Akwaba Besinokufumana Umoya Omtsha!
NGUMBHALELI KAVUKANI! EBRITANI
XA UPHEFUMLA, ngaba usezela umoya omtsha? Ugqirha ocatshulwe kwiThe Times yaseLondon uthi, ungcoliso lomoya lwanamhlanje “lulutshaba olukhulu kunokutshaya.” ENgilani naseWales, umoya ongcolileyo ubulala abantu abaqikelelwa kuma-10 000 nyaka ngamnye. Ehlabathini lonke, ingakumbi kwizixeko ezikhulu, le meko imandundu.
Abaninzi babek’ ityala imizi-mveliso eyenza iinqwelo-mafutha ngokungcolisa umoya. Ukuze kuncitshiswe igesi eyingozi ephuma kwiinqwelo-mafutha, kumazwe amaninzi iinqwelo-mafutha ezintsha ziza sele zifakelwe izixhobo ezihluza umoya eziwukhuphayo nezinciphisa ungcoliso. Iihydrocarbon ezikwiigesi eziphuma kwiinqwelo-mafutha ziye zehla zaya kutsho kwi-12 ekhulwini kunomlinganiselo wowe-1970, yaye kukwanjalo nangomlinganiselo weenitrogen oxide nekharbon monokside. Iintsana ezikhwele kwiinqwelwana zichanabeka ngokukhethekileyo ngenxa yokuba zikumlinganiselo iinqwelo-mafutha ezikhupha kuwo umsi. Kodwa ungcoliso lomoya lusisisongelo nakwabo bakhwele kwinqwelo-mafutha. Kuthiwa, olu ngcoliso luninzi ngokuphindwe kathathu ngaphakathi kwinqwelo-mafutha kunangaphandle. Kubakho iingozi ezongezelelekileyo xa uphefumla umsi onebhenzina njengoko uzalisa itanki yenqwelo-mafutha yakho ngepetroli.
Ingxelo yeZizwe Ezimanyeneyo engemekobume yowe-1993-94 ithi, ngoku eyona ndlela ixhaphakileyo yongcoliso lomoya ehlabathini lonke “Kukusasazwa Kwezinto Ezincinane.” Kubonakala ukuba, amasuntswana omle, okanye izinto ezincinane, ziyakwazi ukungena nzulu emiphungeni zize apho zikhuphe imichiza eyingozi.
Ukuphelelwa kweozone esesibhakabhakeni kungundaba-mlonyeni. Noko ke, kumgangatho osezantsi, ilanga lichaphazela iinitrogen oxide nezinye izinto ezitsha msinya ezibangela ungcoliso lomoya ukuze zivelise umlinganiselo ophakamileyo weozone. Le milinganiselo iye yaphindaphindeka eBritani ebudeni bale nkulungwane. Ezi gesi zonakalisa ipeyinti nezinye izinto zokwakha, zibangela izifo kwimithi, kwizityalo nezilimo, yaye zibonakala zibangela iingxaki zokuphefumla kwabanye abantu. Nangona inkoliso yongcoliso lweozone ibakho ezidolophini, kuyamangalisa ukuba yimimandla yasemaphandleni echaphazeleka gqitha. Kwimimandla yasezidolophini, iinitrogen oxide zifunxa iozone eseleyo, kodwa xa ezi oxide zimbalwa, iozone inokuthi ngokulula nje ibangele umonakalo.
Ukongezelela, iThe Times inikela ingxelo yokuba ungcoliso lomoya “luninzi kangangama-70 ngaphakathi ezindlwini kunangaphandle.” Ivumba lezinto ezihlaziya umoya, letyhefu yamanundu, kwanelempahla ehlanjwe edry cleaner liyawungcolisa umoya. Ngokufanayo umsi womdiza wongezelela kwiingozi ezingokwempilo ngaphakathi ezindlwini.
Ngoko ke, yintoni onokuyenza ukuze ukhusele intsapho yakho? IThe Times yaseLondon yanikela la macebiso alandelayo.
• Musa ukuyisebenzisa gqitha inqwelo-mafutha. Ukuba kunokwenzeka, sebenzisa isithuthi esisetyenziswa ngabanye. Qhuba kakuhle. Ukuba ubambezeleke phakathi kwezithuthi ezininzi okanye kufuneka umise inqwelo-mafutha kangangemizuzu eliqela, yicime. Ukuba kunokwenzeka, ngeentsuku ezishushu misa inqwelo-mafutha yakho emthunzini ukuze kunciphe ungcoliso olubangelwa ngumphunga wepetroli.
• Khetha ukwenza umthambo kwangentseni xa umlinganiselo weozone ngaphandle ngokuqhelekileyo uphantsi.
• Musa ukukuvumela ukutshaya endlwini.
• Gcina iifestile zegumbi lokulala zivulwe kancinane ebusuku ukuze uthobe ukufuma nokuze ukhuphele ngaphandle izinto ezalana nempilo yakho.
Ngokungathandabuzekiyo uyalivuma elokuba: Akwaba besinokufumana umoya omtsha!