Imbono YeBhayibhile

Ngaba AmaKristu Okwenyaniso Anokulindela Ukukhuselwa NguThixo?

EMVA kokuba ethandazile, amaKristu athabatha uhambo njengeqela elandelelana, ukuze ase izinto zokunceda kwabo akhonza kunye nabo abakummandla odlavulwe yimfazwe, apho ayesenokubulawa khona. Afika ekhuselekile apho, nto leyo eyayimangalisa gqitha imikhosi elwayo. Ngaba isithunywa sikaThixo sawakhusela?

Esinye isibini esingamaKristu esasikhonza njengabalungiseleli kangangeminyaka emininzi safa xa inqwelo-moya yantlitheka kuloo mhlaba sasihambisa kuwo ivangeli kwindlu ngendlu. Kwakutheni ukuze isithunywa sikaThixo singasikhokeli okanye salathisele loo nqwelo-moya kwenye indawo kanye ngelo xesha?—Thelekisa IZenzo 8:26.

Xa sithelekisa ezi ziganeko, sisenokubuza: Kutheni amanye amaKristu esifa ngoxa esenza ukuthanda kukaThixo, ngoxa amanye, ngokufuthi aphila phakathi kweemeko eziyingozi gqitha, esinda? Ngaba amaKristu anokulindela ukukhuselwa nguThixo, ingakumbi kule ‘mihla yokugqibela yamanqam’?—2 Timoti 3:1.

Injongo Yokukhuselwa NguThixo

UYehova uThixo uye wathembisa ukusikelela nokukhusela abantu bakhe. (Eksodus 19:3-6; Isaya 54:17) Oku wakwenza ngendlela ebalaseleyo ngenkulungwane yokuqala, xa ibandla lamaKristu lalisakhasa. Kwenzeka imimangaliso emininzi. UYesu wenza ukutya okuninzi ukuze ondle abantu abangamawaka; waphilisa lonke uhlobo lwesifo nobulwelwe, wakhupha imimoya engaphaya kwamandla omntu kwabo babeneedemon waza wavusa nabafileyo. Ngaphantsi kolwalathiso lukaThixo ibandla eliselitsha lakhula yaye laye liqina. Sekunjalo, phezu kwayo nje inkxaso kaThixo ecacileyo, amaKristu amaninzi athembekileyo afumana oko kunokubizwa ngokuba kukufa ngaphambi kwexesha.—Thelekisa INdumiso 90:10.

Khawuqwalasele imeko kaYakobi noYohane, oonyana bakaZebhedi. Benyulwe njengabapostile, bekunye noPetros, babephakathi kwabona bazalwana bakaKristu basondeleyo.a Kodwa uYakobi wabulawa njengomfeli-nkolo ngonyaka wama-44 C.E., ngoxa umzalwana wakhe uYohane waphila de kwasekupheleni kwenkulungwane yokuqala. Ngokucacileyo bobabini babesenza ukuthanda kukaThixo. Kwakutheni ukuze kuvunyelwe ukuba uYakobi afe, ngoxa uYohane waqhubeka ephila?

Ngokuqinisekileyo uThixo uSomandla wayenawo amandla okusindisa ubomi bukaYakobi. Ngokwenene, kungekudala emva kokufel’ ukholo kukaYakobi, uPetros wahlangulwa ekufeni sisithunywa sikaYehova. Kwakutheni ukuze eso sithunywa singamhlanguli uYakobi?—IZenzo 12:1-11.

Kwasetyenziswa Ukuze Kuphunyezwe Injongo KaThixo

Ukuze siqonde isizathu sokukhuselwa nguThixo simele siqonde ukuba akwenziwa nje ukuze kunike abantu ithuba lokuphila ixesha elide kodwa ukuze kukhuselwe okuthile okubaluleke ngakumbi, ukuphunyezwa kwenjongo kaThixo. Ngokomzekelo, ukuvunyelwa kwebandla lamaKristu liphela ukuba liqhubeke likho kuqinisekisiwe kuba kunxulumene ngokusondeleyo nokuzalisekiswa kwaloo njongo. Noko ke, uKristu wabaxelela ngokuphandle abafundi bakhe ukuba mntu ngamnye kubo wayenokujamelana nokufa ngenxa yokholo lwakhe. Emva kokuba ethethe oku, uYesu akazange abethelele ukuba babeya kuhlangulwa ngokungummangaliso, kodwa wathi ‘mabanyamezele kude kube sekupheleni.’ (Mateyu 24:9, 13) Isibakala sokuba abathile bakhuselwa, ngoxa abanye bengazange bakhuselwe, asibonisi ukuba uThixo uyakhetha. UThixo wayesebenzisa umntu owayekwimeko efanelekileyo yokufeza injongo yakhe, eya kuthi ekugqibeleni ibe yingenelo kuluntu lonke.

Ekubeni ukufa ngaphambi kwexesha enkonzweni kaThixo kuyinto enokwenzeka ngokwenene, amaKristu afanele abe nesimo sengqondo esilungeleleneyo nesifana nesamaHebhere amathathu athembekileyo awagwetyelwa ukufa ngenxa yokunqula uThixo. Amxelela oku ukumkani waseBhabhiloni: “Ukuba uThixo wethu esimbusayo unako, wosisindisa ezikweni elivutha umlilo, nasesandleni sakho, kumkani. Ke, ukuba akunjalo, makwazeke kuwe, kumkani ukuba asiyi kubabusa oothixo bakho, asiyi kuqubuda kumfanekiso wegolide owumisileyo.”—Daniyeli 3:17, 18.

UYehova wabulondoloza ubomi bukaPetros noYohane ngenxa yendima yabo ebalaseleyo ekuphunyezweni kwenjongo yakhe. UPetros wasetyenziselwa ukuba ‘omeleze’ ibandla ngokwenza umsebenzi wokwalusa, owawuquka ukubhalwa kweencwadi ezimbini eziphefumlelweyo zeBhayibhile. (Luka 22:32) UYohane wabhala iincwadi ezintlanu zeBhayibhile yaye ‘wayeyintsika’ kwibandla lokuqala.—Galati 2:9; Yohane 21:15-23.

Ixesha nendlela kanye uYehova aya kungenelela ngayo ekukhuseleni ubomi babakhonzi bakhe ayinakuchazwa kusengaphambili. Ekuphela kwento enokuthethwa ngokuqiniseka yeyokuba uKristu wathembisa ukuba kunye nabafundi bakhe “yonke imihla de kube sekuqoshelisweni kwenkqubo yezinto.” (Mateyu 28:20) Ngokukhethekileyo, uya kuba ‘kunye nathi’ ngokwalathisa umsebenzi wokushumayela ngezithunywa zezulu. (Mateyu 13:36-43; ISityhilelo 14:6) Ngaphandle kwale miqondiso icacileyo, asinakulindela ukwazi kanye indlela uncedo lukaThixo oluya kubonakaliswa ngayo okanye sazi ukuba ngubani onokukhuselwa nguThixo. Kuthekani ukuba umKristu uvakalelwa kukuba uye wakhuselwa waza wakhokelwa nguThixo? Ekubeni oku kungenakungqinwa kuyinyaniso okanye kungeyiyo, akukho mntu unokugweba amabango anyanisekileyo aloo mntu.

Ngaba UThixo Akanaluvelwano?

Ngaba isibakala sokuba uThixo ekuvumela ukufa kwamaKristu sibonisa ukuba ngandlel’ ithile akanaluvelwano? Nakanye. (INtshumayeli 9:11) UYehova usebenzela ukulondoloza ubomi bethu kungekuphela nje kangangeminyaka embalwa okanye amashumi eminyaka kodwa ngonaphakade. Ekwindawo yakhe ephakamileyo, uThixo ulawula iziganeko ngenxa yentlalo-ntle kanaphakade yomntu ngamnye omthandayo okanye osondela kuye. (Thelekisa uMateyu 18:14.) Ukuzaliseka kwenjongo yakhe kuya kuthetha ukususwa ngokupheleleyo kwayo nayiphi na into esiye satyhubela kuyo kule nkqubo yezinto—kuquka ukufa. Kangangendlela ezintsonkothe nezifezeke ngayo iinkqubano zikaThixo, umpostile uPawulos washukunyiselwa ukuba adanduluke esithi: “Owu hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe!”—Roma 11:33.

Ekubeni kungekho nto inokusahlula kuthando lukaThixo, mKristu ngamnye akafanele azibuze ukuba ‘Ngaba ndiya kukhuselwa na nguThixo?’ kodwa umele azibuze ukuba ‘Ngaba uYehova uyakholiswa ndim?’ Ukuba kunjalo uya kusinika ubomi obungunaphakade—kungakhathaliseki oko kwenzekayo kuthi kule nkqubo yezinto. Xa kuthelekiswa nokuphila ngonaphakade ubomi obufezekileyo, nakuphi na ukubandezeleka—kuquka ukufa—kule nkqubo kuya kubonakala ‘kukokomzuzwana yaye kukhaphukhaphu.’—2 Korinte 4:17.

[Umbhalo osemazantsi]