Ukukhululeka Kwingxaki Yokungaqeshwa—Kuya Kubakho Njani Yaye Nini?

NJENGOMDALI wakhe, umntu unokufumana uvuyo ekusebenzeni, okuchazwa ngokufanelekileyo ‘njengesipho esivela kuThixo.’ (INtshumayeli 3:12, 13; Yohane 5:17) Umsebenzi obangel’ umdla unokusonwabisa yaye usenze sizive siluncedo yaye sifunwa. Akukho namnye ofuna ukuphulukana nomsebenzi, kungakhathaliseki ukuba usenokuba uwunandipha kangakanani. Ngaphandle kokuqinisekiswa ngomvuzo, umsebenzi ohlawulayo wenza ubomi bukabani bulungelelane, bube nenjongo yaye bube nesidima. Akumangalisi ukuba ngokuqhelekileyo “umntu ongaqeshwanga afune umsebenzi kunayo nayiphi na enye into.”

Iphulo Lokufuna Umsebenzi

Njengoko sesibonile, imeko inzima emsebenzini. Ngenxa yoko, kukho iindlela ezininzi ezifanelekileyo zokuzama umsebenzi. Nabani onelungelo lokwenza oko unokusebenzisa uncedo lwabangaqeshwanga olufumaneka kurhulumente kwiindawo olufumanekayo kuzo; yaye xa kufanelekile, banokubhalisa kwiiofisi zabangaqeshwanga baze basebenzise iinkonzo ezinikelwayo. Abanye bafumana umsebenzi ngokuziyilela eyabo imisebenzi. Kodwa kufanele kwenziwe ngobulumko. Ngokufuthi oziqeshileyo ufanele ahlangabezane neendleko ezinkulu ekuqaleni ekusenokungabi lula ukuzigubungela zonke. Kwakhona kuyafuneka ukwazi nokuhlonela imithetho yemali neyerhafu—nto leyo engeyondlwan’ iyanetha kwamanye amazwe!—Roma 13:1-7; Efese 4:28.

Ukuze bafumane umsebenzi, bambi baye baphum’ iphulo lokufumana umsebenzi, bezinikela ngobuchule nangokuzingisileyo. Abanye baye babhalela iinkampani ezifuna abasebenzi okanye bafaka izibhengezo kumaphephandaba asekuhlaleni—wambi kuwo azishicilela simahla izicelo zomsebenzi. Ngokufuthi uVukani! uye wanikela icebiso eliluncedo nelisebenzayo kulo mbandela—kubantu abaselula nakwabadala ngokufanayo.a—Bona iibhokisi, kwiphepha 11.

Kufuneka ube bhetyebhetye—ulungele ukwenza zonke iintlobo zomsebenzi, kuquka nemisebenzi ongayithandi ncam. Iingcali zithi phakathi kwezinto zokuqala ezibuzwayo kudliwano-ndlebe lomsebenzi ngamava omsebenzi wangaphambili nobude bexesha olichithe ngaphandle komsebenzi. Ukuphulukana nomsebenzi kangangexesha elide asilophawu luhle kulowo usenokuba ngumqeshi.

Umntu olichithe ngobulumko ixesha lakhe esikolweni ukuze azuze ubugcisa unamathuba abhetele okufumana umsebenzi wokuqala. UAlberto Majocchi, umfundisi-ntsapho wezifundo ngenzululwazi yezemali uthi: “Ukungaqeshwa, ngokukhethekileyo kuchaphazela abasebenzi abangenabugcisa.”

Ukubaluleka Kokuxhaswa Ngokweemvakalelo

Esinye isibakala esibalulekileyo kukuba nembono efanelekileyo. Oku kunokwenza umahluko phakathi kokufumana umsebenzi nokungawufumani. Abantu abangaqeshwanga bakuxabisa kakhulu ukuxhaswa ngokweemvakalelo, nto leyo ebanceda ukuba bakuphephe ukuzenza amakheswa okanye ukungakhathali. Kwakhona kwenza boyise ukungazihloneli okunokubangelwa kukuzithelekisa nabanye abangaphulukananga nemisebenzi yabo.

Kusenokungabi lula ukuphila ngemalana encinane. UStefano uthi: “Ngendlela endandikhathazeke ngayo, ndafumanisa kunzima ukulisebenzisa kakuhle ixesha endinalo.” UFrancesco ukhumbula oku: “Le meko yandenza ndaxinezeleka gqitha, nto leyo eyandenza ndaqalisa ukubakhalazela abanye abahlobo bam endibathandayo.” Kulapho ifuneka khona inkxaso yentsapho. Umvuzo omncinane ufuna ukuba onke amalungu entsapho abe bhetyebhetye ukuze anciphise iindleko zokuphila. UFranco, owagxothwa eneminyaka engama-43 ubudala emva kokusebenzela inkampani enye iminyaka engama-23, uthi: “Ukususela kwixesha endagxothwa ngalo, umfazi wam wayeluncedo yaye wayelukhuthazo kakhulu.” UArmando unombulelo ngokukhethekileyo kumfazi wakhe ngenxa “yobulumko bakhe obukhulu ekuthengeni.”—IMizekeliso 31:10-31; Mateyu 6:19-22; Yohane 6:12; 1 Timoti 6:8-10.

Imigaqo yeBhayibhile inokusinceda singalahl’ ithemba yaye singazilibali izinto ezibalulekileyo. Abo uVukani! wadlan’ indlebe nabo, abakhankanywe ngasentla, baye bazuza intuthuzelo eqinisekileyo eBhayibhileni. Oku kuye kwabenza baziva besondele ngakumbi kuThixo. (INdumiso 34:10; 37:25; 55:22; Filipi 4:6, 7) Ukuba nolwalamano olusenyongweni noYehova uThixo kokona kubalulekileyo, ekubeni ethembisa: “Andiyi kuze nangayiphi na indlela ndikushiye, ndingayi kuze nangayiphi na indlela ndikutyeshele.”—Hebhere 13:5.

Enoba ubani akaqeshwanga okanye uqeshiwe, iLizwi likaThixo likhuthaza ubani ukuba ahlakulele iimpawu eziluncedo kubomi bemihla ngemihla. Akumangalisi ukuba maxa wambi amaNgqina kaYehova afunwe kakhulu yaye aqondwe njengabasebenzi abanyanisekileyo. Alandela isiluleko seBhayibhile sokuba ngakhutheleyo nekunokuthenjelwa ngawo, akenqeni.—IMizekeliso 13:4; 22:29; 1 Tesalonika 4:10-12; 2 Tesalonika 3:10-12.

Ukukhululeka Kwishwangusha Lokungaqeshwa

Ngokusisiseko, ukunqaba komsebenzi kubangelwa—kukuzingca nokubawa kwabantu. Njengoko iBhayibhile isitsho, “umntu agunyazele umntu, kube kubi kuye.”—INtshumayeli 8:9.

Ingxaki yokungaqeshwa—nezinye iingxaki—iya kuconjululwa ngokususwa kwengcinezelo yomntu, ‘ekwimihla yayo yokugqibela’ sithetha nje. (2 Timoti 3:1-3) Ihlabathi elitsha lifuneka ngokwenene. Ewe, ihlabathi apho ibutho labantu abalungileyo linokuhlala lize lisebenze khona ngaphantsi kolawulo olusesikweni nolulungileyo, apho kungayi kuphinda kubekho ukubawa. (1 Korinte 6:9, 10; 2 Petros 3:13) Yiyo le nto uYesu wafundisa abantu ukuba bathandazele ukuba kufike uBukumkani bukaThixo nokuba kwenziwe ukuthanda Kwakhe emhlabeni.—Mateyu 6:10.

Ngokuprofetayo lichaza ukususwa kwezinye iingxaki eziphambili zoluntu, iLizwi likaThixo lenza umzekelo ngokuza kwenziwa bobo Bukumkani: “Baya kwakha izindlu, bazihlale; batyale izidiliya, badle iziqhamo zazo. Abayi kwakha, kuhlale bambi; abayi kutyala, kudle bambi. . . . Badle into esetyenzwe zizandla zabo abanyulwa bam. Abayi kuzixhamla ngokulambathayo, bazalele ukhwankqiso.” (Isaya 65:21-23) Ishwangusha lokungaqeshwa kungekudala liya kuthi shwaka ngonaphakade. Ukuba ungathanda ukwazi okungakumbi ngesicombululo sikaThixo, nceda udibane namaNgqina kaYehova kummandla okuwo.

[Imibhalo esemazantsi]

[Ibhokisi ekwiphepha 11]

Ukuyila Umsebenzi Ekhaya

• Ukugcina usana, ukunyamekela umntwana

• Ukuthengisa imifuno okanye iintyatyambo ezityalwe ekhaya

• Ukuthunga, nokulungisa impahla

• Ukungxungxa kwimizi-mveliso

• Ukubhaka nokulungisa ukutya

• Ukwenza amalaphu okugquma ibhedi, ukukrosha, ukunitha; ukuluka, ukubumba izinto ngodongwe; neminye imisebenzi yobugcisa

• Ukulungisa izitulo

• Ukugcina iincwadi, ukuchwetheza, ukulungisa iikhompyutha ezincinane

• Ukuphendula iminxeba

• Ukulungisa iinwele

• Ukuqeshisa ngamagumbi

• Ukubhala nokuhambisa iimvulophu zababhengezi

• Ukuhlamba nokumenyezelisa iinqwelo-mafutha (ofuna ukuhlanjelwa inqwelo-mafutha yakhe ayizise ekhayeni lakho)

• Ukondla nokuqeqesha izilwanyana zasekhaya

• Ukulungisa amaqhaga nokwenza izitshixo (ube nendawo yokusebenzela ekhaya)

• Izibhengezo ezininzi zale misebenzi zinokufakwa simahla okanye ngexabiso eliphantsi kumaphepha empela-veki abhengeza izinto ezithengiswayo okanye kwiibhodi zezaziso zeevenkile ezinkulu

[Ibhokisi ekwiphepha 11]

Ukuyila Umsebenzi Ngaphandle Kwekhaya

• Ukugcina indlu (xa abantu besekhefini yaye befuna ukujongelwa indlu yabo)

• Ukucoca: iivenkile; iiofisi; amakhaya namagumbi emva kokwakhiwa, emva kokuba kutshile, emva kokuba abantu befudukile; ukusebenza endlwini (kumakhaya abanye); ukucoca iifestile (emashishinini nasemakhaya)

• Ukulungisa: izixhobo eziziintlobontlobo (amathala eencwadi aneencwadi eziqondeka lula ngokulungisa izinto)

• Imisebenzi yobugcisa: ukutyabeka izindlu; ukwakha iikhabhinethi, iingcango, iivaranda; ukupeyinta; ukubiya; ukuxhoma izindlu

• Umsebenzi wokulima: ukutyala, ukuvuna iziqhamo

• Ukulungisa umhlaba ngaphakathi nokunyamekela izityalo: eziofisini, ezibhankini, kwiindawo ezineevenkile ezinkulu nakwizakhiwo ezikhulu, nasezipasejini

• Ukunyamekela isakhiwo: ukuba ngumgcini sango, ukuba ngumphathi waso (maxa wambi siquka indawo yokuhlala simahla)

• I-inshorensi, ukuthengisa imihlaba

• Ukufaka ikhaphethi, ukuyicoca

• Ukuhambisa amaphephandaba (abantu abadala nabantwana), ukuhambisa ezinye iinkonzo: izibhengezo, amaphepha azisa amatyala kamasipala

• Ukuthutha, ukulondoloza

• Ukulungisa umhlaba, ukulungisa imithi, ukunyamekela ingca, ukucanda iinkuni

• Ukuqhuba uduladula wabantwana besikolo

• Ukufota (imifanekiso okanye iziganeko zasesidlangalaleni)

• Izinto zabalobi zokuthiyela iintlanzi

• Ukwenza omnye umsebenzi endaweni yomnye: ukwenza umsebenzi wombane endaweni yomsebenzi wokukhanda iinqwelo-mafutha, ukuthunga endaweni yokulungisa imibhobho yamanzi, njl.

[Umfanekiso okwiphepha 10]

“Badle into esetyenzwe zizandla zabo abanyulwa bam.”—Isaya 65:22