Safumana Into Exabiseke Ngakumbi

KUBALISA UFRANCIS ROSARIO DE PÁEZ

Ngonyaka we-1988 mna nabantakwethu namanye amaqela omculo, sasidla ngokucula phambi kwenginginya yabantu eMadison Square Garden, ekwisiXeko saseNew York. Iqela lethu, elalibalasele ngenxa yomdaniso endandiwenza, lamkelwa ngehlombe. Ngoxa sasisebancinane, sancedwa nguTata ukuze siphumelele.

E YIMVUMI yena kuqala, utata waphawula ukuba abantakwethu abasixhenxe abadala kunam babenesiphiwo sokucula. Ngoko ke, wathengisa indlu yasekhaya waza wathenga izixhobo zomculo nezaziza kubanceda ukuze bakwazi ukuba neqela lomculo. Ngelo xesha ndandisengumntwana, ndisandul’ ukuzalwa ngonyaka we-1966. Ngelo xesha, intsapho yasekhaya yayihlala kwidolophu yaseHigüey kwiDominican Republic.

Abantakwethu baqala ukucula phambi kwenginginya yabantu ngonyaka we-1978 kwiholo yedolophu yaseHigüey. Emva koko baya kucula kwikomkhulu lelo lizwe, eSanto Domingo. Baqalisa ukudlala nokucula ngohlobo olutsha lwemerengue yaye oko kwaphumela ekubeni baziwe ngokubanzi.a Eli qela lalisaziwa njengeLos Hermanos Rosario (Oonyana bakwaRosario).

Ndandifuna ukucula kunye nabantakwethu, ekubeni ndandinqwenela ukuba ngumdanisi owaziwayo. Kwelinye itheko umntakwethu uPepe, oyena uphambili kweli qela, wandibiza ukuba ndize kucula nabo, esithi: “UFrancis ngoyena mncinane koodadewethu, yaye uyakwazi ukudanisa.” Ababekho bayithanda indlela endandidanisa ngayo. Ndisebenzisa elo thuba, ndaxelela uPepe ukuba ndifuna ukudanisa ngaphambi kweqela labo. Ngoko ke, xa ndandineminyaka eli-16 ubudala ndaqalisa ukudanisa nanini na iLos Hermanos Rosarios icula.

Ukuduma Kweqela Lethu

Ngaphambi koku, kwakukho iimvumi ezibhinqileyo namaqela emerengue kodwa akuzange kubekho bhinqa lidanisa phakathi kweqela lamadoda. Ndaqamba uhlobo oluthile lomngqungqo oluhambisana nomculo owawusetyenziswa. Ekubeni indlela endidanisa ngayo yayisele isaziwa, yayibizwa ngokuba yi-a lo Francis Rosario.

Sasinengoma yemerengue eyayibizwa ngokuba yi-“Cumandé,” amanye amazwi aloo ngoma ayesithi: “Y ahora todo el mundo como Francis Rosario” (Yaye bonke abantu mabadanise njengoFrancis Rosario). Ngoko ke abantu bebeye balinganise indlela endidanisa ngayo. Maxa wambi babesuka nje bahlale phantsi emgangathweni babukele mna kunokuba badanise. Xa kubhengezwa iqela lethu bekuye kusetyenziswe ifoto yam. Bonke abantu babesazi ukuba iLos Hermanos Rosario iza kuba nekonsathi.

Emva kokuba ndaqalisa ukudanisa nabantakwethu, kongezeleleka ezinye iimvumi kwiqela lethu, kuquka oonyana abathathu bakwaPáez. Omnye wabo, uRoberto nowayedlala ixilongo, kamva waba ngumyeni wam. Oonyana bakwaPáez baqalisa ukuzuza kwimpumelelo yeqela lethu. ILos Hermanos Rosario yaqalisa ukufumana izimemo ezininzi zokuya kucula kumabonwakude eSanto Domingo, nokwenza iikonsathi nakwamanye amazwe.

Ngowe-1988 satyelela eUnited States naseKhanada. Enye indawo esacula kuyo yileyo bendisele ndiyikhankanyile eMadison Square Garden. Amaqela amaninzi aziwayo emerengue ayecula apho, yaye iqela lethu lelona lathandwayo ngabantu. Emva kokuba sicule apho, abaququzeleli bomnyhadala babelungiselela ukuba sicule ekugqibeleni. Kunanini na ngaphambili, babesanda abantu ababethanda umdaniso weLos Hermanos Rosario. Lalisothusa indlela elalisanda ngayo inani labantu ababethenga iikhasethi zomculo wethu.

Satyelela nakumazwe aphesheya, njengeKholombiya, iEcuador, iPanama, iPuerto Rico, iCuraçao, iSpeyin, iJamani, namanye. Kungabanga thuba lide, saba lelona qela lidumileyo eLatin America. Umdaniso, iqonga, iimpahla, nokulungisa ubuso yayizezona zinto zazibalulekile ebomini bam.

Ngaphambi kokuba nditshate, ndandidla ngokuthi ukuba indoda ethile inomdla kum kodwa ibe ingakuthandi ukudanisa ndandinokuyishiya ngaphambi kokuba mna ndiyeke ukudanisa. Noko ke, isimo sam sengqondo ngokuphathelele izinto ezibalulekileyo ebomini kungekudala sasiza kutshintsha.

Ukuqonda Ukubaluleka Kwezinto Zokomoya

Olu tshintsho luqale ngowe-1991 xa sasityelele kwiiCanary Islands. Sasisandul’ ukutshata noRoberto. Umkhuluwa wakhe, uFreddy, naye owayecula kweli qela lethu, wayefunda iBhayibhile kunye namaNgqina kaYehova yaye wayesoloko eneempapasho zawo.

Ngenye imini ndabona incwadi ethi Unokuphila Ngonaphakade KwiParadisi Esemhlabeni kwigumbi likaFreddy yaye ndaqalisa ukuyifunda. Ndaba nomdla kwisahluko esithi “Isihogo-Ngaba Sikho Ngokwenene?” Into eyabangela ukuba ndibe nomdla kuso kukuba uMama wayedla ngokuthi umntu owenza izinto ezimbi uza kutsha esihogweni. Ngoko ndandisoyika isihogo.

Emva kweeveki ezimbalwa, ngoxa sasikwiiCanary Islands, ndaphunyelwa sisisu. Xa bandisa esibhedlele, ndacela uRoberto ukuba andibolekele kuFreddy laa ncwadi ndandiyibone egumbini lakhe. Ndandifuna ukuyifunda ngoxa ndichacha, yaye ndandiyithanda le ncwadi. Phakathi kwezinye izinto endazifundayo kuyo kukuba, xa iBhayibhile ithetha ngesihogo ibhekisela kwingcwaba nje eliqhelekileyo, yaye ayizange ithi qatha nokuthi qatha entliziyweni kaYehova into yokuthuthumbisa abantu. (Yeremiya 7:31) Ndavuya ndakuva ukuba iBhayibhile ifundisa ukuba abafileyo abazi nto konke konke.—INtshumayeli 9:5, 10.

Ekubuyeleni kwethu eDominican Republic, uFreddy wasithumelela elinye iNgqina likaYehova. Lasichazela ngethemba eliseBhayibhileni lobomi obungunaphakade emhlabeni oyiparadesi, yaye oku kwamenza wanomdla umyeni wam. (INdumiso 37:29; Luka 23:43) Sacela ukuqhutyelwa isifundo seBhayibhile.

Ukutshintsha Indlela Yokuphila Nokuqonda Izinto Ezibalulekileyo

Njengokuba ndandihambela phambili elwazini lweBhayibhile, indlela endandiwujonga ngayo lo msebenzi endiwuthanda kangaka yaqalisa ukutshintsha. Indlela endandicinga ngayo yaqalisa ukuvisisana nemigaqo yeBhayibhile. (Roma 12:2) Ndandidla ngokuzibuza: ‘Ndingadanisa njani ngale ndlela babe bonke aba bantu bendibukele? Le asiyondlela endifuna ukuphila ngayo.’ Ndathandaza kuThixo ndathi: “Nceda undikhuphe kule meko ndikuyo.” Ndathetha nomyeni wam ngendlela endandivakalelwa ngayo, kwaye naye wayevakalelwa ngendlela efanayo. Wathi: “Ungazikhathazi Sithandwa. Ukuba unokuqala uyeke, nam ndiza kulandela.”

Ndaphinda ndakhulelwa, ngenxa yoko ndandingasakwazi ukudanisa, yaye oku kwandinika amathuba angakumbi okuya kwiintlanganiso zebandla kwiHolo yoBukumkani. Oko kwasomeleza noRoberto, njengokuba naye wayesiya, yaye kwasenza sakuqonda ukuxabiseka kokuhlanganisana nabantu bakaYehova. Saqonda ukuba ukuze siqhubeke sisenza inkqubela ngokomoya, kufuneka sifunde size sikhuthazwe ziintlanganiso zamaKristu. (Hebhere 10:24, 25) Naxa sisebenza ngaphandle kweDominican Republic, sasiyikhangela iHolo yoBukumkani size siye ezintlanganisweni.

Emva kokuba ndibelekile, ndabuyela emsebenzini, kodwa ndandingasenamdla. Kwakubonakala ukuba nditshintshile, yaye oonondaba baqalisa ukundigxeka. Babedla ngokundibuza: “Kutheni ungasadanisi ngendlela owawuqhele ukudanisa ngayo?” Ndaqhubeka ndithandaza kuYehova ukuba andincede, nokuze ndingaxabani nabantakwethu. Ndandingomnye wabaphathi beli qela, yaye ndandingafuni ukuba sixabane.

Ndaphinda ndakhulelwa, ndaza ndaxelela uRafa, owayengumalathisi weqela lethu emva kokufa komntakwethu uPepe, ukuba ndifuna ukuchitha ixesha elingakumbi nabantwana bam, ngoko andizi kubuyela emsebenzini. Wathi mandenze loo nto ndicinga ukuba ifanelekile. Akukho nomnye kubantakwethu owandichasayo kuba ndifunda iBhayibhile. Ndikuxabisa kakhulu oko.

Ubomi Obutsha Bokukhonza UYehova

Ngonyaka we-1993, emva kokuchitha iminyaka elishumi neli qela, ndayeka ukudanisa ndaza ndazahlulela ngokupheleleyo kuYehova. Ndaba ngumvakalisi weendaba ezilungileyo zoBukumkani bukaThixo yaye emva kokuba uRoberto elishiyile eli qela, sabhaptizwa ngonyaka we-1994. (Mateyu 24:14) Bobabini uFreddy noJulio, abanye abakhuluwa bakaRoberto, baba ngamaNgqina, njengoManuel Pérez, omnye owayelilungu leli qela. Bonke basakhonza uYehova ngokuthembeka nanamhlanje.

Abantu abaninzi babengasiqondi isizathu sokuba ndiyeke umsebenzi endandiwuthanda kangaka. Abanye bavakalelwa ngendlela awayevakalelwa ngayo umvelisi wenkqubo kamabonwakude kwilizwe lethu, owathi yintabatheko nje eza kuphinda iphele. Wathi: “Njengezinye iimvumi, uza kuphinda abuye.” Kodwa loo nto ayizange yenzeke. Ndandizinikele ngokupheleleyo ekukhonzeni uYehova.

Ngoku sinabantwana abathathu: uKatty, uRoberto, no-Obed. Siyazama ukubafundisa ukuba ezona zinto zibalulekileyo ebomini zizinto zokomoya kungekhona izinto eziphathekayo. Ngenxa yamava esinawo siyakwazi ukubalumkisa ngempembelelo elahlekisayo yehlabathi, nokubanika ukhokelo olululo ebomini. Isifundo sentsapho seBhayibhile seeveki ngeeveki siye saluncedo kakhulu, sisenza sihlale simanyene kwihlabathi apho iintsapho ziziintlaba-zahlukane.

Siye sazama ukubafundisa abantwana bethu ukuba bamgqale uYehova njengomntu wokwenene abanokuthembela kuye. (IMizekeliso 3:5, 6; Hebhere 11:27) Kwakhona siye sababonisa ukubaluleka kokuya nokuba nenxaxheba ezintlanganisweni. Ukubona abantwana bethu bekhulela enyanisweni sisipho esixabisekileyo. Kwiminyaka emibini edluleyo, bendinguvulindlela ongumncedani, indlela amaNgqina kaYehova ababiza ngayo abo bachitha iiyure ezingama-50 okanye ngaphezulu nyanga nganye bethetha nabanye ngeenkolelo zabo ezisekelwe eBhayibhileni. Yaye kangangeminyaka eliqela umyeni wam ebengumdala webandla.

Ndisayithanda imerengue. Kodwa ngelishwa, imerengue yanamhlanje yahluke kakhulu kuleyo yexesha lethu. Yayikade indilisekile. Ngoku, ukuze ufumane umculo wemerengue ofanelekileyo kufuneka uwukhethe kakuhle.

Ukubalasela Kokukhonza UYehova

Ihlabathi lithembisa izinto ezininzi, kodwa umntu ufanele ajonge ngaphaya kwezo zinto. Oku kukwanjalo nangomculo, othi xa uwujonga ngaphandle ukhangeleke ubangel’ umdla kwaye ungeyongozi. Kanti akunjalo. Iimvumi ezininzi zisebenzisa iziyobisi yaye ziziphethe kakubi. Ukucula phambi kwenginginya kubeka umntu esichengeni sokunxulumana nabantu abaphilela unamhlanje nabangenasazela.—1 Korinte 15:33.

Siye sabona ukuba eyona nto ibhetele nabani na anokuyenza kukukhonza uYehova. Ndikhumbula ndibuyela ehotele emva komnye weyona minyhadala yethu eyayimikhulu, ndandivakalelwa kukuba ubomi abunanjongo. Ngoku ndiyaqonda ukuba kungenxa yokuba sasingayanelisi eyona ntswelo ibalulekileyo, intswelo yethu yokomoya.—Mateyu 5:3.

Ngoku eyona nto ibalulekileyo ebomini bethu kukukholisa uMdali wethu, ingakumbi ngokushumayela nokufundisa iindaba ezilungileyo zoBukumkani. (Mateyu 24:14; IZenzo 20:35) Ukwenza oko kusenza njengentsapho sizive sonwabile kwaye sanelisekile. Enyanisweni sinombulelo ngokuba phakathi kwabantu bakaThixo nokuba nabahlobo bokwenene—abazalwana noodade—esinethemba elivuyisayo lobomi obungunaphakade kwihlabathi elitsha likaThixo.—Marko 10:29, 30; 2 Petros 3:13; ISityhilelo 21:3, 4.

Sasifumana imali eninzi ngomculo. Kodwa ngokwazi uThixo, uYehova, siye safumana ubutyebi bokomoya obunexabiso elingaphezu kwabo nabuphi ubutyebi bezinto eziphathekayo. Siyavuya kuba sikhonza uThixo onenjongo, onoyolo nosimema ukuba sikholose ngaye! (INdumiso 37:3) Seyiseke ngokupheleleyo ukuba sifumene into ebhetele kakhulu kunodumo nobutyebi bezinto eziphathekayo, yaye sithandazela ukuba uYehova asincede thina nentsapho yethu ukuba senze ukuthanda kwakhe ngonaphakade.

[Umbhalo osemazantsi]

[Umfanekiso okwiphepha 29]

Ndikunye namanye amalungu eqela lethu ngoxa ndandisadanisa

[Umfanekiso okwiphepha 29]

Sasicula eNew York City, malunga nowe-1990

[Umfanekiso okwiphepha 31]

Ngaphambi kweHolo yoBukumkani

[Umfanekiso okwiphepha 31]

Umfanekiso omncinane: Ebudeni besifundo seBhayibhile sentsapho