Ngaba Iintsuku Zonqulo Zibaliwe?

“Ilizwe liya kuzala kukwazi uYehova, njengamanzi egubungele ulwandle.”

UISAYA, UMPROFETI ONGUMSIRAYELI WENKULUNGWANE YESI-8 B.C.E.

LEYO yindlela umprofeti ongumHebhere uIsaya awachaza ngenx’ engaphambili ngayo ukuba ngaminazan’ ithile bonke abantu emhlabeni baya kumanyana ekunquleni uThixo uSomandla. Noko ke, namhlanje, ithemba elinjalo lisenokubonakala likukuza kukaNxele.

Ngokomzekelo, ebutsheni bale nkulungwane, abavukeli bamaKomanisi eRashiya babekholelwa ekubeni ukutshatyalaliswa konqulo kwakulinyathelo elifunekayo ukuze kukhululwe abasebenzi. Babesithi ukuNgakholelwa Kubukho BukaThixo, bathi ‘kuya kukhulula abasebenzi kuxanduva lwenkohlakalo nenkohliso yexa elidluleyo.’ Ngowe-1939, uStalin wanciphisa inani leecawa zobuOthodoki ezazikho kwiSoviet Union zaya kutsho kwi-100, xa kuthelekiswa nezingaphezu kwama-40 000 ezazikho ngaphambi kowe-1917.

Kwakhona uHitler unqulo walujonga njengoluphazamisa indlela yakhe yokufumana igunya elingenamda. Wakha wathi: “Ubani umele abe ngumKristu okanye abe ngumJamani. Akunakuba yintaka-mpuku.” Wayezimisele ukuziphelisa ngokuthe ngcembe zonke iintlobo zonqulo awayengakwazi ukuzilawula. Ngenxa yoko, amaNazi azenzela eyawo imithandazo yonqulo, imisitho, ubhaptizo kwaneenkonzo zemingcwabo. UHitler wayengumesiya wawo, yaye ilizwe lawo lokuzalwa lalinguthixo wawo. Kwakunokwenziwa nasiphi na isenzo senkohlakalo xa uHitler efuna.

Ngaba Unqulo Lukwiintsuku Zalo Zokugqibela?

UStalin noHitler abazange baphumelele kwiphulo labo lokuphelisa unqulo. Kodwa sithetha nje, alusenangxaki yokucinezelwa ngurhulumente kunoko alukhathalelwe ngabantu. Oku kuguquka kweziganeko akubothusi abafundi beBhayibhile. Umpostile uPawulos waxelela uTimoti ukuba “ngemihla yokugqibela” abantu baya kuba ‘ngabathandi beziyolo kunokuba ngabathandi bakaThixo.’—2 Timoti 3:1-4.

Ngaba iBhayibhile ifundisa ukuba le “mihla yokugqibela,” enabantu abaninzi abangenamdla elunqulweni, itshayelela ukupheliswa kwalo lonke unqulo? Akunjalo. Kunokuba ixele kwangaphambili ukuphela kwalo lonke unqulo, iBhayibhile ichaza ukuba unqulo lobuxoki—olunikwe igama lokomfuziselo eliyiBhabhiloni Enkulu—luya kufikelela esiphelweni.a Incwadi yeSityhilelo ithi: “Ingelosi eyomeleleyo yaphakamisa ilitye elinjengelitye elikhulu lokusila yaza yaliphosa elwandle, isithi: ‘Ngaloo ndlela ngokugadlela okukhawulezileyo iBhabhiloni isixeko esikhulu iya kuphoselwa phantsi, ibe ayisayi kuze ifunyanwe kwakhona.’”—ISityhilelo 18:21.

Noko ke, ukutshatyalaliswa konqulo lobuxoki, akuyi kuphumela kwihlabathi elingahloneli Thixo. Ngokwahlukileyo koko, INdumiso 22:27 yaprofeta: “Ziya kukhumbula zibuyele kuYehova zonke iziphelo zehlabathi. Iqubude phambi kwakhe yonke imizalwane yeentlanga.” Khawube nombono wexesha laxa “yonke imizalwane yeentlanga” iya kumanyana ndawonye ekunquleni uThixo omnye oyinyaniso! Phantsi kolawulo loBukumkani bukaThixo, elo dinga liphawulekayo liya kuzaliseka ngokuzukileyo. (Mateyu 6:10) Xa lifika elo xesha, unqulo—unqulo lokwenyaniso—luya kuba yinto ebaluleke gqitha. Kodwa kuthekani ngoku?

Ukwanelisa Indlala Yokomoya

Indlala yokomoya exhaphake gqitha eYurophu namhlanje ifana nemeko yoBukhosi baseRoma benkulungwane yokuqala. Umbhali-mbali uWill Durant uchaza indlela amaKristu enkulungwane yokuqala ahlangabezana ngayo nendlala yokomoya ngelo xesha: “Phakathi kobuhedeni obungafundisi kuziphatha obabusifa, phakathi kobuStoyike obungenabuntu naphakathi kobuEpikure obonakeleyo, phakathi kwehlabathi elinobundlobongela, elikhohlakeleyo, elicinezelayo nelingenamilinganiselo yokuziphatha ngokwesini, phakathi kobukhosi obuzolileyo obabubonakala bungasenakufuna amandla amakhulu endoda okanye oothixo bemfazwe, obaza nendlela entsha yokuphathana kwabazalwana, ububele, intlonelo noxolo.”

Ukungaziphathi kakuhle nendlala yokomoya kubomi babantu kwixesha lethu inokwaneliswa kwangesigidimi esinamandla esifana neso sashunyayelwa ngamaKristu okuqala kubo bonke uBukhosi baseRoma. Ibe baninzi abaphulaphulayo. Abemi baseYurophu abaninzi, nangona bengatyekelanga elunqulweni ngenkangeleko yangaphandle, basavakalelwa kukuba uThixo unendima ebalulekileyo kubomi babo. Basenokuba abasayi kwiinkonzo zecawa eziqhelekileyo, kanti bambi baye bayanelisa kwenye indawo indlala yabo yokomoya.

UJuan José, ityendyana lomfana lasePalma de Mallorca, eSpeyin, wafunda kwisikolo samaKatolika waza wakhonza njengenkwenkwe esebenza esibingelelweni de waneminyaka eli-13 ubudala. Wayesiya eMthendelekweni nentsapho yakowabo ngazo zonke iiCawa, kodwa wayeka ukuya ecaweni akufikelela kwishumi elivisayo. Sasiyintoni isizathu? UJuan José uyachaza: “Ingxaki yam yayikukuba, ukuya eMthendelekweni kwakundikruqula. Ndandimcengceleza undiyakholwa. Yonke into yayibonakala iyimpinda yoko ndandikhe ndakuva ngaphambili. Ngaphezu koko, umfundisi wesiphaluka sethu wayedla ngokusiphatha rhabaxa thina makhwenkwe asebenza esibingelelweni. Yaye ndacinga ukuba iphosakele into yokuba abantu abahluphekileyo bamhlawule umfundisi ngokubaqhubela inkonzo yomngcwabo.

“Ndandisakholelwa kuThixo, kodwa ndandicinga ukuba ndinokumkhonza ngendlela endifuna ngayo ndingaphandle kwecawa. Ndikunye neqela labahlobo, ndazama ukunandipha ubomi kangangoko ndandinako. Ndingatsho ukuba ulonwabo lwaba yinto yokuqala ebomini bam.

“Kodwa xa ndandineminyaka eli-18 ubudala, ndaqalisa ukufundisisa iBhayibhile namaNgqina kaYehova. Ayeza kundinika ntoni leyo ndandingayifumananga ecaweni? Ukholo lokwenyaniso olusekelwe eBhayibhileni kungekhona izithethe ‘neemfihlelo’ endandingenakuziqonda. Noko ke, iinkolelo zam ezintsha zazithetha ukwenza iinguqulelo ezinkulu. Kunokuba ndichithe impela-veki nganye ndilungiselela amatheko kwiindawo zolonwabo zasebusuku, ndaqalisa ukuya kwindlu ngendlu ukuze ndabelane nabamelwane bam ngokholo lwam olutsha endandisandul’ ukulufumana. Ukubandakanyeka ekuncedeni abanye kwenza ubomi bam banentsingiselo. Kwiminyaka esixhenxe edluleyo, bendingumlungiseleli wexesha elizeleyo wamaNgqina kaYehova.”

Asingobantu abaselula kuphela abafuna ukwanelisa indlala yabo engokonqulo. UAntonia, umakhulu waseExtremadura, eSpeyin, wachitha phantse ubomi bakhe bonke “efuna uThixo,” njengoko echaza. Ebudeni beminyaka yakhe yeshumi elivisayo, wayesiya eMthendelekweni mihla le waza ekugqibeleni wangena kumzi woonongendi wamaKatolika, ekubeni wayekholelwa kwelokuba “ukuba uThixo wayengenakufumaneka kuloo mzi woonongendi, akanakufunyanwa ndawo.” Kodwa kwiminyaka emithathu kamva wawushiya loo mzi woonongendi, eziva ekhohlisiwe yaye engazinto ngaphezulu kunanini na ngaphambili.

Ekugqibeleni, xa wayekwiminyaka engama-50 ubudala, waba ngomnye wamaNgqina kaYehova. Uyachaza: “Ndandonwabe gqitha xa amaNgqina andityelelayo aza aphendula imibuzo yam ngokusuka kweyam iBhayibhile. Kususela oko ndathi ndaba ngomnye wamaNgqina kaYehova, ubomi bam buye banenjongo. Ndineengxaki zam, kodwa ndinokuhlangabezana nazo kuba ngoku ndimfumene uThixo oyinyaniso.”

Maninzi amava anjengala waba babini. Kuba eluchasile utyekelo lonqulo, amanani awandayo abantu anxulumana namaNgqina kaYehova yaye aye afumanisa ukuba ukuphila ngokuvisisana nokholo lwawo nokushumayela ngalo kwabanye kwenza ubomi bawo bube nentsingiselo nenjongo.

Unqulo Lokwenyaniso Lubaluleke Gqitha Kunangaphambili

Nangona siphila kwixesha laxa abaninzi beluchasile unqulo, akunakuba bubulumko ukugweba lonke unqulo njengolungafanelekanga. Enyanisweni, kule nkulungwane yama-20, abantu bayayityeshela imigidi ephuthileyo neyakudala neemfundiso ezingekho ngokwezibhalo, yaye bayakugxeka ukuya ecaweni nje kuba ufuna ukubonwa. Enyanisweni, iBhayibhile, incomela ukuba siluphephe unqulo oluhanahanisayo. Umpostile uPawulos watsho kusengaphambili ukuba “ngemihla yokugqibela,” bambi abantu baya kuba ‘nohlobo lozinikelo lobuthixo kodwa bewakhanyela amandla alo.’ Abantu abanjalo balondoloze imbonakalo yokutyekela elunqulweni, kodwa ihambo yabo iyaphikisana noko. Sifanele sisabele njani kuhanahaniso lonqulo olunjalo? UPawulos wacebisa: “Zikhwebule kwaba.”—2 Timoti 3:1, 5.

Kodwa uPawulos wakwathi “unqulo lufumana inzuzo enkulu.” (1 Timoti 6:6, New English Bible) UPawulos wayengathethi nje ngalo naluphi na uhlobo lonqulo. Igama lesiGrike eliguqulelwe apha njengelithi “unqulo” lalingueu·seʹbei·a, othetha “ukuzinikela okanye ukuhlonela uThixo ngokunzulu.” Unqulo lokwenyaniso, oluvumelana nozinikelo lobuthixo, “lunesithembiso sobomi ngoku nesobo buza kuza.”—1 Timoti 4:8.

Njengoko le mizekelo ingasentla ibonisa, unqulo lokwenyaniso lunokubenza bube nentsingiselo ubomi bethu yaye lusincede sijamelane neengxaki zethu ngenkalipho. Ngaphezu koko, unqulo lokwenyaniso luqinisekisa ikamva elingenasiphelo. Unqulo olunjalo lufuna ukuzingelwa, ekubeni siqinisekiswa ukuba ekugqibeleni luya ‘kuzalisa umhlaba.’b (Isaya 11:9; 1 Timoti 6:11) Akuthandabuzeki ukuba, ngoku lelona xesha lubaluleke gqitha ngalo unqulo oluyinyaniso kunanini na ngaphambili.

[Imibhalo esemazantsi]

[Ibhokisi ekwiphepha 10]

Ibali Lezakhiwo Ezibini

ElaseSpeyin lizaliswe zizakhiwo zonqulo, kodwa umoya wokuxhasa ukwakhiwa kwezindlu zecawa ubonakala ngathi uphelile. Ngokomzekelo, eMejorada del Campo, kumaphandle eMadrid, kwakhiwa icawa yamaKatolika ephambili. UJusto Gallego Martínez, owayesakuba yimonki elilungu lamarhamente engcwele uBenedict, waqalisa lo msebenzi kwiminyaka engama-20 eyadlulayo. Kodwa esi sakhiwo siselikhamte nje elingekagqitywa. UMartínez, ojongene nalo msebenzi wokwakha eyedwa, sithetha nje ukwiminyaka engama-60 ubudala, ngoko kubonakala kungenakwenzeka ukuba le cawe ingaze igqitywe. Noko ke, kwindawo ekwiikhilomitha ezingama-300 emazantsi kwenzeka enye into.

“Ukholo Luyazisusa Iintaba” yayiyindlela elakuchaza ngayo iphephandaba lasekuhlaleni ukwakhiwa kweHolo yoBukumkani yamaNgqina kaYehova ngeentsuku ezimbini eMartos, eJaén, eSpeyin. Eli phephandaba lasekuhlaleni labuza, “Kunokwenzeka njani, ukuba kweli hlabathi likhoyo linokuzingca, kusuke amatsha-ntliziyo kwimimandla eyahlukeneyo [yaseSpeyin] ngokungazingci ahambele eMartos ukuya kwakha esona sakhiwo sakhiwe ngokukhawuleza, ngokugqibeleleyo nangokulungeleleneyo?” Ukuphendula lo mbuzo, eli nqaku lacaphula amazwi elinye itsha-ntliziyo: “Mnye unobangela woku kukuba singabantu abafundiswa nguYehova.”

[Imifanekiso ekwiphepha 10]

Mejorada del Campo

IHolo YoBukumkani eMartos