machine ikubeka, ngaba ukwaluphala nokufa kwabantu kungumphumo “wokuyeka ukukhula kweeseli [eziqhelekileyo]”? Ukuba kunjalo, le ncwadi yathi, “kubalulekile ukuphanda nokuqonda inkqubo elawula la mandla aphelayo ukuze siyilawule ngenjongo yokwandisa ubomi bomntu.”
Njengoko usenokukhumbula kwinqaku elandulelayo, uGqr. Hayflick uthethe “ngokwenzeka kwemimangaliso ukususela ekukhawulweni kuse ekuzalweni kwethu nasekukhuleni kwethu ngokwesini size sibe ngabantu abakhulu.” Wandula ke wabhekisela “kweyona nkqubo ilula yokugcina loo mimangaliso iqhubeka ngonaphakade.”
Nangona izazinzulu bezisiwa zivuka kangangeminyaka, zibuye nemband’ esikhova ekufumaniseni eyona nkqubo enokulondoloza ubomi ngonaphakade. Incwadi ethi The Incredible Machine iyavuma: “Oonobangela bokwaluphala baseyimfihlelo.”
Noko ke, eneneni oonobangela bokwaluphala nokufa abayomfihlelo. Impendulo ikho.
Ithini Impendulo?
Onempendulo ngulowo wenza “imimangaliso ukususela ekukhawulweni kuse ekuzalweni kwethu,” uMdali wethu onobulumko bonke, uYehova uThixo. IBhayibhile ithi ngaye: “Ngokuba likuwe ithende lobomi. Yazini ukuba uYehova nguThixo yena. Wasenza yena, asisithi.”—INdumiso 36:9; 100:3.
Khawucinge ngendlela uYehova uThixo awakucwangcisa ngokumangalisa ngayo ukukhula kwakho esibelekweni, ngokungathi kunjalo, wabhala incwadi yemiyalelo yokwenza wena ube ngumntu ongenakulinganiswa nanto! Umdumisi waseBhayibhileni wabhala: “Ngokuba wena wazibumba izintso zam, wandibiyela esizalweni sikama. Ayengagushekile kuwe amathambo am, mna ndenzelwayo entsithelweni . . . Amehlo akho andibona ndiseyimbumba, zazibhalwe encwadini yakho iimini zonke ziphela.” (INdumiso 139:13, 15, 16, akekeliswe sithi.) Kucacile ukuba, amalungu emizimba yethu awenziwa ngokumangalisayo akayomveliso nje yamabonandenzile!
Kanti, ukuba uYehova uThixo wayesidale safezeka ukuze sibe nokuphila ngonaphakade, kutheni sisaluphala size sife? Impendulo ifumaneka kwisalelo esanikwa umntu wokuqala, uAdam, uThixo awambeka kwikhaya elihle elisemhlabeni. UThixo wamyalela: “Yonke imithi yomyezo ungayidla uyidle; ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Akekeliswe sithi.)—Genesis 2:16, 17.
Kwenzeka ntoni? Kunokuba athobele uYise osemazulwini, uAdam akazange athobele, wathelela umfazi wakhe, uEva, batya emthini. Ngokuzingca bamkela isithembiso sobuxoki sesithunywa sezulu esinemvukelo. (Genesis 3:1-6; ISityhilelo 12:9) Ngoko, njengokuba uThixo wayelumkisile, bafa. Nangona uAdam noEva babeyilwe ngendlela yokuba bakwazi ukuphila ngonaphakade, oku kwakuxhomekeke ekuthobeleni uThixo. Ngokungathobeli, bona. Ngoko, njengaboni, badlulisela isiphene esibulalayo kuyo yonke imizimba yenzala yabo. “Kwaza ngokunjalo ukufa kwabatyhutyha abantu bonke.”—Roma 5:12; Yobhi 14:4.
Noko ke, oku akuthethi kuthi akukho themba ngokoyisa ukwaluphala nokufa. Akufanele kube nzima ukukholelwa ukuba uMdali wethu onobulumko bonke unokuziphilisa zonke iziphene ezikwimizila yemfuza aze asinike amandla okuba siqhubeke siphila ngonaphakade. Kodwa uya kukwenza njani oku? Yaye yintoni esimele siyenze ukuze sinandiphe amadinga akhe obomi obungunaphakade?