Imbono YeBhayibhile
Ngaba AmaKristu Afanele Alindele Ukukhuselwa NguThixo?
Ngokufuthi iBhayibhile ibhekisela kwindlela uThixo akwazi ngayo ukukhusela abakhonzi bakhe kwiingozi. UKumkani uDavide wathi: “Ndihlangule, Yehova, kubo abantu ababi; ngamana ungandilondoloza nasemntwini wezenzo zogonyamelo.” (INdumiso 140:1) Namhlanje abakhonzi bakaThixo abaninzi abaye bajamelana nogonyamelo, ulwaphulo-mthetho okanye iintlekele zemvelo baye babhungca ekufeni okanye engozini. Bambi baye bazibuza enoba uThixo uye wabanceda ngendlela engummangaliso ngezo zihlandlo kusini na, ingakumbi njengoko zikho izihlandlo eziliqela apho abantu aboyika uThixo baye behlelwa ziintlekele ezinkulu, kwanokufa ngendlela ebuhlungu.
NGABA uYehova uThixo ukhusela abantu abathile kwiingozi kodwa angenjinjalo kwabanye? Ngaba sifanele silindele ukuhlangulwa ngokungummangaliso xa sijamelene nogonyamelo kunye neentlekele zanamhlanje?
Ukuhlangulwa Ngokungummangaliso Okubhalwe EBhayibhileni
IBhayibhile iqulethe iingxelo ezininzi apho uThixo aye wangenelela ngokungummangaliso ngenxa yabakhonzi bakhe. (Isaya 38:1-8; IZenzo 12:1-11; 16:25, 26) Kwakhona, iZibhalo zikwathetha ngezinye izihlandlo apho abakhonzi bakaYehova bengazange bahlangulwe kwintlekele. (1 Kumkani 21:1-16; IZenzo 12:1, 2; Hebhere 11:35-38) Ngokuqinisekileyo ke ngoko, uYehova unokugqiba ukuba amkhusele uthile ngenxa yesizathu okanye injongo ethile nanini na ekhetha ukwenjenjalo. Ngenxa yoko, xa amaKristu athile engakhange ahlangulwe kwizilingo, akafanele agqibe kwelokuba uThixo uwashiyile. Simele siyivume inyaniso engenakuphikwa yokuba izinto ezimbi ziza kwenzeka nakubakhonzi bakaYehova abathembekileyo. Kutheni kunjalo nje?
Isizathu Sokuba Izinto Ezimbi Zehlele Abakhonzi BakaThixo Abathembekileyo
Esinye isizathu kungenxa yokuba sonke sazuza isono nokungafezeki njengelifa kuAdam noEva. Ngoko sijamelana neentlungu, ukubandezeleka nokufa. (Roma 5:12; 6:23) Esinye isizathu kungenxa yokuba siphila kwimihla yokugqibela. IBhayibhile ithi abantu abaphila kumhla wethu ngabantu “abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga.” (2 Timoti 3:1-5) Ubungqina boku sibubona kwiziganeko ezixhaphakileyo zokudlwengulwa, ukuqweqwediswa, ukugwintwa kwabantu nezinye iintlobo zolwaphulo-mthetho ezimanyumnyezi.
Abakhonzi bakaThixo abathembekileyo abaninzi baphila baze basebenze nabantu abanogonyamelo yaye maxa wambi baba ngamaxhoba ogonyamelo lwabo. Sinokuzifumana sikwimeko ebeka ubomi esichengeni ngenxa nje yokuba sikwindawo embi ngexesha elibi. Ngaphezu koko, sibubona kakuhle ubunyani bamazwi athethwa nguSolomon athi “bonke behlelwa lixesha nasisihlo esingenakubonwa kwangaphambili.”—INtshumayeli 9:11.
Ukongezelela, umpostile uPawulos wathi amaKristu aza kutshutshiswa ngenxa yokuba enqula uThixo. Wathi: “Enyanisweni, bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.” (2 Timoti 3:12) Kwiminyaka yakutshanje oku kuye kwangqineka kuyinyaniso kumazwe aliqela.
Ngoko ke, abantu abamoyikayo uThixo abagonywanga kolu gonyamelo, ulwaphulo-mthetho, iintlekele zemvelo okanye ukufa ngengozi. USathana uye wazama ukusasaza into yokuba uYehova ubakhusela ngendlela ekhethekileyo abakhonzi bakhe ukuze bangahlelwa ngamashwa obu bomi. (Yobhi 1:9, 10) Oku akunjalo. Noko ke, sinokuqiniseka ukuba nangona uYehova engasihlanguli ngokungummangaliso kwimeko ethile, uyabakhusela abantu bakhe.
Indlela UYehova Abakhusela Ngayo Abantu Bakhe Namhlanje
Esebenzisa iLizwi lakhe, uYehova unikela ukhokelo lobuthixo olukhusela abantu bakhe. Ulwazi ngezinto zokomoya nangeBhayibhile lunokubangela senze izigqibo ezifanelekileyo size silungelelane engqondweni, nto leyo enokusinceda siphephe ukwenza iimpazamo ezingeyomfuneko size senze izigqibo zobulumko. (INdumiso 38:4; IMizekeliso 3:21; 22:3) Ngokomzekelo, ukuthobela icebiso leBhayibhile ngokuziphatha okuhle ngokwesini, ukubawa, umsindo kunye nogonyamelo kuye kwasindisa amaKristu kwiintlekele ezininzi. Kwakhona, ngokunganxulumani ngokusondeleyo nabantu abenza izinto ezimbi, akunakufane kwenzeke ukuba sibe kwindawo enokuba nentlekele—ukuba kwindawo embi ngexesha elibi. (INdumiso 26:4, 5; IMizekeliso 4:14) Abo baphila ngemilinganiselo yeBhayibhile banandipha ubomi obonwabisayo, ngokufuthi obubangela ukuba bahlale besempilweni engqondweni nasemzimbeni.
Okona kukhuthazayo kukwazi ukuba nokuba uThixo unokuvumela ukuba izinto ezimbi zenzeke, uya kunika abakhonzi bakhe amandla afunekayo ukuze bakwazi ukunyamezela. Umpostile uPawulos usiqinisekisa ngelithi: “UThixo uthembekile, yaye akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza nendlela yokuphuma ukuze nikwazi ukusinyamezela.” (1 Korinte 10:13) Kwakhona iBhayibhile ithembisa ‘ngamandla angaphaya koko kuqhelekileyo’ ukuze asincede sinyamezele iintlungu ezisehlelayo.—2 Korinte 4:7.
UThixo Wenza Kanye Njengoko Ethanda
Ngaba amaKristu afanele alindele ukuba uThixo awahlangule ngokungummangaliso ngalo lonke ixesha kuvela intlekele? Ingxelo yeBhayibhile ayiyixhasi ingcamango enjalo.
Kakade ke, uYehova uThixo unokukhetha ukungenelela ngokungqalileyo ngenxa yakhe nawuphi na umkhonzi wakhe. Yaye ukuba nabani na ucinga ukuba uye wasinda engozini ngenxa yokungenelela kukaThixo, akafanele agxekwe. Kodwa xa uYehova ekhetha ukungangeneleli, oku akufanele kugqalwe njengophawu lokuba akanelisekanga nguloo mntu.
Ngamana singanethemba lokuba phantsi kwazo naziphi na iimvavanyo okanye ubunzima esijamelana nabo, uYehova uya kubakhusela abakhonzi bakhe abathembekileyo, mhlawumbi ngokuphelisa loo meko, ngokusinika amandla okunyamezela okanye, ukuba siyafa, ngokusivusela kubomi obungunaphakade kwihlabathi lakhe elitsha.—INdumiso 37:10, 11, 29; Yohane 5:28, 29.