Imbono YeBhayibhile
Ngaba Ukungqungqa Kufanelekile KumaKristu?
“ANDINAKUYIBUKELA le nto. Kuza kufuneka ndiphume phandle,” watsho njalo omnye umfana esebezela umfazi wakhe njengoko wayephakama esihlalweni ephuma kwelo gumbi ukuze abethwe ngumoya opholileyo wasebusuku. Wayeneentloni.
Yena nomfazi wakhe babemenywe ngabahlobo babo kwitheko lokuzonwabisa. Abamkeli-zindwendwe bagqiba kwelokuba kubekho izinto-yinto zokonwabisa ezaziquka amabhinqa amathathu awayengqungqa. Bonke abanye ababukeli babengabonakali bephazamisekile. Ngaba lo mfana wayengqongqo ngokugqithiseleyo? Ngaba aba babengqungqa babengabonakalisi nje kuphela iimvakalelo zabo yaye benandipha inkululeko yokungqungqa? Makhe sizame ukuwuqonda umngqungqo ngokwembono yamaKristu.
Ukungqungqa Lunxibelelwano
Enye yeendlela abanxibelelana ngazo abantu zizimbo zomzimba neentshukumo. Ngokomzekelo, xa zikwilizwe lasemzini, iindwendwe ezininzi ziye zamangaliswa kukufumanisa ukuba intshukumo ebeziyijonga njengemsulwa inentsingiselo eyahlukileyo apho—mhlawumbi engathandekiyo. Owayesakuba ngumvangeli wasemazweni kwiiSolomon Islands, eMalaysia, nasePapua New Guinea wagqabaza wathi: “Kweminye imimandla iintshukumo ezithile zomzimba zinentsingiselo engokwesini. Ngokomzekelo, xa ibhinqa lihleli emgangathweni, kujongwa njengento engafanelekanga ngendoda ukudlula ngaphezu kwemilenze yalo. Ngokufanayo, akubobulumko ngebhinqa ukuhamba phambi kwendoda ehleli emgangathweni. Kwezi meko zombini kudluliselwa iintsingiselo ezingokwesini ngokukhawuleza.” Enoba besiyiqonda okanye besingayiqondi, iintshukumo zethu zomzimba zinentsingiselo ethile. Ngoko ke akumele kusimangalise ukuba ukutyhubela imbali ukungqungqa bekusoloko kusetyenziswa njengendlela yonxibelelwano.
Iimvakalelo ezininzi zinokubonakaliswa ngomngqungqo—ukususela kuvuyo nokuchwayita ngenxa yesithethe esithile esisisikhumbuzo sonqulo. (2 Samuweli 6:14-17; INdumiso 149:1, 3) IThe New Encyclopædia Britannica ithi: “Umntu ongqungqayo unxibelelana nababukeli ngeendlela ezimbini ezahlukahlukeneyo, ngeemvakalelo ezibonakala ngendlela oshukuma ngayo umzimba wakhe nasebusweni bakhe okanye ngolwimi oluntsonkothileyo lokulinganisa nezimbo zomzimba.” Kweminye imingqungqo unxibelelwano lunokubonakala lucace okwekat’ emhlophe ehlungwini. Kwezinye iintlobo zemingqungqo, oko kuthethwayo kunokuqondwa ngabambalwa abanolwazi kuphela. Ngokomzekelo, kumdaniso weballet yohlobo lweklasiki isandla esibekwa entliziyweni sibonisa uthando, kanti ukwalatha kumnwe wesine wesandla sasekhohlo kuthetha umtshato. Kumculo weopera waseTshayina ukuhamba uzunguleza kubonisa uhambo, kanti ukujikeleza iqonga ngoxa bemise nkqo isabhokwe kubonisa ukukhwela ihashe; indwe emnyama exhonywe ngokunqamleze iqonga ibonisa uqhwithela, ngoxa eluhlaza ngokwesibhakabhaka ibonisa impepho. Ngaloo ndlela kwiintshukumo zomngqungqo nezimbo zomzimba, umzimba uyanxibelelana. Kodwa ngaba oko ukudluliselayo kusoloko kufanelekile?
Ukungqungqa—Okufanelekileyo Nokungafanelekanga
Ukungqungqa kunokuba luhlobo oluyolisayo lokuzonwabisa nomthambo. Kusenokuba yindlela enyulu nekhululekileyo yokuvakalisa okuthile, ukubonisa iimvakalelo zovuyo ngoyolo lokuphila okanye uxabiso ngokulunga kukaYehova. (Eksodus 15:20; ABagwebi 11:34) Yimbi imingqungqo yamaqela nemingqungqo yesithethe inokunandipheka. UYesu, kumzekeliso wakhe wonyana wolahleko, wakwabhekisela kwiqela elalingqungqa, ekubonakala ukuba laliqeshiwe, njengenxalenye yemibhiyozo. (Luka 15:25) Ngoko ke, ngokucacileyo, iBhayibhile ayikuchasi ukungqungqa ngokwako. Noko ke, iyalumkisa nxamnye nokuvuselelwa kweengcinga neminqweno ephosakeleyo. Kungenxa yesi sizathu lento iindidi ezithile zokungqungqa zisenokuba zezingafanelekanga, zide zibe yingozi kubani ngokomoya. (Kolose 3:5) Ukususela ngamaxesha amandulo ukungqungqa kuye ngezinye izihlandlo kwaba kokuvuselelayo ngokwesini yaye kuye kwasetyenziselwa iinjongo eziyingozi.—Thelekisa uMateyu 14:3-11.
UTshaba lwethu, uSathana uMtyholi, luyazi ukuba iintshukumo zomdaniso neengcinga ezingafanelekanga sisixhobo salo esinamandla. (Thelekisa uYakobi 1:14, 15.) Uwazi kakuhle umdla ongokwesini obakho xa umzimba ushukuma ngendlela evuselela iingcinga ezingokwesini. Umpostile uPawulos walumkisa ngelokuba uSathana uzimisele ukusilukuhla ukuze ‘iingqondo zethu zonakaliswe zisuke ekunyanisekeni nakubunyulu obufanele uKristu.’ (2 Korinte 11:3) Khawuthelekelele indlela uMtyholi ebeya kuvuya ngayo ukuba besiya kuthi ngokubukela okanye ngokuba nenxaxheba kumngqungqo ongafanelekanga sivumele iingqondo zethu zizaliswe ziingcinga ezingafanelekanga. Ebeya kuvuya ngakumbi ukuba besingenakukwazi ukuyilawula iminqweno yethu size sizingenise kwimiphumo ebuhlungu yehambo yokuziphatha. Uye wasebenzisa intshukumo nomngqungqo ngaloo njongo kwixa elidluleyo.—Thelekisa iEksodus 32:6, 17-19.
Indlela Yokuqonda Ofanelekileyo Nongafanelekanga
Kuyabonakala ukuba, enoba umngqungqo wenziwa ngamaqela, zizibini, okanye ngumntu omnye, ukuba iintshukumo zivuselela iingcinga ezingenyulu kuwe, ngoko loo mngqungqo uyingozi kuwe, nangona kusenokungabi njalo kwabanye.
Bambi baye baphawula ukuba kwimingqungqo emininzi yala maxesha, amaqabane akabambani kwaukubambana. Noko ke, ngaba ngokwenene imbambano isekubambaneni? IBritannica iwushwankathela lo mbandela ngokuthi “Umphumo uyafana—luyolo olufunyanwa ekungqungqeni nasekuvuselelekeni kwenkanuko yesini yeqabane, enoba libanjiwe okanye lijongiwe nje.” Ngaba ‘ukuvuseleleka kwenkanuko yesini yeqabane’ kububulumko ngaphandle kweqhina lomtshato? Akunjalo ngokutsho kwamazwi kaYesu athi “wonk’ ubani othi gqolo ekhangela umfazi khon’ ukuze abe nenkanuko ngaye sele ekrexezile naye entliziyweni yakhe.”—Mateyu 5:28.
Ukugqiba enoba uza kungqungqa okanye akunjalo lukhetho lwakho. Ukuzibuza le mibuzo ilandelayo kunokukunceda wenze isigqibo sobulumko. Yintoni injongo yalo mngqungqo? Waziwa njengonjani? Yintoni ekhuthazwa ziintshukumo zalo mngqungqo? Ziziphi iingcinga neemvakalelo ozivuselelayo kum? Yiyiphi iminqweno eyivuselelayo kwiqabane lam okanye kwabo babukeleyo? Ngokuqinisekileyo, ubani ufanele asithobele isazela sakhe, njengokuba yenzayo indoda etshatileyo eselula kwintshayelelo yethu, kungakhathaliseki oko bakwenzayo abanye.
IBhayibhile ibonisa ukuba uMdali ufuna sinandiphe izipho ezibubuhle, isingqi nobubele. Ewe, zinandiphe—kodwa khumbula ukuba xa ungqungqa umzimba wakho uyathetha. Khumbula ukhokelo lukaPawulos kwabaseFilipi 4:8: “Naziphi na izinto eziyinyaniso, naziphi na izinto ezizezenkxalabo enzulu, naziphi na izinto ezibubulungisa, naziphi na izinto ezinyulu, naziphi na izinto ezithandekayo, naziphi na izinto ekuthethwa kakuhle ngazo, nasiphi na isidima esikhoyo yaye nayiphi na into ekhoyo efanelwe yindumiso, qhubekani nizigqala ezi zinto.”
[Inkcazelo Ngomfanekiso okwiphepha 30]
Picture Fund/Courtesy, Museum of Fine Arts, Boston